དམངས་འཚོ་ནི་དཔལ་འབྱོར་འཕེལ་རྒྱས་ཀྱི་འགོ་འཛུགས་ས་དང་དོན་ལ་བབས་ས་ཡིན་པ་དང་། དཔལ་འབྱོར་འཕེལ་རྒྱས་ནི་དམངས་འཚོ་འགན་ལེན་དང་ལེགས་སུ་གཏོང་བའི་དངོས་པོའི་རྨང་གཞི་དང་རྩ་བའི་ཐབས་ལམ་རེད། “དམངས་འཚོར་དོ་ཁུར་བྱེད་པ་ནི་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་ལག་ལེན་བསྟར་བའི་མཚོན་ཚུལ་ཞིག་ཡིན་པས། ངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དོན་དངོས་དང་ཟུང་འབྲེལ་བྱས་ནས་དམངས་ལ་ཕན་པའི་གྲོས་གཞི་བཏོན་ཡོད”ཅེས་རང་སྐྱོང་ལྗོངས་སྲིད་གྲོས་གསར་འགྱུར་དཔེ་སྐྲུན་རིགས་ཁོངས་ཀྱི་ཨུ་ཡོན་རྟ་རྨིག་གསལ་སྒྲོན་གྱིས་གསར་འགོད་པར་གསུངས།

2025ལོར། ཁོང་གིས་ལྗོངས་ཡོངས་ཀྱི་ཁྱབ་ཁོངས་སུ་ས་ཕག་གིས་བརྒྱབ་པའི་གྲོང་གསེབ་སྡོད་ཁང་གི་མངོན་མེད་རྐྱེན་ངན་གྲལ་བཤེར་གང་མགྱོགས་བྱེད་དགོས་པའི་སྐོར་གྱི་གྲོས་གཞི་བཏོན་གནང་བར་དོ་ཁུར་ཆེན་པོ་ཐོབ་པ་དང་། སྡེ་ཚན་མང་པོས་ཕྱར་བ་གྲུ་འདེགས་བྱས་པར། གྲལ་བཤེར་བཅོས་སྒྲིག་ལས་དོན་ལ་གྲུབ་འབྲས་ངེས་ཅན་ཐོབ་ཡོད། ཡང་སྒོས་སུ་ས་ཡོམ་གྱི་གནོད་འཚེ་ཕོག་པའི་དིང་རི་དང་ཉེ་འགྲམ་གྱི་ས་ཆ་ཁག་གི་ཁང་པ་བསྐྱར་སྐྲུན་དང་སླར་གསོ་ཡོང་བར་བྱས་ནས་མང་ཚོགས་རྣམས་དགའ་དགའ་སྤྲོ་སྤྲོའི་ངང་ཁང་པ་གསར་པར་སྤོ་ཐུབ་པ་བྱུང་ཡོད།

ད་ལོ་ཁོང་གིས་སྤྱི་ཚོགས་འཕེལ་རྒྱས་ཀྱི་དགོས་མཁོ་དང་གཞི་རིམ་བཅོས་སྐྱོང་གི་དོན་དངོས་ལ་གཞི་ཚུགས་ཏེ་སྡེ་ཁུལ་གྱི་ལས་དོན་པའི་ཐོབ་ཐང་ལེགས་སུ་གཏོང་བའི་གྲོས་གཞི་བཏོན་གནང་བ་རེད། ཁོང་གིས། སྡེ་ཁུལ་གྱི་ལས་དོན་པ་ནི་གཞི་རིམ་གྱི་སྟོབས་ཤུགས་གཙོ་བོ་རེད་ལ། མང་ཚོགས་དང་ཐད་ཀར་འབྲེལ་བ་བྱེད་མཁན་ཡང་རེད། མིག་སྔར་ཁོང་རྣམ་པས་དམངས་འཚོའི་ཞབས་ཞུ་འགན་སྲུང་དང་སྤྱི་ཚོགས་འཆམ་མཐུན་དང་བརྟན་ལྷིང་སོགས་ལ་ནུས་པ་ཤུགས་ཆེན་འདོན་བཞིན་ཡོད། ཁོང་རྣམ་པའི་ཐོབ་ཐང་ལེགས་སུ་བཏང་ཚེ་ཕུལ་བྱུང་གི་གཞོན་སྐྱེས་སྔར་བས་མང་བ་གཞི་རིམ་ལ་བློ་ཁ་ཕྱོགས་པ་དང་གནས་ཐུབ་པས་ད་ཐེངས་ཀྱི་གྲོས་གཞི་འདི་བཏོན་པ་ཡིན་ཞེས་གསུངས།

སྲིད་གྲོས་ཀྱི་ཨུ་ཡོན་ལ་མང་ཚོགས་ཀྱི་སྙིང་གཏམ་ཉན་པ་དང་གནད་དོན་ཐག་གཅོད་ལ་སྐུལ་འདེད་གཏོང་བའི་འགན་འཁྲི་ཡོད་པས། རྟ་རྨིག་གསལ་སྒྲོན་གྱིས་བཏོན་པའི་དམངས་ཕན་གྲོས་གཞི་དེ་ལས་སྲིད་གྲོས་ཨུ་ཡོན་ཚོས་གཞི་རིམ་དུ་རྩ་བ་ཚུགས་ནས་སྤྱི་ཡོངས་ལ་ཞབས་འདེགས་ཞུ་བའི་འགན་འཁྲི་འཁུར་སེམས་དང་ལས་འགན་སྒྲུབ་སེམས་མཚོན་ཐུབ།