རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན། ཡན་ཅིན་ཧའེ།

འཐུས་མི་རྣམ་པ།

རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་བཀའ་མངགས་ལྟར། ངས་ཚོགས་ཆེན་ལ་ལས་དོན་སྙན་སྒྲོན་ཞུ་རྒྱུ་ཡིན་པས་གྲོས་ཞིབ་གནང་རོགས་ཞུ།

འདས་ཟིན་པའི་ལོ་གཅིག་རིང་གི་ལས་དོན་གཙོ་བོ།

2025ལོ་ནི་བོད་ལྗོངས་གོང་འཕེལ་གྱི་ལོ་རྒྱུས་ཐོག་ལམ་ཚད་རྡོ་རིང་ལྟ་བུའི་དོན་སྙིང་ལྡན་པའི་ལོ་ཞིག་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མ་བོད་དུ་ཕེབས་ནས་གཟིགས་ཞིབ་གནང་བ་དང་། སྐུ་ངོ་མས་འཕྲིན་ལན་གལ་ཆེན་སྤྲིངས་པ། སྐུ་ངོ་མས་མཛུབ་སྟོན་གལ་ཆེན་གནང་བ་བཅས་ལས་ལྗོངས་ཡོངས་སུ་སྔར་ལས་ལྷག་པའི་སྒོ་ནས་མི་རིགས་ཀྱི་སྙིང་སྟོབས་ཆེར་སྐྱེད་དང་། རྒྱལ་གཅེས་ཀྱི་སྤྲོ་སེམས་རབ་འཕེལ། འབད་འཐབ་ཀྱི་སྟོབས་ཤུགས་གཅིག་སྒྲིལ་བཅས་བྱུང་ཡོད། རང་སྐྱོང་ལྗོངས་ཏང་ཨུད་ཀྱིས་ལྗོངས་ཡོངས་ཀྱི་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ། “གཏན་འཁེལ་གཉིས”ལ་སྲུང་སྐྱོང་མཐའ་གཅིག་ཏུ་ཞུ་བ་དང་། “སྲུང་སྐྱོང་གཉིས”མཐའ་གཅིག་ཏུ་ཐུབ་པར་བྱས་ཐོག རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བའི་རྟེན་འབྲེལ་ཆེ་མོའི་མཛད་སྒོ་དང་དིང་རིའི་ས་ཡོམ་གྱི་གེགས་རྗེས་སླར་གསོ་བསྐྱར་སྐྲུན་གྱི“དོན་ཆེན་གཉིས”སྤུས་ཕྱོད་གཉིས་ལྡན་གྱིས་ལེགས་སྒྲུབ་བྱས་པར་མ་ཟད། “ལོ་ལྔ་ཚན་བཅུ་བཞི་པ”ཐུགས་གྲ་ལེགས་འགྲིག་གིས་མཇུག་བསྡུས་པ་དང་། ཚན་རིག་དང་མཐུན་པའི་སྒོ་ནས“ལོ་ལྔ་ཚན་བཅོ་ལྔ་པ”འཆར་འགོད་བྱས་པར་བརྟེན། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་ལ་སྐུལ་འདེད་གཏོང་བའི་ཐད་གོམ་སྟབས་བརྟན་ཞིང་གསར་པ་ཞིག་སྤོས་ཡོད། ལོ་གཅིག་རིང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་ཐོག་མཐའ་བར་གསུམ་དུ་ཏང་ཀྲུང་དབྱང་གི་གལ་ཆེའི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱའི་རྗེས་སུ་དམ་པོར་འབྲངས་ཤིང་། མཐའ་སྐྱོང་བོད་བརྟན་གྱི་དགོས་མཁོ་དངོས་ལ་དམ་པོར་དམིགས་པ་དང་། མི་དམངས་མང་ཚོགས་ཀྱི་འབོད་སྒྲ་དང་རེ་སྒུག་ལ་དམ་པོར་དམིགས་པར་མ་ཟད། “དོན་ཆེན་བཞིར”དམིགས་པ་དང་“འཛུགས་གཏོད་བཞིར”ཤུགས་བརྒྱབ་ནས་ཁྲིམས་ལྟར་འགན་འཁྲི་གཙང་སྒྲུབ་དང་ཐེག་པ་ཁུར་ལེན་བྱས་ཏེ། ལས་དོན་ཁག་གཞུང་འཁྱོངས་གསར་འབྱེད་བྱེད་པའི་ཁྲོད་དུ་སྤུས་ཕྱོད་གཉིས་ལྡན་ཡོང་བ་དང་། སྤྱི་ཡོངས་ལ་ཞབས་འདེགས་ཞུ་བའི་ཁྲོད་དུ་བྱས་རྗེས་མངོན་པར་བྱས་ནས་བརྒྱུད་རིམ་ཧྲིལ་པོའི་མི་དམངས་དམངས་གཙོའི་བོད་ཀྱི་ལག་ལེན་ལ་ཟམ་མི་ཆད་པར་གྲུབ་འབྲས་གསར་པ་ཐོབ་པ་དང་གོང་འཕེལ་གསར་པ་ཡོང་བར་སྐུལ་འདེད་བཏང་ཡོད།

གཅིག བློ་སྒྲིལ་སེམས་སྐྱེད་བྱ་རྒྱུ་མངོན་ཆེར་བཟུང་བས་ཆབ་སྲིད་ཀྱི་ཚུགས་གནས་ལ་མཐོར་འདེགས་གསར་པ་བྱུང་བ།

རྒྱུན་ལས་ཨུ་ལྷན་གྱིས་གསར་གཏོད་རིགས་པའི་གཞུང་ལུགས་ཀྱིས་བསམ་བློར་དྲག་ཆས་སྤྲོས་པ་དང་། ལྷག་བསམ་རྣམ་དག་མཐའ་གཅིག་ཏུ་བྱས་པར་བརྟེན་ནས་བྱ་གཞག་སྒྲུབ་པ། ལྟེ་བ་དང་སྤྱི་ཡོངས་ལ་དམིགས་ནས་ཐེག་པ་ཁུར་ལེན་བྱེད་པ་བཅས་ཀྱི་ཐོག་ནས“ཀྲུང་དབྱང་ནས་བཀོད་སྒྲིག་གནང་བ་དང་། ཏང་ཨུད་ཀྱིས་བཀོད་སྒྲིག་བྱེད་པ། མི་དམངས་འཐུས་ཚོགས་ཀྱིས་ལག་བསྟར་གནད་སྨིན་ཐུབ་པ”བཅས་བྱས་ཡོད།

གཅིག་ནས་རིགས་པའི་གཞུང་ལུགས་ཀྱིས་དྲག་ཆས་སྤྲོས་རྒྱུར་ཤུགས་སྣོན་རྒྱག་པའི་ཁྲོད་བློ་སེམས་གཅིག་མཐུན་བྱས་པ། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་རིམ་བྱུང་གི་དགོངས་དོན་ཕྱོགས་ཡོངས་ནས་ལག་བསྟར་བྱས་ཐོག “གྲོས་དོན་དང་པོའི”ལམ་ལུགས་དོན་འཁྱོལ་ནན་པོ་བྱས་ཏེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དང་། དུས་རབས་གསར་པའི་བོད་སྐྱོང་མཛད་ཇུས་བཅས་ཟམ་མི་ཆད་པར་སློབ་སྦྱོང་གཏིང་ཟབ་བྱས་པ་དང་དུས་ཐོག་ཏུ་སློབ་སྦྱོང་རྗེས་ཟིན་པར་བྱས་ཡོད། རིགས་པའི་གཞུང་ལུགས་དང་དོན་དངོས་ཟུང་འབྲེལ་བྱ་རྒྱུ་མཐའ་འཁྱོངས་བྱས་ཏེ། མི་དམངས་འཐུས་མི་ཚོགས་ཆེན་གྱི་ལམ་ལུགས་མཐའ་འཁྱོངས་དང་འཐུས་སྒོ་ཚང་དུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་གཙོ་གནད་དང་བརྒྱུད་རིམ་ལྡན་པའི་སྒོ་ནས་སློབ་སྦྱོང་བྱས་ནས་ཏང་གི་གསར་གཏོད་རིགས་པའི་གཞུང་ལུགས་དེ་ཉིད་མི་དམངས་འཐུས་ཚོགས་ཀྱི་ལས་དོན་ལ་སྐུལ་འདེད་གཏོང་བའི་ལག་ལེན་གྱི་སྟོབས་ཤུགས་ལ་བསྒྱུར་ཡོད། ལོ་ཧྲིལ་པོར་རྒྱུན་ལས་ཨུ་ལྷན་གྱི་ཚོགས་འདུ་ཐེངས་7དང་། རྒྱུན་ལས་ཨུ་ལྷན་ཏང་ཙུའི་ཚོགས་འདུ་ཐེངས་14 རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གི་སློབ་སྦྱོང་ཚོགས་འདུ་ཐེངས་10བཅས་སྐོང་ཚོགས་བྱས་ཏེ། ཏང་ཙུའུ་ཡིས་སྣེ་ཁྲིད་དེ་སློབ་སྦྱོང་བྱེད་པ་དང་། གཅིག་བསྡུས་ཐོག་ཞིབ་འཇུག་སློབ་སྦྱོང་བྱེད་པ། ཕན་ཚུན་སྤེལ་རེས་ངང་སློབ་སྦྱོང་བྱེད་པ་བཅས་ལ་གཞི་གཅིག་ཏུ་སྐུལ་འདེད་བཏང་ཡོད། “བོད་ལྗོངས་མི་དམངས་འཐུས་ཚོགས་ཀྱི་འཆད་སྟེགས”དུས་ཐེངས་4དང་ཆེད་དོན་དཔེ་ཀློག་འཛིན་གྲྭ་དུས་ཐེངས་3གཉེར་ཡོད།

གཉིས་ནས་ཏང་གི་འགོ་ཁྲིད་མཐའ་འཁྱོངས་བྱེད་པའི་ཁྲོད་ཁ་ཕྱོགས་གཏན་འཁེལ་བྱས་པ། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་དང་སྐབས་བཅུ་པའི་ཚང་འཛོམས་གྲོས་ཚོགས་ཐེངས་རིམ་བྱུང་གི་དགོངས་དོན་ལག་བསྟར་གཏིང་ཟབ་བྱས་ཐོག དུས་རབས་གསར་པའི་མི་དམངས་འཐུས་ཚོགས་ལས་དོན་སྤུས་ཚད་མཐོ་བའི་གོང་འཕེལ་གཏོང་རྒྱུའི་ཁྲིད་ཕྱོགས་གསལ་པོ་བརྟན་འཁྱོངས་བྱས་ཏེ། གནད་དོན་གལ་ཆེན་དང་། དོན་གནད་གལ་ཆེན། གཙོ་གནད་ལས་དོན་བཅས་དུས་ཐོག་ཏུ་རང་སྐྱོང་ལྗོངས་ཏང་ཨུད་ལ་བྱ་བ་མ་བསྒྲུབས་གོང་གི་དགོངས་སྐོར་དང་བྱ་བ་བསྒྲུབས་རྗེས་ཀྱི་སྙན་སེང་ཞུས་ཤིང་། ལོ་ཧྲིལ་པོར་རང་སྐྱོང་ལྗོངས་ཏང་ཨུད་ལ་དགོངས་སྐོར་སྙན་སེང་ཐེངས་213ཞུས་པ་དང་། དོན་གནད་གལ་ཆེན་གྱི་གཏན་འབེབས་ཁག་1དང་གྲོས་ཆོད་ཁག་2བཟོས་ཡོད། ཏང་གིས་ལས་བྱེད་པར་དོ་དམ་བྱེད་པའི་རྩ་དོན་མཐའ་འཁྱོངས་བྱས་ཏེ། ཁྲིམས་བཀོད་ལས་རིམ་ལྟར་རྒྱལ་ཁབ་ལས་ཁུངས་ཀྱི་ལས་དོན་མི་སྣ་མི་ཐེངས་107བསྐོ་འཐེན་བྱས་པ་དང་། ཁག་3དང་མི་ཐེངས་12སྒྲིག་འཛུགས་ཀྱིས་རྩ་ཁྲིམས་ལ་དམ་བཅའ་བཞག་ནས་ཏང་གི་འགོ་ཁྲིད་དེ་མི་དམངས་འཐུས་ཚོགས་ལས་དོན་གྱི་ཕྱོགས་མཐའ་ཀུན་ལ་ཁྱབ་པར་བྱས་ཡོད།

