2022ལོའི་ལས་དོན།

◆སྤྱི་ཚོགས་ཁྱོན་ཡོངས་རྒྱུན་མཐུད་ཞི་མཐུན་བརྟན་ལྷིང་བྱུང་བ།

འདས་མ་ཐག་པའི་2022ལོ་ནི་གལ་འགངས་ཤིན་ཏུ་ཆེ་ལ་སྤྱིར་བཏང་གཏན་ནས་མིན་པའི་ལོ་ཞིག་རེད། ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་སྐོང་འཚོག་བྱས་པ་དེས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་བརྗིད་ཆེའི་འཆར་འགོད་ཀྱི་དཔེ་རིས་བཀོད་ཅིང་། གངས་ལྗོངས་ས་མཐོར་དེ་བས་མཛེས་སྡུག་ལྡན་པའི་གོང་འཕེལ་གྱི་མདུན་ལམ་མངོན་ཡོད། ལོ་གཅིག་རིང་། ལྗོངས་ཏང་ཨུད་ཀྱི་ཞུམ་མེད་སྟོབས་ལྡན་གྱི་འགོ་ཁྲིད་འོག“ནད་ཡམས་འགོག་ཟོན་དང་། དཔལ་འབྱོར་བརྟན་འཁྱོངས། གོང་འཕེལ་བདེ་འཇགས”བཅས་ཀྱི་བླང་བྱ་དོན་འཁྱོལ་མཐའ་གཅིག་ཏུ་བྱས་ཏེ“དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བསྒྲིལ་བ་མ་ཟད། ལྗོངས་ཡོངས་ཀྱི་མི་རིགས་ཁག་གི་མི་དམངས་ལ་མཐུན་སྒྲིལ་དམ་ཟབ་བྱས་ནས་ལས་དོན་ཁག་ཏན་ཏིག་བསྒྲུབས་པ་དང་དཀའ་སེལ་འགག་སྒྲོལ་བྱས་པར་བརྟེན། ཛ་དྲག་ཤིན་ཏུ་ཆེ་བའི་དུས་བབ་འོག་ཧ་ཅང་ཐོབ་པར་དཀའ་བའི་གྲུབ་འབྲས་གསར་པ་བཏོད་ཡོད།

ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་རྒྱུན་མཐུད་གཏིང་ཟབ་དང་བདེ་འཇགས་བཅོས་སྐྱོང་གི“ཉིན་བརྒྱའི་ལས་འགུལ”སྤེལ་བར་གྲུབ་འབྲས་གཟེངས་སུ་ཐོན་པ་ཐོབ་ཡོད། ཆོས་ལུགས་ལས་རིགས་ཁོངས་གཏོགས་སུ“འདུ་ཤེས་གསུམ”གྱི་སློབ་གསོ་ཕྱོགས་ཡོངས་ནས་སྤེལ་བ། ལོ་ཧྲིལ་པོར་དམིགས་བསལ་གྱི་ཚབས་ཆེའི་དོན་རྐྱེན་གཅིག་ཀྱང་ཐོན་མེད་པ། མང་ཚོགས་ཀྱི་བདེ་འཇགས་ཚོར་སྣང་དང་བློ་ཡིད་ཚིམ་ཚད་98%ཡན་ཟིན་པ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་མངོན་གསལ་དོད་པོས་ཆེ་རུ་སོང་ཡོད། དུས་བདེའི་བོད་ལྗོངས་དང་ཁྲིམས་སྐྱོང་བོད་ལྗོངས་འཛུགས་སྐྲུན་བྱེད་ཤུགས་སྔར་བས་ཆེ་རུ་བཏང་ནས་ཏང་གི་ཚོགས་ཆེན་ཉི་ཤུ་པ་སྐོང་འཚོག་བྱེད་པར་ཞི་མཐུན་བརྟན་ལྷིང་གི་སྤྱི་ཚོགས་ཁོར་ཡུག་ཅིག་བཏོད་ཡོད།

◆དཔལ་འབྱོར་གྱི་འཕེལ་ངོ་རྒྱུན་མཐུད་བཟང་པོ་བྱུང་བ།

ས་གནས་ཀྱི་ཐོན་སྐྱེད་སྤྱིའི་རིན་ཐང་སྒོར་དུང་ཕྱུར་2165ཟིན་ནས་3%ཡས་མས་འཕར་བ་དང་། གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་ལག་ཐོག་ཡོང་འབབ་ཁག་སོ་སོར་8%ཡས་མས་དང་10%ཡས་མས་འཕར་ཡོད། གྲོང་ཁྱེར་དང་གྲོང་རྡལ་གྱི་བརྟག་དཔྱད་བྱས་ཁོངས་ཀྱི་ལས་ཤོར་བསྡུར་ཚད་5.5%ཡས་མས་སུ་ཚོད་འཛིན་ཐུབ་ཡོད། སྔ་རྗེས་སུ་དཔལ་འབྱོར་བརྟན་པོ་ཡོང་བའི་སྲིད་ཇུས་བྱ་ཐབས“དོན་ཚན་38”དང“དོན་ཚན་29”པར་འགྲེམས་བྱས་པ་མ་ཟད། རིགས་ཁག་གི་ཁྲོམ་རའི་བྱེད་པོ་དང་དཀའ་ངལ་ཡོད་མཁན་མང་ཚོགས་ལ་མ་དངུལ་སྒོར་དུང་ཕྱུར་116.7ཆག་ཡང་དང་། རྩ་ཆག ཕྱིར་སློག ཁ་གསབ་བཅས་བྱས་པས་རིམས་ནད་ཀྱི་བརྡབ་གསིག་འོག་དཔལ་འབྱོར་གྱི་འཕེལ་ངོ་མུ་མཐུད་བཟང་པོ་བྱུང་ཡོད།

