ས་བབ་མཐོ་ཚད་སྨི་5000ཟིན་པའི་བོད་ལྗོངས་ལྷོ་ཁ་གྲོང་ཁྱེར་མཚོ་སྨད་རྫོང་གྲི་གུ་གྲོང་རྡལ་དུ་གྲང་ཟུག་ཅུང་ཆེ་ཡང་། ཞོགས་པའི་ཉི་ཟེར་ཤར་རིའི་རྩེ་ནས་ཡངས་པའི་རྩྭ་ཐང་གི་ཕང་བར་འཕྲོས་མ་ཐག ལོ་26ལ་སླེབས་པའི་སྐལ་བཟང་དབང་ལགས་ཀྱིས་ལས་རོགས་4དང་མཉམ་དུ་ཉིན་གང་གི་ལས་ལ་བྲེལ་འགོ་བརྩམས།

“རླུང་གློག་གཏོང་སའི་བདེ་འཇགས་ཐོན་སྐྱེད་དང་འཁོར་སྐྱོད་བརྟན་པོ་འགན་ལེན་བྱེད་རྒྱུ་ནི་གློག་གཏོང་ལས་ཕྱོད་འགན་ལེན་བྱེད་པའི་འགག་རྩའི་རྒྱུ་རྐྱེན་ཞིག་རེད། ས་བབ་མཐོ་པོ་འདི་འདྲར་ཞོགས་པ་ལྷགས་པ་ཅུང་ཆུང་བས་ང་ཚོས་སྐབས་དེ་དང་བསྟུན་ནས་རླུང་ཤུགས་གློག་གཏོང་འཕྲུལ་འཁོར་གྱི་ལྕགས་ཕུར་གང་མགྱོགས་ཉམས་བཟོ་བྱས་ཏེ་རྒྱུན་གཏན་ལྟར་གློག་གཏོང་ཐུབ་པ་བྱེད་ཀྱི་ཡོད” སྐལ་བཟང་དབང་ལགས་གློག་ཤུགས་ཆེད་ལས་ཀྱི་དངོས་གཞིའི་ཚན་ཁག་ནས་སློབ་གྲྭ་ཐོན་རྗེས་འགག་གསུམ་ཚོགས་པ་བོད་ལྗོངས་ནུས་རྒྱུ་མ་འཇོག་ཚད་ཡོད་ཀུང་སིར་ཞུགས་པ་དང་བོད་ལྗོངས་མཚོ་སྨད་གྲི་གུའི་རླུང་གློག་གཏོང་སར་ལས་ཀ་བྱས་ནས་ལོ་3འགྲོ་གི་ཡོད།

བོད་ལྗོངས་མཚོ་སྨད་གྲི་གུའི་རླུང་གློག་རྣམ་གྲངས་ནི་བོད་ནས་གློག་དྲ་གཙོ་བོ་དང་སྦྲེལ་མཐུད་བྱས་པའི་རླུང་གློག་རྣམ་གྲངས་དང་པོ་དེ་ཡིན་ཞིང་། འཕྲུལ་འཁོར་ཨ་མ་ནས་གློག་གཏོང་ཚད་ཀྲའོ་ཝ་22ཟིན་པ་དང་རླུང་འཁོར་ས་བབ་མཐོ་ཚད་སྨི་5000ནས་5200བར་དུ་བཙུགས་ཡོད། རྣམ་གྲངས་དེས་2021ལོའི་ལོ་མཇུག་ཏུ་ཕྱོགས་ཡོངས་ནས་གློག་གཏོང་འགོ་ཚུགས་ཚུན། 2023ལོའི་ཟླ་3པ་བར་ཁྱོན་བསྡོམས་གློག་གཏོང་ཚད་ཆུ་ཚོད་ཆན་ཝ་དུང་ཕྱུར་1ལྷག་ཟིན་པ་དེས་དབྱང་གཉིས་ཐཱན་འགྱུར་འབུད་ཚད་ཏུན་ཁྲི་8.32ཉུང་དུ་ཕྱིན་པ་དང་ཚད་ལྡན་རྡོ་སོལ་ཏུན་ཁྲི་3.05གྲོན་ཆུང་ཐུབ་པ་དང་མཚུངས་པ་མ་ཟད། བོད་དུ་དགུན་དུས་གློག་དཀོན་པའི་སྣང་ཚུལ་ཞི་ལྷོད་དུ་ནུས་ལྡན་ཕྱིན་ཡོད་པ་རེད།