གསུམ་ནས་ལྟེ་བ་དང་སྤྱི་ཡོངས་ལ་ཞབས་འདེགས་ཞུ་བའི་ཁྲོད་ངེས་གནས་གཏན་འཁེལ་བྱས་པ། མི་དམངས་འཐུས་ཚོགས་ཀྱི་ལས་དོན་དང་ལྟེ་བའི་ལས་དོན་གཞི་གཅིག་དང་ཕྱོགས་གཅིག་ཏུ་བསྒྲུབ་རྒྱུ་མཐའ་འཁྱོངས་བྱས་ཏེ། བརྟན་ཐོག་ཡར་འཕེལ་གྱི་སྒོ་ནས་དུས་རབས་གསར་པའི་ས་གནས་མི་དམངས་འཐུས་ཚོགས་ཀྱི་ལས་དོན་སྤུས་ཚད་མཐོ་པོས་གོང་འཕེལ་འགྲོ་བར་སྐུལ་འདེད་བཏང་ནས་སྤྱི་ཚོགས་ཀྱི་བརྟན་ལྷིང་སྲུང་སྐྱོང་བྱེད་པ་དང་། མི་རིགས་མཐུན་སྒྲིལ་སྲ་བརྟན་དུ་གཏོང་བ། “ཐོན་ལས་ཆེན་པོ་དགུ”གོང་འཕེལ་གཏོང་བ། ཕྱོགས་ཡོངས་ནས་གྲོང་གསེབ་དར་རྒྱས་གཏོང་བ། སྐྱེ་ཁམས་ཁོར་ཡུག་སྲུང་སྐྱོང་བྱེད་པ། གཞི་རིམ་གྱི་སྤྱི་ཚོགས་བཅོས་སྐྱོང་བྱེད་པ། མཐའ་བརྟན་མཐའ་དར་གཏོང་བ་སོགས་ཀྱི་ཐད་འགན་འཁྲི་གཙང་སྒྲུབ་ཀྱི་རྒྱུགས་ལན་ཕུལ་ཡོད། རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བའི་མཚམས་ཚིགས་གལ་ཆེན་ལ་དམ་པོར་དམིགས་ཏེ། བོད་ལྗོངས་མི་དམངས་འཐུས་ཚོགས་ཀྱི་ལོ་རྒྱུས་འགྲེམས་སྟོན་ཁང་བསྐྲུན་པ་དང་། བོད་ལྗོངས་མི་དམངས་འཐུས་ཚོགས་ཀྱི་ལོ་ངོ་60རིང་གི་ཆེད་དོན་པར་གཞི་པར་ལེན་བྱས་ཏེ། དམངས་གཙོའི་ཁྲིམས་སྐྱོང་གི་གཏམ་རྒྱུད་ཡག་པོར་བཤད་པ་དང་ལམ་ལུགས་ཀྱི་གདེང་ཚོད་ཆེ་རུ་བཏང་ཡོད། རྒྱུན་ལས་ཨུ་ལྷན་ཏང་ཙུའི་ཁོངས་མིས་དིང་རིའི་ས་ཡོམ་གྱི་གེགས་རྗེས་སླར་གསོ་བསྐྱར་སྐྲུན་དང་། རྣམ་གྲངས་གལ་ཆེན་གྱི་འགན་གཙང་ལེན། ཀྲུང་དབྱང་གི་སྐོར་གཟིགས་བཅོས་སྒྲིག ཞིང་ལས་ལ་རོགས་འདེགས་དང་དར་རྒྱས་གཏོང་རྒྱུའི་འགན་གཙང་ལེན་སོགས་ཀྱི་ཆེད་དམིགས་ལས་དོན་གྱི་འགན་འཁྲི་གཙང་སྒྲུབ་བྱས་ཡོད། མི་དམངས་འཐུས་ཚོགས་ཀྱི་འཐུས་མི་སྒྲིག་འཛུགས་བྱས་ནས་ཁམ་བུ་ཁྲེ་དང་ཧིན་རྡུ་ཉི་ཞི་ཡར་འཚམས་འདྲིར་བསྐྱོད་པ་དང་། ཝེ་ཐེ་ནམ་རྒྱལ་ཚོགས་ཀྱི་འཐུས་མི་ཚོགས་པར་སྣེ་ལེན་ཞུས་ནས་བོད་ལྗོངས་འདི་ཉིད་འཛམ་གླིང་གི་ཕྱོགས་སུ་གང་མགྱོགས་སྐྱོད་པ་དང་འཛམ་གླིང་གིས་དེ་བས་ལེགས་པའི་སྒོ་ནས་བོད་ལྗོངས་རྒྱུས་ལོན་ཐུབ་པར་བྱས་ཡོད།

ལག་ལེན་དངོས་ལས་ར་འཕྲོད་གསལ་པོ་བྱུང་བ་ནི་ཏང་གི་འགོ་ཁྲིད་མཐའ་འཁྱོངས་ཇི་ཙམ་ཡག་པོ་བྱུང་ན། མི་དམངས་འཐུས་ཚོགས་དང་དེའི་རྒྱུན་ལས་ཨུ་ལྷན་གྱི་འགན་ནུས་འདོན་སྤེལ་དེ་ཙམ་གང་ལེགས་ཐུབ་པར་མ་ཟད། མི་དམངས་འཐུས་མི་ཚོགས་ཆེན་ལམ་ལུགས་ཀྱི་ཁྱད་འཕགས་རང་བཞིན་དེ་བས་ཀྱང་མངོན་ཐུབ།

གཉིས། དངོས་སྒྲུབ་གོ་ཆོད་ཡོང་རྒྱུ་མངོན་ཆེར་བཟུང་བས་ཁྲིམས་འཛུགས་ལས་དོན་ལ་གོམ་སྟབས་གསར་པ་སྤོས་པ།

རྒྱུན་ལས་ཨུ་ལྷན་གྱིས་ཁྲིམས་འཛུགས་ཀྱི་སྤུས་ཚད་མཐོ་རུ་གཏོང་རྒྱུའི་གནད་འགག་འདི་དམ་པོར་བཟུང་སྟེ། ཚན་རིག་དང་མཐུན་པའི་ཁྲིམས་འཛུགས་དང་། དམངས་གཙོའི་ཁྲིམས་འཛུགས། ཁྲིམས་བཞིན་ཁྲིམས་འཛུགས་བཅས་བྱ་རྒྱུར་སྐུལ་འདེད་གཏིང་ཟབ་བཏང་ནས་ཁྲིམས་འཛུགས་ཀྱི་མ་ལག་རང་བཞིན་དང་། སྤྱི་ཡོངས་རང་བཞིན། མཐུན་སྦྱོར་རང་བཞིན། གོ་ཆོད་རང་བཞིན་བཅས་རྒྱུན་ཆད་མེད་པར་ཆེ་རུ་བཏང་ཡོད།

གཅིག་ནས་ཁྲིམས་སྲོལ་མ་ལག་འཐུས་ཚང་དུ་གཏོང་རྒྱུ་མཐའ་འཁྱོངས་བྱས་པ། གཙོ་གནད་ཁྱབ་ཁོངས་དང་འགག་རྩའི་ལྷུ་ཚིགས་ལ་དམ་པོར་དམིགས་ཏེ། ཁྲིམས་སྲོལ་ལམ་ལུགས་མཁོ་འདོན་བྱེད་ཤུགས་ཆེ་རུ་བཏང་ནས་ཁྲིམས་སྲོལ་ཁག་ཐེངས་28ལ་གྲོས་ཞིབ་བྱས་པ་དང་ཁག་23ལ་གྲོས་འཆམ་བྱུང་ཡོད། ཆུས་བཙུགས་གྲོང་ཁྱེར་གྱི་ཁྲིམས་འཛུགས་ལས་དོན་ལ་མཛུབ་ཁྲིད་བྱེད་ཤུགས་ཆེ་རུ་བཏང་ནས་ཆུས་བཙུགས་གྲོང་ཁྱེར་གྱི་ཁྲིམས་སྲོལ་ཁག་23ལ་ཞིབ་བཤེར་བྱས་ནས་ཆོག་མཆན་སྤྲད་ཡོད། མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ཀྱི་ལག་བསྟར་བྱ་ཐབས་སྔོན་ཚུད་ནས་བཟོས་ཏེ། ཁྲིམས་སྐྱོང་གི་སྟོབས་ཤུགས་ལ་བརྟེན་ནས་རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་སྔར་བས་བརྟན་པོར་བཙུགས་ཡོད། རྒྱལ་ཁབ་ཀྱི་མཐའ་བརྟན་དང་། མཐའ་དར། དམངས་ཕྱུག་བཅས་ཀྱི་བྱ་སྤྱོད་དཔེ་སྟོན་ཁུལ་འཛུགས་གཏོད་ཀྱི་སྲོལ་ཡིག་སྣེ་ཁྲིད་དེ་འཆར་ཟིན་འགོད་པའི་ཁར་གྲོས་ཞིབ་བྱས་ནས་གྲོས་འཆམ་བྱུང་བར་བརྟེན། རང་སྐྱོང་ལྗོངས་ཏང་ཨུད་སྐབས་བཅུ་པའི་མཐའ་མཚམས་སྟོབས་ཆེར་གཏོང་ཁོངས་ཀྱི་གྲུབ་འབྲས་ཐོབ་པའི་ཉམས་མྱོང་དང་ཕན་ཡོད་བྱེད་ཐབས་དེ་དག་ཁྲིམས་འཛུགས་རྣམ་པའི་ཐོག་ནས་གཏན་འཇགས་ཐུབ་པར་མ་ཟད། ཁྲིམས་སྐྱོང་གི་བྱེད་ཐབས་ལ་བརྟེན་ནས་མཐའ་མཚམས་ས་ཁུལ་དེང་རབས་ཅན་དུ་འགྱུར་བར་སྐུལ་འདེད་བཏང་ཡོད། ཐེངས་འདིའི་ཚོགས་ཆེན་ལ་གྲོས་ཞིབ་གནང་རྒྱུར་ཕུལ་བའི་ཆོས་ལུགས་ལས་དོན་སྲོལ་ཡིག་གི་འཆར་ཟིན་དེ་ནི་རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་བླང་བྱ་གཞིར་བཟུང་། དུས་བབ་གསར་པ་དང་། ལས་འགན་གསར་པ། བླང་བྱ་གསར་པ་བཅས་དང་འཚམ་པའི་སྒོ་ནས་རང་རྒྱལ་གྱི་ཆོས་ལུགས་ཀྲུང་གོ་ཅན་དུ་འགྱུར་བར་བརྒྱུད་རིམ་ལྡན་པའི་སྒོ་ནས་སྐུལ་འདེད་གཏོང་བ་དང་། ཆོས་ལུགས་ལས་དོན་གྱི་བཅོས་སྐྱོང་དེ་ཁྲིམས་སྐྱོང་ཅན་དུ་འགྱུར་བར་ཤུགས་སྣོན་རྒྱག་པ། བོད་བརྒྱུད་ནང་བསྟན་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་བྱེད་པ་བཅས་ཀྱི་བྱ་ཐབས་གལ་ཆེན་ཞིག་རེད་ལ། མི་དམངས་འཐུས་ཚོགས་ཀྱིས་རང་འགུལ་ངང་ཁྲིམས་སྐྱོང་འཐབ་རྩོད་ཀྱི་འཐབ་ས་དང་པོར་སྤེལ་བའི་བྱ་སྤྱོད་དངོས་ཤིག་ཀྱང་རེད། ལྷན་རྒྱས་ནས་གྲོས་ཞིབ་ནན་ཏན་གནང་སྟེ་ཐུན་མོང་ཐོག་ཁྲིམས་སྲོལ་འདི་ཡག་པོ་བཟོ་རོགས་ཞུ།

