འདི་ནི་ལྷ་སའི་གྲོང་མིས་རང་སྐྱོང་ལྗོངས་སྤྱི་ཚོགས་འགན་སྲུང་ལས་སྒྲུབ་ཞབས་ཞུའི་ཚོམས་ཆེན་དུ་སྤྱི་ཚོགས་འགན་སྲུང་གཱ་གཉེར་བཞིན་པ།

བོད་ཀྱི་ཏང་ཡོན་ཚོས་བྱ་སྤྱོད་སྤེལ་བཞིན་པ།

ལེ་ཚན་གཏོད་པའི་གཏམ།

སྤྱོད་ཚུལ་འཛུགས་སྐྱོང་དང་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ནས་སྤྱོད་ཚུལ་འཛུགས་སྐྱོང་ནམ་ཡང་ཚར་དུས་མེད་པའི་བསམ་བློའི་གོ་རྟོགས་ཐོག་མཐའ་བར་གསུམ་དུ་རྒྱུན་འཁྱོངས་བྱ་ཆེད། རང་སྐྱོང་ལྗོངས་ཏང་ཨུད་ཀྱིས་ལྗོངས་ཡོངས་ཀྱི་རྒྱ་ཆེའི་ཏང་ཡོན་ལས་བྱེད་པའི་ཁྲོད་སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་བྱེད་པའི་ལས་དོན་གཏིང་ཟབ་སྤེལ་དགོས་པའི་བླང་བྱ་བཏོན་ཡོད། ལོ་གཅིག་རིང་། རང་ལྗོངས་ཀྱི་རིམ་ཁག་ཏང་ཨུད་དང་སྲིད་གཞུང་གིས་ཇུས་འགོད་བཀོད་སྒྲིག་ཞིབ་ཚགས་དང་། གཞི་རྟེན་དང་ལམ་སྲོལ་གསར་གཏོད། ལྟ་སྐུལ་ཞིབ་བཤེར་ལ་ཤུགས་སྣོན་རྒྱག་པ་བཅས་བྱས་པས་ཏང་སྲོལ་དང་སྲིད་སྲོལ་གསར་རྐྱང་དུ་གྱུར་ནས། རྒྱ་ཆེའི་ཏང་ཡོན་ལས་བྱེད་པའི་འགན་འཁྲི་འཁུར་སེམས་སྔར་བས་ཆེ་རུ་ཕྱིན་པ་དང་། ལས་དོན་འཆར་འགོད་སྔར་བས་བྱེད་མཁས་སུ་སོང་བ། འགན་འཁྲི་སྔར་བས་འཁུར་ཕོད་པ། དམངས་སེམས་དང་སྔར་བས་མཐུན་པ། ལས་དོན་སྔར་བས་སྒྲུབ་མཁས་པ་བཅས་བྱུང་སྟེ། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ལས་དོན་ལ་ཕན་འབྲས་བཟང་པོ་ཐོན་ཡོད།

དེ་རིང་ནས་བཟུང་། འདི་ག་ཚགས་པར་ཐོག“སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ཐད་བོད་ཀྱི་ཏང་ཡོན་ལས་བྱེད་པས་བྱ་སྤྱོད་སྤེལ་མུས་ཡིན་པའི”རིམ་སྤེལ་འཕྲིན་སྤེལ་བཏོན་ཏེ་འཐབ་ཕྱོགས་ཁག་དང་ཁྱབ་ཁོངས་ཁག་གི་ཉམས་མྱོང་དང་བྱེད་ཐབས་དང་སྔོན་ཐོན་དཔེ་མཚོན་ལ་དམིགས་ཏེ། ཏང་ཡོན་ལས་བྱེད་པའི་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་སེམས་ཤུགས་དང་ལས་ཀའི་ཕན་འབྲས་ཕྱོགས་ཡོངས་ནས་མངོན་པར་བྱེད་རྒྱུ་ཡིན་པས། དོ་ཁུར་ཡོད་པ་ཞུ།

