བོད་བྱང་ཐང་ས་མཐོའི་དབུས་རྒྱུད་དུ་གནས་པའི་བོད་ལྗོངས་ནག་ཆུ་གྲོང་ཁྱེར་སྙན་རོང་རྫོང་ནི་བོད་ཀྱི་འབྲོག་ལས་ཐོན་སྐྱེད་རྫོང་གལ་ཆེན་གྱི་གྲས་ཤིག་ཡིན། ཟླ་5པར་བོད་བྱང་ཐང་དུ་སྐྱོད་སྐབས་རྩྭ་ཐང་ཐོག་འབྲོག་པའི་རྩལ་ནུས་འགྲན་བསྡུར་འཁྲུག་པོ་ཞིག་སྤེལ་བཞིན་ཡོད་པ་སྟེ། བདམས་ཐོན་པ་310ཡིས་བོད་བཟོའི་འཚེམ་བཟོ་དང་། ཀོ་ཆས་བཟོ་བ། ས་བླུག་འཕྲུལ་འཁོར་གཏོང་བ་སོགས་སྲོལ་རྒྱུན་དང་རྩལ་ནུས་གསར་པའི་རྣམ་གྲངས་11གི་འགྲན་བསྡུར་ནང་བཞུགས་པ་དང་རྣམ་གྲངས་ཁག་གི་བྱ་དགའ་ཨང་གསུམ་པ་ཡན་ཐོབ་མཁན་བདམས་ཐོན་པ་ད་དུང་གྲོང་ཁྱེར་རིམ་པའི་མཐའ་བསྡུར་ནང་ཞུགས་རྒྱུ་རེད།

སྙན་རོང་རྫོང་གི་རྩྭ་ཕྱུགས་སྐྱེ་ཁམས་དོ་སྙོམས་རྒྱ་ཁྱོན་མུའུ་ཁྲི་2310ལྷག་ཙམ་ཟིན་ནས་ཕྱུགས་རིགས་མགོ་གྲངས་ཁྲི་30གསོ་ཚགས་བྱེད་ཐུབ་ཀྱི་ཡོད། འབྲོག་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད། ཉེ་བའི་ལོ་ཤས་རིང་རྫོང་དེས“ཁེ་ལས་དང་། མཉམ་ལས་ཁང་། འབྲོག་དུད”བཅས་ཟུང་དུ་འབྲེལ་བའི་རྣམ་པར་བརྟེན་ནས་ཤང་དང་གྲོང་རྡལ་10རུ་གྲོང་ཚོ་རིམ་པའི་འབྲོག་ལས་མཉམ་ལས་ཁང་120བཙུགས་ཡོད། གཅིག་གྱུར་ངང་ཕྱུགས་འཚོ་བའི་གཉེར་སྐྱོང་སོགས་ཀྱི་བྱེད་སྟངས་འོག་མང་ཚོགས་མང་པོ་ཞིག་སྲོལ་རྒྱུན་འབྲོག་ལས་ཁྲོད་ནས་བཅིངས་འགྲོལ་ཐོབ་སྟེ་རྩལ་ནུས་སྣ་ཚོགས་སློབ་སྦྱོང་ཧུར་ཐག་བྱས་ནས་ཐབས་ལམ་མང་པོར་བརྟེན་ཏེ་འབབ་འཕར་ཐུབ་པ་བྱུང་ཡོད།

“ང་ཚོས་ལོ་ལྟར་མ་བྱན་དང་རྐོ་འདྲུའི་འཕྲུལ་འཁོར་སོགས་ཞིང་འབྲོག་པའི་རྩལ་ནུས་གསོ་སྦྱོང་འཛིན་གྲྭ་གཉེར་གྱི་ཡོད། མིག་སྔར་རྫོང་ཡོངས་ཀྱི་མང་ཚོགས་ཁྲོད་མི་180ལྷག་ཙམ་ལ་རྐོ་འདྲུའི་འཕྲུལ་འཁོར་གྱི་ཁ་ལོ་བའི་ལག་ཁྱེར་ཡོད་པ་དང་། མི་150ཙམ་ལ་ས་བླུག་འཕྲུལ་འཁོར་གྱི་ཁ་ལོ་བའི་ལག་ཁྱེར་ཡོད། མི་117ལ་རྒྱ་ཟས་མ་བྱན་གྱི་དམའ་རིམ་ཐོབ་ཐང་ལག་ཁྱེར་ཡོད། མང་ཚོགས་ཚོས་ལག་རྩལ་སྣ་གཅིག་བྱང་ཆུབ་པ་ཤེས་རྗེས་འབྲོག་ཁུལ་གྱི་ངལ་ནུས་ལྷག་མ་ལས་ཞུགས་གཞན་སྒྱུར་ཐུབ་ཚད་25%ཟིན་གྱི་ཡོད”ཅེས་སྙན་རོང་རྫོང་མི་སྤྱི་ཅུས་ཀྱི་ལས་བྱེད་པ་ཕུན་ཚོགས་ཀྱིས་གསར་འགོད་པར་དེ་ལྟར་བཤད།