གཉིས་ནས་ཁྲིམས་འཛུགས་ལམ་སྲོལ་ཚགས་ཚུད་དུ་གཏོང་རྒྱུ་མཐའ་འཁྱོངས་བྱས་པ། ཁྲིམས་འཛུགས་ལས་དོན་གྱི་ཆེད་དོན་ཚོགས་འདུའི་ལམ་ལུགས་འཚོལ་ཞིབ་དང་ལག་བསྟར་བྱས་ཏེ། ཁྲིམས་འཛུགས་ལས་ཀའི་ལམ་ལུགས་ཁག་12གཙང་བཤེར་དང་འཐུས་སྒོ་ཚང་དུ་བཏང་བ་དང་། ཁྲིམས་འཛུགས་རྣམ་གྲངས་མཛོད་ཀྱི་སྐབས་བསྟུན་དོ་དམ་བྱེད་ལམ་གསར་འཛུགས་དང་འཐུས་སྒོ་ཚང་དུ་བཏང་ནས་ཁྲིམས་འཛུགས་རྣམ་གྲངས་ཁག་23ལ་རིགས་དབྱེའི་དོ་དམ་དང་རིམ་བཞིན་སྐུལ་འདེད་བཏང་ཡོད། དུས་རབས་གསར་པའི་ཁྲིམས་འཛུགས་ལས་དོན་སྤུས་ཚད་མཐོ་བའི་གོང་འཕེལ་འགྲོ་བར་སྐུལ་འདེད་གཏོང་རྒྱུའི་སྐོར་གྱི་བསམ་འཆར་བཟོ་འབེབས་དང་དོན་འཁྱོལ་བྱས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་རྒྱུ་དང་། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་རྒྱུ་དེ་ས་གནས་རང་བཞིན་གྱི་ཁྲིམས་སྲོལ་ལ་གྲོས་ཞིབ་དང་ཞིབ་བཤེར་བྱེད་པ་དང་། ཚད་ལྡན་རང་བཞིན་གྱི་ཡིག་ཆ་སྙན་དཔོད་ཞིབ་བཤེར་བྱེད་པའི་སྔོན་འགྲོའི་ཆ་རྐྱེན་གལ་ཆེན་ཞིག་ཏུ་བརྩི་རྒྱུ་ཐེངས་དང་པོར་གཏན་འབེབས་ཁ་གསལ་བྱས་ཡོད། སྒོ་དབྱེའི་ཁྲིམས་འཛུགས་དང་དམངས་གཙོའི་ཁྲིམས་འཛུགས་ཀྱི་ལས་ཀའི་ལམ་སྲོལ་ཚགས་ཚུད་དུ་བཏང་སྟེ། གཞི་རིམ་གྱི་ཁྲིམས་འཛུགས་འབྲེལ་གཏུག་བྱེད་གནས་དང་རིགས་གཅིག་མཁས་པའི་གྲོས་འདྲིའི་མཛོད་འཛུགས་སྐྱོང་དང་བེད་སྤྱོད་ཡག་པོ་བྱས་ཐོག ཁྲིམས་སྲོལ་འཆར་ཟིན་བཟོ་འབེབས་དང་བཟོ་བཅོས་རྒྱག་རྒྱུའི་སྐོར་ལ་དམིགས་ནས་ཕྱོགས་སོ་སོས་བཏོན་པའི་བསམ་འཆར་དང་གྲོས་འཆར་ཁག་2328ཞིབ་འཇུག་ནན་ཏན་དང་དང་ལེན་གང་ལེགས་བྱས་པར་བརྟེན། མི་དམངས་འཐུས་ཚོགས་ལས་དོན་གྱི་རྩ་བ་དེ་མི་དམངས་མང་ཚོགས་ཀྱི་ཁྲོད་དུ་ཟུག་ཐུབ་པ་བྱུང་ཡོད། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་ཁྲིམས་ལུགས་ལས་དོན་ཨུ་ལྷན་གྱིས་བོད་ཀྱི་ཁྲིམས་འཛུགས་ལག་ལེན་ཆེད་དམིགས་ཀྱིས་ཁྱབ་གདལ་དང་འོས་སྦྱོར་བྱས་ཡོད།

གསུམ་ནས་ཁྲིམས་ལུགས་ཀྱི་གཅིག་གྱུར་སྲུང་སྐྱོང་བྱ་རྒྱུ་མཐའ་འཁྱོངས་བྱས་པ། ལྗོངས་ཡོངས་ཀྱི་མི་དམངས་འཐུས་ཚོགས་སྙན་དཔོད་ཞིབ་བཤེར་ལས་དོན་གྱི་བཞུགས་མོལ་ཚོགས་འདུ་སྐོང་ཚོགས་བྱས་ཏེ། རང་སྐྱོང་ལྗོངས་ཀྱི་ཁྲིམས་སྲོལ་དང་སྒྲིག་སྲོལ་གྱི་ཚད་ལྡན་རང་བཞིན་གྱི་ཡིག་ཆའི་གཞི་གྲངས་མཛོད་འཐུས་སྒོ་ཚང་དུ་བཏང་བས་སྙན་དཔོད་ཞིབ་བཤེར་ཐད་ཆ་འཕྲིན་ཅན་དང་རིག་ནུས་ཅན་གྱི་དོ་དམ་མངོན་འགྱུར་ཐུབ་ཡོད། ཡིག་ཆ་ཡོད་ཕྱིན་ངེས་པར་དུ་སྙན་ཐོ་དཔོད་དགོས་པ་དང་། སྙན་ཐོ་དཔོད་ཕྱིན་ངེས་པར་དུ་ཞིབ་བཤེར་བྱེད་དགོས་པ། ནོར་འཁྲུལ་ཡོད་ཕྱིན་ངེས་པར་དུ་ཡོ་བསྲང་བྱེད་དགོས་པ་བཅས་མཐའ་འཁྱོངས་བྱས་ཏེ། སྙན་དཔོད་ཞུས་པའི་ཚད་ལྡན་རང་བཞིན་གྱི་ཡིག་ཆ་ཁག་38ལ་རང་འགུལ་ཐོག་ཞིབ་བཤེར་བྱས་ནས་ཡོ་བསྲང་བསམ་འཆར་ཁག་1དང་ལས་ཀའི་དྲན་སྐུལ་ཁག་1བཏོན་ཡོད། ཆེད་དམིགས་ཞིབ་བཤེར་དང་གཅིག་སྡུད་གཙང་བཤེར་སྤེལ་ཏེ། རིམ་རྩིས་ལྟར་ན་ཁྲིམས་སྲོལ་ཁག་ཐེངས་354གཙང་བཤེར་བྱས་པ་དང་སྦྲགས། ཁྲིམས་སྲོལ་ཁག་12སྡེབ་སྒྲིལ་བཟོ་བཅོས་བརྒྱབ་པ་དང་ཁྲིམས་སྲོལ་ཁག་2རྩིས་མེད་དུ་བཏང་ཡོད། ས་གནས་རང་བཞིན་གྱི་ཁྲིམས་སྲོལ་ཁག་128ལ་ཁྲིམས་འཛུགས་རྗེས་ཀྱི་ཚོད་སྐོར་བྱས་ཡོད།

བཅའ་ཁྲིམས་ནི་རྒྱལ་ཁབ་སྐྱོང་བའི་མཆོག་ནོར་དང་། བཅའ་ཁྲིམས་ཡག་པོ་ནི་སྐྱོང་མཁས་ཡོང་བའི་སྔོན་འགྲོ་ཡིན། ལོ་གཅིག་རིང་། ང་ཚོས་ཁྲིམས་འཛུགས་དེ་གོང་འཕེལ་གཏོང་ཕྱོགས་ཀྱི་རྗེས་སུ་འབྲངས་བ་དང་། དགོས་མཁོར་དམིགས་ནས་ཁྲིམས་ཚན་བཟོ་བཅོས་རྒྱག་རྒྱུ་མཐའ་འཁྱོངས་བྱས་ནས་ཁྲིམས་འཛུགས་ལས་དོན་དེ་ཉིད་མང་ཚོགས་དང་འབྲེལ་འདྲིས་སྔར་བས་དམ་ཚགས་དང་རིན་ཐང་སྔར་བས་ཆེ་བ་ལྡན་པར་བྱས་ཡོད།

གསུམ། དགོས་ངེས་ཀྱི་ཕན་འབྲས་མངོན་ཆེར་བཟུང་བས་ལྟ་སྐུལ་ལས་དོན་ལ་གོང་འཕེལ་གསར་པ་བྱུང་བ།

རྒྱུན་ལས་ཨུ་ལྷན་གྱིས་གསར་དུ་དག་བཅོས་བྱས་པའི་ལྟ་སྐུལ་བཅའ་ཁྲིམས་ལག་བསྟར་དོན་འཁྱོལ་མཐའ་གཅིག་ཏུ་བྱས་ཏེ། ལྟ་སྐུལ་ཡང་དག་དང་། ལྟ་སྐུལ་ནུས་ལྡན། ཁྲིམས་ལྟར་ལྟ་སྐུལ་བཅས་བྱས་ནས་མི་དམངས་འཐུས་ཚོགས་ཀྱི་ལྟ་སྐུལ་གྱི་དགོས་ངེས་ཕན་འབྲས་དེ་བོད་སྐྱོང་བོད་བརྟན་བོད་དར་བཅས་ཀྱི་བཅོས་སྐྱོང་ཕན་ནུས་ལ་བསྒྱུར་ཡོད།

གཅིག་ནས་ལྟ་སྐུལ་གྱི་གཙོ་གནད་ལ་དམ་འཛིན་བྱས་པ། ལྟེ་བའི་ལས་དོན་དང་ལྗོངས་ཡོངས་ཀྱི་སྤྱི་ཡོངས་ལ་དམ་པོར་དམིགས་ཏེ། “གཞུང་གཅིག་ཨུད་གཅིག་ཁང་གཉིས”ཀྱི་སྙན་སྒྲོན་ཁག་12ཉན་འཇོག་དང་གྲོས་ཞིབ་བྱས་པ་དང་། སྲིད་གཞུང་གི་བུ་ལོན་དོ་དམ་བྱས་ཚུལ་སྐོར་གྱི་སྙན་ཞུ་ཐེངས་དང་པོར་ཉན་འཇོག་དང་གྲོས་ཞིབ་བྱས་ཡོད། བཅའ་ཁྲིམས་དང་ཁྲིམས་སྲོལ་ཁག་7ལ་ཁྲིམས་སྒྱུར་ཞིབ་བཤེར་བྱས་ཏེ། གནད་དོན་ཁག་21ཤེས་རྟོགས་བྱུང་བ་དང་དག་ཐེར་ཡོ་བསྲང་བྱ་རྒྱུའི་བསམ་འཆར་ཁག་25བཏོན་ནས་ཁྲིམས་སྒྱུར་ཞིབ་བཤེར་གྱི་དོན་དངོས་རང་བཞིན་དང་དབང་གྲགས་རང་བཞིན་ཆེ་རུ་བཏང་ཡོད། ཐེངས་དང་པོར་སྲིད་འཛིན་ཁྲིམས་སྒྱུར་ལྟ་སྐུལ་ལས་དོན་ལ་ཆེད་དོན་འདྲི་རྩད་བྱས་པ་དང་སྦྲགས་མོས་མཐུན་བྱུང་ཚད་ཀྱི་དཔྱད་གདེང་ཡང་བྱས་ནས་འབྲེལ་ཡོད་སྡེ་ཁག་གིས་གནད་དོན་ལ་མི་གཡོལ་བ་དང་དག་ཐེར་ཡོ་བསྲང་ལ་དམ་འཛིན་བྱེད་པར་སྐུལ་འདེད་བཏང་ཡོད། “ལོ་ལྔ་ཚན་བཅོ་ལྔ་པའི”འཆར་འགོད་བཟོ་སྒྲིག་ལ་དམ་པོར་དམིགས་ཏེ། རྒྱལ་ཁབ་ཀྱི་དགོས་མཁོ་དང་བོད་ཀྱི་འཇོན་ནུས་ལ་གཞི་ཚུགས་ཏེ། ལོ་ཧྲིལ་པོར་ལྗོངས་ཡོངས་ཀྱི“མི་འབོར་དང་། མི་སེམས། ཤེས་ལྡན་པ”བཅས་ཀྱི་ལས་དོན་དང་། ཞིང་འབྲོག་མང་ཚོགས་ཀྱི་ངལ་ནུས་ལས་ཞུགས། སློབ་གསོའི“འགན་ལེན་གསུམ”གྱི་འགྲོ་གྲོན་དོ་དམ་སོགས་ལ་དམིགས་ནས་ཆེད་དོན་བརྟག་ཞིབ་ཁག་9བྱས་ཏེ“གཞུང་གཅིག་ཨུད་གཅིག་ཁང་གཉིས”ལ་བསམ་འཆར་དང་གྲོས་འཆར་ཁག་47བརྒྱུད་བསྒྲུབས་བྱས་ཡོད། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་བཀའ་མངགས་ལྟར་སྐམ་སའི་རྒྱལ་མཚམས་བཅའ་ཁྲིམས་ལག་བསྟར་དོན་འཁྱོལ་སོགས་ཀྱི་ཆེད་དོན་བརྟག་ཞིབ་བྱས་ཡོད། ཀྲུང་ཧྭའི་ཁོར་ཡུག་སྲུང་སྐྱོང་གི་དུས་རབས་བྱ་སྤྱོད་བོད་དུ་སྤེལ་རྒྱུའི་བྱ་འགུལ་རྒྱུད་ཆད་མེད་པར་གཏིང་ཟབ་ཏུ་བཏང་ནས་སྐྱེ་ཁམས་སྲུང་སྐྱོང་ཟམ་མི་ཆད་པར་གཏིང་ཟབ་དང་ཏན་ཏིག་ངང་སྤེལ་རྒྱུར་སྐུལ་འདེད་བཏང་ཡོད།