སེམས་རྩ་འཁོལ་ཞིང་ཞིབ་ཚགས་པོས་ལས་དོན་བསྒྲུབས་པས་ལས་ཞུགས་ལས་གཏོད་ཀྱི་གདེང་ཚོད་ཆེ་རུ་སོང་བ།

དམངས་འཚོ་འགན་ལེན་གྱི་སྡེ་ཚན་གལ་ཆེན་ཞིག་ཡིན་པའི་རང་སྐྱོང་ལྗོངས་མི་སྤྱི་ཐིང་གིས་ལོ་གཅིག་ལྷག་ཙམ་རིང་ལྗོངས་ཡོངས་ཀྱི་ལས་ཀའི་སྤྱི་ཡོངས་ཁྲོད་རང་འགུལ་ངང་མཉམ་འདྲེས་ཐུབ་པར་བྱས་ཏེ། “དོན་ཆེན་བཞི”ལ་དམིགས་པ་དང“འཛུགས་གཏོད་བཞིར”ཤུགས་བརྒྱབ་སྟེ་འགན་འཁྲི་དང་ལས་སྒོར་གཞི་ཚུགས་པ་དང་། ལས་དོན་དོན་འཁྱོལ་ལ་དམ་འཛིན་བྱེད་པ། རང་འགུལ་ངང་རང་འགན་ཐེག་པ་འཁུར་ལེན་ཐུབ་པ་བཅས་བྱས་པས་མི་སྤྱིའི་ཁོངས་གཏོགས་ཀྱི་སྤྱོད་ཚུལ་གསར་པ་ཞིག་ཤུགས་ཀྱིས་མངོན་པ་དང་། སྤུས་ལེགས་ཀྱི་ཞབས་ཞུ་མི་སེར་གྱིས་ལོངས་སྤྱོད་ཐུབ་ནས་མི་རིགས་ཁག་གི་མང་ཚོགས་ཚོས་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ཕན་འབྲས་དངོས་འབྲེལ་ཚོར་ཐུབ་ཡོད།

སི་ཁྲོན་སློབ་ཆེན་ནས་ཐོན་མ་ཐག་པའི་འཇམ་དབྱངས་ཆོས་སྒྲོན་བློ་ལ་བབས་པའི་ལས་ཀ་ཞིག་རག་པས། ཁོ་མོའི་སློབ་གྲོགས་ཚོས་ཡིད་སྨོན་ཆེན་པོ་བྱེད་ཀྱི་ཡོད།

“ང་ཚོ་ཐེམ་ཁུངས་བོད་ནས་ཡིན་པའི་སློབ་ཐོན་སློབ་མར་སློབ་ཐོན་ལག་ཁྱེར་རག་མ་ཐག་རང་སྐྱོང་ལྗོངས་མི་སྤྱི་སྡེ་ཚན་གྱི་ལས་དོན་མི་སྣས་ང་ཚོར་འབྲེལ་བ་བྱས་ཏེ་དུས་ཐོག་ཏུ་ལས་གནས་ཀྱི་ཆ་འཕྲིན་ངོ་སྤྲོད་བྱེད་ཀྱི་འདུག ཁོང་ཚོའི་ངོ་སྤྲོད་འོག་ང་རང་གི་བློ་ལ་བབས་པའི་ལས་ཀ་ཞིག་ལམ་སེང་རག་བྱུང”ཞེས་ལྷ་སའི་སྨན་ཁང་ཞིག་ཏུ་ལས་ཞུགས་ཐུབ་པའི་འཇམ་དབྱངས་ཆོས་སྒྲོན་གྱིས་ད་ལྟའི་ལས་ཀར་བློ་ཡིད་ཚིམ་བཞིན་དུ་བརྗོད།

