“སྣ་མང”དང“བློ་རྩེ་གཅིག་སྒྲིམ”ནི་རྒྱལ་ཡོངས་སྲིད་གྲོས་ཀྱི་ཨུ་ཡོན་དང་གཙང་གསུམ་ཆུ་འགོའི་རྒྱལ་ཁབ་སྤྱི་གླིང་དོ་དམ་ཅུས་ཀྱི་དབུ་བཞུགས་རིགས་གཅིག་མཁས་ཅན་ལེན་ཡུས་མིང་གིས་ལོ་འདི་དག་རིང་འགན་འཁྲི་བསྒྲུབས་པའི་མཚོན་ཚུལ་ཞིག་རེད།

སྣ་མང་ནི་བྱ་སྤྱོད་དང་། བློ་རྩེ་གཅིག་སྒྲིམ་ནི་ཁ་ཕྱོགས་རེད། ལེན་ཡུས་མིང་གི་འགན་འཁྲི་སྒྲུབ་སྟངས་ནི་སྣ་མང་ཡིན་ཞིང་། རྒྱལ་ཡོངས་ཚོགས་འདུ་གཉིས་ཀྱི“ཨུ་ཡོན་བགྲོད་ལམ”དུ་གཙང་གསུམ་ཆུ་འགོའི་གཏམ་རྒྱུད་བརྗོད་པ་ནས་ཨུ་ཡོན་གྱིས་འགན་འཁྲི་སྒྲུབ་པའི་དམངས་ལ་ཞབས་འདེགས་ཞུ་བའི”བྱེད་སྒོའི་ནང་བསམ་འཆར་ནན་ཏན་གསན་པའི་བར་དང་། ས་མཐོའི་འཐབ་ས་དང་པོར་ཆེད་དོན་བརྟག་ཞིབ་གནང་བ་ནས་ཅོག་ཙེའི་སྟེང་དུ་ཡིག་འབྲུ་རེ་རེ་བཞིན་ལ་བསམ་གཞིག་ཞིབ་ཕྲ་གནང་ནས་གྲོས་གཞི་འདོན་པའི་བར། འགན་འཁྲི་སྒྲུབ་མཚམས་འཇོག་མྱོང་མེད།

ཁོང་གིས་ཐོག་མཐའ་བར་གསུམ་དུ་གཙང་གསུམ་ཆུ་འགོའི་ཁུལ་གྱི་སྲུང་སྐྱོང་དང་འཕེལ་རྒྱས་ལ་དོ་ཁུར་གནང་གི་ཡོད།

སྐབས་གཉིས་བསྟུད་མར་འགན་བཞེས་པའི“ཨུ་ཡོན་རྒན་གྲས”ཤིག་གི་ངོས་ནས་ལེན་ཡུས་མིང་གིས་རང་འཁྲིའི་ལས་དོན་དང་ཨུ་ཡོན་གྱི་འགན་འཁྲི་ཟུང་འབྲེལ་ལ་མཐོང་ཆེན་གནང་སྟེ། ཞིབ་འཇུག་གྲུབ་འབྲས་གྲོས་གཞིར་བསྒྱུར་ཡོད། 2023ལོའི་ཟླ་7པ་ནས་བཟུང་། ཁོང་གིས་གཙང་གསུམ་ཆུ་འགོའི་ཁུལ་གྱི་ས་གནས་ས་ཐོག་ཏུ་ས་ཚིགས་400ལྷག་ཙམ་ལ་བརྟག་ཞིབ་གནང་བ་དང་། ལམ་ཐག་སྤྱི་ལེ་ཁྲི་4ཙམ་བསྐྱོད་མྱོང་ཡོད། ལེན་ཡུས་མིང་གིས“གཞི་རིམ་གྱི་འཐབ་ས་དང་པོར་བསྐྱོད་ན་གྲོས་འགོར་དེ་བས་ནུས་པ་ལྡན་པ་དང་། མང་ཚོགས་ཀྱི་བསམ་འདུན་ཡག་པོ་ཉན་ན་འགན་འཁྲི་སྒྲུབ་པར་དེ་བས་སྟོབས་ཤུགས་ཡོད”ཅེས་གསུངས་པ་རེད།

བརྟག་ཞིབ་ཏན་ཏིག་བྱས་པར་གཞིགས་ནས། 2025ལོའི་རྒྱལ་ཡོངས་ཚོགས་འདུ་གཉིས་རིང་། ལེན་ཡུས་མིང་གིས་གཙང་གསུམ་ཆུ་འགོའི་རྒྱལ་ཁབ་སྤྱི་གླིང་དེ་ཉིད་རྒྱལ་ཁབ་ཀྱི་ཚབ་མཚོན་རང་བཞིན་དང་འཛམ་གླིང་ལ་ཤུགས་རྐྱེན་ལྡན་པའི་རང་བྱུང་སྲུང་སྐྱོང་ཁུལ་གྱི་དཔེ་མཚོན་ཞིག་ཏུ་གཏོད་པར་རྒྱབ་སྐྱོར་བྱེད་པའི་སྐོར་གྱི་གྲོས་གཞི་ཕུལ་ནས། སྤྱི་ཡོངས་རང་བཞིན་དང་བརྒྱུད་རིམ་རང་བཞིན་གྱི་སྲུང་སྐྱོང་བྱེད་ཤུགས་ཆེ་རུ་བཏང་སྟེ། མི་དང་རང་བྱུང་ཁམས་ཞི་མཐུན་མཉམ་གནས་ཡོང་བར་སྐུལ་འདེད་ཏན་ཏིག་གཏོང་དགོས་པའི་གྲོས་འགོ་བཏོན་གནང་བ་རེད།

གྲོས་གཞི་འདིར་རྒྱལ་ཁབ་ནགས་ལས་དང་རྩྭ་ཐང་ཅུས་ཀྱི་ཡིག་ལན་འབྱོར་ཞིང་། ལེན་ཡུས་མིང་གིས“སྤུས་ཚད་མཐོ་བའི་གྲོས་གཞི་འདོན་རྒྱུ་ནི་སྲིད་གྲོས་ཨུ་ཡོན་ལ་ལྡན་དགོས་པའི་གཞི་རྩའི་ནུས་པ་ཡིན་པ་དང་། བརྟག་ཞིབ་བྱེད་པ་ནི་གྲོས་གཞི་ཡག་པོ་འདོན་པའི་འབྱུང་རྩ་ཡིན། བརྟག་ཞིབ་བྱེད་རིང་སྤྱི་ཡོངས་ལ་ཞབས་འདེགས་ཞུས་ནས་དོན་ཆེན་གསལ་པོ་རྟོགས་དགོས་ལ། དམངས་འཚོར་དོ་ཁུར་བྱས་ནས་གནས་ཚུལ་དངོས་ལ་ལྟ་ཞིབ་ཀྱང་བྱེད་དགོས”ཞེས་གསུངས་པ་རེད།