◆གལ་ཆེའི་རྣམ་གྲངས་རིམ་ལྡན་ངང་ལག་བསྟར་བྱས་པ།

འགན་འཁྲི་གཙང་ལེན་གྱི་རྣམ་གྲངས་22ལ་སྐུལ་སྤེལ་གང་མགྱོགས་བཏང་ནས་ཁྲོན་བོད་ལྕགས་ལམ་བོད་ལྗོངས་དུམ་བུའི་གཞུང་ལམ་རྣམ་གྲངས་46དང་། G318ཀྱི་སྤུས་ཚད་ལེགས་གཏོང་དང་བསྒྱུར་བཀོད་ལས་གྲྭ་ཆ་ཚང་ལས་འགོ་བཙུགས་ཟིན་པ་མ་ཟད། ཕད་ནས་མེ་ཏོག་བར་གྱི་གཞུང་ལམ་ཧྲིལ་པོ་བསྐྲུན་ཟིན་ཡོད། ལྷུན་རྩེ་དང་དིང་རིའི་གནམ་ཐང་བསྐྲུན་ཟིན་ནས་གནམ་གྲུ་འཕུར་སྐྱོད་བྱེད་བཞིན་ཡོད། སྟོང་ཝ་ཁྲི་བརྒྱ་རིམ་པའི་ཆུ་ཤུགས་གློག་ཁང་ཐོག་མ་སོལ་བ་ལུང་གློག་ཁང་ལས་གཉེར་བྱེད་འགོ་ཚུགས་ནས་གློག་གཏོང་བཞིན་ཡོད་པ་དང་། བར་རྩེའི་ཆུ་བེད་ལྟེ་གནས་ལས་འགོ་ཚུགས་ནས་འཛུགས་སྐྲུན་བྱེད་བཞིན་ཡོད་པ་མ་ཟད། ཤངས་ཆུའི་ཆུ་བེད་ལྟེ་གནས་ཀྱི་འོག་སྒོར་ཆུ་གསོག་བཞིན་ཡོད།

◆ཁྱད་ལྡན་ཐོན་ལས་འཕར་སྣོན་བརྟན་པོ་བྱུང་བ།

འབྲུ་རིགས་དང་། སྔོ་ཚལ། ཤ་སྒོང་བཅས་ཀྱི་ཐོན་འབོར་ཁག་སོ་སོར་ཀྲོན་ཁྲི་107དང་། ཀྲོན་ཁྲི་93 ཀྲོན་ཁྲི་88ཟིན་ནས་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད། “རྫས་གསུམ་རྟགས་གཅིག”གི་ཞིང་ལས་ཐོན་རྫས་ལྡབ་གསུམ་འཕར་ཡོད། རིགས་ཁག་གི་གློག་འདོན་འཕྲུལ་ཤུགས་སྟོང་ཝ་ཁྲི་613.4ཟིན་ནས་གློག་གཏོང་ཚད་དུས་མཚུངས་ལས་30.4%འཕར་ཡོད། ས་མཐོའི་ནུས་མང་གཡོས་སྦྱོར་ཐབ་ཆས་ཀྱི་རྣམ་གྲངས་ལས་གཉེར་བྱེད་བཞིན་ཡོད་པ་དང་། གྲངས་འཛིན་དཔལ་འབྱོར་གྱི་འཕར་ཐང་སྒོར་དུང་ཕྱུར་200ལས་བརྒལ་ཡོད། རང་སྐྱོང་ལྗོངས་ཀྱི་སྤྱི་པའི་དངོས་ཟོག་གྲབས་མཛོད་དང་འགྲེམས་སྐྱེལ་ལྟེ་གནས་བསྐྲུན་ཟིན་ནས་ལས་གཉེར་བྱེད་བཞིན་ཡོད། སྔོན་དཔག་ལྟར་ན་གཞི་ཁྱོན་ཡན་གྱི་བཟོ་ལས་འཕར་ཐང་13%ཡན་དང་ཕྱི་ཕྱོགས་ཉོ་ཚོང་གི་སྤྱི་འབོར་12%འཕར་བཟོ་ཡོད།

◆གྲོང་གསེབ་དར་རྒྱས་གཏོང་བར་འབྲེལ་མཐུད་ནུས་ལྡན་བྱས་པ།

དབུལ་ལོག་ཉེན་ཆེའི་དུད་ཚང་5105ཡི་མི་གྲངས་21739ཡི་དཀའ་ངལ་སེལ་ཡོད། ནས་ཀྱི་སོན་བཟང་ཁྱབ་གདལ་གཏོང་ཚད་མུའུ་ཁྲི་200ལས་བརྒལ་བ་དང་། ཚད་གཞི་མཐོ་བའི་ཞིང་ཁ་མུའུ་ཁྲི་390ཟིན་ཡོད། “ས་གྲོལ་སོན་འདེབས་དང་། འབྲུ་རིགས་ལ་དོ་དམ་ནན་པོ། འབྲུ་རིགས་འདང་ངེས་བཞིན་གསོག་འཇོག ཚན་རིག་དང་མཐུན་པའི་སོན་འབྲུ་བརྗེ་རེས”བཅས་ཀྱི་གྲབས་གསོག་ལམ་བུ་གསར་པ་འཚོལ་ཞིབ་བྱས་པས་གྲབས་གསོག་འབྲུ་རིགས་ཀྲོན་ཁྲི་3.57འཕར་ཡོད། མཛེས་སྡུག་ལྡན་པའི་གནས་འཕྲོད་གྲོང་ཚོ་100དང་སྲ་བརྟན་ལེགས་གཏོང་གྲོང་ཚོ་100གང་མགྱོགས་འཛུགས་སྐྲུན་བྱེད་བཞིན་ཡོད། ཞིང་འབྲོག་མང་ཚོགས་ཀྱིས་སྲོལ་བཟང་འཛུགས་པའི་ལས་འགུལ་སྤེལ་འགོ་བཙུགས་ཡོད། ཞིང་འབྲོག་མང་ཚོགས་ཁྲི་63.1གནས་སྒྱུར་ལས་ཞུགས་ཐུབ་པ་དང་ངལ་རྩོལ་ཡོང་འབབ་སྒོར་དུང་ཕྱུར་55.6ཟིན་ནས་དམིགས་ཚད་ལས་འགན་ཚད་བརྒལ་ལེགས་གྲུབ་བྱས་ཡོད།