འཇམ་དབྱངས་ཆོས་སྒྲོན་ལ་ལས་གནས་ཀྱི་ཆ་འཕྲིན་ངོ་སྤྲོད་བྱེད་མཁན་ནི་ལྷ་ས་གྲོང་ཁྱེར་སྟག་རྩེ་ཆུས་མི་སྤྱི་ཅུས་ཀྱི་ཅུས་ཀྲང་ཟླ་སྒྲོན་ཡིན་ཞིང་། མིག་སྔར་ཟླ་སྒྲོན་གྱི་རོགས་རམ་འོག་མཐོ་སློབ་སློབ་ཐོན་སློབ་མ་7ལས་ཞུགས་བརྟན་པོ་ཐུབ་པ་དང་ཁོང་ཚོའི་དབར་ལའང་བརྩེ་བ་ཟབ་མོ་ཆགས་ཡོད།

“ང་ཚོས་ད་ལྟ་སྒྲུབ་བཞིན་པའི་ལས་ཀར་དོན་སྙིང་ཧ་ཅང་ཆེན་པོ་ལྡན་ཡོད། གལ་ཏེ་ལྷག་བསམ་རྣམ་དག་གིས་མང་ཚོགས་ལ་བསམ་བློ་གཏོང་བ་དང་གནད་དོན་ཐག་གཅོད་ཞིབ་ཅིང་ཕྲ་བར་བྱས་ན་ཁོང་ཚོས་སེམས་གཏིང་ནས་ཐུགས་རྗེ་ཆེ་ཞུ་གི་རེད་ལ། ང་ཚོའི་ལས་དོན་ལའང་རྒྱབ་སྐྱོར་དེ་བས་མང་བ་ཐོབ་པ་དོན་དངོས་ལས་ར་འཕྲོད་བྱུང་ཡོད”ཅེས་ཟླ་སྒྲོན་གྱིས་མྱོང་ཚོར་ཟབ་མོས་བརྗོད།

“ལས་ཞུགས་ནི་ཆེས་གཞི་རྩའི་དམངས་འཚོ་རེད། སྤྱོད་ཚུལ་སྔར་བས་ལེགས་སུ་བཏང་ནས་དོན་འཁྱོལ་ལ་དམ་འཛིན་ནན་པོ་བྱ་ཆེད། ང་ཚོས་གཞི་རིམ་དུ་བརྟག་དཔྱད་ཞིབ་འཇུག་གཏིང་ཟབ་བྱས་ནས་སྤྱོད་གོ་ཤིན་ཏུ་ཆོད་ཅིང་བོད་ཀྱི་དོན་དངོས་དང་འཚམ་པའི་སྲིད་ཇུས་དང་བྱེད་ཐབས་ཁག་གཅིག་གཅིག་སྡུད་ཐོག་བཏོན་ཡོད”ཅེས་རང་སྐྱོང་ལྗོངས་མི་སྤྱི་ཐིང་གི་ཏང་ཙུའུ་ཡི་ཧྲུའུ་ཅི་གཞོན་པ་དང་ཐིང་ཀྲང་འཕྲིན་ལས་ཉི་མས་ངོ་སྤྲོད་བྱས།

