ཏང་གི་ཚོགས་ཆེན་ཉི་ཤུ་པའི་འཐུས་མིར་བདམས་ཐོན་བྱུང་བས། རང་ཉིད་ལ་གཟི་བརྗིད་ཆེན་པོ་བྱུང་བ་དང་དུས་མཚུངས། འགན་འཁྲི་ཡང་ཧ་ཅང་ལྕི་བའི་ཚོར་སྣང་བྱུང་ཞེས་ཏང་གི་ཚོགས་ཆེན་ཉི་ཤུ་པའི་འཐུས་མི་དང་ལྷོ་ཁ་གྲོང་ཁྱེར་ལྷུན་རྩེ་རྫོང་ཡུལ་སྨད་ཤང་ཡུལ་སྨད་གྲོང་ཚོའི་ཡུལ་མི་སྒྲོལ་དཀར་གྱིས་སེམས་འགུལ་ཆེན་པོས་བརྗོད།

  ཡུལ་སྨད་ཤང་ནི་ལྷུན་རྩེ་རྫོང་གི་མཐའ་མཚམས་ཤང་གྲོང་ཞིག་ཡིན་ཞིང་། དུས་རབས་གོང་མའི་ལོ་རབས་60པ་ནས་བཟུང་། སྤྱི་ལེ་ངོས་གྲུ་སྟོང་ཕྲག་ཁ་ཤས་ཟིན་པའི་རྒྱལ་ཁབ་ཀྱི་ས་ཆར། སངས་རྒྱས་ཆོས་པས་བུ་མོ་སྒྲོལ་དཀར་དང་གཡང་འཛོམས་གཉིས་ཁྲིད་དེ་ཕྱུགས་འཚོ་གིན་མཐའ་མཚམས་ཡུན་རིང་བསྲུངས།

  2017ལོར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྒྲོལ་དཀར་དང་གཡང་འཛོམས་གཅེན་གཅུང་གཉིས་ལ་འཕྲིན་ལན་སྤྲིངས་པ་ནས་བཟུང་། རྒྱལ་ཡོངས་ཀྱི་མི་འབོར་ཉུང་ཤོས་ཀྱི་ཤང་དེ་ཉིད་མི་རྣམས་ཀྱི་མིག་ལམ་དུ་གྱུར།

སྒྲོལ་དཀར་གྱིས《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》སྒྲོག་འགྲེལ་བྱེད་བཞིན་པ། (དཔྱད་གཞིའི་པར་རིས)

  སྒྲོལ་དཀར་དང་གཡང་འཛོམས་གཅེན་གཅུང་གཉིས་པོས་ཕ་འདས་པོའི་འདུན་པའི་རྒྱུན་ཡུན་རིང་བསྐྱངས་ནས། “ཁྱིམ་ནི་ཡུལ་སྨད་དང་རྒྱལ་ཁབ་ནི་ཀྲུང་གོ་ཡིན་པས། ཕྱུགས་འཚོ་གིན་མཐའ་མཚམས་སྲུང་བ་ནི་འགན་འཁྲི་ཡིན་པའི”དད་སེམས་བརྟན་པོ་རྒྱུན་འཁྱོངས་བྱས་ཏེ། ལོ་བཅུ་ཕྲག་ཁ་ཤས་རིང་ཉིན་གཅིག་ལྟར་གངས་ལྗོངས་ཀྱི་མཐའ་མཚམས་སུ་གཞི་ཚུགས་ཁར། ཕྱུགས་འཚོས་ཏེ་སྐོར་གཡེང་བྱེད་བཞིན་མེས་རྒྱལ་གྱི་བླ་ན་མེད་པའི་མངའ་ཁོངས་བསྲུངས་ནས། རྒྱལ་གཅེས་མཐའ་སྲུང་གི་དུས་རབས་ཀྱི་བསྟོད་གླུ་བརྩམས་ཡོད། དེར་བརྟེན། སྒྲོལ་དཀར་དང་གཡང་འཛོམས་གཅེན་གཅུང་ལ་སྔ་རྗེས་སུ“འབད་འཐབ་པ་ཡག་ཤོས”དང་། “དུས་རབས་ཀྱི་མིག་དཔེ” “རྒྱལ་ཡོངས་ཀྱི་གསུམ་བརྒྱད་དར་དམར་བ”  སྐབས་བདུན་པའི“རྒྱལ་ཡོངས་ཀྱི་ལས་བཀུར་ལེགས་སྐྱེས་ཀྱི་ཀུན་སྤྱོད་དཔེ་བཟང་བ”སོགས་ཀྱི་གཟི་བརྗིད་མཚན་སྙན་ཐོབ།