◆བསྒྱུར་བཅོས་སྒོ་དབྱེ་ཟམ་མི་ཆད་པར་གཏིང་ཟབ་ཏུ་སོང་བ།

ཚོང་གཉེར་ཁོར་ཡུག་ལེགས་གཏོང་བྱ་སྤྱོད་ཀྱི“དོན་ཚན་21”ལག་བསྟར་བྱས་པ་དང་། ཐོན་ཁུངས་གསར་སྤེལ་དང་ཁེ་ཕན་མཉམ་སྤྱོད་ཀྱི་ལམ་སྲོལ་བཙུགས་ཡོད། ལྗོངས་ཡོངས་ཀྱི་སྲིད་དོན་ཞབས་ཞུའི་རྣམ་གྲངས་དྲ་ཐོག་ནས་གཉེར་ཚད་100%ཟིན་ཡོད། ཁྲོམ་རའི་བྱེད་པོའི་དུད་ཚང་ཁྲི་2.87མང་དུ་སོང་བ་དང་ཚོང་འགུགས་མ་འདྲེན་གྱི་མ་དངུལ་སྒོར་དུང་ཕྱུར་450དོན་འཁྱོལ་བྱུང་ཡོད། བོད་སྐྱོར་མ་དངུལ་སྒོར་དུང་ཕྱུར་31.2དོན་འཁྱོལ་བྱས་ཡོད། ལྷ་སའི་མཐོ་གསར་ལག་རྩལ་གསར་སྤེལ་ཁུལ་དེ་ཉིད་རྒྱལ་ཁབ་རིམ་པའི་གསར་སྤེལ་ཁུལ་ལ་རིམ་སྤོར་བྱས་པ་དང་། ལྷ་སའི་ཕྱོགས་བསྡུས་ཁྲལ་སྲུང་ཁུལ་དེ་ཉིད་སྒོ་སྡོམ་ལས་གཉེར་བྱེད་བཞིན་ཡོད། སྐྱིད་རོང་མཐའ་མཚམས་དཔལ་འབྱོར་མཉམ་ལས་ཁུལ་དང་ཁོངས་བརྒལ་གློག་རྡུལ་ཚོང་དོན་ཕྱོགས་བསྡུས་ཚོད་ལྟའི་ཁུལ་འཛུགས་རྒྱུར་ཆོག་མཆན་ཐོབ་ཡོད། རྒྱལ་ཁབ་ཀྱི་ཁྲོན་བོད་ལྕགས་ལམ་ལག་རྩལ་གསར་གཏོད་ལྟེ་གནས་དང་མཚོ་བོད་ས་མཐོའི་ཚན་ཞིབ་ལྟེ་གནས་བོད་དུ་གཞིས་ཚུགས་ཡོད།

◆དམངས་འཚོའི་བྱ་བ་དངོས་བསྒྲུབ་རྒྱུར་སྐུལ་སྤེལ་ཧུར་ཐག་བཏང་བ།

“དམངས་འཚོའི་ལས་གཞི་ཆེན་པོ་བཅུར”མ་དངུལ་སྒོར་དུང་ཕྱུར་147.4བཏང་ཡོད། སློབ་གྲྭ་ཚང་མར་དྲོད་རླངས་མཁོ་འདོན་བྱ་རྒྱུ་དང་། ས་བབ་མཐོ་བའི་ཞིང་འབྲོག་ཁུལ་དུ་ཚ་ཁྲིའི་ཚོད་ལྟ་སྤེལ་རྒྱུ། ཞིང་འབྲོག་ཁུལ་གྱི་ཆུ་མཁོ་འདོན་འགན་སྲུང་དང་ལེགས་སུ་གཏོང་རྒྱུ་སོགས་ཀྱི་རྣམ་གྲངས་ལ་སྐུལ་སྤེལ་ཏན་ཏིག་བཏང་ཡོད། སློབ་གསོ་དང་། སྨན་བཅོས། རིག་གནས། བདེ་སྡོད་འགན་སྲུང་། རོགས་སྐྱོར་རྒུད་སྐྱོབ་སོགས་ལ་མ་དངུལ་གཏོང་ཤུགས་ཟམ་མི་ཆད་པར་ཆེ་རུ་བཏང་བ་དང་། དམངས་འཚོའི་རྣམ་གྲངས་13གྱི་ཁ་གསབ་རོགས་དངུལ་ཚད་གཞི་ཕྱོགས་ཡོངས་ནས་མཐོ་རུ་བཏང་བ་མ་ཟད། དམངས་འཚོའི་བྱ་བ་དངོས་38ཚང་མ་དོན་འཁྱོལ་བྱས་ཡོད།