གཉིས་ནས་ལྟ་སྐུལ་བྱེད་སྟངས་གསར་གཏོད་བྱས་པ། སྡེ་ཚན་དང་ཁུལ་ཁོངས་ལས་བརྒལ་བའི་ལྟ་སྐུལ་མཉམ་ལས་བྱེད་ལམ་འཐུས་སྒོ་ཚང་དུ་བཏང་སྟེ། སྒྲིག་ཨུད་ལྟ་ཨུད་དང་། ནོར་སྲིད། རྩིས་བཤེར། བསྡོམས་རྩིས། ཁྲལ་དོན་སོགས་སྡེ་ཁག་དང་མཉམ་འགུལ་བྱེད་ཤུགས་ཆེ་རུ་བཏང་ནས་ཆེད་དོན་བརྟག་ཞིབ་དང་། ཁྲིམས་སྒྱུར་ཞིབ་བཤེར། ཆེད་དོན་འདྲི་རྩད་སོགས་ཀྱི་ལྷུ་ཚིགས་ཁྲོད་སྡེ་ཚན་ཁག་དང་། ས་གནས་དང་གྲོང་ཁྱེར་ཁག་རྒྱ་ཁྱབ་ངང་ཞུགས་པར་གདན་འདྲེན་ཞུས་ནས་ལྟ་སྐུལ་ལས་ཀའི་མཉམ་ཤུགས་ཆགས་པར་བྱས་ཡོད། མི་དམངས་འཐུས་ཚོགས་ཀྱི་སྔོན་རྩིས་དྲ་སྦྲེལ་ལྟ་སྐུལ་མ་ལག་འཛུགས་སྐྲུན་གཏིང་ཟབ་བྱས་ཏེ། རང་སྐྱོང་ལྗོངས་ཀྱི་སྡེ་ཚན་མང་པོ་དང་། ས་གནས་དང་གྲོང་ཁྱེར་ཁག་ལ་སྦྲེལ་མཐུད་བྱས་ནས་སྔོན་རྩིས་ལག་བསྟར་གྱི་ལས་རིམ་ཧྲིལ་པོར་རྒྱུན་རྣམ་ཅན་གྱི་ལྟ་སྐུལ་མངོན་འགྱུར་བྱུང་བས“དངུལ་ཁུག”དེ་ཉིད་ཀུན་གསལ་བེད་སྤྱོད་ཐུབ་པར་བྱས་ཡོད། ལྟ་སྐུལ་དང་ཁྲིམས་འཛུགས་ཕན་ཚུན་སྦྲེལ་མཐུད་བྱ་རྒྱུར་དོ་སྣང་བྱས་ཏེ། ལྟ་སྐུལ་ཁྲོད་ཤེས་རྟོགས་བྱུང་བའི་སྤྱི་ཁྱབ་རང་བཞིན་གྱི་གནད་དོན་དང་ལམ་ལུགས་ཀྱི་ཆད་ཆ་དེ་ཁྲིམས་སྲོལ་གྱི་བཟོ་བཅོས་གྲོས་འཆར་ཁག་36ལ་བསྒྱུར་པས་ལྟ་སྐུལ་དང་ཁྲིམས་འཛུགས་དབར་དགེ་མཚན་ལྡན་པའི་མཉམ་འགུལ་ཐུབ་པ་བྱུང་ཡོད།

གསུམ་ནས་ལྟ་སྐུལ་གྱི་ཕན་འབྲས་དངོས་ཆེ་རུ་བཏང་བ། གནད་དོན་གྱི་སྟོན་ཕྱོགས་དང་ཕན་འབྲས་ཀྱི་སྟོན་ཕྱོགས་མཐའ་འཁྱོངས་བྱས་ཏེ། མི་དམངས་འཐུས་ཚོགས་ཀྱི་ལྟ་སྐུལ་གྱི་བཙན་སྡོམ་དང་ཕན་འབྲས་སྔར་བས་ཤུགས་ཆེར་གཏོང་རྒྱུའི་སྐོར་གྱི་བསམ་འཆར་དངོས་སུ་བཟོ་འདོན་དང་ལག་བསྟར་བྱས་ནས་གྲོས་ཞིབ་བསམ་འཆར་ཐག་གཅོད་བྱས་ཚུལ་གྱི“ལྟ་སྐུལ་བསྐྱར་མ”བྱེད་ལམ་གསར་འཛུགས་དང་འཐུས་སྒོ་ཚང་དུ་བཏང་བས། ལྟ་སྐུལ་གྱིས་སྔར་ལས་ཕན་ནུས་ལྡན་པའི་སྒོ་ནས་བཅོས་སྐྱོང་ཐད་ཞབས་འདེགས་ཞུ་ཐུབ་པ་བྱུང་ཡོད། ལོ་ཧྲིལ་པོར་རང་སྐྱོང་ལྗོངས་སྲིད་གཞུང་ལ་གྲོས་ཞིབ་བསམ་འཆར་ཁག་5དང་། རང་སྐྱོང་ལྗོངས་ལྟ་ཞིབ་ཨུ་ལྷན་ལ་གྲོས་ཞིབ་བསམ་འཆར་ཁག་1བརྒྱུད་སྤྲོད་བྱས་ཤིང་། ཕྱོགས་25ཐད་ཀྱི་གནད་དོན་ཁག་42ལ་དམིགས་ནས་བསམ་འཆར་དང་གྲོས་འཆར་ཁག་50བཏོན་ཡོད། རང་སྐྱོང་ལྗོངས་སྲིད་གཞུང་གིས་ཞིབ་འཇུག་ཐག་གཅོད་ཀྱི་སྙན་ཞུ་ཁག་2དང་། རང་སྐྱོང་ལྗོངས་ལྟ་ཨུད་ཀྱིས་ཞིབ་འཇུག་ཐག་གཅོད་སྙན་ཞུ་ཁག་1ལན་སྤྲོད་བྱས་པ་དེ་དག་ཐེར་བྱེད་ཚད་100%ཟིན་ནས“གནད་དོན་དང་། དག་ཐེར། ལན་སྤྲོད”བཅས་ཀྱི་གདུབ་ཟུམ་ལམ་སྲོལ་ཆགས་ཡོད།

མི་དམངས་འཐུས་ཚོགས་ཀྱི་ལྟ་སྐུལ་ནི་ཁྲིམས་བཀོད་ཀྱི་དབང་གྲགས་ལྡན་ཞིང་མི་དམངས་ཀྱི་ཚབ་ཞུས་ནས་ལྟ་སྐུལ་བྱས་པ་ཞིག་རེད། ལོ་གཅིག་གི་རིང་། ང་ཚོས་གནད་དོན་གྱི་སྟོན་ཕྱོགས་མཐའ་འཁྱོངས་དང་། དོ་ཁུར་ཆེན་པོར་བརྡ་ལན་ཡོད་པར་བྱས་ཏེ། འཛེམ་མེད་དམར་འདོན་གྱི་ལྟ་སྐུལ་རེ་རེའི་ཁྲོད་དུ་བཅའ་ཁྲིམས་ཀྱི་དོན་ཚན་ཁག་རྒྱུན་ཆད་མེད་པར་ཤོག་ངོས་ནས་དོན་ཐོག་ཏུ་འཁྱོལ་བ་དང་། ལམ་ལུགས་ཀྱི་དགེ་མཚན་མངོན་སྟངས་དེ་ལམ་ལུགས་ནས་བཅོས་སྐྱོང་དུ་འགྱུར་ཐུབ་པར་བྱས་ཡོད།

བཞི། ཤུགས་སྒྲིལ་བློ་འདོན་བྱ་རྒྱུ་མངོན་ཆེར་བཟུང་བས་འཐུས་མིའི་ལས་དོན་ལ་ཕན་འབྲས་གསར་པ་ཐོན་པ།

རྒྱུན་ལས་ཨུ་ལྷན་གྱིས་གསར་དུ་བཟོ་བཅོས་བརྒྱབ་པའི་འཐུས་མིའི་བཅའ་ཁྲིམས་ལག་བསྟར་ནན་ཏན་བྱས་ཏེ། འཐུས་མིར་བརྩི་བཀུར་དང་། འཐུས་མིར་བརྟེན་པ། འཐུས་མིར་ཞབས་འདེགས་ཞུ་བ་བཅས་བྱ་རྒྱུ་མཐའ་འཁྱོངས་བྱས་ནས་མི་དམངས་འཐུས་ཚོགས་ཀྱི་འཐུས་མིར་ཞབས་ཞུ་དང་འགན་སྲུང་བྱེད་ཤུགས་རྒྱུན་ཆད་མེད་པར་ཆེ་རུ་བཏང་ཐོག མི་དམངས་འཐུས་ཚོགས་ཀྱི་འཐུས་མིས་ཁྲིམས་ལྟར་འགན་འཁྲི་སྒྲུབ་པར་བློ་བརྟན་འགྱུར་མེད་ཀྱིས་རྒྱབ་སྐྱོར་བྱས་ཡོད།

གཅིག་ནས“འབྲེལ་བ་གཉིས”གཏིང་ཟབ་ཏུ་བཏང་བ། རྒྱུན་ལས་ཨུ་ལྷན་གྱི་ཁོངས་མིས་འཐུས་མིར་འབྲེལ་གཏུག་བྱེད་པའི་ལམ་ལུགས་དོན་འཁྱོལ་ནན་པོ་བྱས་ཏེ། རྒྱུན་ལས་ཨུ་ལྷན་གྱི་འགོ་ཁྲིད་ཀྱིས་རྒྱུན་ལས་ཨུ་ལྷན་གྱི་ཚོགས་འདུར་ཟུར་ཞུགས་བྱེད་མཁན་རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་དང་རྫོང་རིམ་པའི་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་འགན་འཁུར་བ་དང་བཞུགས་མོལ་ཐེངས་4བྱས་པར་མི་ཐེངས་105ཟིན་ཞིང་། ས་ཡུལ་དངོས་སུ་བསམ་འཆར་དང་གྲོས་འཆར་ཁག་26ཉན་འཇོག་བྱས་པ་དང་བརྒྱུད་སྒྲུབ་བྱེད་ཚད་100%ཟིན་ཡོད། སྤྱི་དམངས་ཟུར་ཉན་ལམ་ལུགས་འཛུགས་རྒྱུ་འཚོལ་ཞིབ་བྱས་ཏེ། སྔ་རྗེས་སུ་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཚོགས་འདུའི་ནང་ཞིང་འབྲོག་མང་ཚོགས་དང་གཞི་རིམ་གྱི་ལས་དོན་མི་སྣ་ཁག་4དང་མི་27གདན་ཞུ་བྱས་ཏེ“བར་ཐག་མེད་པའི”སྒོ་ནས་དམངས་གཙོའི་ཇུས་ཐག་གཅོད་པའི་བརྒྱུད་རིམ་ལ་བདེན་དཔང་བྱེད་དུ་བཅུག་ཡོད། རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་མི་ཐེངས་233རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཁྲིམས་འཛུགས་དང་ལྟ་སྐུལ་སོགས་ཀྱི་ལས་དོན་ནང་ཞུགས་རྒྱུ་སྒྲིག་འཛུགས་བྱས་ནས་ཇུས་ཐག་གཅོད་རིམ་ནང་འཐུས་མིའི་སྐད་སྒྲ་ཐད་ཀར་ཐོས་ཐུབ་པ་བྱུང་ཡོད། འཐུས་མི་དང་འདེམས་བསྐོའི་ཚན་པ་ཁག་དབར་གྱི་འབྲེལ་གཏུག་ལ་ཤུགས་སྣོན་བརྒྱབ་སྟེ། འཐུས་མིས་རང་ཉིད་གནས་སའི“མི་དམངས་འཐུས་ཚོགས་ཀྱི་འཐུས་མིའི་ཁྱིམ་གཞིས”དང“འཐུས་མིའི་འབྲེལ་གཏུག་ས་ཚིགས”ལ་བརྟེན་ནས་བྱེད་སྒོ་སྤེལ་རྒྱུར་རྒྱབ་སྐྱོར་བྱས་པས་མི་དམངས་འཐུས་ཚོགས་ཀྱི་འཐུས་མི་དེ་ཉིད་ཏང་དང་མང་ཚོགས་དབར་གྱི“སེམས་སྦྲེལ་ཟམ་པ”ལྟ་བུ་ཞིག་ཏུ་དངོས་སུ་བསྒྱུར་ཡོད།

