ཉིན་ཤས་བསྟུད་མར། བོད་ཀྱི་འཐུས་མི་ཚོགས་པས་ཏང་གི་ཚོགས་ཆེན་ཉི་ཤུ་པའི་སྙན་སྒྲོན་དང་། ཀྲུང་དབྱང་སྒྲིག་ཨུད་ཀྱི་ལས་དོན་སྙན་སྒྲོན། ཏང་གི་སྒྲིག་ཡིག་གི་བཟོ་བཅོས་འཆར་ཟིན་བཅས་ལ་སློབ་སྦྱོང་དང་གྲོས་བསྡུར་ནན་ཏན་གནང་བ་རེད།
བོད་ཀྱི་འཐུས་མི་ཚོགས་པའི་གྲོས་བསྡུར་བྱ་ཡུལ་ཡིན་པ།
འཐུས་མི་ཞུས་ཁྲེང་ཚང་གིས་གསུངས་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནང་བའི་སྙན་སྒྲོན་གྱིས་དར་ཆ་བསྒྲེངས་ནས་ཁ་ཕྱོགས་ལ་སྟངས་འཛིན་དང་། རིགས་པའི་གཞུང་ལུགས་གསར་གཏོད་མངོན་གསལ་དོད་པ། བརྗིད་ཆེའི་འཆར་གཞི་བཀོད་པ་བཅས་ལས། དཔའ་ངར་ཆེར་བསྐྱེད་ཀྱིས་འཐབ་འཛིང་དང་འགན་འཁྲི་འཁུར་ཕོད་པའི་བློ་སྟོབས་ཆེན་པོ་མཚོན་པས། སྙིང་སྟོབས་རབ་འཕེལ་དང་མི་སེམས་ལ་སྐུལ་མ་ཐེབས་པ་ཞིག་འདུག དེར་བརྟེན། ང་ཚོས་ངེས་པར་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་འཇིག་རྟེན་གྱི་ལྟ་བ་དང་བརྟག་ཐབས་སྨྲ་བ་ཁོང་དུ་ཟབ་མོ་ཆུད་པར་བྱས་ཏེ། ལྷོ་ཁའི་དོན་དངོས་དང་ཟུང་འབྲེལ་གྱིས་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་ལྷོ་ཁ་གསར་པ་བསྐྲུན་ཏེ། བྱ་སྤྱོད་དངོས་ལ་བརྟེན་ནས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་ལ་དྲིན་ལན་འཇལ་གྱི་ཡིན།
འཐུས་མི་བསོད་ནམས་ཉི་མས་གསུངས་དོན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་བྱམས་བརྩེའི་ཐུགས་ཁུར་འོག བོད་ཀྱི་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་གྲུབ་འབྲས་མངོན་གསལ་དོད་པོ་ཐོབ་ཡོད། ང་ཚོས“ལྡན་དགོས་པ་གསུམ་དང་ཕན་འདོགས་པ་གཅིག”མཐའ་འཁྱོངས་ཀྱིས་དེང་རབས་ཅན་གྱི་དཔལ་འབྱོར་མ་ལག་མགྱོགས་པོ་སྐྲུན་པ་དང་། ཐོན་ལས་དང་པོ་ལེགས་སུ་གཏོང་བ། ཐོན་ལས་གཉིས་པ་སྟོབས་ཆེར་གཏོང་བ། ཐོན་ལས་གསུམ་པ་གོང་མཐོར་གཏོང་བ། རྣམ་གྲངས་འཛུགས་སྐྲུན་ཟབ་ཏུ་གཏོང་བ། ཚོང་གཉེར་གྱི་ཁོར་ཡུག་རྒྱུན་མཐུད་ལེགས་སུ་གཏོང་བ། ཚོང་འགུགས་མ་འདྲེན་བྱེད་རྒྱ་ཆེ་རུ་ཧུར་ཐག་གཏོང་བ་བཅས་བྱས་ནས། ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་གཏོང་གི་ཡིན།