◆སྐྱེ་ཁམས་ཁོར་ཡུག་མངོན་གསལ་དོད་པོས་ལེགས་སུ་སོང་བ།

“ཁུལ་གསུམ་ཐིག་གསུམ”གྱི་དབྱེ་མཚམས་གཏན་འཁེལ་བཟོས་པ་དང“ཐཱན་གཉིས”ཀྱི་གདིང་གཞིར་དཔྱད་དཔོག་བྱས་ཡོད། གངས་འཁྱགས་ཐོན་ཁུངས་སྲུང་སྐྱོབ་འཆར་འགོད་དང་རྣམ་གྲངས་རིམ་སྤོར་གྱི་ཞིབ་མཆན་ལམ་སྲོལ་བཟོས་ཡོད། ལྷ་སའི་ལྷོ་བྱང་རི་བོ་སྔོ་སྒྱུར་གྱི་ཤིང་འཛུགས་ནགས་བཟོ་མུའུ་ཁྲི་14དང་ལྗོངས་ཡོངས་ཀྱི་ཤིང་འཛུགས་ནགས་བཟོ་མུའུ་ཁྲི་117.9ལེགས་གྲུབ་བྱས་པ་མ་ཟད། རྩྭ་ཐང་ཞན་འགྱུར་མུའུ་ཁྲི་437.5སླར་གསོ་བྱས་ཡོད། ལྗོངས་ཡོངས་ཀྱི་ས་གནས་དང་གྲོང་ཁྱེར་7གྱི་མཁའ་རླུང་སྤུས་ཚད་བཟང་བའི་ཉིན་གྲངས་དེ་99%ཡན་ཟིན་པ་དང་། གཙོ་གནད་གཙང་ཆུ་དང་མཚེའུའི་ཆུ་སྤུས་ཚང་མ་IIIརིགས་ཀྱི་ཚད་གཞིར་སླེབས་པའམ་ཡང་ན་དེ་ལས་ཡག་པ་བྱུང་ཡོད། ཀྲུང་དབྱང་གི་ཁོར་ཡུག་སྲུང་སྐྱོབ་ལྟ་ཞིབ་ཚོགས་ཆུང་དང་དེ་མིན་བརྟག་དཔྱད་ཚོགས་ཆུང་གིས་གསལ་ཞུ་བྱས་པའི་གནད་དོན་བཅོས་སྒྲིག་ནན་ཏན་བྱས་ནས་སྐྱེ་ཁམས་སྲུང་སྐྱོབ་བྱེད་པའི་ཆབ་སྲིད་ཀྱི་འགན་འཁྲི་འཁུར་ཤུགས་ཟམ་མི་ཆད་པར་ཆེ་རུ་བཏང་ཡོད།

◆མཐའ་དར་དམངས་ཕྱུག་སྔར་བས་བརྟན་དུ་སོང་བ།

མཐའ་དར་དམངས་ཕྱུག་གི་ལྟེ་བའི་གྲོང་ཁྱེར་དང་གྲོང་རྡལ་4སྐྲུན་འགོ་ཚུགས་པ་དང་ཚན་རིག་དང་མཐུན་པའི་སྒོ་ནས་མཐའ་མཚམས་རིགས་དབྱེ་དང་མཐའ་མིའི་ཁ་གསབ་རོགས་དངུལ་ཚད་ལྡན་བཟོས་ཡོད། མཐའ་མཚམས་རྫོང་གི་ཆུ་མཁོ་འདོན་བཟོ་གྲྭ་དང་གད་སྙིགས་ས་སྦས་གཏོང་ས་ཆ་ཚང་བསྐྲུན་ཟིན་པ་དང་། རང་བྱུང་གྲོང་ཚོ་30ཡི་མཁྲེགས་ལམ་ཚང་མ་ལས་འགོ་བཙུགས་ཟིན་ཡོད། གཙོ་གནད་ཤང་དང་གྲོང་རྡལ་ཚང་མར་གློག་དྲ་ཆེ་མོ་དང་། སྦྲག་སྲིད། དྲ་ཆེན་བཅས་འཁྲིད་ཚར་བ་མ་ཟད། 4Gབརྡ་རྟགས་གྲོང་ཚོ་ཚང་མར་ཁྱབ་ཡོད།

འདས་ཟིན་པའི་ལོ་ལྔའི་རིང་གི་ལས་དོན།

ལོ་ལྔའི་རིང་། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་གནང་བ་སྒུལ་ཤུགས་ཆེ་ཤོས་སུ་བརྩི་རྒྱུ་མཐའ་འཁྱོངས་བྱས་ཏེ་བོད་ཀྱི་ལས་དོན་ཁག་ལ་སྐུལ་འདེད་གཏོང་བའི་ཐད་གོམ་སྟབས་གསར་པ་སྤོས་ཡོད། སྤྱི་ཁྱབ་ཧྲུའུ་ཅི་སྐུ་ངོ་མས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་གཙོ་སྐྱོང་གནང་བ་དང་། སྐུ་ངོ་མ་བོད་དུ་གཟིགས་ཞིབ་གནང་བར་ཕེབས་ཏེ་གལ་ཆེའི་མཛུབ་སྟོན་རབ་དང་རིམ་པ་དང་དམིགས་བསལ་གྱི་གཟིགས་སྐྱོང་སྲིད་ཇུས་རབ་དང་རིམ་པ་བཟོ་འབེབས་གནང་བ་མ་ཟད། གལ་ཆེའི་རྣམ་གྲངས་རབ་དང་རིམ་པ་གཏན་འཁེལ་གནང་ཡོད། ང་ཚོས་སྤྱི་ཁྱབ་ཧྲུའུ་ཅིའི་བོད་ཀྱི་ལས་དོན་སྐོར་གྱི་གལ་ཆེའི་མཛུབ་སྟོན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་དང་། ལྗོངས་ཏང་ཨུད་སྐབས་དགུ་པ་དང་སྐབས་བཅུ་པའི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་བྱས་ཏེ་ཡུན་རིང་བདེ་འཁོད་དང་སྤུས་ཚད་མཐོ་བའི་གོང་འཕེལ་འགྲོ་བར་སྐུལ་སྤེལ་ཧུར་ཐག་བཏང་ཡོད།

