དབྱར་འགོར་གཞིས་རྩེ་གྲོང་ཁྱེར་དིང་རི་རྫོང་ཆུ་སྟེང་ཤང་མཐོང་སྨོན་གྲོང་ཚོའི་གང་སར་སྔོ་ཐིང་ཐིང་དུ་གྱུར་འདུག

མཐོང་སྨོན་གྲོང་ཚོར་གྲོང་ཚོའི་ལས་བྱེད་པའི་སྐོར་གླེང་སྐབས་བསྟོད་པའི་མཐེ་བོང་མི་སྒྲེང་མཁན་གཅིག་ཀྱང་མེད། ལོ་མང་རིང་ཁོང་ཚོས་གྲོང་སྡོད་ལས་དོན་རུ་ཁག་དང་མཉམ་དུ་གཞི་རིམ་ཏང་འཛུགས་སྐྱོང་སྲ་བརྟན་དུ་གཏོང་བ་དང་། གྲོང་ཚོའི་ཁོར་ཡུག་ལེགས་སུ་གཏོང་བ། དམངས་ལ་ཕན་པའི་དོན་དངོས་སྒྲུབ་པ་སོགས་ལ་གཞོལ་ཞིང་། མང་ཚོགས་ལ་མཐུན་སྒྲིལ་དང་སྣེ་ཁྲིད་བྱས་ཏེ་མཐོང་སྨོན་གྲོང་ཚོ“ཤང་ཡོངས་ཀྱི་རྗེས་སུ་ལུས་པ”ནས“མདུན་གྲལ་དུ་སླེབས་པའི”བར་གྱི་འགྱུར་ལྡོག་ཡོང་བར་སྐུལ་འདེད་བཏང་ཡོད། 2023ལོར་མཐོང་སྨོན་གྲོང་ཚོ་དེ་ཉིད་གཞིས་རྩེ་གྲོང་ཁྱེར་གྱི་ཤེས་དཔལ་གྲོང་ཚོར་བདམས།

2014ལོར་འཕེལ་རྒྱས་ཀྱི་དགོས་མཁོར་གཞིགས་ཏེ། གྲོང་ཚོའི་དེ་སྔའི་བྱེད་སྟངས་ལ་འགྱུར་ལྡོག་བཏང་ནས་གྲོང་ཚོའི་སློབ་རྒྱུས་ཡོད་པའི་གཞོན་ནུ་རྣམས་གྲོང་ཚོའི་ལས་བྱེད་པར་འདེམས་འགོ་བཙུགས།

ལོ་དེར་ལོ་24ལ་སླེབས་པའི་ནོར་བུ་ཚེ་རིང་གྲོང་མི་ཨུ་ལྷན་གྱི་ཀྲུའུ་རེན་གཞོན་པར་བདམས་པ་དང་། གྲོང་ཚོའི“ཨུ་ལྷན་གཉིས”ཚན་ཁག་ཁྲོད་ཀྱི་སློབ་རྒྱུས(དམའ་རིམ་སློབ་འབྲིང)ཡོད་པའི་ཁོངས་མི་གཅིག་པུ་དེར་གྱུར།

2017ལོར་དབུལ་སྒྲོལ་འགག་སྒྲོལ་དམག་འཐབ་ཚ་ཚ་འུར་འུར་ངང་རྒྱག་འགོ་ཚུགས་ཤིང་། སྐབས་བརྗེས་པ་བརྒྱུད་མཐོང་སྨོན་གྲོང་ཚོར་རྒན་དར་གཞོན་གསུམ་ལས་གྲུབ་པའི་ལས་བྱེད་པའི་འོས་གྲབས་དཔུང་ཁག་གཞི་རྩའི་ཆར་ཆགས་ཏེ། “ཨུ་ལྷན་གཉིས”ཀྱི་ཚན་ཁག་ལ་གསོན་ཤུགས་གསར་པ་མངོན་ཞིང་། ནོར་བུ་ཚེ་རིང་ལ་མུ་མཐུད་མཐོང་ཆེན་བྱས་ཏེ་གྲོང་ཚོ་ཨུ་ལྷན་གྱི་ཀྲུའུ་རེན་ལ་བདམས།

