ཟླ་5ཚེས་23ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“2023·ཀྲུང་གོའི་བོད་ལྗོངས་འཕེལ་རྒྱས་གླེང་སྟེགས”ལ་རྟེན་འབྲེལ་འཕྲིན་ཡིག་སྤྲིངས་ནས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པར་ཁས་ལེན་གང་ལེགས་གནང་བ་དང་ཆབས་ཅིག ཀྲུང་གོའི་ལུགས་ཀྱི་དེང་རབས་ཅན་གྱི་རྒྱང་ལམ་གསར་པའི་ཐོག་བོད་ཀྱི་མི་རིགས་ཁག་གི་མི་དམངས་སྔར་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་སྐྱེལ་ཐུབ་ཕྱིར་རེ་བ་གསར་པ་དང་བླང་བྱ་གསར་པ་བཏོན་གནང་བ་མ་ཟད། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་སྔར་བས་ཁ་ཕྱོགས་གསལ་སྟོན་ཡང་གནང་བ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་གལ་ཆེན་ལ་རང་ལྗོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཁྲོད་ཚུར་སྣང་ལན་ཆ་ཆེན་པོ་བྱུང་ཞིང་། ཚང་མས་བརྗིད་ཆེའི་རྒྱང་ལམ་གསར་པར་སྐྱོད། འབད་འབུངས་ཡར་བརྩོན་སེམས་ནུས་བསྒྲིལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་གལ་ཆེན་གྱི་དགོངས་དོན་དེ་དོན་དངོས་ཀྱི་ལས་དོན་ཁྲོད་ལག་བསྟར་དོན་འཁྱོལ་བྱས་ཏེ། རང་འགན་ཐེག་པ་འཁུར་ལེན་དང་འབད་འབུངས་ཡར་བརྩོན་གྱིས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་ཐུན་མོང་ཐོག་རྩོམ་རྒྱུ་ཡིན་ཞེས་གཅིག་རྗེས་གཉིས་མཐུད་ངང་བརྗོད་པ་རེད།

“ཀྲུང་གུང་ཚོགས་ཆེན་བཅོ་བརྒྱད་པ་འཚོགས་ཚུན། ཀྲུང་དབྱང་སྲིད་གཞུང་དང་རྒྱལ་ཡོངས་མི་དམངས་ཀྱི་ཤུགས་ཆེའི་རྒྱབ་སྐྱོར་འོག་བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཚོས་དཀའ་སྤྱད་འབད་འཐབ་དང་ཞུམ་མེད་འབད་འབུངས་བྱས་ནས། བོད་ལྗོངས་འདི་ཉིད་ལོ་ངོ་སྟོང་ཕྲག་རིང་གི་དབུལ་པོ་དབུལ་ནག་གི་འཆིང་རྒྱ་ལས་རྦད་དེ་བསྒྲལ་ཏེ། རྒྱལ་ཡོངས་དང་མཉམ་དུ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པས། སྐྱེ་སྟོབས་ཀྱི་དཔལ་འབར་བའི་དར་རྒྱས་ཀྱི་རྣམ་པ་མངོན་བཞིན་ཡོད”ཅེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་ནང་བོད་ཀྱི་འཕེལ་རྒྱས་གྲུབ་འབྲས་ལ་ཁས་ལེན་གང་ལེགས་གནང་ཡོད།

བོད་ཀྱི་དམངས་གཙོའི་བཅོས་སྒྱུར་གྱི་གྲོང་ཚོ་དང་པོ་ཡིན་པའི་ལྷོ་ཁ་གྲོང་ཁྱེར་སྣེ་གདོང་ཆུས་ཁེ་གསུམ་སྡེ་ཁུལ་དུ་གྲོང་གསེབ་དར་རྒྱས་གཏོང་བའི་རྣམ་པ་གསར་པ་གཏོད་བཞིན་ཡོད། འཕོ་འགྱུར་ཆེན་པོ་དང་མཆོང་སྐྱོད་ལྟ་བུའི་འཕེལ་རྒྱས་བྱུང་བ་ནི་བོད་ཀྱི་འགྲོ་བ་མིའི་ཐོབ་ཐང་གི་བྱ་གཞག་ལ་འཕེལ་རྒྱས་དང་ཡར་ཐོན་བྱུང་བའི་གསོན་ཉམས་དོད་པའི་བསྡུས་རིས་ཤིག་རེད།