ལོ་ལྔའི་རིང་། ང་ཚོས་བརྟན་ལྷིང་སྲུང་སྐྱོང་བྱ་རྒྱུ་དེ་ལས་འགན་ཨང་དང་པོར་བརྩི་རྒྱུ་མཐའ་འཁྱོངས་བྱས་ཏེ་སྤྱི་ཚོགས་བཅོས་སྐྱོང་བྱེད་པར་སྐུལ་འདེད་གཏོང་བའི་ཐད་མཐོར་འདེགས་གསར་པ་ཡོང་བ་བྱས་ཡོད། ཁ་ཕྲལ་གཏོར་བཤིག་བྱེད་སྤྱོད་ལ་དོགས་ཟོན་ནན་པོ་དང་རྡུང་རྡེག་ཚ་ནན་བཏང་བ་དང་། དངོས་པོའི་ནུས་ཤུགས་དང་བསམ་པའི་ནུས་ཤུགས་གཅིག་གྱུར་ཡོང་བ་བྱ་རྒྱུ་མཐའ་འཁྱོངས་བྱས་ཏེ“ལྟོ་གོས་འགན་ལེན”དང“བསམ་བློར་སྟངས་འཛིན”བྱེད་པའི་དབར་གྱི་འབྲེལ་བ་ཐག་གཅོད་ཡང་དག་བྱས་པར་བརྟེན། ཞི་མཐུན་བརྟན་ལྷིང་གི་གཞི་རིམ་རྨང་གཞི་སྔར་བས་བརྟན་དུ་སོང་ཡོད། མི་རིགས་མཐུན་སྒྲིལ་ཡར་ཐོན་འཛུགས་གཏོད་བྱེད་པར་སྐུལ་སྤེལ་ཤུགས་ཆེན་བཏང་བ་མ་ཟད། རྒྱལ་ཁབ་ཀྱི་སྤྱི་སྤྱོད་སྐད་ཡིག་ལ་ཕྱོགས་ཡོངས་ནས་ཤུགས་སྣོན་བརྒྱབ་པ་དང་ཁྱབ་གདལ་བཏང་བར་བརྟེན། “མོས་སེམས་ལྔ”མི་སེམས་ལ་བརྟན་པོ་ཟུག་ཡོད། 《ཆོས་ལུགས་ལས་དོན་སྲོལ་ཡིག》གི་ལག་བསྟར་བྱ་ཐབས་ལ་དག་བཅོས་བྱས་པ་དང་། “འདུ་ཤེས་གསུམ”དང“ཚད་གཞི་བཞིར་བརྩི་སྲུང་ཞུ་བའི”སློབ་གསོ་གཏིང་ཟབ་སྤེལ་ཡོད། ཕྱོགས་ཡོངས་ནས་བོད་ལྗོངས་ཁྲིམས་བཞིན་སྐྱོང་རྒྱུ་མཐའ་འཁྱོངས་བྱས་ནས་སྤྱི་ཚོགས་ཀྱི་དྲང་གཞག་དྲང་བདེན་ལ་སྲུང་སྐྱོང་དང་འགལ་ཟླ་རྩོད་གཞིའི་རིགས་ཐག་གཅོད་ནུས་ལྡན་བྱས་པར་བརྟེན། མང་ཚོགས་ཀྱི་བདེ་འཇགས་ཚོར་སྣང་དང་བློ་ཡིད་ཚིམ་ཚད་རྒྱུན་མཐུད་རྒྱལ་ཡོངས་ཀྱི་མདུན་གྲལ་དུ་སླེབས་ཡོད།

