མང་ཚོགས་ཀྱི“འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག”བཅས་ལ་དམིགས་ཏེ་དམངས་འཚོའི་བདེ་རྩ་ཟམ་མི་ཆད་པར་ཆེ་རུ་གཏོང་བ།
ཉིན་ཤས་བསྟུད་མར། རང་ལྗོངས་ཀྱི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་སྲིད་གྲོས་ཀྱི་ཨུ་ཡོན་ཚོས་རྒྱལ་ཡོངས་ཚོགས་འདུ་གཉིས་ཀྱི་ཐོག “འགོ་ཚུགས་ལོར་ཇི་ལྟར་བྱས་ནས་ཀྲུང་གོའི་ལུགས་ཀྱི་དེང་རབས་ཅན་གྱི་བརྗིད་ཆེའི་འཆར་འགོད་དེ་ཞིབ་ཕྲའི་འབད་འཐབ་དམིགས་ཚད་དུ་བསྒྱུར་ནས་མི་སེར་ཚོས་སེམས་ཁུར་བྱེད་པའི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་དང་གླེང་མང་བའི་གནད་དོན་ཐག་གཅོད་ཏན་ཏིག་བྱེད་པ་དང་། འཕེལ་རྒྱས་ལ་བརྟེན་ནས་དམངས་འཚོའི་བདེ་རྩ་ཟམ་མི་ཆད་པར་ཆེ་རུ་གཏོང་རྒྱུར”དམིགས་ནས་ངོས་འཛིན་དང་གྲུབ་འབྲས་གླེང་བ་དང་བྱེད་ཐབས་བཏོན་གནང་བ་རེད།
རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། ཆབ་མདོ་གྲོང་ཨུད་ཀྱི་ཧྲུའུ་ཅི་གཞོན་པ། ཧྲི་ཀྲང་བཅས་ཡིན་པའི་ལུའོ་ཆིང་ཝུའུ་ཡིས། འདས་ཟིན་པའི་ལོ་5ཡི་ནང་། ཆབ་མདོ་གྲོང་ཁྱེར་གྱིས་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་དང་གྲོང་གསེབ་དར་རྒྱས་འབྲེལ་མཐུད་ནུས་ལྡན་བྱེད་རྒྱུ་དེ་དམངས་སེམས་འདུ་འགོད་ཆེ་ཤོས་སུ་མཐའ་འཁྱོངས་བྱས་ནས་དུས་བཀག་ལྟར་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་པ་དང་། དབུལ་སྒྲོལ་གྱི་གྲུབ་འབྲས་རྒྱུན་མཐུད་སྲ་བརྟན་དུ་གཏོང་བ། གྲོང་གསེབ་དར་རྒྱས་ལ་རྒྱུན་མཐུད་སྐུལ་འདེད་གཏོང་བ་བཅས་བྱས་པ་དང་། ལས་ཞུགས་བརྟན་པོ་དང་ལས་ཞུགས་འགན་ལེན་བྱེད་རྒྱུ་དེ་གཞི་རྩའི་དམངས་འཚོའི་འདུ་འགོད་དུ་མཐའ་འཁྱོངས་བྱས་ནས་མཐོ་སློབ་སློབ་ཐོན་སློབ་མའི་ལས་ཞུགས་དང་ཞིང་འབྲོག་མང་ཚོགས་ཀྱི་ལས་ཞུགས་གཞན་སྒྱུར་ལ་གཙོ་གནད་ཐོག་དམ་འཛིན་ཡག་པོ་བྱས་པ། མི་དམངས་བློ་ཡིད་ཚིམ་པའི་སློབ་གསོ་ཡག་པོ་གཉེར་རྒྱུ་དེ་རྩ་བའི་ལས་འགན་དུ་མཐའ་འཁྱོངས་བྱས་ནས་སློབ་གསོའི་འགྲོ་གྲོན་གཏོང་ཤུགས་དང་། སློབ་གཉེར་ཆ་རྐྱེན་ལེགས་བཅོས། སློབ་གཉེར་ནུས་པ་ཆེར་གཏོང་། སློབ་གསོའི་སྤུས་ཚད་མཐོར་གཏོང་བཅས་ལ་ཤུགས་སྣོན་བརྒྱབ་པ། རིག་གནས་བྱ་གཞག་འཕེལ་རྒྱས་གཏོང་རྒྱུ་དེ་མི་དམངས་ཀྱི་བསམ་པའི་རིག་གནས་ཀྱི་དགོས་མཁོ་སྐོང་བའི་གཞི་རྩའི་ཐབས་ལམ་དུ་མཐའ་འཁྱོངས་བྱས་ནས་རིག་གནས་ཞབས་ཞུའི་མ་ལག་རྒྱུན་མཐུད་འཐུས་སྒོ་ཚང་དུ་གཏོང་བ་དང་། རིག་རྩལ་སྤུས་དག་གསར་གཏོད་ལ་རྒྱུན་མཐུད་སྐུལ་འདེད་གཏོང་བ། རིག་གནས་དམངས་ཕན་གྱི་བྱེད་སྒོ་རྒྱུན་མཐུད་སྤེལ་བ། རིག་གནས་ཐོན་ལས་འཕེལ་རྒྱས་ལ་རྒྱུན་མཐུད་སྐུལ་འདེད་གཏོང་བ་བཅས་བྱས་པ། བདེ་ཐང་ཆབ་མདོ་བསྐྲུན་རྒྱུ་དེ་དམངས་འཚོའི་ཁྱབ་ཁོངས་ཀྱི་ལས་དོན་གལ་ཆེན་ཞིག་ཏུ་མཐའ་འཁྱོངས་བྱས་ནས་བདེ་ཐང་ཆབ་མདོའི་འགན་སྲུང་འདུ་འགོད་དང་། འཕྲོད་བསྟེན་གྱི་རྨང་གཞིའི་ཆ་རྐྱེན་ལེགས་བཅོས། སྨན་བཅོས་འཕྲོད་བསྟེན་གྱི་སྒྲིག་སྲོལ་སྒྱུར་བཅོས། སྨན་བཅོས་ཞབས་ཞུའི་ནུས་པ་འཛུགས་སྐྱོང་སོགས་ལ་དམ་འཛིན་ནན་པོ་བྱས་པ། སྤྱི་ཚོགས་འགན་སྲུང་དེ་མི་དམངས་ཀྱི་འཚོ་བ་ལེགས་སུ་གཏོང་བའི་རྨང་གཞིའི་དམངས་འཚོའི་འདུ་འགོད་དུ་མཐའ་འཁྱོངས་བྱས་ནས་སྤྱི་ཚོགས་འགན་བཅོལ་གྱི་ཀུན་ཕན་མཉམ་སྤྱོད་དང་། སྨན་བཅོས་འགན་བཅོལ་གྱི་མ་ལག་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ། དམངས་འཚོ་འགན་སྲུང་གི་དྲ་བ་ཚགས་དམ་དུ་གཏོང་བ་བཅས་བྱས་ཡོད། ཆབ་མདོ་གྲོང་ཁྱེར་གྱིས་དམངས་འཚོ་མུ་མཐུད་འགན་ལེན་དང་ལེགས་སུ་གཏོང་བ་ནི་རང་ལྗོངས་ཀྱི་དམངས་འཚོའི་བྱ་གཞག་སྤུས་ཚད་མཐོ་བའི་འཕེལ་རྒྱས་ཀྱི་བསྡུས་རིས་ཤིག་རེད་ཅེས་གསུངས་པ་རེད།
རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། ལྷ་ས་གྲོང་ཁྱེར་མི་དམངས་སྨན་ཁང་ཏང་ཨུད་ཀྱི་ཨུ་ཡོན། ཡོན་ཀྲང་གཞོན་པ་བཅས་ཡིན་པའི་ཉི་མས “སྲིད་གཞུང་གི་ལས་དོན་སྙན་སྒྲོན་ནང་། མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་སྲུང་སྐྱོང་ཡག་པོ་བྱེད་རྒྱུ་དེ་གནས་བབ་གལ་ཆེན་ཐོག་བཞག་ནས་བཀོད་སྒྲིག་བྱས་ཡོད། ནད་ཐོག་སྨན་བཅོས་བྱས་ནས་ལོ་30སོང་བའི་སྨན་དོན་མི་སྣ་ཞིག་ཡིན་པའི་ང་ལ་ལྕག་སྐུལ་ཆེན་པོ་དང་སེམས་འགུལ་ཆེན་པོ་ཐེབས་བྱུང་། ལས་གནས་སུ་ལོག་རྗེས་ངས་འཐུས་མིའི་འགན་འཁྲི་ཡག་པོ་བསྒྲུབས་ནས་ཏང་དང་རྒྱལ་ཁབ་ཀྱི་གསུང་སྒྲ་ཁྱིམ་ཚང་ཁྲི་སྟོང་མང་པོར་བརྒྱུད་བསྒྲགས་བྱས་ཏེ། ཏང་དང་རྒྱལ་ཁབ་དང་མི་དམངས་མང་ཚོགས་དབར་གྱི་འབྲེལ་ཟམ་གྱི་ནུས་པ་གང་ལེགས་བཏོན་ནས་སྨན་དོན་པའི་འགན་འཁྲི་ལྷག་བསམ་རྣམ་དག་ངང་ལག་བསྟར་དང་བོད་ཀྱི་མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ཡག་པོ་སྲུང་གི་ཡིན”ཞེས་གསུངས་པ་རེད།