ལོ་གཅིག་ལྷག་ཙམ་རིང་མི་སྤྱི་སྡེ་ཚན་གྱིས་སྲིད་ཇུས་གཅིག་སྡུད་དང་བྱ་ཐབས་ལ་ཤུགས་སྣོན་བརྒྱབ་སྟེ་མཐོ་སློབ་སློབ་ཐོན་སློབ་མའི་ལས་ཞུགས་ལས་གཏོད་ཀྱི་རོགས་སྐྱོར་འཆར་གཞི་རབ་དང་རིམ་པ་ལག་ལེན་བསྟར་ནས་ལམ་ལུགས་འཛུགས་སྐྱོང་དང་། གཞི་རྟེན་འཛུགས་སྐྲུན། ཐབས་ལམ་རྒྱ་སྐྱེད། རྩལ་ནུས་གསོ་སྦྱོང་། སྤྱི་པའི་ཞབས་ཞུ། ཁེ་དབང་འགན་ལེན་སོགས་དམ་འཛིན་བྱ་གཞི་ཆེན་པོ་དྲུག་ལ་ཤུགས་སྣོན་བརྒྱབ་ནས། ཞིང་འབྲོག་པའི་ལས་ཞུགས་གཞན་སྒྱུར་གྱི་ལས་དོན་ལ་སྐུལ་འདེད་བཏང་བས་ཕན་འབྲས་བཟང་པོ་ཐོན་ཡོད་པ་རེད། 2022ལོར་རང་ལྗོངས་ཀྱི་ལོ་འདི་གའི་མཐོ་སློབ་སློབ་ཐོན་སློབ་མ་ལས་ཞུགས་ཐུབ་ཚད་95.6%ཟིན་པ་དང་། ཞིང་འབྲོག་མང་ཚོགས་ཁྲི་63.1ལས་ཞུགས་གཞན་སྒྱུར་ཐུབ་པ། ངལ་ནུས་ཡོང་འབབ་སྒོར་དུང་ཕྱུར་55.6བྱུང་སྟེ་གཙོ་གནད་ཚོགས་སྤྱི་ལས་ཞུགས་ཐུབ་ཚད་རྒྱལ་ཡོངས་ཀྱི་མདུན་གྲལ་དུ་སླེབས་ཡོད།

ལས་དོན་ཏན་ཏིག་བསྒྲུབས་པས་གོ་མིང་དཔྱད་འདེམས་ཀྱི་གདེང་ཚོད་འཕེལ་བ།

ཉེ་བའི་ལོ་ཤས་རིང་བཀྲ་ཤིས་ཚེ་རིང་གི་སེམས་ཁྲལ་ཆེ་ཤོས་ནི་གོ་མིང་དཔྱད་འདེམས་བྱེད་རྒྱུ་དེ་ལས་མ་འདས། བཀྲ་ཤིས་ཚེ་རིང་གིས་མངའ་རིས་སུ་ལོ་ཉི་ཤུ་ལྷག་ལས་ཀ་བྱས་པ་དང་མཐོ་རིམ་གཞོན་པའི་གོ་མིང་བླངས་ནས་ཀྱང་ལོ་བཅུ་ལྷག་འགྲོ་ཡི་ཡོད། དཔྱད་རྩོམ་སོགས་ཆ་རྐྱེན་མང་པོའི་ཚད་བཀག་ལས་བཀྲ་ཤིས་ཚེ་རིང་གིས་རང་ཉིད་སྤྱིར་ན་མཐོ་རིམ་གཞོན་པའི་གོ་མིང་ནས་རྒན་ཡོལ་ཞུ་གི་ཡིན་པའི་ངོས་འཛིན་བྱེད་ཀྱི་ཡོད།

“རང་སྐྱོང་ལྗོངས་མི་སྤྱི་ཐིང་ཁོངས་གཏོགས་ཀྱིས‘གཏན་འཁེལ་གཉིས’ཀྱི་སྲིད་ཇུས་བཏོན་རྗེས་དུས་ཡུན་རིང་པོ་གཞི་རིམ་དུ་ལས་ཀ་བྱེད་མཁན་ཆེད་ལས་ལག་རྩལ་པའི་དཔྱད་རྩོམ་སོགས་ཀྱི་ཚད་བཀག་མེད་པར་བཟོས་པས་ང་ལ་གཞི་ནས་མཐོ་རིམ་རྒན་པའི་གོ་མིང་རག་བྱུང་། དེ་ནི་ངས་ལོ་མང་གཞི་རིམ་དུ་ལས་ཀ་བྱས་པའི་གྲུབ་འབྲས་རེད་ལ་ལས་ཀའི་འཇོན་ཐང་ལ་ཁས་ལེན་བྱས་པ་ཞིག་དེ་བས་རེད”ཅེས་མཐོ་རིམ་རྒན་པའི་གོ་མིང་བླངས་ཟིན་པའི་བཀྲ་ཤིས་ཚེ་རིང་གིས་དགའ་ཚོར་ཆེན་པོས་བརྗོད་པ་དང་། ཁོང་གིས“ངས་གཞི་རིམ་དུ་རྩ་བ་བརྟན་པོ་བཙུགས་ཏེ་ཆེད་ལས་ཀྱི་ཤེས་བྱར་བརྟེན་ནས་མང་ཚོགས་ལ་ལས་དོན་དངོས་བསྒྲུབས་ནས་ཁེ་ཕན་དོན་གཉེར་བྱེད་ཀྱི་ཡིན”ཞེས་བརྗོད།

