ཚེས་28ཉིན་གྱི་སྔ་དྲོ།　རང་སྐྱོང་ལྗོངས་ཀྱི་སྲིད་འཛིན་བསྐྱར་གྲོས་ཚོམས་ཆེན་གོ་རིམ་ལྡན་པའི་ངང་ཕྱི་ཕྱོགས་སུ་སྒོ་མོ་འབྱེད་རྒྱུ་སླར་གསོ་བྱས་ཏེ་དྲ་ཕྱི་ནས་སྲིད་འཛིན་བསྐྱར་གྲོས་ཀྱི་རེ་ཞུ་དང་སྐར་ཁུང་བློ་འདྲིའི་ཞབས་ཞུ་དང་ལེན་བྱ་རྒྱུ་རེད།　འཆར་གཞི་ལྟར་ན།　རང་སྐྱོང་ལྗོངས་ཀྱི་སྲིད་འཛིན་བསྐྱར་གྲོས་ཚོམས་ཆེན་གཅིག་གྱུར་སྒོ་ཕྱེ་བའི་དུས་ཚོད་ནི་གཟའ་ཟླ་བ་ནས་གཟའ་པ་སངས་བར་གྱི་སྔ་དྲོའི་ཆུ་ཚོད་9：30ནས13：00བར་དང་།　ཕྱི་དྲོའི་ཆུ་ཚོད་15：30ནས18：00བར་ཡིན་པ་རེད།

ཤེས་རྟོགས་བྱུང་བར་གཞིགས་ན།　ལས་ཀའི་བཀོད་སྒྲིག་གཞིར་བཟུང་།　སྲིད་འཛིན་བསྐྱར་གྲོས་ཚོམས་ཆེན་དུ་ལས་དོན་སྒྲུབ་པར་ཡོང་མཁན་མང་ཚོགས་ལ་སྤྱིར་བཏང་ཁ་པར་ཐོག་ནས་སྔོན་མངགས་བྱེད་དགོས་པའི་བླང་བྱ་བཏོན་ཡོད།　དམིགས་བསལ་ཛ་དྲག་ཆེ་བའི་དོན་གྱི་རྐྱེན་པས་སྲིད་འཛིན་བསྐྱར་གྲོས་ཚོམས་ཆེན་དུ་ས་གནས་ས་ཐོག་ཏུ་སྲིད་འཛིན་བསྐྱར་གྲོས་དང་ཞུ་ལན་འདེབས་པའི་དོན་དག་སྒྲུབ་དགོས་ཚེ།　ལས་དོན་སྒྲུབ་མཁན་གྱིས་ངེས་པར་དུ་ཁ་རས་རྒྱག་པ་དང་།　གནས་ཡུལ་བཤེར་རྟགས་བཤེར་བ།　བདེ་ཐང་བཤེར་རྟགས་དང་འགྲོ་སྐྱོད་བཤེར་རྟགས་སྟོན་པ།　ཚ་བ་ལྟ་བ།　གཞོགས་འདེགས་བཅས་བྱས་ཏེ“ཉིན་གསུམ་བཤེར་གཉིས”ཀྱི་ཉིང་སྐྱུར་བརྟག་དཔྱད་སྲིབ་གཤིས་ཡིན་པའི་དཔང་ཡིག་མཁོ་འདོན་བྱེད་དགོས་པ་མ་ཟད།　ད་དུང་སྲིད་འཛིན་བསྐྱར་གྲོས་ཚོམས་ཆེན་དུ་ལས་དོན་སྒྲུབ་སྐབས་ངེས་པར་དུ་ལས་དོན་མི་སྣའི་ཁྲིད་སྟོན་ལ་བརྩི་སྲུང་ཞུ་དགོས་པ་དང“བར་ཐག་སྨི་གཅིག”འཇོག་དགོས་པའི་གཏན་འབེབས་ལ་བརྩི་སྲུང་ནན་པོ་ཞུ་བ་བཅས་བྱེད་དགོས།

རང་སྐྱོང་ལྗོངས་ཁྲིམས་འཛིན་ཐིང་གི་འབྲེལ་ཡོད་འགན་འཁུར་བས་གསར་འགོད་པར།　གོམ་སྟབས་རྗེས་མར་རང་སྐྱོང་ལྗོངས་ཁྲིམས་འཛིན་ཐིང་གིས་བཅའ་ཁྲིམས་ཀྱི་གཏན་འབེབས་གཞིར་བཟུང་།　རིམས་ནད་སྔོན་འགོག་དང་ཚོད་འཛིན་གྱི་འགོག་སྲུང་འཛིང་རགས་བརྟན་པོ་སྲུང་བའི་སྔོན་འགྲོའི་ཆ་རྐྱེན་འོག　རིམས་ནད་ཀྱི་རྐྱེན་པས་སྒྲུབ་མཚམས་བཞག་པའི་སྲིད་འཛིན་བསྐྱར་གྲོས་ཀྱི་གྱོད་གཞི་གོ་རིམ་ལྡན་པའི་ངང་བསྐྱར་དུ་བསྒྲུབས་ནས་ལས་ཐོན་བསྐྱར་ཚུགས་ལ་སྐུལ་འདེད་ནུས་ལྡན་གཏོང་རྒྱུ་ཡིན་ཞེས་བརྗོད་པ་རེད།