  “འགྱུར་ལྡོག་ཧ་ཅང་ཆེན་པོ་བྱུང་སོང་། སྔོན་ཆད་དགུན་ཁར་ཁ་བ་བབས་པས་ལ་འགོག་གི་ཡོད་སྟབས། ལོ་ཕྱེད་སྔོན་ནས་འཚོ་བའི་དངོས་རྫས་གྲ་སྒྲིག་བྱེད་དགོས་ཀྱི་ཡོད། ད་ཆ་ལམ་ཤར་གཏོང་ཐུབ་པས་འཚོ་བའི་དངོས་ཟོག་སྣ་ཚོགས་དུས་ཐོག་ཏུ་ཉོ་ཐུབ་པ་དང་། གློག་ཤར་གཏོང་ཐུབ་ནས་གློ་བུར་དུ་གློག་ཆད་པའི་སེམས་ཁྲལ་བྱེད་དགོས་མེད། ལྷག་པར་དུ་ཡུལ་སྨད་ཤང་ལ་དེ་སྔ་སློབ་གྲྭ་མེད་སྟབས། ཤང་གི་ཕྲུ་གུ་ཚོ་ལ་བརྒྱབ་ཀླུང་བརྒལ་ནས་སློབ་གྲྭར་འགྲོ་དགོས་ཀྱི་ཡོད། 2017ལོར་རྒྱལ་ཁབ་ཀྱིས་མ་དངུལ་སྒོར་དུང་ཕྱུར་1.2བཏང་ནས། ཡུལ་སྨད་དུ་མཐའ་མཚམས་འབྱོར་འབྲིང་དཔེ་སྟོན་ཤང་བསྐྲུན་པ་དང་ཆབས་ཅིག སློབ་གྲྭ་དང་འཕྲོད་བསྟེན་ཁང་སོགས་ལེ་ལག་ཚང་བའི་སྒྲིག་བཀོད་འཛུགས་སྐྲུན་བྱས་ཡོད། དེ་སྔ་ཡུལ་སྨད་ལ་ཆ་འཕྲིན་གསང་པོ་མེད་མོད། འོན་ཀྱང་ད་ཆ་G4ཡི་བརྡ་རྟགས་ཤང་ཡོངས་ལ་ཁྱབ་ཀྱི་ཡོད་པས། ཕྱི་ནས་དངུལ་སྤྲོད་དགོས་ཚེ་སྒུལ་བདེའི་གཏོང་སྤྲོད་སྤྱད་ཆོག  དུད་ཚང་ཚང་མས་ཁྱིམ་ཚང་མགྲོན་ཁང་དང་། ཇ་ཁང་། ཚོང་ཁང་ཆུང་གྲས་སོགས་བཙུགས་ནས། འཚོ་བ་ཧ་ཅང་ལེགས་པོ་ཡོད” ལོ་འདི་དག་རིང་གི་ཡུལ་སྨད་ཤང་གི་འཕེལ་རྒྱས་དང་འགྱུར་ལྡོག་སྐོར་གླེང་སྐབས། སྒྲོལ་དཀར་ལ་རྫོགས་རྒྱུ་མེད་པའི་གཏམ་གླེང་རྒྱུ་ཡོད།

སྒྲོལ་དཀར་གྱིས《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》སྒྲོག་འགྲེལ་བྱེད་བཞིན་པ། (དཔྱད་གཞིའི་པར་རིས)

ད་ཕན་ལོ་ཤས་རིང་། བོད་ཀྱི་མཐའ་མཚམས་འབྱོར་འབྲིང་གྲོང་ཚོ་འཛུགས་སྐྲུན་དང་དམངས་ཕན་མཐའ་བརྟན་གྱི་སྲིད་ཇུས་སྣ་ཚོགས་ཀྱི་གཟིགས་སྐྱོང་འོག 2021ལོར་ཡུལ་སྨད་ཤང་གི་དཔལ་འབྱོར་ཡོང་འབབ་བསྡོམས་འབོར་སྒོར་ཁྲི་910ཟིན་པ་དང་། མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་38848.4ཟིན་ནས། རང་ལྗོངས་ཀྱི་ཆ་སྙོམས་ཆུ་ཚད་ལས་ཧ་ཅང་མཐོ་བ་དང་དབུལ་གྲོལ་མང་ཚོགས་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་23975.9ཟིན་ཡོད།

སྒྲོལ་དཀར་དང་བུ་མོ་ལུག་འཚོ་བཞིན་པ། (དཔྱད་གཞིའི་པར་རིས)

  ད་ཆ་རང་ཉིད་ཀྱི་ཕ་ཡུལ་དུ་ཉིན་བཞིན་འགྱུར་ལྡོག་ཆེན་པོ་འགྲོ་བ་དང་མང་ཚོགས་ཀྱིས་དེ་བས་བདེ་སྐྱིད་ལྡན་པའི་འཚོ་བ་སྐྱེལ་བ་མཐོང་སྐབས། སྒྲོལ་དཀར་གྱིས་སྔོན་ཆད་ཡུལ་སྨད་དུ་ང་ཚོ་ཕ་བུ་གསུམ་ལས་མེད། ད་ཆ་གང་ས་ཅི་ཐད་ལ་འཕེལ་རྒྱས་ཧ་ཅང་ཡག་པོ་བྱུང་བ་འདི་དག་ཚང་མ་རྒྱལ་ཁབ་ཀྱི་སྲིད་ཇུས་བཟང་པོ་དང་དམིགས་བསལ་གྱི་ཐུགས་ཁུར་གནང་བ་ལས་བྱུང་བ་ཞིག་རེད། ཏང་གི་ཚོགས་ཆེན་ཉི་ཤུ་པའི་འཐུས་མི་ཞིག་གི་ངོས་ནས། ངས་ད་ཐེངས་ཀྱི་གོ་སྐབས་ལ་གཅེས་སྤྲས་ཆེན་པོ་བྱས་ནས། འཐུས་མིའི་འགན་འཁྲི་ནན་ཏན་གྱིས་སྒྲུབ་པ་དང་ཚོགས་ཆེན་གྱི་དགོངས་དོན་ལ་གོ་བ་ཡག་པོ་བླངས་ཏེ། ཕ་ཡུལ་དུ་ལོག་རྗེས་དྲིལ་བསྒྲགས་ཡག་པོ་བྱས་ནས་མཐའ་མཚམས་མང་ཚོགས་ཀྱི་སྣེ་ཁྲིད་དེ། མེས་རྒྱལ་གྱི་ས་ཆ་སྦར་མཐིལ་ཙམ་ཡང་སྔར་ལས་ལྷག་པའི་སྒོ་ནས་ཡག་པོ་སྲུང་ཀྱི་ཡིན་ཞེས་མྱོང་ཚོར་ཆེན་པོས་བརྗོད།