“ད་ཆ་ཁེ་གསུམ་སྡེ་ཁུལ་དུ་གཞུང་ལམ་རྒྱ་ཆེ་བ་དང་། སྒྲིག་ཆས་ཆ་ཚང་བ། ཁོར་ཡུག་མཛེས་སྡུག་ལྡན་པ་ཞིག་ཡོད། དུས་རབས་གསར་པར་འཚོ་སྡོད་བྱེད་བཞིན་པའི་ཁེ་གསུམ་བ་ཞིག་གི་ངོས་ནས་བརྗོད་ན། རང་ཉིད་ཧ་ཅང་སྐྱིད་པོ་ཡིན་སྙམ་གྱི་འདུག”ཅེས་ཁེ་གསུམ་སྡེ་ཁུལ་གྱི“དགུ་བཅུའི་ནང་སྐྱེས”ཀྱི་ལས་བྱེད་པ་དང་ཕ་ཡུལ་དུ་ལོག་པའི་སློབ་ཆེན་སློབ་མ་བདེ་སྐྱིད་དཔལ་སྒྲོན་གྱིས་བརྗོད། ཡང་ཁོང་གིས“སླད་ཕྱིན་ངས་སྡེ་ཁུལ‘ཨུ་ལྷན་གཉིས’ཀྱི་ཚན་ཁག་གི་ཁོངས་མི་དང་མཉམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་གལ་ཆེན་གྱི་དགོངས་དོན་སློབ་སྦྱོང་དྲིལ་བསྒྲགས་ཡག་པོ་དང་ལག་བསྟར་དོན་འཁྱོལ་ཡག་པོ་བྱས་ཏེ་དཀའ་སྤྱད་སྙིང་རུས་དང་དོན་འཁྱོལ་ལ་དམ་འཛིན་བྱས་ནས་གྲོང་མི་མང་ཚོགས་ཀྱི་ཐོབ་སྣང་སྔར་བས་ཆེ་བ་དང་། སྐྱིད་སྣང་སྔར་བས་རྒྱུན་མཐུད་ཐུབ་པ། བདེ་འཇགས་ཚོར་སྣང་སྔར་བས་འགན་སྲུང་ཐུབ་པ་བཅས་ཧུར་ཐག་བྱེད་ཀྱི་ཡིན”ཞེས་བརྗོད་པ་རེད།

ཉེ་བའི་ལོ་ཤས་རིང་། ལྷོ་ཁ་གྲོང་ཁྱེར་གྱིས་ལྗོངས་ཏང་ཨུད་ཀྱི“མདུན་གྲལ་དུ་སླེབས་པ་བཞིའི”ལས་ཀའི་བླང་བྱ་ལག་བསྟར་དོན་འཁྱོལ་ལ་དམིགས་ནས“ལྗོངས་ཡོངས་ཀྱི་མདུན་གྲལ་དུ་སླེབས་པ་དྲུག”གི་དམིགས་ཚད་གསར་གཏོད་ཀྱིས་བཏོན་ཏེ། ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་གྲུབ་འབྲས་གསར་པ་ཟམ་མི་ཆད་པར་ཐོབ་པར་རམ་འདེགས་བྱས་ཡོད། ལྷོ་ཁ་གྲོང་ཁྱེར་འཕེལ་སྒྱུར་ཨུ་ལྷན་གྱི་ཏང་ཙུའི་ཧྲུའུ་ཅི་ཀྲུའུ་རེན་གཞོན་པ་པད་མ་རྡོ་རྗེས“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་གལ་ཆེན་མི་སེམས་ལ་དྲོ་སྐྱིད་སྦྱིན་པ་དང་སྐུལ་ལྕག་ཐེབས་འོས་པ་ཞིག་ཡོད། དེ་ནི་ང་ཚོར་་ལྕག་སྐུལ་བྱས་པ་ཞིག་ཀྱང་རེད། གོམ་སྟབས་རྗེས་མར་ང་ཚོས་ལྷོ་ཁ་གྲོང་ཁྱེར་གྱི་དོན་དངོས་དང་ཟུང་འབྲེལ་བྱས་ཏེ་ནུས་ལྡན་གྱི་མ་དངུལ་འཇོག་རྒྱ་ཆེ་རུ་ཧུར་ཐག་གཏོང་བ་དང་། ཁྱད་ལྡན་ཐོན་ལས་འཕེལ་རྒྱས་ཤུགས་ཆེན་གཏོང་བ། ས་ཁོངས་མཐུན་སྦྱོར་ལ་ནུས་ཤུགས་ཡོད་རྒུས་སྐུལ་འདེད་གཏོང་བ། དམངས་འཚོ་དོ་སྙོམས་འཕེལ་རྒྱས་ལ་སྐུལ་འདེད་གཏོང་བ། སྐྱེ་ཁམས་བདེ་འཇགས་སྲུང་ཡོལ་བརྟན་དུ་གཏོང་བར་རྒྱུན་མཐུད་སྐུལ་འདེད་བཏང་ནས་སྤུས་ཚད་མཐོ་བའི་འཕེལ་རྒྱས་ལ་བརྟེན་ནས‘ལྗོངས་ཡོངས་ཀྱི་མདུན་གྲལ་དུ་སླེབས་པ་དྲུག’ལ་སྐུལ་སྤེལ་བཏང་སྟེ་མི་དམངས་མང་ཚོགས་ལ་འཕེལ་རྒྱས་ཀྱི་ཕན་པ་དེ་བས་མང་བ་ཐོབ་པ་བྱེད་ཀྱི་ཡིན”ཞེས་བརྗོད་པ་རེད།

