ལྷོ་རིའི་སྤྱི་གླིང་དུ་སྐྱོད་སྐབས་ཆུ་ཕྲན་ཤང་ཤང་དུ་རྒྱུག་པ་དང་གང་སར་སྔོ་ལྗང་གོས་བཟང་གིས་བཀླུབས། འོན་ཀྱང་ལོ་མང་སྔོན་འདི་ལྟ་བུའི་མཛེས་ལྗོངས་ནི་བསམ་ཡུལ་ལས་འདས་པ་ཞིག་རེད།

རི་བོ་སྔོ་ལྗང་གིས་བཀླུབས་ཆེད་མི་ལ་ལས་ཆེས་རྩ་ཆེ་བའི་ལང་ཚོ་ས་མཐོར་ལེགས་སྐྱེས་ཕུལ་བ་དང་། མི་ལ་ལས་ལོ་མང་རིང་རི་སྟེང་གི་སྔོ་ལྗང་ལ་གཡོག་བྱེད་བྱས་ཏེ་བྱ་སྤྱོད་དངོས་ཀྱི་ཐོག་ནས་ལྗང་མདོག་གི་བསྟོད་གླུ་རེ་རེ་བརྩམས་ཡོད། ལྷ་ས་གྲོང་ཁྱེར་ནགས་ཚལ་དང་རྩྭ་ཐང་ཅུས་ནགས་ཚལ་རྩད་ཞིབ་སུའོ་ཡི་སུའོ་ཀྲང་འཇིགས་མེད་རྣམ་རྒྱལ་ནི་དེའི་ཁྲོད་ཀྱི་གཅིག་རེད།

2006ལོར་སློབ་གྲྭ་ཐོན་མ་ཐག་པའི་འཇིགས་མེད་རྣམ་རྒྱལ་ལྷ་ས་གྲོང་ཁྱེར་སྟག་རྩེ་ཆུས་ནགས་ལས་ཅུས་སུ་ལས་བགོས་བརྒྱབ། ལས་ཀར་ཞུགས་ནས་ཡུན་རིང་མ་སོང་བར་ཁོང་དང་ལས་རོགས་ཀྱིས་སྟག་རྩེ་ཆུས་ཀྱི་ཤང་དང་གྲོང་རྡལ་ཁག་ཏུ་བསྐྱོད་དེ་ནགས་ཚལ་ཐོན་ཁུངས་ཁྱབ་ཚུལ་མཐིལ་རྟོགས་བྱས།

འཇིགས་མེད་རྣམ་རྒྱལ་གྱིས་ལས་སྒོར་དཀའ་སྤྱད་འབད་བརྩོན་དང་ཁེངས་སྐྱུང་ངང་སློབ་སྦྱོང་བྱས་པས་མགྱོགས་མྱུར་ལས་སྒོའི་རྐང་འཛིན་པ་ཞིག་ཏུ་གྱུར། 2011ལོར་འཇིགས་མེད་རྣམ་རྒྱལ་ལྷ་ས་གྲོང་ཁྱེར་ནགས་ལས་སྔོ་འགྱུར་ཅུས་སུ་ལས་འགྱུར་བྱས།

“ཟླ་གསུམ་པར་ཤིང་འཛུགས་ནགས་བཟོའི་ལས་དོན་ཕྱོགས་ཡོངས་ནས་སྤེལ་འགོ་ཚུགས་ཤིང་། ང་ཚོས་ཉིན་ལྟར་ལྷ་སའི་ལྷོ་རི་བྱང་རིའི་ཡུག་ཁུལ་ཁག་ཏུ་བསྐྱོད་དེ་ལག་རྩལ་མི་སྣ་དང་དེ་བཞིན་ཞིང་འབྲོག་པར་ཤིང་འཛུགས་ནགས་བཟོའི་ལས་དོན་ལ་མཛུབ་ཁྲིད་བྱེད་པ་དང་ཁོང་ཚོར་ལྕང་མ་འཛུགས་སྟངས་དང་། ཡལ་གཅོད་རྒྱག་སྟངས། ས་དོང་འདྲུ་སྟངས། ཆུ་གཏོང་སྟངས། དུས་མཇུག་ཏུ་གཡོག་བྱེད་བྱེད་སྟངས་སོགས་ཀྱི་ལག་རྩལ་སློབ་ཀྱི་ཡོད”ཅེས་འཇིགས་མེད་རྣམ་རྒྱལ་གྱིས་བཤད། ཉེ་བའི་ལོ་ཤས་རིང་། ལྷ་ས་གྲོང་ཁྱེར་ནགས་ལས་དང་རྩྭ་ཐང་ཅུས་ནགས་ཚལ་རྩད་ཞིབ་སུའོ་ཡི་སུའོ་ཀྲང་འཇིགས་མེད་རྣམ་རྒྱལ་གྱིས་གཙོ་བོ་ལྷ་ས་གྲོང་ཁྱེར་གྱི་རྫོང་དང་ཆུས་ཁག་གི་རྨོ་བསྐྱུར་ནགས་གསོ་དང་བྱེ་འགོག་བྱེ་བཅོས་རྣམ་གྲངས་དོ་དམ་དང་དེ་བཞིན་གྲོང་ཁུལ་གྱི“ཤིང་སྣ་རི་འདེབས”དང“ལྗང་མདོག་གྲོང”རྣམ་གྲངས་ཀྱི་ས་གནས་ས་ཐོག་གི་ལག་རྩལ་མཛུབ་ཁྲིད་ཀྱི་འགན་འཁུར་བ་རེད།