གཉིས་ནས་གྲོས་འཆར་གཉེར་སྒྲུབ་ལེགས་སྒྱུར་བྱས་པ། འཐུས་མིའི་གྲོས་འཆར་བརྒྱུད་སྤྲོད་ཚོགས་འདུ་དང་སྐུལ་སྤེལ་ཚོགས་འདུ་ཆེད་མངགས་སྐོང་ཚོགས་བྱས་ཏེ། སྲིད་གཞུང་གི་འབྲེལ་ཡོད་སྡེ་ཚན་དང་འབྲེལ་གཏུག་མཐུན་སྦྱོར་བྱེད་པར་ཤུགས་སྣོན་བརྒྱབ་ནས“དོན་དག་ཚང་མར་ལན་གསལ་པོ་ཡོད་པ་དང་། གྲོས་འཆར་ཚང་མ་དོན་འཁྱོལ་ཐུབ་པར”བྱས་ཡོད། རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པའི་རིང་འཐུས་མིས་བཏོན་པའི་གྲོས་འཆར་ཁག་367ཚང་མ་གཉེར་སྒྲུབ་བྱས་ཟིན་པའི་ཁར་འཐུས་མིར་ལན་བཏབ་ཡོད། གཙོ་གནད་ཐོག་སྒྲུབ་སྐུལ་བྱ་རྒྱུའི་འཐུས་མིའི་གྲོས་འཆར་དང་། སྐྱོན་བརྗོད། བསམ་འཆར་བཅས་ཀྱི་ལས་ཀའི་བྱ་ཐབས་བཟོ་འབེབས་བྱས་ཏེ། རྒྱུན་ལས་ཨུ་ལྷན་གྱི་འགོ་ཁྲིད་ཀྱིས་སྣེ་ཁྲིད་དེ་གཙོ་གནད་ཐོག་སྒྲུབ་སྐུལ་དང་། ཆེད་དོན་ལས་དོན་ཨུ་ལྷན་གྱིས་ཆེད་དོན་སྒྲུབ་སྐུལ། འཐུས་མིའི་ལས་དོན་ཨུ་ལྷན་གྱིས་མཐུན་སྦྱོར་སྒྲུབ་སྐུལ་བཅས་ཀྱི་ལས་ཀའི་ལམ་སྲོལ་བཙུགས་ནས་འཐུས་མིའི་གྲོས་འཆར་ཁག་5གཙོ་གནད་ཐོག་སྒྲུབ་སྐུལ་དང་། འཐུས་མིའི་གྲོས་འཆར་ཁག་12གཙོ་གནད་ཐོག་ཞིབ་བཤེར་བྱས་ཏེ། གྲོང་གསེབ་ཀྱི་བཙོག་ཆུ་གཙང་གསིང་བྱ་རྒྱུ་དང་། བཟའ་བཅའི་བདེ་འཇགས་ལ་ལྟ་སྡོམ་བྱེད་ཤུགས་ཆེ་རུ་གཏོང་རྒྱུ་སོགས་དང་འབྲེལ་བའི་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཁག་གཅིག་ཐག་གཅོད་ཐུབ་པར་སྐུལ་འདེད་བཏང་ཡོད།

གསུམ་ནས་ཚོགས་འདུ་གྲོལ་རྗེས་ཀྱི་འགན་འཁྲི་དངོས་སུ་བསྒྲུབས་པ། “ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་ཆེད་མི་དམངས་འཐུས་ཚོགས་ཀྱི་འཐུས་མིས་བྱ་སྤྱོད་སྤེལ་བཞིན་ཡོད”ཅེས་པའི་ཆེད་དོན་བྱེད་སྒོ་གསར་གཏོད་ཐོག་ནས་སྤེལ་ཏེ་འཐུས་མིའི་དཔེ་སྟོན་དང་སྣེ་ཁྲིད་ཀྱི་ནུས་པ་འདོན་སྤེལ་བྱས་ཡོད། འཐུས་མིའི་འགན་སྒྲུབ་ཉམས་མྱོང་སྤེལ་རེས་བྱེད་ལམ་བཙུགས་ཡོད། “དྲ་ཐོག+དྲ་ཕྱི”ཡི་རྣམ་པ་སྤྱད་དེ་ཆེད་དོན་གསོ་སྦྱོང་འཛིན་གྲྭ་དུས་ཐེངས་5གཉེར་བ་དེ་འཐུས་མི་མི་ཐེངས་3600ཙམ་ལ་ཁྱབ་ཡོད། འཐུས་མི་82སྒྲིག་འཛུགས་བྱས་ནས“གཞུང་གཅིག་ཨུད་གཅིག་ཁང་གཉིས”ཀྱི་འབྲེལ་ཡོད་ལས་དོན་དང་བྱེད་སྒོར་ཞུགས་པ་དང་། འཐུས་མི་381གཞི་རིམ་བཅོས་སྐྱོང་དང་སྤུས་ཚད་མཐོ་བའི་གོང་འཕེལ་སོགས་ཀྱི་ལྟ་ཞིབ་དང་ཆེད་དོན་བརྟག་ཞིབ་ནང་ཞུགས་རྒྱུར་གདན་ཞུ་བྱས་ཡོད། བོད་དུ་བཞུགས་པའི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མིས་ཁྲིམས་ལྟར་འགན་དབང་སྤྱོད་རྒྱུར་ཞབས་ཞུ་དང་འགན་ལེན་ཧུར་ཐག་བྱས་ཡོད།

འཐུས་མིའི་ཁེ་དབང་ལ་བརྩི་འཇོག་བྱེད་པ་ནི་མི་དམངས་ཀྱི་ཁེ་དབང་ལ་བརྩི་འཇོག་བྱེད་པ་དང་། འཐུས་མིས་ཁྲིམས་ལྟར་འགན་འཁྲི་བསྒྲུབ་རྒྱུར་འགན་སྲུང་བྱེད་པ་ནི་མི་དམངས་ལ་རང་ཁྱིམ་རང་བདག་ཡོང་བར་འགན་ལེན་བྱེད་པ་དེ་ཡིན། ལོ་གཅིག་རིང་། ང་ཚོས་ལས་སྟེགས་འཛུགས་གཏོད་བྱེད་པ་དང་། ཞབས་ཞུ་ལེགས་སུ་གཏོང་བ། མི་དམངས་ཀྱི་བློ་གྲོས་གཅིག་སྡུད་བྱེད་པ། མི་དམངས་ཀྱི་འབོད་སྒྲར་ལན་གསལ་པོ་ཡོད་པ་བཅས་བྱས་ཏེ། ནུས་ཤུགས་ཡོད་རྒུ་བཏོན་ནས་འཐུས་མིས་སྤུས་ཚད་མཐོ་བའི་འགན་འཁྲི་སྒྲུབ་པའི་གདེང་ཚོད་དང་སྤོབས་སེམས་ཆེ་རུ་བཏང་བ་དང་། མཐུན་རྐྱེན་དང་ཕན་འབྲས་ལེགས་སུ་བཏང་བར་བརྟེན། མི་དམངས་འཐུས་ཚོགས་ཀྱི་འཐུས་མིས་རང་སོ་སོའི་ཁྱབ་ཁོངས་སུ་ཉམས་བཟང་མངོན་པ་དང་མིག་དཔེ་བསྟན་ཡོད།

ལྔ། རྨང་རྩ་གཉིས་བརྟན་ཡོང་རྒྱུ་མངོན་ཆེར་བཟུང་བས་རང་ངོས་འཛུགས་སྐྱོང་ཐད་རྣམ་པ་གསར་པ་མངོན་པ།

ལྕགས་རྡུང་བར་ཐོ་བ་མཁྲེགས་དགོས། རྒྱུན་ལས་ཨུ་ལྷན་གྱིས་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་ཏན་ཏིག་སྤེལ་ཏེ། སེམས་མཐུན་ཞི་ལྷོད་དང་ཤུགས་བསྐྱེད་ལས་བརྩོན་བྱེད་པའི་རྣམ་པ་བཟང་པོ་བསྐྲུན་ཡོད། རྒྱུན་ལས་ཨུ་ལྷན་ཏང་ཙུའི་ལས་ཀའི་སྒྲིག་སྲོལ་དང་། རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གི་སློབ་སྦྱོང་སྒྲིག་སྲོལ། ཀྲུའུ་རེན་ཚོགས་འདུའི་དོན་གྲོས་སྒྲིག་སྲོལ་བཅས་ལ་བཟོ་བཅོས་བརྒྱབ་ཡོད། མི་དམངས་འཐུས་ཚོགས་ཀྱི་ཚོགས་འདུའི་ལམ་ལུགས་དང་། དོན་གྲོས་ལས་རིམ། ལས་ཀའི་ལམ་སྲོལ་བཅས་འཐུས་སྒོ་ཚང་དུ་བཏང་ཡོད། ཕྱོགས་ཡོངས་ནས་ཏང་ནན་པོས་སྐྱོང་བའི་ཆབ་སྲིད་ཀྱི་འགན་འཁྲི་ནན་དཀྲིས་བྱས་ཏེ། རྒྱུན་ལས་ཨུ་ལྷན་ཏང་ཙུའི་ཏང་འཛུགས་སྐྱོང་ལས་དོན་འགོ་ཁྲིད་ཚོགས་ཆུང་ལེགས་སྒྲིག་དང་འཐུས་སྒོ་ཚང་དུ་བཏང་བ་དང་སྦྲགས་ལྟ་ཞིབ་དང་ཁྲིམས་འཛིན་ཨུ་ཡོན་ལྷན་ཁང་དང་། ཞིང་ལས་གྲོང་གསེབ་དང་ཁོར་ཡུག་ཐོན་ཁུངས་ཨུ་ཡོན་ལྷན་ཁང་གི་ཡན་ལག་ཏང་ཙུའུ་བཙུགས་ཡོད། འགོ་ཁྲིད་ལས་བྱེད་པ་ཕྱིར་ཐོན་སྐབས་ཆོག་མཆན་ཞུ་བ་དང་། དགོངས་ཞུ་དང་དགོངས་དུས་ཐིམ་ཞུའི་ལམ་ལུགས་ཚད་ལྡན་དུ་བཏང་ཐོག་ལག་བསྟར་ནན་པོའང་བྱས་ཡོད། “མི་དམངས་འཐུས་ཚོགས་ཤེས་རྟོགས”དང“མི་དམངས་འཐུས་ཚོགས་སྒྲོག་འགྲེལ”བྱེད་པར་མཐུན་སྦྱོར་སྐུལ་འདེད་གཏོང་རྒྱུ་མཐའ་འཁྱོངས་བྱས་ཏེ། རང་སྐྱོང་ལྗོངས་མི་དམངས་འཐུས་ཚོགས་ཀྱི་གསར་འགྱུར་ཡོངས་བསྒྲགས་ཚོགས་འདུའི་ལམ་ལུགས་གསར་འཛུགས་དང་འཐུས་སྒོ་ཚང་དུ་བཏང་བ་དང་། དྲིལ་བསྒྲགས་འོས་སྦྱོར་གྱི་བརྩམས་ཆོས་ཁག་6ལ་རྒྱལ་ཡོངས“མི་དམངས་འཐུས་ཚོགས་ཀྱི་གསར་འགྱུར་བྱ་དགའ”ཐོབ་ཡོད། རང་སྐྱོང་ལྗོངས་མི་དམངས་འཐུས་ཚོགས་ཀྱི་ལས་དོན་དང་རིགས་གཞུང་ཞིབ་འཇུག་ལྷན་ཚོགས་ཀྱི་སྐབས་བརྗེ་ལེགས་སྒྲུབ་བྱས་པ་དང“མི་དམངས་འཐུས་ཚོགས་ཀྱི་སྒོ་དབྱེའི་ཉིན་མོའི”བྱེད་སྒོ་སྤེལ་རྒྱུ་འཚོལ་ཞིབ་བྱས་ཡོད། རང་འགུལ་ངང་རྒྱལ་ཡོངས་མི་དམངས་འཐུས་ཚོགས་དང་འབྲེལ་མཐུད་བྱེད་པར་ཤུགས་སྣོན་བརྒྱབ་པ་དང་། རིམ་ཁག་མི་དམངས་འཐུས་ཚོགས་དང་མཐུན་སྦྱོར་མཉམ་འགུལ་དམ་ཟབ་བྱས་ཏེ། མི་དམངས་འཐུས་ཚོགས་ལས་དོན་གྱི་སྤྱི་ཡོངས་ཀྱི་མཉམ་ཤུགས་ཆེ་རུ་བཏང་ཡོད།

