ཞིང་ས་གཤིན་པོར་དཔྱིད་རླུང་ལྡང་བའི་དུས། ལྗོན་ཤིང་བཏབ་པའི་དུས་སྐབས་འཆར་བའི་རྟགས། ཉེ་ཆར། ལྷ་ས་གྲོང་ཁྱེར་ཁྲེང་ཀོན་ཆུས་ཀྱིས་ལྗོངས་ཐད་གཏོགས་ཚན་པ་དང་དོག་སྡེ་ཁྲོམ་གཞུང་གི་ལས་བྱེད་པ་དང་ལས་བཟོ་སྒྲིག་འཛུགས་བྱས་ཏེ། དོག་སྡེ་ཁྲོམ་གཞུང་འོལ་པ་གྲོང་ཚོར“འོས་འགན་ཤིང་འཛུགས་བྱས། མཛེས་པའི་ཁྱིམ་གཞིས་སྐྲུན”པའི་འོས་འགན་ཤིང་འཛུགས་བྱེད་སྒོ་སྤེལ་ཏེ་ནགས་བཟོ་རྒྱ་ཁྱོན་མུའུ་90ལྷག་ཙམ་ཟིན་པ་དང་སྡོང་ཕྲུག་2480ལྷག་ཙམ་བཏབ་པ་རེད།
“ད་ཕན་ལོ་ཤས་རིང་ལྷ་ས་གྲོང་ཁྱེར་དང་ཁྲེང་ཀོན་ཆུས་ཀྱི་འབྲེལ་ཡོད་སྡེ་ཚན་གྱིས་འོལ་པ་གྲོང་ཚོར་ཤིང་འཛུགས་ནགས་བཟོའི་བྱེད་སྒོ་རབ་དང་རིམ་པ་སྤེལ་ནས། འོལ་པ་གྲོང་ཚོའི་རྣམ་པ་གསར་རྐྱང་དུ་གྱུར་པ་དང་གྲོང་ཚོ་དང་གྲོང་ལྷན་གྱི་ཁོར་ཡུག་ལེགས་སུ་ཕྱིན་པ་དང་དུས་མཚུངས། རྐང་ཐང་ལ་དགའ་པོ་བྱེད་མཁན་མི་ཉུང་བ་ཞིག་དེ་གར་ལྟ་སྐོར་དང་ཡུལ་སྐོར་བྱེད་པར་བཀུགས་ཡོད”ཅེས་འོས་འགན་ཤིང་འཛུགས་ལ་ཞུགས་མཁན་འོལ་པ་གྲོང་ཚོའི་གྲོང་མི་ཉི་མས་བཤད།
འོས་འགན་ཤིང་འཛུགས་བྱེད་སྒོར་ཞུགས་པའི་ལས་བྱེད་པ་དང་ལས་བཟོས་ད་ཐེངས་ཀྱི་འོས་འགན་ཤིང་འཛུགས་བྱེད་སྒོ་བརྒྱུད། “རི་སྔོ་ཆུ་དྭངས་གསེར་དངུལ་རི་ལས་ལྷག”པའི་འདུ་ཤེས་བརྟན་པོ་བཙུགས་པ་དང་ནགས་གཅེས་ནགས་གསོའི་སྤྲོ་སེམས་འཕེལ་བ་མ་ཟད། རྩ་འཛུགས་ཀྱི་གོང་བུ་སྒྲིལ་ཤུགས་ཀྱང་འཕེལ་ནས། དཔུང་ཁག་གི་མཉམ་ལས་ནུས་པ་སྔར་བས་ཆེ་རུ་ཕྱིན་ཡོད་ཅེས་གཅིག་རྗེས་གཉིས་མཐུད་ངང་བཤད་པ་རེད།
ད་ཐེངས་ཀྱི་འོས་འགན་ཤིང་འཛུགས་བྱེད་སྒོ་བརྒྱུད་་རྒྱ་ཆེའི་ལས་བྱེད་པ་དང་ལས་བཟོའི་ཧུར་བརྩོན་ཡར་ཐོན་དང་བློ་རྩ་བརྟན་པོས་ཡར་བརྩོན་བྱེད་པའི་བསམ་པའི་ཉམས་འགྱུར་གང་ལེགས་མངོན་པ་དང་། ཤིང་འཛུགས་ནགས་བཟོ་དང་ཁོར་ཡུག་ལེགས་བཅོས་ཀྱི་རྣམ་པ་ཟབ་མོ་བཏོད་པ། ཤིང་འཛུགས་ནགས་བཟོ་དང་སྔོ་ཞིང་དྭངས་བའི་རི་ཆུ་ཀླུང་གསུམ་སྲུང་སྐྱོང་བྱེད་པའི་ཚ་རླབས་འཕྱུར་བ་བཅས་གང་ལེགས་མངོན་ཡོད།