“‘ལོ་ལྔ་ཚན་བཅུ་བཞི་པའི’རིང་། རང་ལྗོངས་ཀྱི་དམངས་ཕན་བྱ་ཐབས་རབ་དང་རིམ་པ་དོན་འཁྱོལ་བྱུང་བས་མཐའ་མཚམས་ས་ཁུལ་གྱི་རྣམ་པ་གསར་རྐྱང་དུ་གྱུར་ཡོད་ལ། མང་ཚོགས་ཀྱི་འཚོ་བའང་ཉིན་རེ་བཞིན་ཇེ་ལེགས་སུ་ཕྱིན་ཏེ། ‘ལོ་ལྔ་ཚན་བཅོ་ལྔ་པའི’འགོ་ཡག་པོ་འཛུགས་རྒྱུར་རྨང་གཞི་བརྟན་པོ་ཞིག་བཏིང་ཡོད”

“སྲིད་གཞུང་གི་ལས་དོན་སྙན་སྒྲོན་ནང‘མཐའ་མཚམས་འཛུགས་སྐྲུན་ལ་གཞི་ཚུགས་ནས་མཐའ་བརྟན་མཐའ་དར་དམངས་ཕྱུག་བཅས་ཀྱི་བྱ་སྤྱོད་ལ་སྐུལ་འདེད་ཏན་ཏིག་གཏོང་དགོས’ཞེས་ཁ་གསལ་བཏོན་ཡོད། སྙན་སྒྲོན་གྱི་ཡིག་འབྲུ་རེ་རེས་མི་རྣམས་ལ་འབད་འབུངས་མདུན་སྐྱོད་བྱེད་པའི་ཡར་སྐུལ་ཐེབས་ལ། བཀོད་སྒྲིག་འདིས་འབྱུང་འགྱུར་ལ་ཡིད་ཆེས་ཀྱིས་ཁེངས་སོང”ཞེས་ཨུ་ཡོན་ཚོས་གྲོས་བསྡུར་འཁྲུག་པོ་གནང་།

སྲིད་གཞུང་གི་ལས་དོན་སྙན་སྒྲོན་ནང“ལོ་ལྔ་ཚན་བཅོ་ལྔ་པའི”རིང་མཐའ་བརྟན་མཐའ་དར་དམངས་ཕྱུག་བཅས་ཀྱི་བྱ་སྤྱོད་མུ་མཐུད་ལག་ལེན་ཤུགས་ཆེན་བསྟར་ཏེ། མཐའ་བརྟན་ཡོང་བར་ནུས་པ་ལྡན་པ་དང་། མཐའ་དར་ལ་འདེགས་སྐྱོར་ཐུབ་པ། དམངས་ཕྱུག་གི་ཐབས་ལམ་ཡོད་པ་བཅས་ཀྱི་མཐའ་མཚམས་འཕེལ་རྒྱས་ཀྱི་རྣམ་པ་གསར་པ་ཞིག་མགྱོགས་མྱུར་བསྐྲུན་དགོས་ཞེས་བསྟན་ཡོད། བཀོད་སྒྲིག་འདིས་ཀྱང་མཐའ་མཚམས་ཀྱི་འཐབ་ཕྱོགས་དང་པོར་གཞིས་ཆགས་པའི་འཐུས་མི་དང་ཨུ་ཡོན་མང་པོར་ལྕག་སྐུལ་ཆེན་པོ་ཐེབས་ཡོད།

རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་དང་ཉིང་ཁྲི་གྲོང་ཁྱེར་རྫ་ཡུལ་རྫོང་རྫ་ཡུལ་རོང་སྨད་གྲོང་རྡལ་གྲོང་གསར་གྲོང་ཚོའི་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཡུ་སྒྲོན་གྱིས“ལོ་འདི་དག་རིང་། གྲོང་གསར་གྲོང་ཚོར་སྡོད་ཁང་གསར་པ་བརྒྱབ་པ་དང་། ལས་རིགས་གསར་པ་དར་སྤེལ་བྱུང་སྟེ་ཁྱིམ་ཚང་ཚང་མ་དེ་བས་བདེ་སྐྱིད་ལྡན་པའི་འཚོ་བ་སྐྱེལ་རྒྱུ་བྱུང་ཡོད། གྲོང་ཚོ་ཡོངས་ཀྱི་དུད་ཚང་71གི་ཡུལ་མི་ཚང་མ་ནི་མཐའ་མཚམས་འཕེལ་རྒྱས་ཀྱི་བདེན་དཔང་བྱེད་མཁན་དང་། དེའི་ནང་ཞུགས་མཁན། ཕན་པ་ཐོབ་མཁན་བཅས་ཤ་སྟག་ཡིན”ཞེས་མྱོང་ཚོར་ཟབ་མོའི་ངང་གསུངས།