ལོ་ལྔའི་རིང་། ང་ཚོས་གོང་འཕེལ་གྱི་འདུ་ཤེས་གསར་པ་ཆ་ཚང་ཞིང་ཡང་དག་པ་དང་ཕྱོགས་ཡོངས་ནས་ལག་བསྟར་བྱ་རྒྱུ་མཐའ་འཁྱོངས་བྱས་ཏེ། ས་མཐོའི་དཔལ་འབྱོར་སྤུས་ཚད་མཐོ་བའི་གོང་འཕེལ་འགྲོ་བར་སྐུལ་འདེད་གཏོང་བའི་ཐད་རྣམ་པ་གསར་པ་བཏོད་ཡོད། ས་གནས་ཀྱི་ཐོན་སྐྱེད་སྤྱིའི་རིན་ཐང་ལོ་རེར་ཆ་སྙོམས་7.9%འཕར་བ་དང་མི་རེའི་ཆ་སྙོམས་ཀྱི་ས་གནས་ཀྱི་ཐོན་སྐྱེད་སྤྱིའི་རིན་ཐང་ཨ་སྒོར་8600ཟིན་ཡོད། སྤྱིར་བཏང་གི་སྤྱི་པའི་སྔོན་རྩིས་ཡོང་འབབ་ལོ་རེར་ཆ་སྙོམས་12%འཕར་ཡོད། ལོ་བསྟུད་མར་འབྲུ་རིགས་ཐོན་འབབ་བཟང་པོ་བྱུང་ནས་ཁྱོན་ཐོན་འབོར་ཀྲོན་ཁྲི་100ཡན་བརྟན་འཁྱོངས་ཐུབ་ཡོད། རྫོང་དང་། ཆུས། གཙོ་གནད་ཤང་དང་གྲོང་རྡལ་ཚང་མར་གློག་དྲ་ཆེ་མོ་ཁེབས་ཟིན་པ་དང་ལོ་རེར་གློག་གཏོང་ཚད་ལྡབ་འགྱུར་འཕར་ཡོད། རླངས་འཁོར་ཤར་གཏོང་ཐུབ་པའི་གཞུང་ལམ་གྱི་རིང་ཚད་སྤྱི་ལེ་ཁྲི་12ལས་བརྒལ་བའི་ནང་མཐོ་རིམ་མྱུར་བགྲོད་གཞུང་ལམ་སྤྱི་ལེ་1105ཡོད། ལྷ་ཉིང་ལྕགས་ལམ་བསྐྲུན་ཟིན་ནས་ཤར་གཏོང་ཐུབ་པ་དང་བསྐྱར་དར་རྟགས་ཅན་གངས་ལྗོངས་ས་མཐོར་འཁྱུག་བགྲོད་བྱེད་བཞིན་ཡོད། དམངས་སྤྱོད་མཁའ་འགྲུལ་ལམ་ཐིག་150ལས་བརྒལ་ཡོད། འོད་སྐུད་ཀྱི་སྤྱིའི་རིང་ཚད་སྤྱི་ལེ་ཁྲི་27ཡན་ཟིན་པ་དང་རྒྱུན་སྡོད་མི་འབོར་གྲོང་ཁྱེར་དང་གྲོང་རྡལ་ཅན་དུ་འགྱུར་ཚད་བརྒྱ་ཆའི་གྲངས་5.04འཕར་ཡོད། ཕྱོགས་བསྡུས་ཁྲལ་སྲུང་ཁུལ་དང་མཐའ་མཚམས་དཔལ་འབྱོར་མཉམ་ལས་ཁུལ་ལ་འགག་སྒྲོལ་གསར་པ་བྱུང་ཡོད། “དྲ་གཅིག་སྟེགས་གསུམ”བསྐྲུན་ཟིན་ནས་ལས་གཉེར་བྱེད་འགོ་ཚུགས་པ་མ་ཟད། ཁྲོམ་རའི་བྱེད་པོ་ལྡབ་འགྱུར་མང་དུ་ཕྱིན་ནས་ཁྱིམ་དུད་ཁྲི་43.5ཟིན་ཡོད། སྤྱི་ཚོགས་ཡོངས་ཀྱི་ཞིབ་འཇུག་གསར་སྤེལ་ཐད་ལོ་རེར་ཆ་སྙོམས་མ་དངུལ་འཇོག་ཤུགས་17.5%འཕར་ཡོད། བོད་སྐྱོར་ལས་དོན་དང་ལྷག་པར་དུ་ཚོགས་སྒྲིག་རྣམ་པའི་བོད་སྐྱོར་ལས་དོན་ཐད་འགག་སྒྲོལ་ཆེན་པོ་བྱུང་ནས་མི་རིགས་མཐུན་སྒྲིལ་ཡར་ཐོན་དང་བོད་ཀྱི་དཔལ་འབྱོར་སྤྱི་ཚོགས་གོང་འཕེལ་འགྲོ་བར་སྐུལ་འདེད་ནུས་ལྡན་ཐུབ་ཡོད།

ལོ་ལྔའི་རིང་། ང་ཚོས“ཚང་དགོས་པ་གསུམ་དང་ཕན་འདོགས་པ་གཅིག”མཐའ་འཁྱོངས་བྱས་ཏེ་མི་རིགས་ཁག་གི་མི་དམངས་ཀྱི་འཚོ་བར་སྐུལ་འདེད་གཏོང་བའི་ཐད་ཡར་རྒྱས་གསར་པ་ཡོང་བ་བྱས་ཡོད། གྲོང་མི་ཡོངས་ཀྱི་མི་རེའི་ཆ་སྙོམས་ལག་ཐོག་ཡོང་འབབ་ལོ་རེར་ཆ་སྙོམས་12.8%འཕར་བ་དང་། འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད། ལོ་འདི་གའི་མཐོ་རིམ་སློབ་ཐོན་སློབ་མ་ལས་ཞུགས་ཐུབ་ཚད་95%ཡན་རྒྱུན་འཁྱོངས་ཐུབ་པ་དང་ཞིང་འབྲོག་མང་ཚོགས་མི་ཁྲི་60ཡན་གནས་སྒྱུར་ལས་ཞུགས་ཐུབ་ཡོད། ཧྲིལ་ལོ་15ལོན་པ་དང་དེ་ཡན་གྱི་མི་འབོར་ལ་ཆ་སྙོམས་སློབ་གསོ་ཐོབ་ཚད་ལོ་1.5མང་དུ་སོང་བ་དང་། མི་ཆིག་སྟོང་རེར་ཉལ་ཁྲི་5.37མང་དུ་སོང་བ། མི་རེའི་ཆ་སྙོམས་སྔོན་དཔག་ཚེ་ཚད་ལོ་1.59རིང་དུ་སོང་བ། སྤྱི་ཚོགས་འགན་སྲུང་མ་ལག་ཟམ་མི་ཆད་པར་འཐུས་སྒོ་ཚང་དུ་སོང་བ་བཅས་བྱུང་ཡོད། རིག་གནས་དམངས་ཕན་ལས་གཞི་གསར་གཏོད་ལག་བསྟར་དང་། རིམ་ལྔའི་སྤྱི་པའི་རིག་གནས་ཞབས་ཞུའི་མ་ལག་འཐུས་སྒོ་ཚང་དུ་སོང་བ་མ་ཟད། ཆེད་བསྐོས་འགན་གཅིག་ལྕོགས་ཀྱི་རིག་རྩལ་དཔུང་ཁག་མི་ཁྲི་10ལས་བརྒལ་བ་དང་། རིག་རྩལ་བརྩམས་ཆོས་དང་རིག་རྩལ་འཇོན་ཐང་ཅན་ལ་རྒྱལ་ཁབ་དང་། ཞིང་ཆེན། པུའུ་བཅས་རིམ་པའི་བྱ་དགའ་ཆེན་མོ་49ཐོབ་ཡོད། ལུས་རྩལ་པས་ཐེངས་དང་པོར་དགུན་དུས་ཨོ་རྩལ་འགྲན་ཚོགས་དང་། རྒྱལ་ཡོངས་ལུས་རྩལ་འགྲན་ཚོགས། མི་རིགས་ལུས་རྩལ་འགྲན་ཚོགས་སོགས་ཀྱི་འགྲན་བསྡུར་ཆེ་གྲས་ཁག་ནང་ཞུགས་ནས་གཟེངས་བསྟོད་རྟགས་མ་ཐོབ་ཚད་ལོ་རྒྱུས་རང་བཞིན་གྱི་ཚད་བརྒལ་བྱུང་ཡོད། མིག་སྔར་ང་ཚོ་ནི་ལོ་ངོ་སྟོང་ཕྲག་རིང་དབུལ་པོ་དབུལ་རྐྱང་གི་གནས་ལས་ཡོངས་སུ་ཐར་ཏེ་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་བཞིན་ཡོད་པ་མ་ཟད། ལྗོངས་ཡོངས་ཀྱི་གོང་འཕེལ་ཡང་ལོ་རྒྱུས་ཀྱི་འགོ་འཛུགས་ས་གསར་པར་སླེབས་ཡོད།

