ཉེ་ཆར་རྒྱལ་སྲིད་སྤྱི་ཁྱབ་ཁང་མཉམ་འགོག་མཉམ་སྡོམ་ལམ་སྲོལ་གྱིས་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས་ཀྲུང་ལུགས་དང་ཕྱི་ལུགས་གསོ་རིག་ཟུང་འབྲེལ་གྱི་སྨན་བཅོས་ཞབས་ཞུ་འགན་ལེན་གྱི་འབྲེལ་ཡོད་གནས་ཚུལ་ངོ་སྤྲོད་བྱས་པ་རེད། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་གསར་འགྱུར་མགྲིན་ཚབ་པ་དྲིལ་བསྒྲགས་སིའི་སི་ཀྲང་གཞོན་པ་སྨི་ཧྥུང་གིས། ལེགས་སུ་བཏང་བའི་བྱ་ཐབས་བཅུ་བཏོན་རྗེས་རྒྱལ་སྲིད་སྤྱི་ཁྱབ་ཁང་མཉམ་འགོག་མཉམ་སྡོམ་ལམ་སྲོལ་གྱི་འབྲེལ་ཡོད་སྡེ་ཚན་གྱིས་སླར་ཡང་སྔ་རྗེས་སུ་ལས་དོན་བཀོད་སྒྲིག་བྱས་ནས་སྨན་བཅོས་ཀྱི་བརྒྱུད་རིམ་ལེགས་སུ་གཏོང་བ་དང་སྨན་བཅོས་མཉམ་འབྲེལ་སྒྲིག་གཞིའི་ནུས་པ་འདོན་སྤེལ་བྱེད་དགོས་པའི་ནན་བཤད་བྱས་པ་མ་ཟད། ད་དུང་ཚ་བ་རྒྱས་པའི་ནད་པར་སྨན་བཅོས་བྱེད་པ་དང་། ཁྱིམ་སྡོད་ལོགས་འཇོག་སྨན་བཅོས་བྱེད་པ། དེ་བཞིན་རྒན་རྒོན་དང་། སྦྲུམ་མ། བྱིས་པ་བཅས་ཀྱི་བདེ་ཐང་ཞབས་ཞུ་སོགས་ལ་བླང་བྱ་ཁ་གསལ་བཏོན་ཡོད། ཚ་རྒྱས་སྒོ་བསྟེན་སྨན་ཁང་འཛུགས་རྒྱུར་ཤུགས་སྣོན་བརྒྱབ་ནས་སྨན་བཅོས་སྒྲིག་གཞིས་དྲ་སྦྲེལ་གྱི་ཐོག་ནས་བློ་འདྲི་དང་སྨན་བཅོས་བྱ་རྒྱུར་ལྕག་སྐུལ་བྱེད་པ་དང་། བདེ་ཐང་ལྟ་ཞིབ་ཚད་ལེན་ཡག་པོ་བྱས་ནས་གཙོ་གནད་མི་ཚོགས་ལ་རིམ་དབྱེ་རིགས་དབྱེའི་སྒོ་ནས་དོ་དམ་བྱེད་པ། ཀྲུང་ལུགས་དང་ཕྱི་ལུགས་གསོ་རིག་ཟུང་འབྲེལ་དང་ཀྲུང་ལུགས་དང་ཕྱི་ལུགས་སྨན་རྫས་མཉམ་སྤྱོད་མཐའ་འཁྱོངས་བྱས་ཏེ་མང་ཚོགས་ལ་སྨན་བཅོས་ཞབས་ཞུ་འགན་ལེན་ཡག་པོ་བྱེད་དགོས་ཞེས་བཤད་པ་རེད།
རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་སྨན་དོན་སིའི་སི་ཀྲང་ཅའོ་ཡ་ཧུའེ་ཡིས“སྨན་བཅོས་ཐོན་ཁུངས་ཀྱི་གྲ་སྒྲིག་ལས་དོན་ཡག་པོ་བསྒྲུབ་རྒྱུ་དེ་ནི་གོམ་སྟབས་རྗེས་མའི་སྨན་བཅོས་ཞབས་ཞུའི་ལས་དོན་ཡག་པོ་བསྒྲུབ་པའི‘སྔོན་ལ་བྱ་སྤྱོད་སྤེལ་བ’དང‘འགག་རྩའི་བྱ་སྤྱོད’རེད་ཅེས་བརྗོད་ཆོག མིག་སྔར་ས་གནས་ཁག་གིས་སྨན་བཅོས་ཐོན་ཁུངས་གྲ་སྒྲིག་དང་འཛུགས་པའི་ཐད་ཤུགས་སྣོན་རྒྱག་རྒྱུར་མཛུབ་ཁྲིད་བྱས་པའི་ནང་ཚ་རྒྱས་སྒོ་བསྟེན་སྨན་ཁང་འཛུགས་པ་དང་། དམིགས་འཛུགས་སྨན་ཁང་གི་སྨན་བཅོས་ཐོན་ཁུངས་གྲ་སྒྲིག་ལ་ཤུགས་སྣོན་རྒྱག་པ། རིམ་པ་གཉིས་པའི་སྨན་ཁང་གི་ནད་ལྕིའི་ཐོན་ཁུངས་གྲ་སྒྲིག་བྱེད་པ། རིམ་གསུམ་སྨན་བཅོས་སྒྲིག་གཞིའི་ནད་ལྕིའི་ཐོན་ཁུངས་རྒྱ་སྐྱེད་དང་སྒྱུར་བཅོས་བྱེད་པ་སོགས་ཚུད་ཡོད་ཅེས་བཤད་པ་རེད།
ངོ་སྤྲོད་བྱས་པར་གཞིགས་ན། མིག་སྔར་རྒྱལ་ཡོངས་སུ་ནད་ལྕིའི་གསོ་རིག་གི་ནད་ཁྲི་ཁྲི་13.81ཡོད་པའི་ཁྲོད་རིམ་གསུམ་སྨན་བཅོས་སྒྲིག་གཞིའི་ནད་ལྕིའི་གསོ་རིག་གི་ནད་ཁྲི་ཁྲི་10.65ཡོད་པ་དང་། མི་ཁྲི་10རེར་ནད་ལྕིའི་གསོ་རིག་ནད་ཁྲི་10རེ་ཡོད་པ་རེད། ནད་ལྕིའི་གསོ་རིག་གི་སྨན་པ་དཀའ་བཅུ་པའི་བསྡོམས་འབོར་ཁྲི་8.05ཟིན་པ་དང་ནད་ལྕིའི་ཆེད་ལས་ཀྱི་ནད་སྐྱོང་པ་ཁྲི་22ཟིན་པ། གཞན་ཡང“ICUརུ་བསྒྱུར་ཐུབ་པའི”ནད་སྐྱོང་པ་ཁྲི་17.77ཡོད་པ་རེད།
ཅའོ་ཡ་ཧུའེ་ཡིས། ས་ཁུལ་དང་གྲོང་ཁྱེར་ཚན་པར་བྱས་ཏེ་གྲོང་ཁྱེར་གྱི་མི་འབོར་གཞི་ཁྱོན་ལ་གཞིགས་ནས་སྒྲོམ་ཚང་སྨན་ཁང་དག་ནད་བཅོས་དམིགས་འཛུགས་སྨན་ཁང་དུ་རིམ་སྤོར་སྒྱུར་བཅོས་བྱེད་དགོས། དེ་ཡང་སྒྲོམ་ཚང་སྨན་ཁང་གི་རྨང་གཞིའི་ཐོག་དེར་སྨན་བཅོས་ཀྱི་ནུས་པ་ངེས་ཅན་ལྡན་པར་བྱས་ནས་དེའི་ནད་ཁྲིའི་བསྡུར་ཚད་10%ལྟར་ལྟ་སྐྱོང་གི་ནད་ཁྲིར་སྒྱུར་བཀོད་བྱེད་དགོས། “རྒྱ་སྐྱེད་དང་སྒྱུར་བཀོད་ཀྱི་ལས་དོན་དེ་དག་ཚང་མ་ས་གནས་ཁག་གིས་ངེས་པར་དུ་ཟླ་12པའི་ཟླ་མཇུག་གོང་ལེགས་སྒྲུབ་བྱེད་དགོས་པའི་བླང་བྱ་བཏོན་ཡོད”ཅེས་བཤད་པ་རེད།
