ཚེས་14ཉིན། ལྗོངས་ཏང་ཨུད་རྩ་འཛུགས་པུས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོའི་ལས་དོན་ཚོགས་འདུ་འཚོགས་ཏེ། ཀྲུང་དབྱང་དང་ལྗོངས་ཏང་ཨུད་ཀྱི་བརྗོད་དོན་གཙོ་བོའི་སློབ་གསོའི་ལས་དོན་ཚོགས་འདུའི་དགོངས་དོན་བརྒྱུད་བསྒྲགས་སློབ་སྦྱོང་བྱས་པ་དང་ལས་ཁུངས་ཀྱི་བརྗོད་དོན་གཙོ་བོའི་སློབ་གསོའི་ལས་དོན་བཀོད་སྒྲིག་བྱས་པ་རེད། ལྗོངས་ཏང་ཨུད་ཀྱི་རྒྱུན་ཨུ་རྩ་འཛུགས་པུའི་པུའུ་ཀྲང་ལའེ་ཅའོ་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་བ་རེད།
ལའེ་ཅའོ་ཡིས་ནན་བཤད་གནང་དོན། རྩ་འཛུགས་སྡེ་ཚན་དང་རྩ་འཛུགས་ལས་དོན་གྱི་ལས་བྱེད་པ་ནི་བརྗོད་དོན་གཙོ་བོའི་སློབ་གསོ་སྒྲིག་འཛུགས་བྱེད་མཁན་དང་སྐུལ་འདེད་གཏོང་མཁན་ཞིག་ཡིན་ལ། དེའི་ནང་དངོས་སུ་ཞུགས་མཁན་དང་སློབ་གསོ་མྱོང་མཁན་ཞིག་ཀྱང་ཡིན་པས་འགན་འཁྲི་ཉིས་བརྩེགས་ཁུར་བཞིན་ཡོད། འགོ་འཛུགས་ས་མཐོ་པོས་ཇུས་འགོད་དང་། ཚད་གཞི་མཐོ་པོས་སྐུལ་འདེད་གཏོང་བ། སྤུས་ཚད་མཐོ་པོས་དོན་འཁྱོལ་བཅས་བྱས་ཏེ། “དཔེ་བཟང་སློབ་མ”དང“སྣེ་ཁྲིད་པའི”རྣམ་པའི་ངོས་ནས་བརྗོད་དོན་གཙོ་བོའི་སློབ་གསོའི་ལས་དོན་ཁག་ཏན་ཏིག་ངང་ཡག་པོ་བསྒྲུབས་ཏེ་ལྗོངས་ཡོངས་སུ་ཚད་ཤིང་འཛུགས་པ་དང་མིག་དཔེ་འདོན་དགོས། བརྗོད་དོན་གཙོ་བོའི་སློབ་གསོའི་སྤྱིའི་བླང་བྱ་དང་། དམིགས་ཚད་ལས་འགན། གཙོ་གནད་བྱ་ཐབས་བཅས་ཁོང་དུ་གནད་སྨིན་ཆུད་པར་བྱས་ཏེ་གཏན་འབེབས་བྱ་སྤྱོད་དོན་འཁྱོལ་དང་། རང་འདེམས་བྱ་སྤྱོད་གསར་གཏོད། ཕྱི་ཚུལ་རིང་ལུགས་གཏན་འགོག་བཅས་བྱས་ནས་ཕན་འབྲས་དངོས་ཐོན་པའི་འགན་ལེན་བྱེད་དགོས། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་སྣོན་བརྒྱབ་སྟེ། བརྗོད་དོན་གཙོ་བོའི་སློབ་གསོའི་ཁྲོད་འཕེལ་བའི་རྩ་འཛུགས་ལས་དོན་གྱི་ལས་བྱེད་པའི་སློབ་སྦྱོང་དང་ལས་ཀའི་སྤྲོ་སེམས་དེ་སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱེད་པའི་སྒུལ་ཤུགས་ཆེན་པོར་འགྱུར་བར་བྱེད་པ་དང་། རྩ་འཛུགས་ལམ་ཕྱོགས་ཀྱིས་ཆབ་སྲིད་ལམ་ཕྱོགས་ལ་ཞབས་འདེགས་ཞུ་བའི་ཕན་འབྲས་དངོས་ལ་བརྟེན་ནས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།