“མིག་སྔར་ང་ཚོས་གོ་མིང་རིགས་24ཡི་ལས་རིགས་ཁྱབ་ཁོངས་ཀྱི་གོ་མིང་གདེང་འཇོག་ཚད་གཞི་46བཟོས་ནས་གཞི་རིམ་ལ་དམིགས་བསལ་གཟིགས་སྐྱོང་སྲིད་ཇུས་བཏོན་པ་དང“གཞི་རིམ་དུ་བསྐྱོད་པའི”སྟོན་ཕྱོགས་ལ་ཤུགས་སྣོན་བརྒྱབ་པས་གོ་མིང་ལམ་ལུགས་སྒྱུར་བཅོས་སྤྱིར་ན་ལེགས་གྲུབ་བྱུང་ཡོད”ཅེས་རང་སྐྱོང་ལྗོངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་གི་ཆེད་ལས་ལག་རྩལ་མི་སྣ་དོ་དམ་ཁྲུའུ་ཡི་ཁྲུའུ་ཀྲང་འཇམ་དབྱངས་གྲགས་པས་ངོ་སྤྲོད་བྱས་པ་དང་། 2022ལོའི་ལོ་མཇུག་བར་ལྗོངས་ཡོངས་སུ་ཆེད་ལས་ལག་རྩལ་ཤེས་ལྡན་པ་2622ཀྱིས“གཏན་འཁེལ་གཉིས”ཀྱི་གོ་མིང་དཔྱད་ཞིབ་ལ་བརྟེན་ནས་མཐོ་རིམ་གོ་མིང་རག་ཡོད།

ངོ་སྤྲོད་བྱས་པར་གཞིགས་ན། གོ་མིང་ལམ་ལུགས་སྒྱུར་བཅོས་ཁྲོད་རང་སྐྱོང་ལྗོངས་མི་སྤྱི་ཐིང་གིས་ཤེས་ལྡན་པ་འཕེལ་རྒྱས་གཏོང་བའི་སྒྲིག་སྲོལ་དང་ལམ་སྲོལ་སྒྱུར་བཅོས་གཏིང་ཟབ་ཏུ་གཏོང་བ་དང་གོ་མིང་ལམ་ལུགས་སྒྱུར་བཅོས་ལ་སྐུལ་འདེད་ཏན་ཏིག་གཏོང་བ་གལ་ཆེའི་ནང་གི་འགངས་ཆེར་བརྩི་རྒྱུ་མཐའ་འཁྱོངས་ཀྱིས་གནད་དོན་ཕྱོགས་སྟོན་དུ་འཛིན་ཤུགས་ཆེ་རུ་བཏང་སྟེ་ཆེད་ལས་ལག་རྩལ་ཤེས་ལྡན་པའི་ལས་ཀའི་གཙོ་གནད་དང་དཀའ་གནད་ནུས་ཤུགས་ཡོད་རྒུས་བསལ་ནས་ཆེད་ལས་ལག་རྩལ་ཤེས་ལྡན་པའི་གསར་གཏོད་ལས་གཏོད་ཀྱི་ཧུར་སེམས་གང་ལེགས་འཕེལ་བར་བྱས་ཡོད།