2021ལོར་སྐབས་བརྗེས་རྗེས་ནོར་བུ་ཚེ་རིང་གིས་གྲོང་ཚོའི་ཏང་ཀྲི་པུའི་ཧྲུའུ་ཅིའི་ལས་འགན་གསར་པ་ཁུར་ཞིང་། གྲོང་ཚོའི་ལས་བྱེད་པའི་དཔུང་ཁག་གི་ལོ་ན་ཡང་རིམ་བཞིན་གཞོན་དུ་སོང་། ཁོང་གིས“ད་ཆ་ངས་ཚང་མའི་བློ་སེམས་གཅིག་ཏུ་སྒྲིལ་གང་ཐུབ་བྱས་ཏེ་གཞི་རིམ་རྩ་འཛུགས་ཀྱི་གོང་བུར་འགྲིལ་ཤུགས་ཆེ་རུ་བཏང་ཚེ། གཞི་ནས་དམངས་ལ་བྱ་བ་དངོས་དེ་བས་ལེགས་པའི་སྒོ་ནས་སྒྲུབ་ཐུབ”ཅེས་བཤད།

རྒྱལ་སྲིད་ནི་མི་དམངས་དང་མི་དམངས་ནི་རྒྱལ་སྲིད་ཡིན། མཐོང་སྨོན་གྲོང་ཚོའི་སྐབས་གསར་པའི“ཨུ་ལྷན་གཉིས”ཀྱི་ཚན་ཁག་གི་ལས་འགན་འཁུར་རྗེས་ཀྱི་ལས་ཀ་དང་པོར་དུད་ཚང་ཚང་མར་འཚམས་འདྲིར་བསྐྱོད་དེ་རེ་རེ་བཞིན་གསེད་བཀྲོལ་མཐུན་སྦྱོར་བྱས་ནས་ལོ་20ཙམ་རིང་གི་རྩིས་ཐོ་གསལ་པོར་བཟོས་པ་དང་། གྲོང་ཚོ་རིམ་པའི་ནོར་དོན་ཚད་ལྡན་དུ་བཏང་བ། གྲོང་མིའི་སེམས་ནད་བསལ་ནས་གྲོང་ཚོ་ཨུ་ལྷན་ལ་ཀུན་གྱིས་ཡིད་ཆེས་བྱེད་ཚད་ཆེ་རུ་ཤུགས་ཆེན་བཏང་བ་རེད།

ཏང་གིས་མང་ཚོགས་དང་འབྲེལ་གཏུག་བྱེད་པའི་འབྲེལ་ཟམ་དང་འབྲེལ་ཐག་གི་ནུས་པ་འདོན་སྤེལ་གང་ལེགས་བྱས་ཏེ། རྣམ་པ་མང་པོ་དང་། རིམ་པ་དབྱེ་བ། ཡོངས་སུ་ཁྱབ་པ་བཅས་ཀྱིས་སློབ་སྦྱོང་དྲིལ་བསྒྲགས་བྱེད་སྒོ་སྤེལ་ནས་ཁོངས་གཏོགས་ཁུལ་གྱི་མང་ཚོགས་ཀྱིས་སྨན་བཅོས་འགན་བཅོལ་དང་། རྒན་གསོའི་འགན་བཅོལ། སློབ་གསོའི“འགན་ལེན་གསུམ”སོགས་དམངས་ཕན་སྲིད་ཇུས་ལ་ཤེས་རྟོགས་བྱེད་ཚད་མཐོ་རུ་བཏང་ཞིང་། མིག་སྔར་གྲོང་ཚོ་ཡོངས་ཀྱི་གྲོང་མིའི་རྒན་གསོའི་འགན་བཅོལ་དང་སྨན་བཅོས་འགན་བཅོལ་ནང་ཞུགས་ཚད་100%ཟིན་པ་དང་སློབ་ལོ་ལོན་པའི་བྱིས་པ་སློབ་གྲྭར་ཞུགས་ཚད་100%ཟིན་པ་སོགས་གྲུབ་འབྲས་དགའ་འོས་པ་ཐོབ་ཡོད།