འཐུས་མི་རྣམ་པ་ཚོ།

“ལོ་ལྔ་ཚན་བཅུ་བཞི་པའི”དུས་སྐབས་ནི་བོད་ཀྱི་གོང་འཕེལ་ལོ་རྒྱུས་ཁྲོད་ཧ་ཅང་རྒྱུན་གཏན་མིན་པ་དང་སྤྱིར་བཏང་གཏན་ནས་མིན་པའི་ལོ་ལྔ་རེད། ལོ་ལྔའི་ནང་། རང་སྐྱོང་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག རྒྱུན་ལས་ཨུ་ལྷན་གྱིས་ཁྲིམས་སྐྱོང་གི་བྱེད་ཐབས་གཙོ་བོར་སྤྱད་པ་དང་། ཐེག་པ་ཁུར་ལེན་བྱ་རྒྱུ་དེ་ལས་འགན་གལ་ཆེན་ཞིག་ཏུ་བརྩིས་ཏེ། སྤྱི་ཡོངས་ལ་ཞབས་འདེགས་ནུས་ལྡན་ཞུས་པ་དང་། དམངས་ཆེད་འགན་སྒྲུབ་ཀྱི་ལས་རྗེས་བཞག་པའི་དུས་རབས་གསར་པའི་རྒྱུགས་ལན་ཞིག་ཕུལ་ཡོད། ང་ཚོས“དོན་ཆེན་བཞིར”དམིགས་པ་དང་། “ཁུལ་གསུམ་མཐོ་ས་གཅིག”འཛུགས་སྐྲུན་བྱེད་པའི་བླང་བྱར་དམ་པོར་དམིགས་ནས་སྔ་རྗེས་སུ་ས་གནས་རང་བཞིན་གྱི་ཁྲིམས་སྲོལ་ཁག་ཐེངས་79དང་། ད་ལྟ་སྤྱོད་མུས་ཡིན་ཞིང་གོ་ཆོད་པའི་རང་སྐྱོང་ལྗོངས་རིམ་པའི་ས་གནས་རང་བཞིན་གྱི་ཁྲིམས་སྲོལ་ཁག་138 རང་སྐྱོང་ལྗོངས་སྲིད་གཞུང་གི་སྒྲིག་སྲོལ་ཁག་112 ཆུས་བཙུགས་གྲོང་ཁྱེར་གྱི་ས་གནས་རང་བཞིན་གྱི་ཁྲིམས་སྲོལ་ཁག་89བཅས་བཟོ་འབེབས་དང་དག་བཅོས་བྱས་པས། ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་ཁྲིམས་སྲོལ་མ་ལག་སྔར་བས་ཚན་རིག་དང་མཐུན་ཞིང་འཐུས་སྒོ་ཚང་བ་དང་། གཅིག་གྱུར་དང་དབང་གྲགས་ལྡན་པ་བྱུང་ཡོད། ང་ཚོས་རང་སྐྱོང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་གལ་ཆེན་དོན་འཁྱོལ་གནད་སྨིན་དང་། བཅའ་ཁྲིམས་དང་ཁྲིམས་སྲོལ་ལག་བསྟར་ནུས་ལྡན། མི་དམངས་མང་ཚོགས་ཀྱི་རེ་ཞུར་ལན་སྤྲོད་གང་ལེགས་བཅས་བྱ་རྒྱུར་དམིགས་ཏེ། སྔ་རྗེས་སུ་བཅའ་ཁྲིམས་དང་ཁྲིམས་སྲོལ་ཁག་52ལ་དམིགས་ནས་ཁྲིམས་སྒྱུར་ཞིབ་བཤེར་བྱས་པ་དང་། འབྲེལ་ཡོད་ལས་དོན་གྱི་སྙན་ཞུ་ཁག་141ཉན་འཇོག་དང་གྲོས་ཞིབ་བྱས་པ། རིགས་འདྲ་མིན་གྱི་བརྟག་དཔྱད་ཞིབ་འཇུག་ཐེངས་174དང་ཆེད་དོན་འདྲི་རྩད་ཐེངས་9བྱས་པ་བཅས་ཀྱི་ཐོག་ནས“ལྟ་སྐུལ་ནུས་ལྡན”བྱས་པར་བརྟེན་ནས“ལོ་ལྔ་ཚན་བཅུ་བཞི་པའི”དམིགས་ཚད་ལས་འགན་ཁག་ཐུགས་གྲ་ལེགས་འགྲིག་ཡོང་བར་རམ་འདེགས་བྱས་ཡོད། ང་ཚོས་མི་དམངས་འཐུས་ཚོགས་ཀྱི་འཐུས་མིས་ཁྲིམས་ལྟར་འགན་སྒྲུབ་དང་ནུས་པ་འདོན་སྤེལ་བྱེད་པར་རང་འགུལ་ངང་ཞབས་འདེགས་ཞུས་ཏེ། ལྗོངས་ཡོངས་ཀྱི་མི་དམངས་འཐུས་ཚོགས་ཀྱི་འཐུས་མི་ཁྲི་4ལྷག་ཙམ་གྱིས་རང་སོ་སོའི་ལས་གནས་ཐོག་འགན་འཁྲི་གཙང་སྒྲུབ་བྱ་རྒྱུའི་སྒྲིག་འཛུགས་དང་སྐུལ་སློང་བྱས་ནས“ལོ་ལྔ་ཚན་བཅུ་བཞི་པའི”དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་གོང་འཕེལ་གྱི་སྟོབས་ཤུགས་ཆེན་པོ་གཅིག་ཏུ་བསྒྲིལ་ཡོད།

དུས་ཡུན་རིང་པོའི་ལས་ཀའི་ལག་ལེན་ཁྲོད་ང་ཚོར་ཐོབ་པའི་མྱོང་ཚོར་ཟབ་ཤོས་ནི། ཏང་གི་འགོ་ཁྲིད་མཐའ་འཁྱོངས་དང་དེར་ཤུགས་སྣོན་རྒྱག་རྒྱུ་དེ་ངེས་པར་དུ་ཆབ་སྲིད་ཀྱི་རྩ་དོན་མཐོ་ཤོས་དང་རྩ་བའི་ཆབ་སྲིད་ཀྱི་འགན་ལེན་ཞིག་ཏུ་བརྩི་དགོས་པ་དང་། ངེས་པར་དུ་མི་དམངས་གོང་དུ་བཀུར་རྒྱུ་དེ་ཐོག་མའི་བསམ་འདུན་དང་འགན་འཁྲི་དང་། རིན་ཐང་གི་དམིགས་ས་ཆེ་ཤོས་ཤིག་ཏུ་བརྩི་དགོས་པ། ངེས་པར་དུ་ཁྲིམས་ལྟར་འགན་འཁྲི་བསྒྲུབ་རྒྱུ་དེ་གཞི་རྩའི་ཚད་གཞི་དང་ནང་གནས་ཀྱི་བླང་བྱ་ཞིག་ཏུ་བརྩི་དགོས་པ། ངེས་པར་དུ་གཞུང་འཁྱོངས་གསར་འབྱེད་བྱ་རྒྱུ་དེ་རྩ་དོན་གལ་ཆེན་དང་སྒུལ་ཤུགས་ཀྱི་ཡོང་ཁུངས་ཤིག་ཏུ་བརྩི་དགོས་པ། ངེས་པར་དུ་བྱ་བ་དངོས་སྒྲུབ་པ་དང་ཐེག་པ་ཁུར་ལེན་བྱ་རྒྱུ་དེ་རང་མདངས་མངོན་གསལ་དོད་ཤོས་དང་སྲིད་སྐྱོང་གི་རང་འགན་ཆེ་ཤོས་ཤིག་ཏུ་བརྩི་དགོས་པ་བཅས་ཡིན།

འཐུས་མི་རྣམ་པ་ཚོ།

རྒྱུན་ལས་ཨུ་ལྷན་གྱི་ལས་དོན་ལ་གྲུབ་འབྲས་འདི་དག་ཐོབ་པའི་རྩ་བ་ནི་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཁ་སྒྱུར་ཕྱོགས་སྟོན་དང་དམིགས་བསལ་ཐུགས་ཁུར་གནང་བ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་དར་སྒྲེང་ཕྱོགས་སྟོན་དང་། ཚན་རིག་དང་མཐུན་པའི་མཛུབ་ཁྲིད་གནང་བར་ཐུག་ཡོད། དེ་ནི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་མཛུབ་ཁྲིད་ཞིབ་ཚགས་དང་རང་སྐྱོང་ལྗོངས་ཏང་ཨུད་ཀྱིས་འགྱུར་མེད་སྟོབས་ལྡན་གྱི་འགོ་ཁྲིད་གནང་བའི་འབྲས་བུ་ཞིག་དང་། རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་དང་། རྒྱུན་ལས་ཨུ་ལྷན་གྱི་གྲུབ་ཆའི་ཁོངས་མི། ལས་ཁུངས་ཀྱི་ལས་བྱེད་ལས་བཟོ་བཅས་ཀྱིས་རང་འགན་གཙང་སྒྲུབ་དང་དཀའ་སྤྱད་འབད་བརྩོན་བྱས་པའི་འབྲས་བུ་ཞིག རང་སྐྱོང་ལྗོངས་ཀྱི“གཞུང་གཅིག་ཨུད་གཅིག་ཁང་གཉིས”དང་རིམ་ཁག་མི་དམངས་འཐུས་ཚོགས་དང་དེའི་རྒྱུན་ལས་ཨུ་ལྷན་གྱིས་གཞོགས་འདེགས་དམ་ཟབ་དང་ཕྱར་བ་གྲུ་འདེགས་བྱས་པའི་འབྲས་བུ་ཞིག མི་རིགས་ཁག་གི་མང་ཚོགས་ཁྲི་370ཡིས་ཡིད་ཆེས་གང་ལེགས་དང་རྒྱབ་སྐྱོར་ཤུགས་ཆེན་བྱས་པའི་འབྲས་བུ་ཞིག་བཅས་ཡིན། འདིར་ངས་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཚབ་ཞུས་ནས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།

ང་ཚོས་ཀྱང་རིག་པ་དྭངས་གསལ་གྱི་སྒོ་ནས་ངོས་འཛིན་ཐུབ་དགོས་པ་ནི། ལས་ཀའི་ཁྲོད་ད་དུང་ཧེ་བག་དང་མི་འདང་བའི་ཆ་འགའ་ཤས་ཡོད་པ་སྟེ། ཁྲིམས་འཛུགས་ཀྱི་སྤུས་ཕྱོད་ད་དུང་སྔར་བས་མཐོ་རུ་གཏོང་དགོས་པ་དང་། ལྟ་སྐུལ་གྱི་སྒྲིག་སྲོལ་དང་ལམ་སྲོལ་ད་དུང་སྔར་བས་འཐུས་སྒོ་ཚང་དུ་གཏོང་དགོས་པ། མི་དམངས་འཐུས་ཚོགས་ཀྱི་འཐུས་མི་དང་མི་རིགས་ཁག་གི་མང་ཚོགས་དབར་འབྲེལ་བ་དམ་ཟབ་བྱེད་པའི་ཐབས་ལམ་ད་དུང་སྔར་བས་གསར་གཏོད་བྱེད་དགོས་པ། རང་ངོས་འཛུགས་སྐྱོང་དང་ལྷག་པར་དུ་སྤྱོད་ཚུལ་འཛུགས་སྐྱོང་ཐད་སྔར་བས་ཤུགས་སྣོན་རྒྱག་དགོས་པ་བཅས་རེད། རྒྱུན་ལས་ཨུ་ལྷན་གྱིས་ཕྱོགས་གང་ཅིའི་ཐད་ཀྱི་གྲོས་གཞི་དང་གྲོས་འཆར་ཁེངས་སྐྱུང་ངང་ནས་ཉན་ཏེ་ཧུར་བརྩོན་ཆེན་པོས་ལེགས་བཅོས་ཟམ་མི་ཆད་པར་བྱ་རྒྱུ་ཡིན།