འཐུས་སྒོ་ཚང་ལ་གཏིང་ཟབ་པས་སྤྱི་ཚོགས་འགན་སྲུང་གི་ནུས་པ་དེ་བས་ཆེ་བ།

ཟླ་རེའི་ཟླ་འགོར་ཁྲེང་ཏུའུ་རུ་སྡོད་མཁན་རྒན་ཡོལ་ཞུས་པའི་ལས་བྱེད་པ་ཝུའུ་ཧོ་ལི་ཡི་སྤྱི་ཚོགས་འགན་སྲུང་གཱ་ནང་རྒན་ཡོལ་ཞུས་པའི་གླ་ཆ་དུས་ཐོག་ཏུ་འབྱོར་གྱི་ཡོད། འོན་ཀྱང་དང་ཐོག་སྤྱི་ཚོགས་འགན་སྲུང་གཱ་ལེན་རྒྱུ་ཁྱབ་གདལ་གཏོང་སྐབས་ཝུའུ་ཧོ་ལི་ཡིས་དང་ལེན་དེ་ཙམ་བྱེད་ཀྱི་མེད་ཅིང་། ཁོང་གིས“དེ་སྔོན་རྒན་ཡོལ་ཞུས་པའི་གླ་ཆ་སྔོན་མ་ལྟར་དངུལ་ཁང་གཱ་ནང་བླུགས་ན་འགྲིག་གི་རེད། སྤྱི་ཚོགས་འགན་སྲུང་གཱ་བཟོ་བར་ད་དུང་བོད་ལ་འགྲོ་དགོས་པས་དུས་ཚོད་འཕྲོ་བརླག་འགྲོ་ཡི་རེད་ལ་འགྲོ་སོང་ཡང་ཆེན་པོ་རེད་སྙམ་བྱུང”ཞེས་བརྗོད།

ཁྲེང་ཏུའུ་དང་དེའི་ཉེ་འགྲམ་དུ་སྡོད་པའི་ཐེམ་ཁུངས་བོད་ནས་ཡིན་པའི་མི་སྣ་དང་བོད་དུ་འགན་བཅོལ་ནང་ཞུགས་པའི་མི་སྣར་དུས་ཐོག་ཏུ་སྤྱི་ཚོགས་འགན་སྲུང་གཱ་སྤྱོད་རྒྱུ་ཡོང་བ་བྱ་ཆེད། རང་སྐྱོང་ལྗོངས་མི་སྤྱི་ཐིང་གིས་རང་འགུལ་ངང་འགན་འཁྲི་འཁུར་བ་དང་བྱས་རྗེས་ཧུར་ཐག་བཞག་སྟེ་ཁྲེང་ཏུའུ་རུ་སྤྱི་ཚོགས་འགན་སྲུང་གཱ་ཡི་ཞབས་ཞུའི་ས་ཚིགས་བཙུགས་པས་ཝུའུ་ཧོ་ལི་ཡི་སེམས་ཁྲལ་བསལ་ཡོད།

“སྤྱི་ཚོགས་འགན་སྲུང་གཱ་གཉེར་རྗེས་ཐད་ཀར་ཧྭ་ཤིས་སྨན་ཁང་ནས་ཞིང་ཆེན་སྒྲོལ་ཏེ་ས་ཆ་གཞན་དུ་སྨན་བཅོས་ཐུབ་པ་དང་ཁྲེང་ཏུའུ་ཡི་དམིགས་བཙུགས་སྨན་རྫས་ཚོང་ཁང་ནས་སྨན་ཉོ་ཐུབ་པས་དངོས་གནས་སྟབས་བདེ་པོ་འདུག”ད་ཆ་ཝུའུ་ཧོ་ལི་ཡིས་སྤྱི་ཚོགས་འགན་སྲུང་གཱ་གང་འདོད་སྤྱོད་ཐུབ་པ་དང་། ཁོང་ཡང་བོད་ལྗོངས་སྤྱི་ཚོགས་འགན་སྲུང་གཱ་ཡི་འོས་འགན་དྲིལ་བསྒྲགས་པར་གྱུར་ནས་ཉེ་འགྲམ་གྱི་དགའ་ཉེ་སྤུན་གྲོགས་ཚོར་སྤྱི་ཚོགས་འགན་སྲུང་གཱ་སྤྱོད་པར་ཁྲིད་སྟོན་བྱེད་བཞིན་ཡོད།