ལོ་ལྔའི་རིང་། ང་ཚོས་སྐྱེ་ཁམས་སྲུང་སྐྱོབ་བྱ་རྒྱུ་དེ་འགན་འཁྲི་གལ་ཆེན་ཞིག་ཏུ་བརྩི་རྒྱུ་མཐའ་འཁྱོངས་བྱས་ཏེ་མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་པར་སྐུལ་འདེད་གཏོང་བའི་ཐད་རྣམ་པ་གསར་པ་མངོན་ཐུབ་པ་བྱས་ཡོད། ལྗོངས་ཡོངས་ཀྱི་རྒྱལ་ཁོངས་ས་ཆའི་50%ཡན་སྐྱེ་ཁམས་སྲུང་སྐྱོབ་ཀྱི་དམར་ཐིག་ནང་བཅུག་པ་དང་། གཙང་གསུམ་ཆུ་འགོའི་རྒྱལ་ཁབ་སྤྱི་གླིང་གི་གདང་ལའི་བྱང་རྒྱུད་ཁུལ་ལ་ཆོག་མཆན་ཐོབ་ནས་བསྐྲུན་ཟིན་ཡོད། རྩྭ་ཐང་གི་སྔོ་ཁེབས་དང་ནགས་ཚལ་གྱི་ཁེབས་རྒྱ་ཆེ་རུ་སོང་བ་མ་ཟད། ས་རྒོད་དང་བྱེ་ཐང་ཅན་དུ་འགྱུར་ཚད་མངོནགསལ་དོད་པོས་ཆུང་དུ་ཕྱིན་ཡོད། ས་བབ་ཧ་ཅང་མཐོ་བའི་ས་ཁུལ་གྱི་སྐྱེ་ཁམས་གནས་སྤོའི་ལས་འགན་ཚང་མ་ལེགས་གྲུབ་ཟིན་ཡོད། མཁའ་རླུང་དང་ཆུ། ས་རྒྱུ་བཅས་ཀྱི་སྤུས་ཚད་རྒྱུན་མཐུད་རྒྱལ་ཡོངས་ཀྱི་མདུན་གྲལ་དུ་སླེབས་ཡོད། སྐྱེ་ཁམས་བྱ་དགའི་ཁ་གསབ་དངུལ་སྒོར་དུང་ཕྱུར་663.9དོན་འཁྱོལ་བྱས་པས་ཞིང་འབྲོག་མང་ཚོགས་འབོར་ཆེན་རི་སྔོན་ཆུ་དྭངས་ཀྱི་སྲུང་སྐྱོབ་པ་དང་ཁེ་ཕན་ཐོབ་མཁན་ལ་གྱུར་ཡོད།

ལོ་ལྔའི་རིང་། ང་ཚོས“བླ་ན་མེད་པའི་རྒྱལ་ཁོངས་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག་བྱ་རྒྱུ”མཐའ་འཁྱོངས་བྱས་ཏེ་མཐའ་སྟོབས་དང་། མཐའ་དར། དམངས་ཕྱུག་བཅས་ལ་སྐུལ་འདེད་གཏོང་བའི་ཐད་ཚད་བརྒལ་གསར་པ་ཡོང་བ་བྱས་ཡོད། མཐའ་མཚམས་ཀྱི་འབྱོར་འབྲིང་གྲོང་ཚོ་624བསྐྲུན་ཟིན་ནས་མཐའ་མཚམས་ཀྱི་ཐེམ་ཐོ་ཡོད་མཁན་མི་གྲངས་10.5%འཕར་བ་དང་། མཐའ་མཚམས་གཞུང་ལམ་ཤར་གཏོང་ཐུབ་ཚད་ལྡབ་3.7འཕར་ཡོད། མཐའ་མཚམས་རྫོང་21གི་དཔལ་འབྱོར་སྤྱི་འབོར་དང་གྲོང་མིའི་ཡོང་འབབ་རྒྱུན་མཐུད་འཕར་སྣོན་མགྱོགས་པོ་བྱུང་ཡོད། མི་རིགས་ཁག་གི་ལས་བྱེད་པ་དང་མང་ཚོགས་ཚོས་ཕྱར་བ་གྲུ་འདེགས་དང་མཐུན་སྒྲིལ་འབད་འཐབ་བྱས་ཏེ་ཐུན་མོང་ཐོག་མེས་རྒྱལ་གྱི་མཐའ་མཚམས་སྲུང་སྐྱོབ་དང་ཐུན་མོང་ཐོག་བདེ་སྐྱིད་ལྡན་པའི་འཚོ་བ་སྐྲུན་བཞིན་ཡོད།