འཐུས་མི་ཚེ་རིང་དོན་གྲུབ་ཀྱིས་གསུངས་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྙན་སྒྲོན་དུ“ཞིང་གསུམ”གྱི་ལས་དོན་ལ་ཚད་མཐོའི་མཐོང་ཆེན་གནང་ནས། གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བར་བཀོད་སྒྲིག་གལ་ཆེན་གནང་ཡོད། པ་སྣམ་རྫོང་གིས་ཚོགས་ཆེན་གྱི་དགོངས་དོན་ལག་བསྟར་དོན་འཁྱོལ་ནན་ཏན་བྱས་ཏེ། དྲིན་ཚོར་ཡར་བརྩོན་དང་འབད་འབུངས་ཆེར་བསྐྱེད་ཀྱིས་ཞིང་ལས་གཞི་ཁྱོན་ཅན་དང་། ཐོན་ལས་ཅན། ཁྲོམ་ར་ཅན་བཅས་ལ་སྐུལ་འདེད་ཤུགས་ཆེན་དང་། ཞིང་ལས་ཀྱི་གྲུབ་ཆ་ལེགས་སྒྲིག་ལ་སྐུལ་འདེད་ཧུར་ཐག་བཏང་ནས། གྲོང་གསེབ་ཕྱོགས་ཡོངས་ནས་དར་རྒྱས་གཏོང་བའི་ཐོན་ལས་ཀྱི་རྨང་གཞི་བརྟན་དུ་གཏོང་གི་ཡིན།
འཐུས་མི་སྒྲོལ་དཀར་གྱིས་གསུངས་དོན། མེས་རྒྱལ་མཐའ་མཚམས་ཀྱི་ཞིང་འབྲོག་པའི་ཏང་ཡོན་གྱི་ངོས་ནས། ཏང་གི་ཚོགས་ཆེན་ཉི་ཤུ་པར་ཞུགས་པར་སྤོབས་པ་ཆེན་པོ་སྐྱེ་ཡི་འདུག དུས་དང་རྣམ་པ་ཀུན་ཏུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་ངེས་པ་དང་། ཏང་གི་ཚོགས་ཆེན་ཉི་ཤུ་པའི་དགོངས་དོན་ཁྱིམ་ཚང་ཚང་མར་དྲིལ་བསྒྲགས། མང་ཚོགས་དེ་བས་མང་བས་མཐའ་མཚམས་ས་ཁུལ་དུ་བདེ་སྡོད་ལས་བརྩོན་དང་བྱས་རྗེས་འཇོག་པར་སྐུལ་ཁྲིད་བཅས་བྱས་ནས། བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་སྐྱོང་ཡག་པོ་དང་བདེ་སྐྱིད་ལྡན་པའི་ཁྱིམ་གཞིས་འཛུགས་སྐྲུན་ཡག་པོ་བྱེད་ཀྱི་ཡིན།
འཐུས་མི་བསྟན་འཛིན་དོན་གྲུབ་ཀྱིས་གསུངས་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནང་བའི་སྙན་སྒྲོན་དུ། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་སྐྲུན་པའི་དཔུང་སྐྱོད་དུང་བརྡ་བཏང་ཡོད། བཟོ་པའི་གྲལ་རིམ་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ལག་བསྟར་དོན་འཁྱོལ་གཏིང་ཟབ་བྱས་ཏེ། བདག་པོའི་ཉམས་འགྱུར་ལ་བརྟེན་ནས་གཞུང་ཁོངས་ཁེ་ལས་ཀྱི་སྒྱུར་བཅོས་ལ་ཞུགས་པ་དང་། གསར་གཏོད་ཀྱི་འདུ་ཤེས་ཟབ་ཏུ་གཏོང་བ། ཚན་རིག་རིག་གནས་ཀྱི་ཤེས་བྱ་དང་ཆེད་ལས་ལག་རྩལ་གྱི་ཤེས་བྱ་ནན་ཏན་སྦྱོང་བ། དཀའ་སྤྱད་སྦྱོང་བརྡར་དང་བློ་རྩེ་གཅིག་སྒྲིམ་གྱིས་བརྩོན་ཞིབ་བཅས་བྱས་ཏེ། གཞུང་ཁོངས་ཁེ་ལས་འཕེལ་རྒྱས་ཀྱི་གསོན་ཤུགས་དང་ལྟེ་བའི་འགྲན་རྩོད་ནུས་པ་ཆེ་རུ་གཏོང་རོགས་བྱེད་ཀྱི་ཡིན།