མཐའ་བརྟན་ནི་འགན་འཁྲི་ཞིག་དང་། མཐའ་དར་ནི་ལས་འགན་ཞིག་ཡིན། “ལོ་ལྔ་ཚན་བཅུ་བཞི་པའི”རིང་། བོད་ཀྱི་ཟོག་འགྲེམས་ཀྱི་རྨང་གཞིའི་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་པ་དང་། དེང་རབས་ཀྱི་ཚོང་དོན་འཁོར་རྒྱུག་མ་ལག་རྒྱུན་ཆད་མེད་པར་འཐུས་སྒོ་ཚང་དུ་ཕྱིན་ནས་ཟོག་འགྲེམས་ལྟེ་གནས་སོགས་འཛུགས་སྐྲུན་ལ་ཚད་བརྒལ་ཆེན་པོ་བྱུང་བ་མ་ཟད། མཐའ་མཚམས་འགག་སྒོའི་སྒྲིག་བཀོད་ཀྱང་རྒྱུན་ཆད་མེད་པར་འཐུས་སྒོ་ཚང་དུ་ཕྱིན་ཏེ། མཐའ་མཚམས་ཚོང་དོན་ཟོག་འགྲེམས་ལས་རིགས་འཕེལ་རྒྱས་འགྲོ་བར་དགེ་མཚན་ལྡན་པའི་ཕན་འབྲས་ཐོན་པ་དེས་ཀྱང་མཐའ་དར་དམངས་ཕྱུག་ཡོང་བར་སྒུལ་ཤུགས་ཆེན་པོ་བསྣན་ཡོད།

“མིག་སྔའི་བར། བོད་ཀྱི་སྦྲག་ལས་ཀྱིས་གྲོང་གསེབ་ཀྱི་བསྐུར་མ་སྐྱེལ་ཡུལ་781ལ་རླངས་འཁོར་གྱིས་སྐྱེལ་རྒྱུ་ཡོངས་ཁྱབ་བྱུང་བ་མ་ཟད། སྒྲིག་ཁོངས་གྲོང་ཚོ་1134ལ་བསྐུར་མ་སྐྱེལ་རྒྱུ་གཟའ་འཁོར་རེར་ཐེངས་གསུམ་ནས་ཐེངས་ལྔ་བར་མང་དུ་ཕྱིན་ནས་ཞིང་འབྲོག་མང་ཚོགས་ཀྱི་སྦྲག་བསྐུར་སྒུག་ཡུན་ཐུང་དུ་ཕྱིན་ཡོད”རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་དང་ཀྲུང་གོ་སྦྲག་ལས་ཚོགས་པ་ཚད་ཡོད་ཀུང་སི་བོད་རང་སྐྱོང་ལྗོངས་ཡན་ལག་ཀུང་སིའི་སྤྱི་ཁྱབ་ཅིང་ལི་གཞོན་པ་བཀྲ་ཤིས་དོན་གྲུབ་ཀྱིས་བརྗོད་དོན། སྦྲག་ལམ་ཤར་གཏོང་ཐུབ་ནས་མཐའ་མཚམས་གྲོང་ཚོའི་ཁྱད་ལྡན་ཞིང་ལས་ཐོན་རྫས་རི་ཁུལ་ནས་ཐོན་ཐུབ་སྟེ་ཚོང་ལམ་རྒྱ་བསྐྱེད་པ་དེས་མང་ཚོགས་ཀྱི་འཚོ་བའི་དངོས་ཟོག་མཁོ་སྤྲོད་ཀྱི་ཐབས་ལམ་རྒྱ་ཆེར་ཕྱིན་ནས་མཐའ་མཚམས་ཀྱི་དངོས་ཟོག་ཉོ་ཚོང་དང་ཟོག་འགྲེམས་ཀྱི་གསོན་ཤུགས་འཕེལ་ནས། ས་ཁུལ་གྱི་དཔལ་འབྱོར་འཕེལ་རྒྱས་འགྲོ་བར་སྐུལ་ཁྲིད་ཐུབ་པ་མ་ཟད། མཐའ་མཚམས་དང་ཕྱི་རོལ་དབར་གྱི་འབྲེལ་བ་སྔར་བས་དམ་ཟབ་བྱུང་ནས་མཐའ་མཚམས་ས་ཁུལ་འཕེལ་རྒྱས་ཀྱི་འབྲེལ་ཟམ་ཞིག་བསྐྲུན་ཡོད།