སྤྱི་ཚོགས་འགན་སྲུང་གཱ་ཙམ་མ་ཡིན་པར་སྤྱི་ཚོགས་འགན་སྲུང་གི་ཕྱོགས་གང་ས་ཅི་ཐད་དུ་མི་སྤྱིའི་ཁོངས་གཏོགས་ཚང་མས་ཞབས་འདེགས་ཞུ་བཞིན་ཡོད། 2022ལོར་རང་ལྗོངས་ཀྱི་གཞི་རྩའི་རྒན་གསོ་འགན་བཅོལ་ནང་ཞུགས་ཚད་96%ཡན་རྒྱུན་འཁྱོངས་ཐུབ་པ་དང་། ལས་རྣམ་གསར་པའི་ཚོགས་སྤྱི་ལས་རྨས་འགན་བཅོལ་ནང་ཞུགས་པར་ཐོགས་མེད་བགྲོད་ལམ་བཏོད་པ། ཁེ་ལས་ཀྱི་ལས་བཟོའི་གཞི་རྩའི་རྒན་གསོ་འགན་བཅོལ་རྒྱལ་ཡོངས་ཀྱི་སྤྱི་འདོམས་ཐུབ་པ། གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་རྒན་གསོ་འགན་བཅོལ་གྱི་རྨང་གཞིའི་རྒན་གསོའི་དངུལ་གྱི་ཚད་གཞི་ཟླ་རེར་མི་རེར་སྒོར་220ཟིན་ཡོད།

དྲང་གཞག་བདེན་སྐྱོང་བྱས་པས་ངལ་རྩོལ་འབྲེལ་བ་དེ་བས་ཞི་མཐུན་བྱུང་བ།

2022ལོའི་ཟླ་4པར་ཀྲོའུ་ཆེ་གེ་མོ་ལྷ་ས་གྲོང་ཁྱེར་མི་སྤྱི་ཅུས་སུ་བོད་ལྗོངས་མཛེས་བཟོ་བཟོ་སྐྲུན་ཚད་ཡོད་ཀུང་སི་ཞིག་གིས་བཟོ་པའི་གླ་ཆ་ཁྱོན་སྒོར་28000འགྱངས་ཆད་བྱས་པའི་སྐོར་ཞུ་བར་ཡོང་བ་དང་། མི་སྤྱི་སྡེ་ཚན་གྱི་ལས་དོན་མི་སྣས་དོ་བདག་གིས་ཞུས་པའི་གྱོད་གཞི་འཕྲལ་མར་ཐོ་འགོད་ཞིབ་ཕྲ་བྱས་ནས་གང་མགྱོགས་གྱོད་གཞི་སྒྲུབ་གཉེར་བྱས་ཡོད། ཕྱོགས་མང་པོ་ནས་བརྟག་དཔྱད་བྱས་པ་བརྒྱུད། ཀུང་སི་དེའི་ཁྲིམས་འགལ་གྱི་བྱེད་སྤྱོད་གསལ་ཞིང་དཔང་རྟགས་ཁུངས་བཙན་རག་པ་རེད།

