ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། དུས་རབས་ཀྱིས་སྤྲད་པའི“དམངས་འཚོའི་རྒྱུགས་ཤོག”ལ་དམིགས་ཏེ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་དམངས་འཚོ་ལེགས་སུ་གཏོང་རྒྱུའི་སྐོར་གྱི་ཐབས་ཇུས་བཀོད་སྒྲིག་སློབ་སྦྱོང་དང་ལག་བསྟར་གཏིང་ཟབ་བྱས་ནས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་མཐའ་འཁྱོངས་བྱེད་པ་དང་། དམངས་འཚོ་ལེགས་གཏོང་དང་མི་སེམས་གཅིག་ཏུ་བསྒྲིལ་རྒྱུ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འགོ་འཛུགས་ས་དང་དོན་ལ་བབས་སར་བརྩིས་ནས“རྒྱུགས་གཏོང”སྐབས་རིག་པ་དྭངས་གསལ་དང་བློ་བརྟན་འགྱུར་མེད་ཀྱིས་འཚབ་འཚུབ་མེད་པའི་ངང་ལན་བཏབ་པ་སྟེ།

“དམངས་འཚོའི་འདུ་འགོད་ཆེན་པོ་བཅུ”ལག་བསྟར་ཤུགས་ཆེན་བྱས་ནས་དམངས་ཕན་དམངས་བདེའི་སྲིད་ཇུས་ཁག་དོན་འཁྱོལ་ཡག་པོ་བྱས་པ།

འཕེལ་རྒྱས་གཏོང་རིང་དམངས་འཚོ་འགན་ལེན་དང་ལེགས་སུ་གཏོང་རྒྱུ་མཐའ་འཁྱོངས་བྱས་ནས་80%ཡན་གྱི་ནོར་སྲིད་གཏོང་སྒོ་དམངས་འཚོའི་གཙོ་གནད་ཁྱབ་ཁོངས་སུ་སྤྱད་དེ་སྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་དེ་བས་མང་པོ་མི་རིགས་ཁག་གི་མང་ཚོགས་ལ་དེ་བས་དྲང་གཞག་ངང་ཕན་པ་ཐོབ་པ་བྱས་ཡོད།

མི་དམངས་མང་ཚོགས་ཀྱིས་མོས་མཐུན་བྱེད་མིན་དང་། དགའ་པོ་བྱེད་མིན། ཁས་ལེན་བྱེད་མིན་བཅས་ལས་དོན་མཐའ་དག་ལ་བསྡུར་ཞིབ་བྱེད་པའི་རྩ་བའི་ཚད་གཞིར་འཛིན་རྒྱུ་མཐའ་འཁྱོངས་བྱས་ནས་སེམས་ནུས་ཡོད་རྒུས་དམངས་འཚོའི་དོན་དངོས་ཡག་པོ་བསྒྲུབས་ཡོད།

དམངས་འཚོ་རྒྱུན་མཐུད་ངང་ལེགས་སུ་ཕྱིན་པ་དང་བསྟུན་ནས་ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཟམ་མི་ཆད་པར་ཆེ་རུ་ཕྱིན་ཡོད།

ལོ་བཅུ་འདིའི་རིང་མི་རིགས་ཁག་གི་མི་དམངས་ཀྱིས་མཛེས་སྡུག་ལྡན་པའི་འཚོ་བ་བརྩོན་ལེན་བྱེད་པའི་གོམ་སྟབས་བརྟན་དུ་སོང་བ།

དབུལ་སྒྲོལ་འགག་སྒྲོལ་ལ་ཕྱོགས་ཡོངས་ནས་རྒྱལ་ཁ་ཐོབ་པ་དེ་ནི་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་བོད་ཀྱི་དམངས་འཚོའི་ལས་དོན་ཐད་ཐོབ་པའི་མངོན་གསལ་དོད་ཤོས་ཀྱི་གྲུབ་འབྲས་ཀྱི་གྲས་ཤིག་ཡིན་པ་སྟེ། རྫོང་དང་ཆུས་དབུལ་པོ་74ཚང་མས་དབུལ་ཞྭ་ཕུད་པ་དང་། ཡིག་ཚགས་དང་གཱ་བཟོས་པའི་མི་འབོར་དབུལ་པོ་ཁྲི་62.8ཚང་མ་དབུལ་སྒྲོལ་ཐུབ་པ། མི་ཁྲི་26.6ཡུལ་གཞན་དུ་གནས་སྤོས་ཏེ་ལོ་རྒྱུས་རང་བཞིན་གྱི་སྒོ་ནས་དབུལ་ཕོངས་ཀྱི་གནད་དོན་ཐག་གཅོད་བྱས་ཡོད།

