“ཉེ་བའི་ལོ་ཤས་རིང་། མཐའ་མཚམས་མང་ཚོགས་ཀྱི་འཚོ་བ་སྔར་བས་སྐྱིད་དུ་ཕྱིན་ཡོད”ཅེས་ཞིང་ལས་དང་གྲོང་གསེབ་རིགས་ཁོངས་ཀྱི་སྲིད་གྲོས་ཨུ་ཡོན་དབང་འདུས་ཀྱིས་གསར་འགོད་པར་བཤད། སྙན་སྒྲོན་ནང་བཀོད་པའི་མཐའ་མཚམས་འཕེལ་རྒྱས་ཀྱི་འཆར་གཞིའི་སྐོར་ཉན་སྐབས། ས་སྐྱེས་རྡོ་སྐྱེས་ཀྱི་མཐའ་མཚམས་འབྲོག་པ་ཞིག་ཡིན་པའི་ཁོང་ལ་མྱོང་ཚོར་ཟབ་མོ་བྱུང་ཡོད།

འདས་ཟིན་པའི་ལོ་གཅིག་ནང་། དབང་འདུས་ཀྱིས་མཐའ་མཚམས་འབྱོར་འབྲིང་གྲོང་ཚོ་འཕེལ་རྒྱས་གཏོང་བའི་ཐད་དོ་ཁུར་ཆེན་པོ་བྱས་ཤིང་། ས་གནས་དེ་གའི་ཁྱད་ལྡན་བོད་བྱ་གསོ་ཚགས་དང་ས་མཐོའི་སྨན་རྩྭ་འདེབས་འཛུགས་ཀྱི་ལས་དོན་དེ་གྲོང་གསེབ་ཡུལ་སྐོར་དང་ཟུང་འབྲེལ་ཐུབ་པར་སྐུལ་འདེད་ཧུར་ཐག་བཏང་ནས། གྲོང་མིར་གསར་དུ་བསྐྲུན་པའི་བདེ་སྡོད་ཁང་པའི་ནང་ཁྱིམ་ཚང་མགྲོན་ཁང་གཉེར་རོགས་བྱས་པ་དང་། གྲོང་ཚོའི་ནང་ཁྱད་ལྡན་ཐོན་རྫས་ཕྱིར་ཚོང་ས་ཚིགས་བསྐྲུན་ཏེ། མཛེས་སྡུག་ལྡན་པའི་གྲོང་གསེབ་ལ་བརྟེན་ནས་དཔལ་འབྱོར་འཕེལ་རྒྱས་ལ་སྐུལ་འདེད་བཏང་བ་རེད། ཁོང་གིས“ད་ཆ། ང་ཚོའི་གྲོང་ཚོར་གཞུང་ལམ་ཤར་གཏོང་ཐུབ་པ་དང་གློག་སྒྲོན་གསར་པ་བསྒར་བ་སོགས་རྨང་གཞིའི་སྒྲིག་བཀོད་འཐུས་སྒོ་ཚང་པོ་ཡོད་ལ། སློབ་གྲྭ་དང་འཕྲོད་བསྟེན་ཁང་སོགས་ཀྱང་བསྐྲུན་ཡོད”ཅེས་གསུངས།

“སྲིད་གྲོས་ཨུ་ཡོན་ཞིག་ཡིན་པའི་ངོས་ནས། མཐའ་མཚམས་མང་ཚོགས་ཀྱི་དོ་ཁུར་ཆེ་ཤོས་བྱེད་པའི་རེ་འདུན་དག་ཚོགས་འདུར་གོང་ཞུ་བྱེད་དགོས། ངས་མུ་མཐུད་མཐའ་མཚམས་ཀྱི་འཐབ་ས་དང་པོར་གཞི་ཚུགས་ནས་མཐའ་མཚམས་འཕེལ་རྒྱས་ཆེད་གྲོས་འགོ་དེ་བས་མང་བ་བཏོན་ཏེ། མཐའ་མཚམས་མང་ཚོགས་རྣམས་བདེ་སྐྱིད་ལྡན་པའི་འཚོ་བ་སྐྱེལ་ཐུབ་པ་བྱེད་ཀྱི་ཡིན”ཞེས་དབང་འདུས་ཀྱིས་གསུངས།