འདི་ལོ་ལོ་56ལ་སླེབས་པའི་བེ་གཞུང་ཤང་སྒོ་ཕྱིན་གྲོང་ཚོའི་གྲོང་མི་ཉི་མ་ཚེ་རིང་གིས་ཆུང་བྱིས་པའི་དུས་སུ་ཕ་ཡི་ས་ནས་འབྲོག་ཁུལ་གྱི་བོད་ཆས་འཚེམ་བཟོའི་ལག་རྩལ་སྦྱངས་པ་རེད། 2020ལོའི་ལོ་འགོར་ཁོང་གིས་ཤང་སྲིད་གཞུང་གི་ཉེ་འགྲམ་དུ་བོད་ཆས་ལས་སྣོན་ཚོང་ཁང་ཞིག་བཙུགས་ནས་གཙོ་བོ་བོད་ཆས་དང་། འཇུར་རྟ། འབྲོག་ཁུལ་གྱི་ཀོ་ཆས་བཅས་བཟོས་ནས་ལོ་རེར་ཆ་སྙོམས་ཡོང་འབབ་ཁེ་གཙང་སྒོར་ཁྲི་8ལྷག་ཙམ་ཟིན་པ་དེ་ཁོང་གི་འབྲོག་ལས་ཀྱི་ལོ་རེའི་ཡོང་འབབ་ལས་ཧ་ཅང་གིས་མང་བ་ཡོད། ཁོང་གིས“ང་ལོ་ལྟར་འཚེམ་བཟོའི་འགྲན་བསྡུར་ནང་ཞུགས་ཀྱི་ཡོད། མི་དེ་བས་མང་བས་སྲོལ་རྒྱུན་གྱི་ལག་རྩལ་དེར་དགའ་པོ་བྱེད་པ་དང་སློབ་སྦྱོང་བྱ་རྒྱུའི་རེ་བ་ཡོད”ཅེས་བཤད།

མང་ཚོགས་ཀྱི་ཡོང་འབབ་ཟམ་མི་ཆད་པར་འཕར་བ་དང་དུས་མཚུངས་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་བྱེད་བཞིན་ཡོད། ཉི་མ་ཤང་དུག་ལུང་གྲོང་ཚོར་སླེབས་སྐབས་གྲོང་མིའི་ཁང་སྟེང་གི་འོད་ཤུགས་པང་ལེབ་སྟར་པ་རེ་རེ་མིག་ལམ་དུ་མངོན་པ་དང་གྲོང་ཚོའི་འགྲོ་ལམ་དང་ཕྱོགས་བཞི་གཙང་ཞིང་གྲལ་འགྲིག་པོ་ཡོད། 2023ལོའི་ཟླ་6པར་རྒྱལ་ཁབ་ནུས་རྒྱུ་ཚོགས་པ་བོད་སྐྱོར་ལས་དོན་རུ་ཁག་གིས་དུག་ལུང་གྲོང་ཚོར“ཐཱན་མེད”ཀྱི་མཛེས་སྡུག་ལྡན་པའི་གྲོང་གསེབ་ཀྱི་འོད་ཤུགས་དྲོད་གཏོང་ཚོད་ལྟའི་རྣམ་གྲངས་ལག་བསྟར་བྱས་པ་རེད། འབྲོག་པ་མང་ཚོགས་ཀྱི་དུད་ཚང་40ཡི་བོད་བཟོའི་སྡོད་ཁང་གི་ཁང་སྟེང་དུ་འོད་ཤུགས་པང་ལེབ་སྒྲིག་སྦྱོར་བྱས་ནས། ཉི་ནུས་སྤྱད་དེ་གློག་དང་དྲོད་མཁོ་འདོན་བྱས་པས་ས་གནས་དེ་གའི་མང་ཚོགས་གཙང་ལ་ཕན་ནུས་ཆེ་བའི་དེང་རབས་ཅན་གྱི་དྲོད་རླངས་དང་དཀར་ཆ་དོད་པའི་སྡོད་ཁང་ནང་འཚོ་བ་སྐྱེལ་འགོ་ཚུགས་པ་རེད།

ཉི་མ་ཤང་གི་ཤང་ཀྲང་ཚའོ་ལིན་གྱིས“གྲོང་ཚོ་རིམ་པའི་མཉམ་ལས་ཁང་གིས་མཉམ་འབྲེལ་གཉེར་སྐྱོང་བྱས་པ་བརྒྱུད་སྒོ་ཕྱུགས་དང་ཕྱུགས་ལས་ཐོན་རྫས་ཀྱི་རིན་གོང་འཕར་བ་དང་མང་ཚོགས་ཀྱི་ཡོང་འབབ་དུས་མཚུངས་ལས་10%འཕར་ནས་ཆ་སྙོམས་ལོ་རེར་དུད་ཚང་རེར་བགོ་འགྲེམས་སྒོར་ཁྲི་2རྒྱག་གི་ཡོད”ཅེས་ངོ་སྤྲོད་བྱས་པ་རེད།

སྙན་རོང་རྫོང་གི་རྫོང་དཔོན་ཤི་ལོག་ཚེ་རིང་གིས་ད་ཆ་སྙན་རོང་རྫོང་གི་ཤང་དང་གྲོང་ཚོ་ཚང་མའི་མཉམ་ལས་གཉེར་སྐྱོང་བྱེད་སྟངས་མི་འདྲ་བ་ཕུད། གྲོང་གསེབ་འཛུགས་སྐྲུན་དང་མང་ཚོགས་ཀྱི་འཚོ་བ་སོགས་ཀྱི་གནས་ཚུལ་ལ་ཁྱད་པར་དེ་ཙམ་མེད། གྲོང་གསེབ་དར་རྒྱས་གཏོང་བའི་ལས་དོན་ཁག་ཟམ་མི་ཆད་པར་གཏིང་ཟབ་ཏུ་ཕྱིན་པ་དང་བསྟུན་ནས་ས་མཐོའི་བོད་བྱང་ཐང་གི་འབྲོག་ལས་རྫོང་དེར་འཕེལ་རྒྱས་ཀྱི་གསོན་ཤུགས་གསར་པ་རྒྱས་བཞིན་ཡོད།

(ཤིན་ཧྭ་གསར་འགྱུར་ཁང་ལྷ་ས་ནས་འབྱོར་བའི་གློག་འཕྲིན)