ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ལྷོ་ཁ་གྲོང་ཁྱེར་གྲ་ནང་རྫོང་དང་། ཆུ་གསུམ་རྫོང་། ཟངས་རི་རྫོང་བཅས་སུ་ཐོན་ལས་འཕེལ་རྒྱས་དང་གྲོང་གསེབ་དར་རྒྱས་ཀྱི་ལས་དོན་སོགས་ལ་བརྟག་ཞིབ་གནང་བར་ཕེབས་ཞིང་། ཁོང་གིས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་དོན་འཁྱོལ་གཏིང་ཟབ་བྱས་ཏེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་ཀྱི་བཀོད་སྒྲིག་བླང་བྱ་གཞིར་བཟུང་། ལེགས་ཆ་དང་ཁྱད་ལྡན་ཐོན་ཁུངས་ལ་གཞི་ཚུགས་ནས་ཐོན་ལས་སྟོབས་ཆེར་གཏོང་བ་དང་། གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་བཏང་སྟེ་ཞིང་ལས་དང་གྲོང་གསེབ་དེང་རབས་ཅན་གྱི་གོམས་སྟབས་རྒྱུན་ཆད་མེད་པར་མགྱོགས་སུ་གཏོང་དགོས་པའི་ནན་བཤད་གནང་བ་རེད།
གྲོང་གསེབ་དར་རྒྱས་ལ་སྐུལ་འདེད་ཏན་ཏིག་གཏོང་བར་ཐོན་ལས་དར་རྒྱས་ནི་རྨང་གཞི་རེད། ཡན་ཅིན་ཧའེ་སྔ་རྗེས་སུ་གྲ་ནང་རྫོང་སྔོ་ལྗང་འབྱུང་ཁུངས་དེང་རབས་ཞིང་ལས་ཚན་རྩལ་མ་རྐང་ཚད་ཡོད་ཀུང་སི་དང་། ཆུ་གསུམ་རྫོང་ཆུ་མཁར་གྲོང་ཚོའི་སྔོ་སྨན་འདེབས་འཛུགས་ལས་སྣོན་མཉམ་ལས་ཁང་། ཟངས་རི་རྫོང་རྒུན་འབྲུམ་འདེབས་འཛུགས་རྟེན་གཞི་བཅས་ཀྱི་འགྱིག་ཤོག་དྲོད་ཁང་ཆེན་པོ་དང་བཟོ་ཁང་དུ་ཕེབས་ནས་ཐོན་སྐྱེད་གཉེར་སྐྱོང་བ་དང་སྤེལ་རེས་གཏིང་ཟབ་གནང་སྟེ་ཁེ་ལས་ཀྱི་གཞི་ཁྱོན་དང་། ཐོན་རྫས་ཚོང་ལམ། དཔལ་འབྱོར་གྱི་ཕན་འབྲས། ཐོན་ལས་འཁོར་འབྲེལ་འཛུགས་སྐྲུན་བཅས་དང་། དེ་བཞིན་མང་ཚོགས་ཀྱི་ལས་ཞུགས་འབབ་འཕར་ལ་སྐུལ་ཁྲིད་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་དང་འབྲེལ་ཁོ་ཚོའི་བསམ་འཆར་དང་གྲོས་འགོ་གསན་ཞིང་། ཁོང་གིས་ཤིང་འབྲས་དང་སྔོ་ཚལ་འདེབས་འཛུགས་དང་སྔོ་སྨན་འདེབས་འཛུགས་ལས་སྣོན་སོགས་ཀྱི་ས་མཐོའི་ཁྱད་ལྡན་ཐོན་ལས་འཕེལ་རྒྱས་གཏོང་བ་ནི་ནང་སྐྱེས་འཕེལ་རྒྱས་ཀྱི་སྒུལ་ཤུགས་ཆེ་རུ་གཏོང་བ་དང་ཞིང་པའི་ཡོང་འབབ་རྒྱུན་མཐུད་འཕར་བར་སྐུལ་འདེད་གཏོང་བའི་དམ་འཛིན་བྱ་གཞི་གལ་ཆེན་ཞིག་རེད། ཞབས་འདེགས་ཀྱི་འདུ་ཤེས་ཟབ་ཏུ་གཏོང་བ་དང་། ཁེ་ལས་འཕེལ་རྒྱས་ལ་སེམས་ཁུར་དང་རྒྱབ་སྐྱོར་མང་ཙམ། འདེབས་འཛུགས་དང་གསོ་ཚགས་སྣེ་འདྲེན་གྱི་ཁེ་ལས་ཁག་གཅིག་རྒྱ་སྟོབས་ཆེ་རུ་འགྲོ་བར་འདེགས་སྐྱོར། ཁེ་ལས་བློ་བདེ་དང་སེམས་རྣལ་དུ་ཕབ་ནས་ལས་སྒྲུབ་ལས་གཏོད་ཐུབ་པ། མང་ཚོགས་དེ་བས་མང་བའི་འབབ་འཕར་ཕྱུག་འགྱུར་ལ་སྐུལ་ཁྲིད་བཅས་བྱས་ནས་ཁེ་ལས་ལ་ཕན་འབྲས་ཐོན་པ་དང་མི་སེར་ལ་ཕན་པ་ཐོབ་པ་བྱེད་དགོས་ཞེས་གསུངས་པ་རེད།
གྲ་ནང་རྫོང་ཡང་ཀ་ཞྭ་མོ་ཚེ་རིང་སྐྱིན་ཁེབས་བཟོ་གྲྭ་དང་བརྐོས་དཀྲོལ་བཟོ་རྩལ་ཞིང་པའི་ཆེད་ལས་མཉམ་ལས་ཁང་གིས་ཐོན་སྐྱེད་བྱས་པའི་བོད་བཟོའི་ཞྭ་མོ་དང་བོད་བཟོའི་ཁྱིམ་ཆས་སོགས་ཀྱི་བཟོ་རྩལ་ཞིབ་ཚགས་པ་དང་བཟོ་ལྟ་དཔེ་གསར་གྱི་ལག་ཤེས་ཐོན་རྫས་ལ་མི་རིགས་ཁག་གི་མང་ཚོགས་ཀྱི་དགའ་བསུ་ཐོབ་ནས་ཐོན་རྫས་བྲིན་ཁ་རྒྱུག་པོ་ཡོད། ཡན་ཅིན་ཧའེ་བཟོ་པའི་ཁྲོད་དུ་ཕེབས་ནས་ཐོན་རྫས་ཀྱི་བཟོ་རིམ་དང་། ཐོན་སྐྱེད་ཕྱིར་ཚོང་། གླ་ཕོགས་ཡོང་འབབ་བཅས་ཀྱི་གནས་ཚུལ་ལ་མཁྱེན་རྟོགས་ཞིབ་ཕྲ་གནང་བ་རེད།
ནོར་བུ་བྱེ་གཏེར་ཁུལ་དུ་ཡན་ཅིན་ཧའེ་ཡིས་ས་གནས་ས་ཐོག་ཏུ་གཏེར་རིའི་ཉེ་འཁོར་གྱི་ཁོར་ཡུག་དང་ཁེ་ལས་ཀྱི་བདེ་འཇགས་ཐོན་སྐྱེད་དོ་དམ་གྱི་བརྒྱུད་རིམ་ལ་གཟིགས་ཞིབ་གནང་ནས་ལས་ཀའི་སྙན་སེང་གསན་ཞིང་། ཁོང་གིས་བདེ་འཇགས་ཐོན་སྐྱེད་དང་ཁོར་ཡུག་སྲུང་སྐྱོང་ལ་ཧ་རི་ཧུ་རི་དང་ལྷོད་གཡེང་སྤུ་ཙམ་ཡང་གཏོང་མི་རུང་། “རི་སྔོན་ཆུ་དྭངས་གསེར་རི་དངུལ་རི་ལས་ལྷག་པའི”འདུ་ཤེས་ཟབ་ཏུ་གཏོང་བ་དང་ཁོར་ཡུག་སྲུང་སྐྱོང་གི་ཚད་གཞི་ནན་ཤོས་ལག་བསྟར་བྱས་ནས་ལྗང་མདོག་འཕེལ་རྒྱས་དང་རྒྱུན་མཐུད་ཆོག་པའི་འཕེལ་རྒྱས་མངོན་འགྱུར་ཡོང་བར་བྱེད་དགོས་ཞེས་གསུངས་པ་རེད།