ལོ་བཅུའི་རིང་རང་ལྗོངས་ཀྱི་གྲོང་ཁྱེར་དང་གྲོང་གསེབ་ཀྱི་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་18363དང་སྒོར་5698ནས་སྒོར་46503དང་སྒོར་16935བར་སོ་སོར་འཕར་ནས་འཕར་ཚད་ལྡབ་1.5དང་ལྡབ་2ཙམ་ཟིན་ཏེ་གྲོང་ཁྱེར་དང་གྲོང་གསེབ་ཀྱི་ཡུལ་མིའི་ཡོང་འབབ་ཀྱི་ཧེ་བག་མུ་མཐུད་ཆུང་དུ་སོང་ཡོད། “གྱོན་གོས་སྣ་གཅིག་གིས་དུས་ཚིགས་མང་པོ་འཁྱོལ་བ”ནས“དུས་ཚིགས་རེར་གྱོན་གོས་སྣ་མང་གྱོན་པའི”བར་དང་དངོས་ཚན་ཚོང་སྐོར་སྣ་མང་ཕུན་སུམ་ཚོགས་པོ་ནས་དྲ་ཐོག་ཉོ་སྒྲུབ་འཛད་སྤྱོད་ཉིན་བཞིན་མང་དུ་སོང་བའི་བར་རང་ལྗོངས་ཀྱི་གྲོང་མིའི་འཛད་སྤྱོད་བྱེད་སྟངས་དེ་བས་སྣེ་མང་ཅན་དུ་གྱུར་ཡོད། 2016ལོ་ནས་2020ལོ་བར་རང་ལྗོངས་ཀྱི་ཞིང་འབྲོག་མང་ཚོགས་མི་རེའི་ཆ་སྙོམས་འཛད་སྤྱོད་འབྲུ་རིགས་སྤྱི་རྒྱ་126ཆག་པ་དང་། འཛད་སྤྱོད་སྔོ་ཚལ་སྤྱི་རྒྱ་23འཕར་བ། གྱོན་གོས་འཛད་སྤྱོད་སྒོར་584འཕར་བ། འགྲིམ་འགྲུལ་དང་འཕྲིན་གཏོང་གི་འགྲོ་སོང་ལྡབ་1ཙམ་འཕར་བ། སྨན་བཅོས་དང་འཕྲོད་སྦྱོར་གྱི་འགྲོ་སོང་160.9%འཕར་བ། མི་རེའི་ཆ་སྙོམས་རིག་གནས་རོལ་རྩེད་ཞབས་ཞུའི་འགྲོ་སོང་167.6%འཕར་ཡོད།

ལོ་བཅུ་པོ་འདིའི་རིང་དམངས་འཚོའི་བྱ་གཞག་སྤུས་ཚད་མཐོ་བའི་ཕྱོགས་སུ་འཕེལ་རྒྱས་སོང་བ།

དམངས་འཚོའི་བདེ་རྩ་ཆེ་རུ་གཏོང་རྒྱུ་ནི་འཕེལ་རྒྱས་ཀྱི་རྩ་བའི་དམིགས་ཡུལ་རེད། རང་ལྗོངས་ཀྱིས་བརྟན་ཐོག་ཡར་འཕེལ་གྱི་ལས་ཀའི་རྩ་བའི་དགོངས་གཞི་མཐའ་འཁྱོངས་དང“ཚང་དགོས་པ་གསུམ་དང་ཕན་འདོགས་པ་གཅིག”མཐའ་འཁྱོངས་ཀྱིས་གསར་དར་ཐོན་ལས་སྐྱེད་སྲིང་དང་དཔལ་འབྱོར་གྲུབ་ཆ་ལེགས་སྒྲིག་བྱེད་མགྱོགས་སུ་བཏང་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བརྒྱུད་རིམ་ཁྲོད་ཀྱི་དམངས་འཚོའི་ཞན་ཆ་སེལ་གང་ཐུབ་དང་། དམངས་འཚོའི་དཀའ་གནད་སེལ་གང་ཐུབ། དམངས་འཚོའི་མཐའ་ཚད་ཀྱི་ཐ་སྐྱོང་གང་ཐུབ་བཅས་བྱས་ཡོད།