ལོ་ལྔའི་རིང་གི་ལག་ལེན་དངོས་ལས་ར་འཕྲོད་བྱུང་བར། སྲིད་གཞུང་གི་ལས་དོན་ཡག་པོ་སྒྲུབ་པར། ངེས་པར་དུ་ཏང་གིས་ཕྱོགས་ཡོངས་ལ་འགོ་ཁྲིད་བྱ་རྒྱུ་མཐའ་འཁྱོངས་བྱས་ཏེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བོད་ཀྱི་ལས་དོན་སྐོར་གྱི་གལ་ཆེའི་མཛུབ་ཁྲིད་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་མཐའ་གཅིག་ཏུ་བྱེད་དགོས་པ་དང་། ངེས་པར་དུ་མི་དམངས་གོང་དུ་བཀུར་རྒྱུ་མཐའ་འཁྱོངས་བྱས་ཏེ“ཚང་དགོས་པ་གསུམ་དང་ཕན་འདོགས་པ་གཅིག”གི་བླང་བྱ་དེ་དཔལ་འབྱོར་སྤྱི་ཚོགས་གོང་འཕེལ་གྱི་བརྒྱུད་རིམ་ཧྲིལ་པོ་དང་ཕྱོགས་ཁག་གི་ཐད་ལག་བསྟར་ཐུབ་པ་བྱ་རྒྱུ་མ་ཟད། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་རྒྱུན་མཐུད་བརྟན་པོ་བཙུགས་ནས་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་ཟམ་མི་ཆད་པར་སྲ་བརྟན་དང་གོང་འཕེལ་གཏོང་དགོས། ངེས་པར་དུ་གོང་འཕེལ་གྱི་འདུ་ཤེས་གསར་པ་ཆ་ཚང་ཞིང་ཡང་དག་པ་དང་ཕྱོགས་ཡོངས་ནས་ལག་ལེན་བསྟར་རྒྱུ་མཐའ་འཁྱོངས་བྱས་ཏེ་གོང་འཕེལ་གྱི་རྣམ་པ་གསར་པར་ཞབས་ཞུ་དང་མཉམ་འདྲེས་ཐུབ་པ་བྱ་རྒྱུ་དང་། ལས་དོན་མཐའ་དག་དོན་དངོས་གཞིར་བཟུང་སྟེ་དམ་པ་དོན་གཉེར་དང་། ཡུལ་བབ་ལ་བསྟུན་པ། རིགས་དབྱེ་ཇུས་འདོན་བཅས་བྱེད་དགོས། ངེས་པར་དུ་བསྒྱུར་བཅོས་སྒོ་དབྱེའི་འགག་རྩའི་ཐབས་ལམ་མཐའ་འཁྱོངས་བྱས་ཏེ་སྒུལ་ཤུགས་ཆེ་རུ་གཏོང་བ་དང་གསོན་ཤུགས་འཕེལ་བར་བྱེད་དགོས། ངེས་པར་དུ་བོད་ལྗོངས་ཁྲིམས་བཞིན་སྐྱོང་རྒྱུ་མཐའ་འཁྱོངས་བྱས་ཏེ་ཁྲིམས་སྐྱོང་སྲིད་གཞུང་འཛུགས་སྐྱོང་བྱེད་ཤུགས་ཆེ་རུ་བཏང་ནས་ཁྲིམས་སྐྱོང་གི་ལམ་བུའི་ཐོག་དཔལ་འབྱོར་དང་སྤྱི་ཚོགས་ཀྱི་གོང་འཕེལ་བརྟན་འཁྱོངས་རྒྱང་བགྲོད་ཐུབ་པར་སྐུལ་འདེད་གཏོང་དགོས།

ལོ་ལྔའི་རིང་གི་གྲུབ་འབྲས་ནི་ལས་སླ་པོར་ཐོབ་པ་ཞིག་གཏན་ནས་མིན་ལ། ལོ་ལྔའི་རིང་གི་འབད་འཐབ་ནི་སེམས་ལ་ངེས་རིན་ཡོད་པ་ཞིག་ཡིན། དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལམ་སྟོན་དེད་དཔོན་གནང་བ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་བྱམས་བརྩེའི་ཐུགས་ཁུར་གནང་བ། རྒྱལ་ཡོངས་མི་དམངས་རྣམས་ཀྱིས་སྒེར་སེམས་མེད་པའི་རོགས་སྐྱོར་གནང་བ་བཅས་ལས་བྱུང་བའི་འབྲས་བུ་ཡིན་ལ། ལྗོངས་ཏང་ཨུད་ཀྱི་ཞུམ་མེད་སྟོབས་ལྡན་གྱི་འགོ་ཁྲིད་དང་། སྐབས་རིམ་བྱུང་སྲིད་གཞུང་ཚན་ཁག་གི་རྒྱུན་མཐུད་འབད་བརྩོན། མི་དམངས་འཐུས་ཚོགས་དང་སྲིད་གྲོས་ཀྱི་ལྟ་སྐུལ་རོགས་སྐྱོར། ལྗོངས་ཡོངས་ཀྱི་གོང་འོག་ཚང་མས་མཐུན་སྒྲིལ་འབད་འཐབ་བཅས་བྱས་པ་ལས་བྱུང་བའི་འབྲས་བུའང་ཡིན།