ཡོངས་བསྒྲགས་ཚོགས་འདུའི་ཐོག་ཅའོ་ཡ་ཧུའེ་ཡིས“སྔོན་ཆད་ཚང་མས་ཉིང་སྐྱུར་གདགས་གཤིས་ཡིན་པ་ཚང་མ་དམིགས་འཛུགས་སྨན་ཁང་དུ་སྨན་བཅོས་བྱེད་པར་འགྲོ་དགོས་པའི་ངོས་འཛིན་བྱེད་ཀྱི་ཡོད། སླད་ཕྱིན་སྨན་བཅོས་སྒྲིག་གཞི་ཚང་མས་ཉིང་སྐྱུར་གདགས་གཤིས་ཡིན་པའི་ནད་པར་སྨན་བཅོས་བྱེད་དགོས་པས་ཉིང་སྐྱུར་གདགས་གཤིས་ཡིན་ཚེ་སྨན་ཁང་གིས་སྨན་བཅོས་མི་བྱེད་པ་མི་སྲིད་པས་སེམས་ཁྲལ་བྱེད་དགོས་མེད། ད་ལྟ་ནས་བཟུང་སྨན་བཅོས་སྒྲིག་གཞི་ཚང་མས་དེའི་ཐད་གྲ་སྒྲིག་ཡག་པོ་བྱེད་དགོས། སྨན་བཅོས་སྒྲིག་གཞི་ཚང་མས་ནད་གཞིའི་གནས་ཚུལ་དང་ནད་པའི་རེ་བ་གཙོ་བོ་ལྟར་སྨན་བཅོས་བྱེད་པ་དང་ནད་པས་ཀྱང་ནད་གཞིའི་དགོས་མཁོར་གཞིགས་ནས་སྨན་བཅོས་བྱེད་སའི་སྨན་ཁང་འདེམས་ཆོག”ཅེས་བཤད་པ་རེད།
པེ་ཅིང་ཀྲུང་ལུགས་གསོ་རིག་སྨན་ཁང་གི་ཡོན་ཀྲང་ལིའུ་ཆིང་ཆོན་གྱིས“ནད་ཐོག་སྨན་བཅོས་ཀྱི་ལག་ལེན་དངོས་ལས་ཀྲུང་ལུགས་གསོ་རིག་དང་དེ་བཞིན་ཀྲུང་ལུགས་དང་ཕྱི་ལུགས་ཟུང་འབྲེལ་གྱིས་སྨན་བཅོས་བྱས་པར་ཕན་འབྲས་མངོན་གསལ་དོད་པོ་ཐོན་པ་དང་ལྷག་པར་དུ་ཏོག་གསར་གློ་ཚད་ཕོག་མཁན་ལ་ཚ་བ་རྒྱས་པ་དང་། མིད་པ་ན་བ། གློ་རྒྱག་པ། ཉོབ་མདངས་སླེབས་པ་སོགས་ཀྱི་ནད་རྟགས་མངོན་གསལ་དོད་པོས་ཡང་དུ་གཏོང་བ་དང་། ཉིང་སྐྱུར་སྲིབས་གཤིས་སུ་འགྱུར་བའི་དུས་ཚོད་ཐུང་དུ་འགྲོ་བ་སོགས་ཐད་ལེགས་ཆ་ཆེན་པོ་ལྡན་ཡོད། སྤྱིའི་ཆ་ནས་བརྗོད་ན། རླུང་སེལ་ཚ་སེལ་དང་། རླན་སེལ་དུག་སེལ། ནད་སེལ་གློ་ཕན་བཅས་ཀྱི་ནུས་པ་ལྡན་པའི་ཆམ་ནད་བཅོས་པའི་ཀྲུང་ལུགས་སྨན་ཡིན་ཕྱིན་མིག་སྔའི་ཨོ་སྨི་ཁེ་རོན་བཅོས་པར་ནུས་པ་ཧ་ཅང་ཡག་པོ་ལྡན་ཡོད་ཅེས་ངོ་སྤྲོད་བྱས་པ་རེད།
པེ་ཅིང་ཁྲའོ་དབྱང་སྨན་ཁང་གི་ཡོན་ཀྲང་གཞོན་པ་ཐུང་ཀྲའོ་ཧུའེ་ཡིས། ནད་རྟགས་མེད་པའི་ནད་པར་སྨན་བཅོས་བྱེད་མི་དགོས་པ་དང་། ནད་རྟགས་ཡང་བའི་ནད་པ་དཔེར་ན་གློ་ཅུང་རྒྱག་པ་དང་། ཚ་བ་ཏོག་ཙམ་རྒྱས་པ། མིད་པ་མི་བདེ་བ་བཅས་ཀྱི་ནད་རྟགས་ཐོན་སྲིད་པས་ནད་རྟགས་དེ་དག་ལ་གཞིགས་ནས་སྨན་བཏང་ན་ཆོག གལ་ཏེ་ཚ་བ་38.5℃ཡན་རྒྱས་ན་ཚ་བ་འཇགས་བྱེད་ཀྱི་སྨན་ནམ་ཡང་ན་དུག་སེལ་གྱི་ཀྲུང་ལུགས་སྨན་བཏང་ན་ཆོག ཚ་བ་ཤུགས་ཆེན་རྒྱས་ནས་ཡུན་རིང་མི་འཇགས་པ་དང་། དབུགས་ཧལ་བ། བྲང་ཁ་མི་བདེ་བ་སོགས་ཀྱི་ནད་རྟགས་ཐོན་སྐབས་དུས་ཐོག་ཏུ་དམིགས་འཛུགས་སྨན་ཁང་དུ་སྨན་བཅོས་བྱེད་པར་འགྲོ་དགོས་ཞེས་བཤད་པ་རེད།
རྒན་རྒོན་ནི་ཏོག་དབྱིབས་ནད་དུག་ཕོག་ཉེན་ཆེ་བའི་མི་ཚོགས་ཤིག་རེད། ཅའོ་ཡ་ཧུའེ་ཡིས། རེས་སྐོར་གསར་པའི་སྨན་བཅོས་སྒྱུར་བཅོས་བྱས་ཚུན། ས་གནས་ཁག་གིས་སྨན་བཅོས་མཉམ་འབྲེལ་སྒྲིག་གཞི་འཛུགས་རྒྱུར་སྐུལ་འདེད་ཤུགས་ཆེན་བཏང་ནས་རྒན་རྒོན་གྱི་བདེ་ཐང་ལྟ་ཞིབ་ཚད་ལེན་ལ་གལ་འགངས་ཤིན་ཏུ་ཆེ་བའི་རྨང་གཞི་བཏིང་ཡོད། གྲོང་ཁྱེར་དང་རྫོང་ཁོངས་ཚན་པར་བྱས་ནས་དྲ་མིག་ཅན་གྱི་བཀོད་སྒྲིག་བྱེད་པ་དང་འབྲེལ་རྒན་རྒོན་ལ་རིམ་དབྱེའི་བདེ་ཐང་གི་ལྟ་ཞིབ་ཚད་ལེན་བྱེད་དགོས། གལ་ཏེ་རྒན་རྒོན་གྱི་ནད་གཞི་ཇེ་ལོད་དུ་ཕྱིན་ཚེ་རིམ་པ་བཞིན་སྨན་ཁང་སྤོ་སྒྱུར་མི་བྱེད་པར། རིམ་གསུམ་སྨན་ཁང་གི་ལྗང་མདོག་བགྲོད་ལམ་བརྒྱུད་ཐད་ཀར་སྨན་བཅོས་ཆུ་ཚད་མཐོ་བའི་སྨན་ཁང་དུ་བསྐྱོད་ནས་དེ་མཚུངས་ཀྱི་སྨན་བཅོས་བྱེད་ཆོག་ཅེས་བཤད་པ་རེད།