2026ལོའི་ལས་དོན་གཙོ་བོའི་འཆར་གཞི།

2026ལོ་ནི“ལོ་ལྔ་ཚན་བཅོ་ལྔ་པའི”འགོ་ཚུགས་ལོ་ཞིག་ཡིན། རྒྱུན་ལས་ཨུ་ལྷན་གྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ཏེ། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་རིམ་བྱུང་གི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་དང་། ཞི་ཅིན་ཕིང་གི་ཁྲིམས་སྐྱོང་དགོངས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་དམངས་འཐུས་མི་ཚོགས་ཆེན་གྱི་ལམ་ལུགས་མཐའ་འཁྱོངས་དང་འཐུས་སྒོ་ཚང་དུ་གཏོང་རྒྱུའི་སྐོར་གྱི་དགོངས་པ་གལ་ཆེན་དང་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་བཅས་ལག་བསྟར་དོན་འཁྱོལ་གཏིང་ཟབ་བྱས་ཐོག “གཏན་འཁེལ་གཉིས”ལ་སྲུང་སྐྱོང་མཐའ་གཅིག་ཏུ་ཞུ་བ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པ་དང་། ཏང་གི་འགོ་ཁྲིད་དང་། མི་དམངས་རང་ཁྱིམ་རང་བདག ཁྲིམས་བཞིན་རྒྱལ་ཁབ་སྐྱོང་རྒྱུ་བཅས་ཟུང་འབྲེལ་ནུས་ལྡན་ཡོང་རྒྱུ་མཐའ་འཁྱོངས་བྱས་ཏེ། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་དང་སྐབས་བཅུ་པའི་ཚང་འཛོམས་གྲོས་ཚོགས་ཐེངས་རིམ་བྱུང་གི་བཀོད་སྒྲིག་གཞིར་བཟུང་། “དོན་ཆེན་བཞིར”དམ་པོར་དམིགས་པ་དང་། “འཛུགས་གཏོད་བཞིར”ཤུགས་བརྒྱབ་སྟེ་གསར་གཏོད་རང་བཞིན་ལྡན་པའི་སྒོ་ནས་མི་དམངས་འཐུས་ཚོགས་ཀྱི་ལས་དོན་ཁག་སྤེལ་ནས“ལོ་ལྔ་ཚན་བཅོ་ལྔ་པའི”འགོ་ཡག་པོ་འཛུགས་ཐུབ་པ་དང་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་ཆེད་མི་དམངས་འཐུས་ཚོགས་ཀྱི་ལེགས་སྐྱེས་གསར་པ་འབུལ་རྒྱུ་ཡིན།

(གཅིག) ཆབ་སྲིད་ཀྱི་ཁ་ཕྱོགས་ལ་སྔར་བས་དམ་འཛིན་བྱ་རྒྱུ། ཏང་གིས་མི་དམངས་འཐུས་ཚོགས་ཀྱི་ལས་དོན་ལ་ཕྱོགས་ཡོངས་ནས་འགོ་ཁྲིད་བྱ་རྒྱུ་མཐའ་འཁྱོངས་དང་ཤུགས་སྣོན་བརྒྱབ་སྟེ། མི་དམངས་འཐུས་ཚོགས་ཀྱི་ལས་དོན་དེ་ཐོག་མཐའ་བར་གསུམ་དུ་རང་སྐྱོང་ལྗོངས་ཏང་ཨུད་ཀྱི་འགོ་ཁྲིད་གཙང་བཙན་འོག་དགོངས་སྐོར་སྙན་སེང་ཞུ་བའི་ལམ་ལུགས་དོན་འཁྱོལ་ནན་པོ་བྱེད་པ་དང་སྦྲགས་རང་སྐྱོང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་དེ་དོན་ཚན་རེ་རེ་བཞིན་དོན་ཐོག་ཏུ་འཁྱོལ་བ་དང་། དོན་དག་རེ་རེ་བཞིན་གནད་ལ་སྨིན་པ། བྱ་བ་ཚང་མར་ཕན་འབྲས་ཐོན་པ་བཅས་བྱ་རྒྱུ། རྒྱུན་ལས་ཨུ་ལྷན་ཏང་ཙུའི་འགོ་ཁྲིད་བྱེད་ལམ་འཐུས་ཚང་དུ་གཏོང་རྒྱུ་དང་། རྒྱུན་རྣམ་ཅན་གྱི་སྒོ་ནས“གྲོས་དོན་དང་པོའི་ལམ་ལུགས”དོན་འཁྱོལ་བྱ་རྒྱུ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འཛུགས་པར་སྐུལ་འདེད་གཏོང་རྒྱུར་དམིགས་ནས་བརྒྱུད་རིམ་ཧྲིལ་པོའི་མི་དམངས་དམངས་གཙོ་སྔར་བས་གོང་འཕེལ་གཏོང་བ་དང་མི་དམངས་འཐུས་ཚོགས་ཀྱི་འགན་ནུས་འདོན་སྤེལ་གང་ལེགས་བྱས་ཏེ་ལྗོངས་ཡོངས་སུ་ཆབ་སྲིད་བརྟན་འཇགས་དང་། སྤྱི་ཚོགས་བརྟན་ལྷིང་། མི་རིགས་མཐུན་སྒྲིལ། ཆོས་ལུགས་ཞི་དུལ། དཔལ་འབྱོར་གོང་འཕེལ། སྐྱེ་ཁམས་བཟང་བ། མཐའ་སྲུང་སྲ་བརྟན། མི་དམངས་བདེ་སྡོད་ལས་བརྩོན་བཅས་ཡོང་བར་རམ་འདེགས་བྱ་རྒྱུ་ཡིན།

ཆབ་སྲིད་ཀྱིས་སྣེ་ཁྲིད་བྱས་ནས་ལྷད་མེད་ལྷག་བསམ་གཏོད། སྤོབས་སེམས་ཆེན་པོས་འགན་འཁྲི་ཁུར་ནས་ལས་རྗེས་གསར་པ་འཇོག ང་ཚོས་སྲ་ཞིང་བརྟན་པའི་ཆབ་སྲིད་ཀྱི་བློ་དཀར་སེམས་དཀར་དང་། རྟག་བརྟན་འགྱུར་མེད་ཀྱི་ཆབ་སྲིད་ཀྱི་ངེས་ཤུགས་ལ་བརྟེན་ནས་མི་དམངས་འཐུས་ཚོགས་ལས་དོན་གྱི་ཆབ་སྲིད་ཀྱི་རྩ་བའི་རྨང་གཞི་བརྟན་དུ་གཏོང་རྒྱུ་ཡིན།

(གཉིས) ཁྲིམས་བཟང་སྐྱོང་མཁས་ཐད་སྔར་བས་སྐུལ་འདེད་གཏོང་རྒྱུ། ཆོས་ཉིད་ལ་བརྩི་སྲུང་ཞུས་ནས་ཚན་རིག་དང་མཐུན་པའི་ཁྲིམས་འཛུགས་དང་། བློ་གྲོས་གཅིག་སྡུད་བྱས་ནས་དམངས་གཙོའི་ཁྲིམས་འཛུགས། མཐའ་ཚད་བརྟན་སྲུང་བྱས་ནས་ཁྲིམས་བཞིན་ཁྲིམས་འཛུགས་བཅས་བྱ་རྒྱུ། “འགལ་ཆ་མེད་པ་དང་། ཁྱད་ཆོས་ལྡན་པ། གོ་ཆོད་པ”བཅས་ཀྱི་རྩ་དོན་མཐའ་འཁྱོངས་བྱས་ཐོག“བཅད་ཁ་ཆུང་ངུ”དང“ཆུང་བདེ་མྱུར་གསུམ”གྱི་ཁྲིམས་འཛུགས་སྟངས་འཚོལ་ཞིབ་ཧུར་ཐག་བྱས་ཏེ། “འདུ་ཤེས་གསུམ”གྱི་སློབ་གསོའི་གྲུབ་འབྲས་སྲ་བརྟན་དང་རྒྱ་སྐྱེད་མཐོར་འདེགས་གཏོང་རྒྱུ་དང་། ལྷོ་རི་བྱང་རིའི་ནགས་བཟོ་སྔོ་སྒྱུར་གྱི་སྤུས་འབྲས་ལེགས་སུ་གཏོང་རྒྱུ། རི་སྐྱེས་སྲོག་ཆགས་ཀྱི་གནོད་གུན་གསབ་རྒྱུར་དམིགས་པའི་མང་ཚོགས་ཀྱི་དོ་ཁུར་ལ་ལན་སྤྲོད་བྱ་རྒྱུ་བཅས་ལ་དམ་པོར་དམིགས་ཏེ། བཅའ་ཁྲིམས་ལྟར་མི་དམངས་འཐུས་ཚོགས་ཀྱིས་རང་བརྟེན་ཁྲིམས་འཛུགས་བྱ་རྒྱུ། བརྒྱུད་རིམ་གྱི་ལྟ་བ་དང་། འཕྲལ་མཁོ་སྔོན་བཟོ། སྤུས་ཚད་སྔོན་འཇོག་བཅས་མཐའ་འཁྱོངས་བྱས་ཏེ། ཁྲིམས་སྲོལ་རྣམ་གྲངས་ཁག་16ལ་གྲོས་ཞིབ་དང་། ཁྲིམས་སྲོལ་རྣམ་གྲངས་ཁག་11ལ་བརྟག་ཞིབ་དང་རིགས་པས་ཁུངས་སྐྱེལ་བྱེད་རྩིས་ཡོད། ཁྲིམས་སྲོལ་ལ་ཞིབ་བཤེར་དང་གཙང་སེལ་བྱེད་པའི་ལས་ཀར་སྤྱི་འདོམས་ཡག་པོ་བྱ་རྒྱུ་བཅས་ཡིན།

ཁྲིམས་སྐྱོང་གིས་གོང་འཕེལ་ལ་འགན་སྲུང་བྱེད། ཁྲིམས་བཟང་སྐྱོང་མཁས་ཀྱིས་དམངས་འཚོར་ཕན་པ་འདོགས། ང་ཚོས་སྤུས་ཚད་མཐོ་བའི་ཁྲིམས་འཛུགས་ལ་བརྟེན་ནས་གོང་འཕེལ་གཏོང་རྒྱུའི་ཐད་ཀྱི་དཀའ་གནད་སེལ་བ་དང་མང་ཚོགས་ཀྱི་རེ་སྒུག་ལ་བརྡ་ལན་བསློགས་ཏེ། བོད་ཀྱི་ས་གནས་རང་བཞིན་གྱི་ཁྲིམས་སྲོལ་མ་ལག་གི“ཀ་བཞི་གདུང་བརྒྱད”རིམ་པས་བསྐྲུན་པའི་ཁར། ཁྲིམས་སྐྱོང་གི་བསམ་གཞི་དང་ཁྲིམས་སྐྱོང་བྱེད་སྟངས་ལ་བརྟེན་ནས“དོན་ཆེན་བཞི”དང“འཛུགས་གཏོད་བཞིར”འཕྲད་པའི་གདིང་རྩའི་གནད་དོན་ཐག་གཅོད་བྱས་ཏེ། ཕྱོགས་ཡོངས་ནས་ཁྲིམས་ལྟར་བོད་སྐྱོང་བར་བོད་ཀྱི་ཁྱད་ཆོས་དེ་བས་མངོན་གསལ་དོད་པ་དང་ལག་ལེན་གྱི་ཕན་འབྲས་དེ་བས་ཆེ་བ་ཐོན་རྒྱུར་རྒྱུན་ཆད་མེད་པར་སྐུལ་འདེད་གཏོང་རྒྱུ་ཡིན།