མི་སྤྱི་སྡེ་ཚན་གྱིས་ཀུང་སི་དེ་དང་ཐེངས་མང་འབྲེལ་བ་བྱས་ཀྱང་ཀུང་སི་དེས་གཞོགས་འདེགས་མ་བྱས་པས། འབྲེལ་ཡོད་བཅའ་ཁྲིམས་དང་ཁྲིམས་སྲོལ་ལྟར། མི་སྤྱི་སྡེ་ཚན་གྱིས་ཀུང་སི་དེར་སྒོར་9000ཡི་སྲིད་འཛིན་ཆད་པ་བཅད་པ་དང་འབྲེལ་ཀུང་སི་དང་ཁྲིམས་མི་ཞིང་པ་ལས་མིའི་གླ་ཆ་འགྱངས་ཆད་བྱས་པར་ཆད་གཅོད་བསླབ་འདོམས་བྱ་ཡུལ་གྱི་མིང་ཐོའི་ནང་བཅུག་ནས་སྤྱི་ཚོགས་ཐོག་ཁྱབ་བསྒྲགས་བྱས་པ་རེད། གླ་ཆ་རག་རྗེས་ཀྲོའུ་ཆེ་གེ་མོས་སེམས་འགུལ་ཚད་མེད་ཐེབས་བཞིན་དུ“སྟབས་ལེགས་པ་ཞིག་ལ་སྤྱི་ཚོགས་འགན་སྲུང་སྡེ་ཚན་གྱིས་ང་ཚོར་བདེན་པའི་རྒྱབ་ལངས་གནང་བྱུང”ཞེས་བཤད།

མིག་སྔའི་བར་ལྗོངས་ཡོངས་སུ་རང་མིང་འགོད་ལམ་གྱི་དོ་དམ་རྣམ་གྲངས་ཀྱི་བསྡོམས་3307ཟིན་པ་དང་། ལས་སྟེགས་ཀྱི་མིང་ཐོག་ནས་ཐོ་འགོད་བྱས་པའི་བཟོ་པ་ཁྲི་10.99ཟིན་པ། ཞིང་པ་ལས་མིའི་གླ་ཆ་ཆེད་འཇོག་རྩིས་ཁྲ་2717བཟོས་པ། རིམ་རྩིས་བྱས་ན་དངུལ་ཁང་གིས་མི་ཐེངས་ཁྲི་110.38ལ་ཚབ་སྤྲོད་བྱས་པར་སྒོར་དུང་ཕྱུར་200.84ཟིན་པ་དང་། འཕྲལ་སྡོམ་འཁོར་རྒྱུག་མ་དངུལ་སྒོར་དུང་ཕྱུར་7.26དོན་འཁྱོལ་བྱས་ནས་ཞིང་པ་ལས་མིའི་གླ་ཆ་འགན་ལེན་མ་དངུལ་སྒོར་དུང་ཕྱུར་25.29བཅོལ་ཡོད།

“གོམ་སྟབས་རྗེས་མར་རང་སྐྱོང་ལྗོངས་མི་སྤྱི་ཐིང་ཏང་ཙུའུ་ཡིས་སྤྱོད་ཚུལ་འཛུགས་སྐྱོང་སྔོན་ལ་འཇོག་རྒྱུ་མུ་མཐུད་མཐའ་འཁྱོངས་བྱས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པའི་སློབ་གསོ་དང་ཟུང་འབྲེལ་གྱིས་སྤྱོད་ཚུལ་སྔར་བས་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱས་ཏེ། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱེད་རྒྱུ་དེ་ཚད་གཞི་ཅན་དང་། རྒྱུན་གཏན་ཅན། ཕུགས་ཕན་ཅན། ལམ་ལུགས་ཅན་བཅས་སུ་འགྱུར་བའི་འགན་ལེན་བྱས་ནས། མི་སྤྱིའི་ལས་དོན་སྐོར་གྱི་རང་སྐྱོང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་ཁག་དོན་འཁྱོལ་ཞིབ་ཚགས་དང་ཕན་འབྲས་དངོས་ཐོན་པའི་འགན་ལེན་བྱེད་ཀྱི་ཡིན”ཞེས་ལྗོངས་ཏང་ཨུད་རྩ་འཛུགས་པུའི་པུའུ་ཀྲང་གཞོན་པ་དང་ལྗོངས་མི་སྤྱི་ཐིང་གི་ཏང་ཙུའུ་ཡི་ཧྲུའུ་ཅི་ལི་ཧྥུའུ་ཀྲུང་གིས་བརྗོད།