རྒྱལ་ཡོངས་སྲིད་གྲོས་ཀྱི་ཨུ་ཡོན་བོད་རང་སྐྱོང་ལྗོངས་མི་དམངས་སྨན་ཁང་གསུམ་པའི་ཡོན་ཀྲང་གཞོན་པ་ཧྭ་ཏེ་སྨི་ཡིས། སྲིད་གཞུང་གི་ལས་དོན་སྙན་སྒྲོན་ནང་། ལོ་ལྔའི་རིང་ཏང་དང་རྒྱལ་ཁབ་ཀྱིས་རང་རྒྱལ་གྱི་སྨན་བཅོས་འཕྲོད་བསྟེན་ཞབས་ཞུའི་ནུས་པ་ཆེ་རུ་ཤུགས་ཆེན་བཏང་ཡོད། གཞུང་བཙུགས་སྨན་ཁང་གི་ཕྱོགས་བསྡུས་སྒྱུར་བཅོས་ཁྱོན་ཡོངས་ནས་སྤེལ་བ་དང་། རྫོང་ཁོངས་ཀྱི་སྨན་བཅོས་འཕྲོད་བསྟེན་ཞབས་ཞུའི་ནུས་པ་རྒྱུན་མཐུད་ཆེ་རུ་བཏང་བ། རིམ་དབྱེའི་ནད་བརྟག་སྨན་བཅོས་མ་ལག་འཐུས་སྒོ་ཚང་དུ་བཏང་བ་བཅས་བཏོན་ཡོད། འོན་ཀྱང་རང་ལྗོངས་ཀྱི་གཞི་རིམ་དུ་འཕྲོད་བསྟེན་དང་སྨན་བཅོས་ནུས་པ་ཞན་པའི་གནད་དོན་སྔར་བཞིན་གནས་ཡོད་པས། རྒྱལ་ཁབ་ཀྱི་རིམ་ངོས་ནས་དབུས་ནུབ་ས་ཁུལ་གྱི་གཞི་རིམ་སྨན་བཅོས་འཕྲོད་བསྟེན་ཞབས་ཞུའི་ནུས་པ་འཛུགས་སྐྱོང་གི་རྣམ་གྲངས་སྤྱི་འདོམས་བཀོད་སྒྲིག་བྱས་ཏེ་གཞི་རིམ་གྱི་ལས་སྒོའི་འཇོན་ཐང་ཆེ་རུ་གཏོང་རྒྱུར་ཤུགས་སྣོན་དང་། ཚང་མའི་ལས་ཀའི་ཧུར་སེམས་སྐོང་འཐེན། མང་ཚོགས་ཀྱི་ནད་གཞི་བརྟག་དཔྱད་དང་སྨན་པ་བསྟེན་པའི་མཐའ་ཚད་སྲུང་བ་བཅས་བྱས་ནས་གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་དགོས་པའི་གྲོས་འགོ་འདོན་གྱི་ཡིན་ཞེས་གསུངས་པ་རེད།
དམངས་འཚོའི་བྱ་བར་དོན་ཆུང་མེད། བདེ་སྡུག་མི་སེར་སེམས་ལ་གསལ། ཉེ་བའི་ལོ་ཤས་རིང་། རང་ལྗོངས་ཀྱིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་བརྟན་པོ་བཙུགས་ནས་གཙོ་གནད་ལ་དམ་འཛིན་དང་། ཆད་སྐྱོན་གསབ་པ། ཞན་ཆ་སེལ་བ། སེམས་ནུས་ཡོད་རྒུས་མང་ཚོགས་ཀྱིས་དོ་ཁུར་བྱེད་པའི་གཙོ་གནད་དང་དཀའ་གནད་ཐག་གཅོད་བྱེད་པ། ནུས་ཤུགས་དེ་བས་ཆེ་བ་དང་བྱ་ཐབས་དེ་བས་ཏན་ཏིག་སྤྱད་དེ་དམངས་སེམས་འདུ་འགོད་ཡག་པོ་སྒྲུབ་པ་དང་དམངས་འཚོའི་བྱ་བ་དངོས་ཡག་པོ་བསྒྲུབས་ནས། མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་སྣང་བཅས་ཆེ་རུ་ཏན་ཏིག་བཏང་སྟེ་འཕེལ་རྒྱས་དང་སྒྱུར་བཅོས་ཀྱི་གྲུབ་འབྲས་ལས་རྒྱ་ཆེའི་མང་ཚོགས་ལ་ཕན་པ་དེ་བས་མང་བ་ཐོབ་པར་བྱས་ཡོད།