ཏང་གི་ཚོགས་ཆེན་ཉི་ཤུ་པའི་འཐུས་མི་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ། ལྷོ་ཁ་གྲོང་ཨུད་ཀྱི་ཧྲུའུ་ཅི་ཞུས་ཁྲེང་ཚང་གིས་ཏང་གི་ཚོགས་ཆེན་ཉི་ཤུ་པའི་སྙན་སྒྲོན་གྱི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་དོན་འཁྱོལ་བཅས་བྱེད་པའི་ཐད་གསར་འགོད་པའི་བཅར་འདྲི་དང་ལེན་གནང་ཞིང་། ཁོང་གིས་བློ་མཐུན་ཞི་ཅིན་ཕིང་གིས་ཏང་གི་ཚོགས་ཆེན་ཉི་ཤུ་པའི་ཐོག་གནང་བའི་སྙན་སྒྲོན་ནན་ཏན་ཉན་རྗེས། སྐུལ་ལྕག་ཆེན་པོ་ཐེབས་བྱུང་ལ། ངར་ཤུགས་ཀྱང་ཆེན་པོ་སྐྱེས་བྱུང་ཞེས་གསུངས། 

ལྷོ་ཁ་གྲོང་ཁྱེར་གྱི་གྲོང་ཁུལ་གཙོ་བོ།

ལྷོ་ཁ་གྲོང་ཁྱེར་གྲ་ནང་རྫོང་བསམ་ཡས་གྲོང་རྡལ་ཡར་རྒྱས་གྲོང་ཚོའི་མང་ཚོགས་དང་གྲོང་སྡོད་ལས་དོན་རུ་ཁག་གིས་གཡུལ་ལས་བྱེད་བཞིན་པ།

ཞུས་ཁྲེང་ཚང་གིས་གསུངས་དོན། ཏང་གི་ཚོགས་ཆེན་བཅོ་བརྒྱད་པའི་ཚུན་དུ། ལྷོ་ཁའི་བྱ་གཞག་ཁག་ལ་ཕྱོགས་ཡོངས་ནས་ཡར་རྒྱས་དང་ལོ་རྒྱུས་རང་བཞིན་གྱི་གྲུབ་འབྲས་ཐོབ་ཡོད། དེ་ཡང་སྤུས་ཚད་མཐོ་བའི་འཕེལ་རྒྱས་ལ་གྲུབ་འབྲས་གསར་པ་ཐོབ་ཡོད་པ་སྟེ། 2021ལོར་གྲོང་ཁྱེར་ཡོངས་ཀྱིས་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་237.27ལེགས་སྒྲུབ་བྱས་པ་དེ་2012ལོའི་ལྡབ་3.25ཡིན་པ་དང་། རྩེད་གོང་རིམ་མཐོའི་གཞུང་ལམ་དང་མཐའ་མཚམས་ཀྱི་ལམ་ཆེན་བསྐྲུན་ནས་རླངས་འཁོར་ཤར་གཏོང་ཐུབ་པ་དང་། ལྷ་ཉིང་ལྕགས་ལམ་དངོས་སུ་ཤར་གཏོང་ཐུབ་པ། མི་དམངས་ཀྱི་འཚོ་བའི་སྤུས་ཚད་ཧ་ཅང་ལེགས་སུ་ཕྱིན་ནས། གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སོ་སོར་སྒོར་43100དང་སྒོར་18435ཟིན་པ་དེ་སོ་སོར་2012ལོའི་ལྡབ་2.53དང་ལྡབ་3.04ཟིན་པ། སྐྱེ་ཁམས་ཤེས་དཔལ་གྱི་མཐོ་ས་མགྱོགས་མྱུར་བསྐྲུན་པས། རིམ་རྩིས་བྱས་ན་སྔོ་འགྱུར་རྒྱ་ཁྱོན་མུའུ་ཁྲི་53.4མང་དུ་ཕྱིན་པ་དང་། དགུན་དུས་དང་དཔྱིད་དུས་ཡར་ཀླུང་གཙང་པོའི་ངོགས་གཉིས་སུ་བྱེ་རླུང་གི་གནམ་གཤིས་སྟོན་པ་མངོན་གསལ་དོད་པོས་ཉུང་དུ་ཕྱིན་ནས། རྒྱལ་ཁབ་ཀྱི་སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་གྲོང་ཁྱེར་དངོས་སུ་གཏོད་ཐུབ་པ། མཐའ་བརྟན་མཐའ་དར་དམངས་ཕྱུག་བཅས་ལ་འཕེལ་རྒྱས་གསར་པ་བྱུང་ནས། གྲོང་ཁྱེར་ཡོངས་ཀྱི་མཐའ་མཚམས་འབྱོར་འབྲིང་གྲོང་ཚོ་96ཚང་མ་བསྐྲུན་ཟིན་པ་དང་། མཐའ་མཚམས་ས་ཁུལ་གྱི་ཐོན་སྐྱེད་དང་འཚོ་བའི་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་ཏེ། “ཏང་གི་འོད་སྟོང་མཐའ་མཚམས་ཡུལ་དུ་འཕྲོས། མཐའ་མཚམས་མི་དམངས་སེམས་པ་ཏང་ལ་ཕྱོགས”པའི་གསོན་ཉམས་དོད་པའི་ལེའུ་ཞིག་བརྩམས་ཡོད། 

ལྷོ་བྲག་རྫོང་ལ་རྒྱབ་ཤང་ལ་རྒྱབ་མཐའ་མཚམས་འབྱོར་འབྲིང་གྲོང་ཚོ། 

ཡར་ཀླུང་གི་ཕོ་གཞོན་མོ་གཞོན་ཚོས་གླུ་ལེན་གར་འཁྲབ་བྱེད་བཞིན་པ། 

གྲུབ་འབྲས་ནི་འདས་ཟིན་པར་ཐོབ་པ་ཞིག་ཡིན་པས། མ་འོངས་པར་དེ་བས་འབད་འབུངས་བྱེད་དགོས། ཞུས་ཁྲེང་ཚང་གིས་གསུངས་དོན། དེང་སྐབས་དང་སླད་ཕྱིན་གྱི་དུས་སྐབས་ཤིག་རིང་། ང་ཚོས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་དོན་འཁྱོལ་གཏིང་ཟབ་བྱེད་པ་ཆབ་སྲིད་ཀྱི་ལས་འགན་ཨང་དང་པོར་བརྩིས་ནས། བརྟན་ལྷིང་སྲུང་སྐྱོང་ཨང་དང་པོར་འཇོག་པའི་ལས་འགན་མཐའ་གཅིག་ཏུ་དོན་འཁྱོལ་དང་། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ནུས་ལྡན་གཏོང་བ། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས། སྔོ་ལྗང་རི་ཀླུང་གསེར་རི་དངུལ་རི་ལས་ལྷག་པའི་འདུ་ཤེས་བརྟན་དུ་གཏོང་བ། མཐའ་སྟོབས་མཐའ་བརྟན་མཐའ་དར་དམངས་ཕྱུག་གི་བྱ་སྤྱོད་ལག་ལེན་ཤུགས་ཆེན་བསྟར་བ་བཅས་བྱེད་དགོས། 

ཡར་ཀླུང་གཞུང་གི་སྟོན་ཁའི་མཛེས་ལྗོངས།

ལྷོ་ཁ་གྲོང་ཁྱེར་གྱི་གྲོང་ཁྱེར་སྤྱི་གླིང་ཐོག་མ། —— ཡར་ཀླུང་མི་དམངས་སྤྱི་གླིང་།