གྲོང་སྡོད་ལས་དོན་རུ་ཁག་གི་གཞོགས་འདེགས་འོག མཐོང་སྨོན་གྲོང་ཚོས་གྲོང་ཚོ་རིམ་པའི་ཏང་རྩ་འཛུགས་ཚད་ལྡན་ཅན་གྱི་འཛུགས་སྐྱོང་ལ་དམ་འཛིན་ནན་པོ་བྱས་པ་བརྒྱུད“ཚོགས་འདུ་གསུམ་དང་སློབ་ཚན་གཅིག”དང་། “བརྗོད་དོན་གཙོ་བོའི་ཏང་གི་ཉིན་མོ” “གྲོས་བསྡུར་བཞི་དང་ཡོངས་བསྒྲགས་གཉིས”སོགས་ཀྱི་ལམ་ལུགས་དོན་འཁྱོལ་ནན་པོ་བྱས་ཏེ། སྤྱོད་གཙང་དྲིལ་བསྒྲགས་སློབ་གསོར་ཤུགས་སྣོན་བརྒྱབ་པ་དང་། རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་སྦྱོང་མུ་མཐུད་བྱས་པ། གྲོང་ཚོ་ཡོངས་ཀྱི་ཏང་ཡོན་ལས་བྱེད་པའི་རིགས་པའི་གཞུང་ལུགས་ཀྱི་ཆུ་ཚད་དང་ལག་ལེན་ནུས་པ་སྔར་བས་ཆེ་རུ་བཏང་བ། གཞི་རིམ་ཏང་རྩ་འཛུགས་ཀྱི་གསར་གཏོད་ནུས་པ་དང་། གོང་བུར་འགྲིལ་ཤུགས། འཐབ་འཛིང་ནུས་པ་བཅས་ཟམ་མི་ཆད་པར་ཆེ་རུ་བཏང་བས་ཏང་འཛུགས་སྐྱོང་ལས་དོན་དེ་ཤང་ཡོངས་ཀྱི་དཔྱད་ཞིབ་ཁྲོད་ལོ་གསུམ་བསྟུད་མར་མདུན་གྲལ་དུ་སླེབས།

2023ལོར་ངལ་རྩོལ་ངལ་ལས་དང་། སྲིད་ཇུས་ཁ་གསབ། ཐོན་ལས་བགོ་འགྲེམས་སོགས་བརྒྱུད་མཐོང་སྨོན་གྲོང་ཚོའི་མང་ཚོགས་མི་རེའི་ཆ་སྙོམས་ཡོང་འབབ་སྒོར་ཁྲི་1.45ཟིན་ཡོད།

“རིམ་ཁག་ཏང་ཨུད་དང་སྲིད་གཞུང་གི་ཡང་དག་པའི་འགོ་ཁྲིད་འོག ང་ཚོར་ཏང་ཡོན་ཡོངས་དང་ཡུལ་མི་སྤུན་ཟླ་ཡོངས་ལ་མཐུན་སྒྲིལ་དང་སྣེ་ཁྲིད་བྱས་ཏེ། གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་ཏན་ཏིག་བཏང་ནས་སྔར་བས་མཛེས་སྡུག་དང་བདེ་སྐྱིད་ལྡན་པའི་འཚོ་བ་ཐུན་མོང་ཐོག་གཏོད་ཐུབ་པའི་ཡིད་ཆེས་དང་ཆོད་སེམས་བརྟན་པོ་ཡོད”ཅེས་ནོར་བུ་ཚེ་རིང་གིས་བཤད།