འཇུག་སྒོ་ཆུང་ཆུང་གིས་གྲོང་གསེབ་དར་རྒྱས་ཀྱི་གོམ་སྟབས་ཆེན་པོར་སྐུལ་ཁྲིད་བྱས་ནས་ཐོན་ལས་ཆེན་པོའི་ནང་གནས་འཕེལ་རྒྱས་ཀྱི་སྒུལ་ནུས་གསར་པ་འཕེལ་བར་བྱས་ཤིང་། ས་མཐོའི་ས་གཞི་ཆེ་མོར་བལྟས་ཚེ། རིག་གནས་ཡུལ་སྐོར་དང་། ནུས་རྒྱུ་གཙང་མ། ལྗང་མདོག་བཟོ་ལས། དེང་རབས་ཞབས་ཞུ། ས་མཐོའི་སྐྱེ་དངོས། མཐའ་མཚམས་ཚོང་དོན་ཟོག་འགྲེམས། མཐོ་གསར་གྲངས་གཞི་བཅས“ཐོན་ལས་ཆེན་པོ་བདུན”བརྟན་པོའི་ངང་འཕེལ་རྒྱས་ཕྱིན་ནས་མང་ཚོགས་དེ་བས་མང་བ་རང་འགུལ་ངང་དེའི་ནང་ཞུགས་ཏེ་མཐོང་རྒྱ་ཆེ་རུ་སོང་བ་དང་ལག་རྩལ་སྣ་གཅིག་ཤེས་ནས་སྣ་མང་ཕུན་སུམ་ཚོགས་པའི་མི་ཚེ་སྐྱེལ་འགོ་བརྩམས་ཡོད།

རྨང་གཞིའི་སྒྲིག་བཀོད་ནི་དམངས་འཚོ་ལེགས་སུ་གཏོང་བའི་དམ་འཛིན་བྱ་གཞི་གལ་ཆེན་ཞིག་རེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རྒྱུན་ཆད་མེད་པར་འཐུས་སྒོ་ཚང་དུ་ཕྱིན་པའི་རང་ལྗོངས་ཀྱི“ཆུ་གློག་ལམ་འཕྲིན་དྲ”ཡིས་དམངས་ཀྱི་ཕུགས་འདུན་འདུས་ནས་རེ་བའི་འོད་སྣང་འཕྲོས་པ་སྟེ།

བོད་དབུས་གློག་ཤུགས་དྲ་སྦྲེལ་དང་མངའ་རིས་གློག་ཤུགས་དྲ་སྦྲེལ་ལས་གྲྭ་བསྐྲུན་ཟིན་ནས་སྤྱོད་འགོ་ཚུགས་ཏེ་ཁྱིམ་ཚང་ཁྲི་སྟོང་མང་པོའི་གློག་སྒྲོན་ལས་མུན་སེལ་འོད་སྣང་འཕྲོས་ཡོད། འཕྲིན་གཏོང་དང་རླུང་འཕྲིན་བརྙན་འཕྲིན་གྱི་བརྡ་རྟགས་དང་གཅིག་སྡུད་ཆུ་མཁོ་འདོན་སྲིད་འཛིན་གྲོང་ཚོ་ཚང་མར་གཞི་རྩའི་ཆ་ནས་ཁྱབ་སྟེ་མི་སེར་གྱི་འཚོ་བར་སྟབས་བདེ་བསྐྲུན་ཡོད།

མྱུར་བགྲོད་གཞུང་ལམ་ལྷ་ས་དང་། ལྷོ་ཁ། ཉིང་ཁྲི། ནག་ཆུ་བཅས་སུ་ཤར་གཏོང་ཐུབ་པ་དང་། རྫོང་ཚང་མར་སྣུམ་ནག་ལམ་ཤར་གཏོང་ཐུབ་པ། ཤང་ཚང་མར་གཞུང་ལམ་ཤར་གཏོང་ཐུབ་ནས་དུད་ཚང་ཁྲི་སྟོང་མང་པོ་སྦྲེལ་མཐུད་བྱས་ཡོད།

ཁྲོན་བོད་ལྕགས་ལམ་གྱི་ལམ་ཐིག་ཧྲིལ་པོ་སྐྲུན་འགོ་ཚུགས་ནས་བསྐྱར་དར་རྟགས་ཅན་མཐུན་སྒྲིལ་ལམ་ཐིག་དང་བདེ་སྐྱིད་ལམ་བུ་བརྒྱུད་དེ་བྱ་འཕུར་བ་ལྟར་འཕུར་རྒྱུག་བྱེད་བཞིན་ཡོད།

རྒྱལ་ཁབ་ཕྱི་ནང་དུ་སྐྱོད་པའི་མཁའ་ལམ་152དང་མཁའ་ལམ་འབྲེལ་མཐུད་གྲོང་ཁྱེར་68ལས་ལམ་ཐིག་རིང་པོའི་བཀག་རྒྱ་ཡོངས་སུ་བསལ་ཡོད།