(གསུམ) ལྟ་སྐུལ་གྱི་སྤུས་འབྲས་སྔར་བས་ཆེ་རུ་གཏོང་རྒྱུ། འབེན་དམིགས་ཇུས་འདོན་དང་གནད་འཕིགས་ཤུགས་འདོན་བྱ་རྒྱུ་མཐའ་འཁྱོངས་བྱས་ཏེ། “ལོ་ལྔ་ཚན་བཅོ་ལྔ་པའི”འཆར་འགོད་རྩ་གནད་དོན་འཁྱོལ་ལག་བསྟར་བྱ་རྒྱུར་དམིགས་ནས་ལྟ་སྐུལ་རྣམ་གྲངས་ཁག་23བཀོད་སྒྲིག་བྱེད་རྩིས་ཡོད། མཚོ་བོད་ས་མཐོའི་སྐྱེ་ཁམས་སྲུང་སྐྱོང་དང་། གཞུང་ཁོངས་ཁེ་ལས་ཀྱི་མ་རྩའི་རིགས་ཀྱི་དོན་གནད་སྐོར་གལ་ཆེའི་ཇུས་ཐག་གཅོད་པ་དང་དོ་དམ་བྱེད་རིགས་གཙོ་གནད་དུ་བཞག་ནས་ཆེད་དོན་འདྲི་རྩད་བྱ་རྒྱུ། ནོར་སྲིད་དཔལ་འབྱོར་ལས་དོན་གྱི་ལྟ་སྐུལ་ལམ་ལུགས་ཁག་2བཟོ་འབེབས་བྱ་རྒྱུ། ལྟ་སྐུལ་གྱི་རྣམ་གྲངས་གཏན་འཁེལ་དང་། ལག་བསྟར། ཕན་འབྲས་འདྲི་རྩད་སོགས་ཀྱི་ལས་ཀར་སྤྱི་འདོམས་ཇུས་འགོད་བྱས་ཏེ། “བྱ་བ་མ་བསྒྲུབས་གོང་མཉམ་དུ་གྲོས་མོལ་བྱེད་པ་དང་། བྱ་བ་སྒྲུབ་རིང་མཉམ་འགུལ་བྱེད་པ། བྱ་བ་བསྒྲུབས་རྗེས་མཉམ་དུ་ལྟ་སྐུལ་བྱེད་པ”བཅས་ཀྱི་མ་ལག་བཟོས་ཏེ་ནུས་པ་ལྡན་པ་དང་། གོ་རིམ་ལྡན་པ། ཕན་འབྲས་ལྡན་པ་བཅས་ཀྱི་སྒོ་ནས་ལྟ་སྐུལ་གྱི“མཇུག་འཕྲོའི་ལས་དོན”ཡག་པོར་བསྒྲུབས་ཐོག ལྟ་སྐུལ་ཞོར་ལ་རྒྱབ་སྐྱོར་བྱས་ནས་རྒྱལ་ཁབ་ལས་ཁུངས་ཀྱིས་ལས་ཀར་ཤུགས་སྣོན་རྒྱག་པ་དང་ལེགས་བཅོས་བྱེད་པར་སྐུལ་འདེད་གཏོང་རྒྱུ་བཅས་ཡིན།

ཁྲིམས་ལྟར་ལྟ་སྐུལ་བྱེད་པའི་ཕན་ནུས་སྔར་བས་མངོན་གསལ་དོད་པ་དང་། སྤྱི་ཡོངས་ལ་ཞབས་འདེགས་ཞུ་བའི་སྤུས་ཚད་སྔར་བས་ལེགས་པོ་ཡོང་བར་བྱ་རྒྱུ། ང་ཚོས་གནད་འཕིགས་ལྟ་སྐུལ་ལ་བརྟེན་ནས་གནད་དོན་ཐག་གཅོད་ཐུབ་རྒྱུར་སྐུལ་འདེད་གཏོང་བ་དང་ལྟ་སྐུལ་ནུས་ལྡན་ལ་བརྟེན་ནས་ལམ་ལུགས་ཀྱི་ལེགས་ཆ་མངོན་པར་བྱས་ཏེ། ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱ་དོན་འཁྱོལ་གནད་སྨིན་དང་གཡུར་ཟའི་གྲུབ་འབྲས་ཐོབ་པར་བྱ་རྒྱུ་ཡིན།

(བཞི) འཐུས་མིའི་ནུས་པ་སྔར་བས་འདོན་སྤེལ་བྱ་རྒྱུ། “‘ལོ་ལྔ་ཚན་བཅོ་ལྔ་པར’ནུས་ཤུགས་བསྒྲིལ་ནས་འཐུས་མིས་གདོང་ལེན་པ་བྱེད་པའི”བརྗོད་དོན་གཙོ་བོའི་བྱེད་སྒོ་སྤེལ་ཏེ། “གཅིག་རེ་དྲུག”དེ་དམ་འཛིན་བྱ་གཞིར་བྱས་ནས་འགན་འཁྲི་སྒྲུབ་པའི་ལག་ལེན་གཏིང་ཟབ་ཏུ་གཏོང་རྒྱུ། འཐུས་མིའི་འབྲེལ་གཏུག་བྱེད་ལམ་གཏིང་ཟབ་ཏུ་བཏང་སྟེ། ཆེད་ལས་ཚོགས་ཆུང་བཙུགས་ནས་འཐུས་མི“ཁྱིམ་གཞིས་དང་ས་ཚིགས་ལ་སྐྱོད་པར”སྐུལ་འདེད་གཏོང་རྒྱུ། གྲོས་གཞི་དང་གྲོས་འཆར་གྱི་སྤུས་འབྲས་ལེགས་སུ་གཏོང་བ་དང་། གྲོས་འཆར་སྒྲུབ་སྐུལ་དང་ཚོད་སྐོར་བྱེད་ལམ་གསར་འཛུགས་དང་འཐུས་སྒོ་ཚང་དུ་བཏང་སྟེ། “གཉེར་སྒྲུབ་བྱས་ཟིན་པ”ནས“གྲོས་འཆར་གཉེར་སྒྲུབ་ཡག་པོ་བྱེད་པ”དང་། “ལན་འདེབས་རྣམ་པ”ནས“དོན་འཁྱོལ་རྣམ་པའི”ཕྱོགས་སུ་འགྱུར་བར་སྐུལ་འདེད་གཏོང་རྒྱུ། གྲོང་ཁྱེར་དང་། རྫོང་། ཤང་བཅས་ཀྱི་མི་དམངས་འཐུས་ཚོགས་ཀྱི་སྐབས་བརྗེའི་མཛུབ་ཁྲིད་ལ་ཤུགས་སྣོན་རྒྱག་རྒྱུ། ལྗོངས་ཡོངས་ཀྱི་མི་དམངས་འཐུས་ཚོགས་འཐུས་མིའི་ལས་དོན་གྱི་སྐུལ་སྤེལ་ཚོགས་འདུ་སྐོང་ཚོགས་བྱ་རྒྱུ། མི་དམངས་འཐུས་ཚོགས་ཀྱི་ལས་ཀའི་ནུས་པ་འཛུགས་སྐྱོང་ལ་ཤུགས་སྣོན་རྒྱག་རྒྱུའི་སྐོར་གྱི་བསམ་འཆར་བཟོ་རྒྱུ་བཅས་ཡིན།

དམངས་ལ་རེ་འབོད་ཡོད་ཕྱིན་ང་ཚོས་ངེས་པར་དུ་བརྡ་ལན་སློག་པ་དང་། དམངས་ལ་རེ་སྒུག་ཡོད་ཕྱིན་ང་ཚོས་ངེས་པར་དུ་དོན་གཉེར་བྱ་རྒྱུ། ང་ཚོས་འཐུས་མིའི་གནས་བབ་གཙོ་བོར་བརྩི་འཇོག་དང་། འཐུས་མིའི་འགན་སྒྲུབ་ལ་འགན་སྲུང་བྱེད་པའི་མ་ལག་འཐུས་སྒོ་ཚང་དུ་བཏང་སྟེ། འཐུས་མིའི་ནུས་པ་འདོན་སྤེལ་སྔར་བས་གང་ལེགས་དང་། མང་ཚོགས་དང་འབྲེལ་འདྲིས་སྔར་བས་དམ་ཟབ། མི་དམངས་ལ་ཞབས་འདེགས་སྔར་བས་ནུས་ལྡན་ཞུ་རྒྱུ་ཡིན།

(ལྔ) ཉམས་སད་ཐེག་ཐུབ་པའི་དཔུང་ཁག་སྔར་བས་ལེགས་སྐྱོང་བྱ་རྒྱུ། “ལས་ཁུངས་བཞིའི”བླང་བྱ་ལྟར། ཡང་དག་པའི་སྲིད་དོན་ལས་རྗེས་ལྟ་བ་བརྟན་པོར་འཛུགས་པ་དང་དོན་གཉེར་བྱས་ཏེ། རང་རྟོགས་ངང་མི་དམངས་ཀྱི་ཆེད་དུ་སྲིད་དོན་ལས་རྗེས་འཇོག་ཐུབ་པ་དང་། དངོས་སྒྲུབ་ལ་བརྟེན་ནས་སྲིད་དོན་ལས་རྗེས་བཞག་སྟེ་སྒྲུབ་དགོས་པའི་རིགས་ངེས་པར་དུ་སྒྲུབ་པ་དང་། སྒྲུབ་ཐུབ་པའི་རིགས་ཧུར་ཐག་གིས་སྒྲུབ་པ། སྒྲུབ་མི་ཆོག་པའི་རིགས་གཏན་ནས་མི་སྒྲུབ་པ་བཅས་ཀྱི་ཐོག་ནས་ཆབ་སྲིད་ཀྱི་བློ་རྩ་བརྟན་པ་དང་། མི་དམངས་ལ་ཞབས་འདེགས་ཞུས་པ། ཁྲིམས་སྐྱོང་གོང་དུ་བཀུར་བ། དམངས་གཙོ་འདོན་སྤེལ་བྱེད་པ། འཁྲི་འགན་གཙང་སྒྲུབ་བྱེད་པ་བཅས་ཀྱི་མི་དམངས་འཐུས་ཚོགས་ཀྱི་ལས་ཀའི་དཔུང་ཁག་ཅིག་གཏོད་པ་དང་། “འགན་སྒྲུབ་གསལ་ཐོའི”འགན་འཁྲིའི་མ་ལག་འཐུས་སྒོ་ཚང་དུ་བཏང་ནས“དམར་འདོན་དཔྱད་བསྡུར”གྱི་ལྟ་སྐུལ་འགན་འདེད་མ་ལག་འཛུགས་རྒྱུ། གཡོ་འགུལ་སྤུ་ཙམ་མེད་པར་ཕྱོགས་ཡོངས་ནས་ཏང་ནན་པོས་སྐྱོང་བར་སྐུལ་འདེད་བཏང་སྟེ་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་ཤུགས་སྣོན་རྒྱག་རྒྱུ། ཟ་མཁས་འཐུང་མཁས་ཀྱི་གོམས་གཤིས་འཇགས་པའི་བླང་བྱ་དོན་འཁྱོལ་དང་། རྒྱུན་ཆད་མེད་པར་སྤྱོད་ཚུལ་ལེགས་བཅོས་དང་དོན་འཁྱོལ་ལ་དམ་འཛིན་ནན་པོ་བྱས་ཏེ། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་གཏན་འགོག་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་བར་སྣེ་ཁྲིད་བྱ་རྒྱུ་བཅས་ཡིན།

འཐུས་མི་རྣམ་པ་ཚོ།

བརྗིད་ཆགས་དཔེ་རིས་མངོན་པར་བཀྲ། ལག་ལེན་དངོས་ཀྱིས་འབྱུང་འགྱུར་གཏོད། ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་བྱས་ཏེ། རང་སྐྱོང་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག མི་དམངས་འཐུས་མི་ཚོགས་ཆེན་གྱི་ལམ་ལུགས་དེ་བློ་བརྟན་འགྱུར་མེད་ཀྱིས་རྒྱུན་འཁྱོངས་ཡག་པོ་བྱེད་པ་དང་། དུས་བསྟུན་མདུན་སྐྱོད་ཀྱིས་འཐུས་སྒོ་ཚང་དུ་གཏོང་བ། གཞུང་འཁྱོངས་གསར་འབྱེད་ཀྱིས་འཁོར་སྐྱོད་ཡག་པོ་བྱེད་པ་བཅས་ཀྱི་ཁར། གདེང་ཚོད་བརྟན་པོ་དང་། མདུན་སྐྱོད་ཡར་བརྩོན། དངོས་འཛིན་དངོས་སྒྲུབ་བཅས་བྱས་ནས་མི་དམངས་འཐུས་ཚོགས་དང་དེའི་རྒྱུན་ལས་ཨུ་ལྷན་གྱི་ལས་དོན་དེ“ལོ་ལྔ་ཚན་བཅོ་ལྔ་པའི”འཆར་འགོད་འགོ་ཚུགས་ལོ་ལ་སྐས་རིམ་གསར་པར་སླེབས་པ་དང་ལེགས་སྐྱེས་གསར་པ་འབུལ་ཐུབ་པར་སྐུལ་འདེད་ཏན་ཏིག་གཏོང་རྒྱུ་ཡིན།

(རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་བཞི་པའི་དྲུང་ཡིག་ཁྲུའུ་ནས་མཁོ་འདོན་བྱས་པ་གཞིར་བཟུང)