འཇིགས་མེད་རྣམ་རྒྱལ་གྱི་སྣེ་ཁྲིད་འོག་ལྷ་ས་གྲོང་ཁྱེར་ནགས་ལས་དང་རྩྭ་ཐང་ཅུས་ནགས་ཚལ་རྩད་ཞིབ་སུའོ་ཡིས“ཁག་གསུམ་པའི་རི་ཆུ་ནགས་ཞིང་མཚེའུ་རྩྭ་བཅས་ཀྱི་སྐྱེ་ཁམས་སྲུང་སྐྱོང་ཉམས་གསོའི་འདུ་འགོད”དང་ལྷ་སའི་ཉེ་འཁོར་དང་དེ་བཞིན་རི་བོ་སྔོ་འགྱུར“ལྗང་མདོག་གྲོང”གི་དུས་ཐེངས་དང་པོ་དང་གཉིས་པའི་འདུ་འགོད་དང་ལྷ་ས་ནས་གནམ་ཐང་བར་གྱི་ལམ་རྒྱུད་ཀྱི་རི་བོ་བྱེ་འགྱུར་བཅོས་སྒྲིག་རྣམ་གྲངས་ལ་སྐུལ་འདེད་གཏིང་ཟབ་བཏང་བ་དང་འབྲེལ། ནོར་སྲིད་པུའི་སི་ཁྲོན་ལྟ་འདོམས་ཅུས་ཀྱི་ལས་རྗེས་དམིགས་ཚད་ཀྱི་དཔྱད་ཞིབ་ལོན་པ་དང་འདུ་འགོད་ཁག་གསུམ་གྱི་ནགས་ཚལ་སྔོ་འགྱུར་རྒྱ་ཁྱོན་མུའུ་14982.15ཟིན་ནས་གསོན་ཚད་85%ཡན་ཟིན་པ་དང་། “ལོ་ལྔ་ཚན་བཅུ་གསུམ་པའི”རིང་གི་ཐང་རྒོད་བཅོས་སྐྱོང་རྒྱ་ཁྱོན་མུའུ་ཁྲི་12ལྷག་ཙམ་ལེགས་སྒྲུབ་བྱས་པ། ལྷ་ས་མཁའ་འགྲུལ་ཁུལ་གསར་གྱི་བྱེ་ཐང་སྔོ་ཁེབས་སླར་གསོའི་ལག་རྩལ་ཞིབ་འཇུག་གི་ཚན་ཞིབ་རྣམ་གྲངས་སྤེལ་བ་དང་ས་མཐོའི་བྱེ་ཐང་བཅོས་སྐྱོང་ལ་འཚམ་པའི་ས་རྒྱུ་བདམས་ཏེ་བྱེ་འགྱུར་དང་སྐྱེ་ཁམས་ཁོར་ཡུག་ཉམས་ཞན་གྱི་གནད་དོན་ཐག་གཅོད་ནུས་ལྡན་བྱུང་ནས་ཡར་ཀླུང་གཙང་པོ་རྒྱུག་ཁུལ་གྱི་སྐྱེ་ཁམས་ནུས་པ་ལེགས་སུ་དང་ཆེ་རུ་ཕྱིན་ཡོད་པ་རེད།

ལོ་མང་རིང་འཇིགས་མེད་རྣམ་རྒྱལ་གྱིས་ཐོག་མཐའ་བར་གསུམ་དུ་ལྗོན་ཤིང་འཛུགས་པ་དང་སྲུང་སྐྱོང་གི་འཐབ་ས་དང་པོར་འབད་འཐབ་བྱས་ནས་རང་ཉིད་ཀྱི་སེམས་ནུས་དང་བློ་གྲོས་ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭར་ལེགས་སྐྱེས་ཕུལ་བར་གྲུབ་འབྲས་མངོན་གསལ་དོད་པོ་ཐོབ་ཅིང་། སྔ་རྗེས་སུ་ལྷ་ས་གྲོང་ཁྱེར་ནགས་ལས་ཀྱི“ཕུལ་བྱུང་མི་སྒེར”དང་། ལྷ་ས་གྲོང་ཁྱེར་གྱི“ལྔ་བཞི”གཞོན་ནུའི་གཟེངས་རྟགས། “ལས་བཞིའི་འདུ་འགོད”ཀྱི་སྔོན་ཐོན་ལས་དོན་པ། 2022ལོའི་ལོ་འཁོར་གྱི་ལྷ་སའི་ལྷོ་རི་བྱང་རི་སྔོ་འགྱུར་གྱི་སྔོན་ཐོན་མི་སྒེར་སོགས་ཀྱི་གཟི་བརྗིད་མཚན་སྙན་མང་པོ་ཐོབ་པ་རེད།

ད་ཆ་ལོ་39ལ་སླེབས་པའི་འཇིགས་མེད་རྣམ་རྒྱལ་ནགས་ལས་ལས་གནས་ཐོག་ལས་ཀ་བྱས་ནས་ལོ་17སོང་ཞིང་། ཁོང་གིས་རང་ཉིད་ཀྱི་ལང་ཚོ་ནགས་ལས་བྱ་གཞག་ལ་ཕུལ་བ་དང་ལྗང་མདོག་ནི་ཁོང་གི་མི་ཚེའི་ལས་དོན་གཙོ་བོར་གྱུར་ཡོད། ཁོང་གིས་ལྗོན་ཤིང་འཛུགས་པ་དང་སྲུང་སྐྱོང་ལས་ལ་ནམ་ཡང་གཞོལ་ངེས་རེད།