བོད་ཀྱིས་གངས་ལྗོངས་ས་མཐོའི་ཆུ་རླུང་འོད་གསུམ་གྱི་ཐོན་ཁུངས་ལེགས་ཆར་དམ་པོར་དམིགས་པས། གློག་ཁུངས་དང་གློག་དྲ་འཛུགས་སྐྲུན་བྱ་གཞག་བྱ་འཕུར་བ་ལྟར་འཕེལ་རྒྱས་ཕྱིན་ནས་དགུན་དཔྱིད་གཉིས་ལ་གློག་དཀོན་པའི་སྣང་ཚུལ་ཞི་ལྷོད་དུ་ནུས་ལྡན་ཕྱིན་ཏེ། བོད་ཀྱི་ས་བབ་མཐོ་བའི་ཐག་རིང་ལུང་ཁུག་ས་ཁུལ་སྔར་ལས་མང་བའི་ཞིང་འབྲོག་མང་ཚོགས་ཚོར་ཉེ་བའི་ལོ་ཤས་རིང་གློག་བརྟན་པོ་སྤྱོད་རྒྱུ་བྱུང་བ་དང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གློག་སྤྱོད་དགོས་མཁོ་མགྱོགས་མྱུར་སྐོང་ཐུབ་ཡོད། 2022ལོའི་ལོ་མཇུག་བར་བོད་ཀྱིས་བསྐྲུན་ཟིན་པ་དང་སྐྲུན་བཞིན་པའི་གློག་འདོན་འཕྲུལ་འཁོར་ནས་གློག་གཏོང་ཚད་ཆན་ཝ་ཁྲི་1757ཟིན་པ་དང་ལོ་ཧྲིལ་པོར་གློག་དྲ་སྦྲེལ་མཐུད་ཀྱི་གློག་ཁང་ནས་གློག་གཏོང་ཚད་དུས་མཚུངས་ལས་30.4%འཕར་ཡོད་པ་རེད།

ས་བབ་མཐོ་ཚད་སྨི་4500ཙམ་ཟིན་པའི་ནག་ཆུ་གྲོང་ཁྱེར་གསེར་རྙེད་ཆུས་དགའ་ལྡན་ཁང་གསར་གྲོང་ཚོར་ས་བཟུང་རྒྱ་ཁྱོན་མུའུ་2200ཟིན་ཞིང་། གྲལ་སྟར་འགྲིག་པོར་བཞག་པའི་ཉི་ནུས་ཀྱི་འོད་ཤུགས་ཤེལ་ལེབ་25000ལྷག་ཙམ་དགུང་སྔོན་སྤྲིན་དཀར་གྱི་འོག་དེ་བས་བཀྲག་མདངས་ཆེ།

དེ་ནི་མིག་སྔར་བོད་ནས་འོད་ཤུགས་གློག་གཏོང་གི་གློག་མཁོ་འདོན་འགན་ལེན་རྣམ་གྲངས་ཆེ་ཤོས་ཡིན་པའི་བོད་ལྗོངས་ཧྭ་གློག་ནག་ཆུ་གསེར་རྙེད་ཆུས་ཀྱི་ཆན་ཝ་ཁྲི་12ཟིན་པའི་འོད་ཤུགས་གློག་གཏོང་གི་གློག་མཁོ་འདོན་རྣམ་གྲངས་ཡིན་ཞིང་། འཛུགས་སྐྲུན་གྱི་གཞི་ཁྱོན“འོད་ཤུགས་ཆན་ཝ་ཁྲི་12+གསོག་ནུས་ཆུ་ཚོད་ཆན་ཝ་ཁྲི་12ཟིན་པ”དང་ལོ་རེར་ཆ་སྙོམས་གློག་གཏོང་ཚད་ཆུ་ཚོད་ཆན་ཝ་དུང་ཕྱུར་2.47ཟིན་གྱི་ཡོད་པ་རེད།