ལོ་བཅུ་པོ་འདིའི་རིང་ས་མཐོའི་བུ་ཕྲུག་གི་བདེ་སྐྱིད་སྟོན་གྲངས་རིམ་བཞིན་འཕར་བ།

“ད་ཆ་ཚང་མས་ཟས་གོས་ཐད་སེམས་ཁྲལ་བྱེད་དགོས་མེད། ཕྲུ་གུ་སློབ་གྲྭར་ཕྱིན་ན‘འགན་ལེན་གསུམ’གྱི་སྲིད་ཇུས་ལོངས་སུ་སྤྱོད་རྒྱུ་ཡོད་པ་དང་། སྨན་བཅོས་ཀྱི་འགྲོ་སོང་མང་ཆེ་བ་རྩིས་ཞུ་བྱེད་ཆོག་ལ་ཡོང་འབབ་གསོག་པའི་ཐབས་ལམ་ཡང་མང་དུ་འགྲོ་གི་འདུག”ཅེས་གཞིས་རྩེ་གྲོང་ཁྱེར་བཞད་མཐོང་སྨོན་རྫོང་རིན་ཆེན་རྩེ་ཤང་སྒོམ་སྡེ་གྲོང་ཚོའི་བགྲེས་སོང་མགོན་པོས་བཤད་པའི་སྐད་ཆ་འདི་ལས་ལོ་བཅུའི་རིང་རང་ལྗོངས་ཀྱི་དམངས་འཚོ་རྒྱུན་མཐུད་ལེགས་སུ་ཕྱིན་པའི་གྲུབ་འབྲས་དངོས་མཚོན་ཐུབ།

དམངས་ཀྱི་རེ་ལྟོས་ནི་སྲིད་ཀྱི་སྐྱོང་ཕྱོགས་ཡིན་ཞིང་། ལོ་བཅུའི་རིང་ལྗོངས་ཡོངས་ཀྱི་སྤྱིར་བཏང་གི་སྤྱི་པའི་སྔོན་རྩིས་ནང་། སློབ་གསོའི་གཏོང་སྒོ་སྒོར་དུང་ཕྱུར་164.6འཕར་བ་དང་། སྤྱི་ཚོགས་འགན་སྲུང་དང་ལས་ཞུགས་ཀྱི་གཏོང་སྒོ་སྒོར་དུང་ཕྱུར་128.5འཕར་བ། འཕྲོད་བསྟེན་བདེ་ཐང་གི་གཏོང་སྒོ་སྒོར་དུང་ཕྱུར་79.2འཕར་བ། གྲོང་ཁྱེར་དང་གྲོང་གསེབ་ཀྱི་སྡེ་ཁུལ་ལས་དོན་གྱི་གཏོང་སྒོ་སྒོར་དུང་ཕྱུར་75.3འཕར་ཡོད། གཏོང་སྒོ་རེ་རེ་ལས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དམངས་ལ་བདེ་སྐྱིད་སྐྲུན་པའི་ལྷག་བསམ་དང་ཆོད་སེམས་བརྒྱུད་སྤྲོད་བྱས་ཡོད།

དམངས་འཚོ་འགན་ལེན་དང་ལེགས་སུ་གཏོང་བར་ནམ་ཡང་ཚར་དུས་མེད་པས་རྒྱུན་ཆད་རྒྱུ་མེད་པར་འགོ་འཛུགས་ས་གསར་པ་གཏོད་དགོས།

2021ལོའི་ཟླ་11ཚེས་27ཉིན་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་ཐོག“འཛུགས་གཏོད་བཞིར”སྐུལ་འདེད་ཤུགས་ཆེན་བཏང་ནས“མདུན་གྲལ་དུ་སླེབས་པ་བཞི”ཧུར་ཐག་བྱེད་དགོས་ཞེས་བཏོན་ཡོད་། དེའི་ནང་དམངས་འཚོའི་བདེ་རྩར་ཐུག་པའི་གནད་དོན་དག་སྔར་བཞིན་བཀྲག་མདངས་འཚེར་བ་ཞིག་ཡོད། ང་ཚོས་མི་དམངས་མང་ཚོགས་ཀྱི་ཉེ་འགྲམ་དུ་ཐོན་པའི་དོན་ཆུང་དེ་ཐོག་མཐའ་བར་གསུམ་དུ་རང་ཉིད་ཀྱི་དོན་ཆེན་ལ་བརྩིས་ནས་དོན་དག་རེ་རེ་བཞིན་མུ་མཐུད་སྒྲུབ་པ་དང་ལོ་རེ་བཞིན་མུ་མཐུད་སྒྲུབ་པ་ཡིན་ན། མི་རིགས་ཁག་གི་མང་ཚོགས་ཀྱི་འཚོ་བ་སྔར་བས་དར་ཞིང་རྒྱས་པ་དང་བདེ་སྐྱིད་ལྡན་པར་འགྱུར་ངེས་རེད།