ཝང་ཝུའེ་ཏུང་གིས་རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན་གྱི་བརྗོད་དོན་གཙོ་བོའི་སློབ་གསོའི་འགོ་ཁྲིད་ཚོགས་ཆུང་གི་ཚོགས་འདུ་གཙོ་སྐྱོང་གནང་བ།
ཉེ་དུས་རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན་གྱི་བརྗོད་དོན་གཙོ་བོའི་སློབ་གསོའི་འགོ་ཁྲིད་ཚོགས་ཆུང་གིས་ཚོགས་འདུ་འཚོགས་ནས། བློ་མཐུན་ཚའེ་ཆིས་ཀྲུང་དབྱང་གི་བརྗོད་དོན་གཙོ་བོའི་སློབ་གསོའི་འགོ་ཁྲིད་ཚོགས་ཆུང་གི་ཚོགས་འདུ་ཐེངས་3པའི་ཐོག་གནང་བའི་གསུང་བཤད་ཀྱི་དགོངས་དོན་དང་ལྗོངས་ཏང་ཨུད་ཀྱི་འབྲེལ་ཡོད་ཚོགས་འདུའི་དགོངས་དོན་བརྒྱུད་བསྒྲགས་སློབ་སྦྱོང་དང་ལག་བསྟར་བྱེད་ཐབས་ལ་ཞིབ་འཇུག་བྱས་པ་རེད། ལྗོངས་ཏང་ཨུད་ཀྱི་རྒྱུན་ཨུ་དང་། སྒྲིག་ཨུད་ཀྱི་ཧྲུའུ་ཅི། ལྟ་ཞིབ་ཨུ་ལྷན་གྱི་ཀྲུའུ་རེན་བཅས་ཡིན་པའི་ཝང་ཝུའེ་ཏུང་གིས་ཚོགས་འདུ་གཙོ་སྐྱོང་གནང་བ་རེད།
ཚོགས་འདུའི་ཐོག་ནན་བཤད་བྱས་དོན། རིགས་པའི་གཞུང་ལུགས་ཀྱིས་བསམ་བློར་དྲག་ཆས་སྤྲོས་རྒྱུར་རྒྱུན་མཐུད་ཤུགས་སྣོན་བརྒྱབ་སྟེ། གུས་བཀུར་བྱེད་པ་དང་། བརྩེ་སེམས་འཆང་བ། དད་སེམས་ཡོད་པ། འགན་འཁྲི་དང་ལས་འགན་ཡོད་པ་བཅས་ཀྱི་སྒོ་ནས་ཏང་གི་གསར་གཏོད་རིགས་པའི་གཞུང་ལུགས་ཟབ་སྦྱོང་མཐིལ་རྟོགས་བྱེད་པ་དང་། བློ་བརྟན་འགྱུར་མེད་ངང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་དད་སེམས་པ་བརྟན་པོ་ཞིག་དང་ཟོལ་མེད་ཀྱི་ལག་ལེན་པ་ཞིག་བྱེད་དགོས། དག་ཐེར་ལ་འཚོལ་བཤེར་ནན་པོ་བྱས་ནས། འཕེལ་རྒྱས་ལ་མཁོ་བ་དང་། སྒྱུར་བཅོས་ལ་མཁོ་བ། གཞི་རིམ་གྱི་རེ་སྒུག དམངས་འཚོའི་ཕྱོགས་ས་བཅས་ནས་གནད་སྨིན་ངང་གནད་དོན་ཡང་དག་འཚོལ་བར་དམིགས་ཏེ། “སྐབས་ཐོག་བཅོས་སྒྲིག”དང“ཕུཌ་ཕན་སྲོལ་འཛུགས”ཟུང་འབྲེལ་བྱ་རྒྱུ་མཐའ་འཁྱོངས་ཀྱིས། སྒྲིག་སྲོལ་ལམ་ལུགས་དུས་གཅིག་ཏུ་བཙུགས་ཏེ། སྟབས་བདེ་ཅན་དང་མ་རབས་ཅན་གྱི་ཕྱི་ཚུལ་རིང་ལུགས་ཀྱི་གནད་དོན་ནན་འགོག་བྱེད་དགོས། ཏང་གི་སྒྲིག་ཡིག་དང་རྩ་ཁྲིམས་ལས་དཀྲིས་པའི་འགན་འཁྲི་ཟོལ་མེད་ངང་ཁུར་ནས། སྐབས་ཉི་ཤུ་པའི་ཀྲུང་དབྱང་སྒྲིག་ཨུད་ཀྱི་ཚང་འཛོམས་གྲོས་ཚོགས་ཐེངས་གཉིས་པ་དང་རང་སྐྱོང་ལྗོངས་སྒྲིག་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་གསུམ་པའི་ཐོག་བཀོད་སྒྲིག་བྱས་པའི་ལས་འགན་ཁག་གཞིར་བཟུང་། དོན་ཚན་དང་རྣམ་གྲངས་རེ་རེ་བཞིན་དོན་འཁྱོལ་ལ་དམ་འཛིན་ཡག་པོ་བྱས་ཏེ་ལས་ཀའི་ཕན་འབྲས་དངོས་ལ་བརྟེན་ནས་བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་ཞིབ་བཤེར་བྱེད་དགོས།