“ཉིན་མོར་འོད་ཤུགས་སྒྲིག་ཆས་ཀྱིས་རྒྱུན་གཏན་ལྟར་གློག་གཏོང་ཐུབ་པ་དང་། མཚན་མོར་ནུས་རྒྱུ་གསོག་འཇོག་མ་ལག་གིས་ཆུ་ཚོད་4ཡི་རིང་གློག་ཆུ་ཚོད་ཆན་ཝ་ཁྲི་12ལྷག་ཙམ་གཏོང་ཐུབ”ཅེས་ཧྭ་གློག་ནུས་རྒྱུ་གསར་པའི་ཚོགས་པ་མ་རྐང་ཚད་ཡོད་ཀུང་སི་བོད་ལྗོངས་ཡན་ལག་ཀུང་སིའི་རྣམ་གྲངས་ཀྱི་འགན་འཁུར་བ་ཅང་ཅ་པའོ་ཡིས་2023ལོའི་ཟླ་3པ་བར་རྣམ་གྲངས་ཀྱིས་རིམ་རྩིས་བྱས་ན་གློག་ཆུ་ཚོད་ཆན་ཝ་ཁྲི་400ལྷག་ཙམ་བཏང་ནས་བོད་ཀྱི་ས་བབ་མཐོ་ཚད་སྨི་4500ཡན་གྱི“འོད་ཤུགས་དང་གསོག་ནུས”ཟུང་དུ་འབྲེལ་བའི་ནུས་རྒྱུ་མཁོ་སྤྲོད་འགན་ལེན་གྱི་ལས་དོན་སྔོན་ལ་ལག་བསྟར་དང་ཚོད་ལྟ་བྱེད་མཁན་དུ་གྱུར་ཡོད་ཅེས་བརྗོད།

གསར་འགོད་པར་ཤེས་རྟོགས་བྱུང་བར་གཞིགས་ན། “ལོ་ལྔ་ཚན་བཅུ་བཞི་པའི”རིང་བོད་ཀྱིས་ཆན་ཝ་ཁྲི་བརྒྱ་རིམ་པའི་འོད་ཤུགས་རྟེན་གཞི་དང་ས་བབ་མཐོ་བའི་རླུང་གློག་འཛུགས་སྐྲུན་ལ་སྐུལ་འདེད་ཧུར་ཐག་དང“ནུས་རྒྱུ་གསར་པ་དང་ནུས་རྒྱུ་གསོག་འཇོག”ཟུང་དུ་འབྲེལ་བའི་ཚོད་ལྟའི་དཔེ་སྟོན་ལ་གོ་རིམ་ལྡན་པའི་ངང་སྐུལ་འདེད་བཏང་སྟེ་འོད་ཤུགས་ཉི་ནུས་ཀྱི་གློག་འདོན་འཕྲུལ་འཁོར་ནས་གློག་གཏོང་ཚད་ཆན་ཝ་ཁྲི་1000ལྷག་ཟིན་པའི་བརྩོན་ལེན་བྱ་རྒྱུ་རེད།

རྒྱལ་ཁབ་ཀྱིས་བསྐྱར་སྤྱོད་ཆོག་པའི་ནུས་རྒྱུའི་འཕེལ་རྒྱས་ལ་སྤྱི་འདོམས་འཆར་འགོད་བྱས་པ་དང་བསྟུན་ནས་ཉེ་བའི་ལོ་ཤས་རིང་བོད་ཀྱིས་གོ་སྐབས་དམ་འཛིན་བྱས་ཏེ་འོད་ཤུགས་དང་ཆུ་གློག་སོགས་ནུས་རྒྱུ་གསར་པ་འཕེལ་རྒྱས་ཤུགས་ཆེན་བཏང་ནས་ཐོན་ཁུངས་ཀྱི་ལེགས་ཆ་དེ་དཔལ་འབྱོར་དང་དམངས་འཚོའི་ཁེ་སྤོགས་སུ་འགྱུར་བར་སྔར་བས་སྐུལ་འདེད་བཏང་ཡོད།

(ཤིན་ཧྭ་གསར་འགྱུར་ཁང་ལྷ་ས་ནས་ཟླ་3ཚེས་23ཉིན་འབྱོར་བའི་གློག་འཕྲིན)