“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་གལ་ཆེན་ལས་ང་ལ་སྐུལ་ལྕག་ཚད་མེད་དང་སེམས་འགུལ་ཆེན་པོ་ཐེབས་བྱུང”ཞེས་མངའ་རིས་ས་ཁུལ་སྒར་རྫོང་སེང་གེ་ཁ་འབབ་གྲོང་རྡལ་གཙང་པོ་གྲོང་མི་ཨུ་ལྷན་གྱི་ལས་བྱེད་པ་ཕུན་ཚོགས་ཀྱིས་གསར་འགོད་པར་བརྗོད། ཁོང་གིས“གཞི་རིམ་གྱི་ལས་དོན་པ་ཞིག་ཡིན་པའི་ངོས་ནས་ངས་ལོ་དེ་དག་རིང་སྡེ་ཁུལ་ལ་འགྱུར་ལྡོག་ཕྱིན་པ་དང་། རྨང་གཞིའི་སྒྲིག་བཀོད་རྒྱུན་ཆད་མེད་པར་འཐུས་སྒོ་ཚང་དུ་ཕྱིན་པ། སྡོད་ཁང་གི་ཆ་རྐྱེན་སྔར་བས་ལེགས་སུ་ཕྱིན་པ། གྲོང་མིའི་འཚོ་བ་སྔར་བས་སྟབས་བདེ་རུ་ཕྱིན་པ་བཅས་ཟབ་མོ་ཚོར་བྱུང་། དེ་དག་ཚང་མ་ཏང་དང་རྒྱལ་ཁབ་ཀྱི་སྲིད་ཇུས་བཟང་པོ་ལས་བྱུང་བ་ཞིག་རེད”ཅེས་བརྗོད།

མངའ་རིས་ས་ཨུད་དྲིལ་བསྒྲགས་པུའི་ལས་བྱེད་པ་དབྱང་མིན་ཆི་ཡིས། ངས་དར་ཆ་སྒྲེང་བ་དང་། དམངས་སེམས་སྒྲིལ་བ། མི་གསར་སྐྱོང་བ། རིག་གནས་དར་སྤེལ། གཟུགས་བརྙན་མངོན་པ་བཅས་ཀྱི་འགན་འཁྲི་དང་ལས་འགན་རང་རྟོགས་ངང་ཕྲག་ཐོག་ཏུ་ཁུར་ནས་བོད་ལྗོངས་འཕེལ་རྒྱས་ཀྱི་འཕོ་འགྱུར་གསར་པ་དང་གྲུབ་འབྲས་གསར་པ་དྲིལ་བསྒྲགས་ཤུགས་ཆེན་བྱེད་པ་དང་། མི་རིགས་ཁག་གི་མང་ཚོགས་ཀྱིས་འཕེལ་རྒྱས་དང་འགྱུར་ལྡོག་ཁྲོད་ནས་ཀྲུང་གོ་གུང་ཁྲན་ཏང་མཁས་མཛངས་ལྡན་ལ་རླབས་ཆེ་བ་དང་སྤྱི་ཚོགས་རིང་ལུགས་ལམ་ལུགས་ཀྱི་དོ་ཟླ་བྲལ་བའི་ཁྱད་འཕགས་ཚོར་རྒྱུར་ཁྲིད་སྟོན་བྱེད་པ། ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་ཀྱི་གདེང་ཚོད་དང་ཆོད་སེམས་སྔར་བས་བརྟན་དུ་གཏོང་བ་བཅས་བྱས་ནས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་བློ་གྲོས་དང་སྟོབས་ཤུགས་ལེགས་སྐྱེས་ཧུར་ཐག་འབུལ་གྱི་ཡིན་ཞེས་བརྗོད་པ་རེད།

--  --