གཞི་རིམ་ཏང་རྩ་འཛུགས་ནི་ཏང་གི་ལས་དོན་ཧྲིལ་པོ་དང་འཐབ་འཛིང་ནུས་པའི་རྨང་གཞི་ཡིན་ལ། ཏང་གི་ལམ་ཕྱོགས་དང་མཛད་ཕྱོགས་སྲིད་ཇུས་དང་ལས་འགན་ཁག་དོན་འཁྱོལ་བྱེད་པའི་དམག་འཐབ་མཁར་རྫོང་ཡང་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ལྗོངས་ཡོངས་ཀྱི་རིམ་ཁག་ཏང་རྩ་འཛུགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་དང་། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་སློབ་སྦྱོང་དང་ལག་བསྟར། དུས་རབས་གསར་པའི་ཏང་འཛུགས་སྐྱོང་གི་སྤྱིའི་བླང་བྱ་དང་རྩ་འཛུགས་ཀྱི་ལམ་ཕྱོགས་ལྷག་བསམ་རྣམ་དག་ངང་ལག་བསྟར་བཅས་བྱས་ནས། གཞི་རིམ་ཏང་འཛུགས་སྐྱོང་ལས་དོན་དེ་གཞུང་འཁྱོངས་གསར་འབྱེད་དང་ལེགས་ཕྱོགས་ཡར་ཐོན་ཁྲོད་འཕེལ་རྒྱས་གསར་པ་ཡོང་བ་དང་ཚད་བརྒལ་གསར་པ་ཡོང་བ་བྱས་ཡོད་པ་རེད།

ལོ་བཅུའི་རིང་། ལྗོངས་ཡོངས་ཀྱི་རིམ་ཁག་ཏང་རྩ་འཛུགས་ཀྱིས་བསམ་བློ་ཆབ་སྲིད་འཛུགས་སྐྱོང་བྱ་རྒྱུ་དེ་ཨང་དང་པོར་འཇོག་རྒྱུ་མཐའ་འཁྱོངས་བྱས་ནས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱ་རྒྱུ་དེ་འགོ་ཁྲིད་ཚན་ཁག་གི་ཚོགས་འདུའི་གྲོས་གཞི་དང་པོ་དང་། ཏང་གི་སློབ་གྲྭའི་སློབ་ཚན་གཙོ་བོ། ཀྲི་པུའུ་ཡི་སློབ་སྦྱོང་གི་ནང་དོན་གཙོ་བོ། སྒེར་གྱི་སྦྱོང་དགོས་ངེས་ཀྱི་སློབ་ཚན་བཅས་སུ་བརྩི་བ་དང་། རང་སྐྱོང་ལྗོངས་ཀྱི་དཔེ་སྟོན་གསོ་སྦྱོང་དང་། གྲོང་ཁྱེར་དང་ས་གནས་ཀྱི་གཙོ་གནད་གསོ་སྦྱོང་། རྫོང་དང་ཆུས་ཀྱི་ཡོངས་ཁྱབ་གསོ་སྦྱོང་། ཤང་དང་གྲོང་རྡལ་གྱི་གསོ་སྦྱོང་བཅས་ཀྱི་བྱ་ཐབས་སྤྱད་དེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་རབ་དང་རིམ་པའི་དགོངས་དོན་དང་། ཏང་གི་ཚོགས་ཆེན་བཅོ་བརྒྱད་པ་དང་བཅུ་དགུ་པ་དང་དེ་བཞིན་ཐེངས་རིམ་བྱུང་གི་ཚང་འཛོམས་གྲོས་ཚོགས་ཀྱི་དགོངས་དོན་སོགས་ཀྱི་གསོ་སྦྱོང་གཏིང་ཟབ་སྤེལ་ཡོད། མིག་སྔའི་བར་ལྗོངས་ཡོངས་སུ་རིམ་རྩིས་བྱས་ན་ཏང་ཡོན་དང་ལས་བྱེད་པ་མི་ཐེངས་ཁྲི་610ལྷག་ཙམ་ལ་གསོ་སྦྱོང་བྱས་པ་རེད།

ལོ་བཅུའི་རིང་། ལྗོངས་ཡོངས་ཀྱི་རིམ་ཁག་ཏང་རྩ་འཛུགས་ཀྱིས་གཞི་རིམ་ལ་དམ་འཛིན་ཤུགས་ཆེན་བྱེད་པའི་མངོན་གསལ་དོད་པའི་ཕྱོགས་སྟོན་འཛུགས་རྒྱུ་མཐའ་འཁྱོངས་ཀྱིས། རྩ་འཛུགས་ཀྱི་མ་ལག་སྟོབས་ཆེར་གཏོང་བ་དང་གཞི་རིམ་གྱི་རྨང་གཞི་བརྟན་དུ་ཏན་ཏིག་བཏང་ནས། ཏང་རྩ་འཛུགས་ཀྱི་ཆབ་སྲིད་ཀྱི་འགོ་ཁྲིད་ནུས་པ་དང་། བསམ་བློའི་ཁྲིད་སྟོན་ནུས་པ། མང་ཚོགས་སྒྲིག་འཛུགས་ནུས་པ། སྤྱི་ཚོགས་ཀྱི་འབོད་སྐུལ་ནུས་པ་བཅས་ཟམ་མི་ཆད་པར་ཆེ་རུ་བཏང་ཡོད། བསྡོམས་རྩིས་བྱས་པར་གཞིགས་ན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་ལྗོངས་ཡོངས་སུ་ཏང་ནང་ཞུགས་མཁན་བློ་མཐུན་ཁྲི་17.8ཡོད་པ་དང་། 2021ལོའི་ལོ་མཇུག་བར་ལྗོངས་ཡོངས་ཀྱི་ཏང་ཡོན་བསྡོམས་འབོར་ཁྲི་43ལྷག་ཙམ་ཟིན་ཡོད་པ་རེད།

ཁྱབ་ཁོངས་ཁག་གི་གཞི་རིམ་ཏང་རྩ་འཛུགས་འཛུགས་སྐྱོང་གི་སྤུས་ཚད་ལེགས་གཏོང་དང་ཕན་འབྲས་ཆེར་གཏོང་ལ་སྐུལ་འདེད་གཏོང་ཆེད། ལོ་བཅུའི་རིང་རང་ལྗོངས་ཀྱིས་རྩ་འཛུགས་ཀྱི་ནུས་པ་ཆེ་རུ་གཏོང་རྒྱུ་གཙོ་གནད་དུ་བྱས་ནས་ཏང་གི་རྩ་འཛུགས་མ་ལག་འཛུགས་སྐྱོང་ལ་གཞི་གཅིག་ཏུ་སྐུལ་འདེད་བཏང་སྟེ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་དུ་གཏོང་བ་དང་། སྤྱི་ཚོགས་བརྟན་ལྷིང་སྲུང་སྐྱོང་བྱེད་པ། མང་ཚོགས་ཀྱི་སྣེ་ཁྲིད་དེ་ཕྱུག་འགྱུར་ཡོང་བ་བྱེད་པ། སྐྱེ་ཁམས་ཁོར་ཡུག་སྲུང་སྐྱོང་བྱེད་པ། མཐའ་མཚམས་བརྟན་སྲུང་བྱེད་པ། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་སྤེལ་བ་བཅས་ཀྱི་སྲ་ཞིང་བརྟན་པའི་དམག་འཐབ་མཁར་རྫོང་ཞིག་ཧུར་ཐག་བཏོད་ཡོད། ལས་རིགས་ཁག་གི་ཁྱབ་ཁོངས་ནང་རང་ལྗོངས་ཀྱིས་གཞི་རིམ་ཏང་འཛུགས་སྐྱོང་གི་དཔེ་སྟོན་ས་ཚིགས་100ཧུར་ཐག་བཏོད་དེ། རིམ་རྩིས་བྱས་ན་ཁྱབ་ཁོངས་ཁག་གི་ནུས་མེད་ཟབ་ཟོབ་ཀྱི་གཞི་རིམ་ཏང་རྩ་འཛུགས་4500ལྷག་ཙམ་ལ་དག་ཐེར་བྱས་ཡོད། ཞིང་འབྲོག་ཁུལ་དང་། གྲོང་ཁྱེར་གྱི་སྡེ་ཁུལ། ལས་ཁུངས་ཚན་པ། གཞུང་ཁོངས་ཁེ་ལས། བྱ་གཞག་ཚན་པ། དགོན་སྡེ་དོ་དམ་ཨུ་ལྷན། ལས་བྲལ་དང་རྒན་ཡོལ་ཞུ་མཁན་ཁྱབ་ཁོངས་སོགས་ཀྱི་ཏང་རྩ་འཛུགས་འཛུགས་སྐྱོང་ལ་སྐུལ་འདེད་གཏིང་ཟབ་བཏང་ནས། གཞི་རིམ་ཏང་རྩ་འཛུགས་ཀྱི་གྲངས་འབོར་དེ་2012ལོའི་ཁྲི་1.4ནས་2022ལོའི་ཁྲི་2.2བར་མང་དུ་ཕྱིན་པ་དང་། གྲོང་ཚོ(སྡེ་ཁུལ)“ཨུ་ལྷན་གཉིས”ཀྱི་ཚན་ཁག་གི་ཁོངས་མི་ཚང་མ་ཏང་ཡོན་ཡིན་པ། “གསར་གཉིས”རྩ་འཛུགས་ཀྱི་ཏང་རྩ་འཛུགས་དང་ལས་དོན་ཁྱོན་ཡོངས་ལ་ཁྱབ་པའི་འགག་སྒྲོལ་བྱ་སྤྱོད་སྤེལ་ནས། “ཡོད་པ་གསུམ”གྱི་ཚད་གཞི་དང་མཐུན་པའི་སྤྱི་དབང་མིན་པའི་ལམ་ལུགས་ཁེ་ལས་དང་རྒྱུན་གཏན་གྱི་བྱེད་སྒོ་སྤེལ་བའི་སྤྱི་ཚོགས་རྩ་འཛུགས་ལ་ཏང་རྩ་འཛུགས་ཁྱབ་ཚད་74.06%དང་97.54%སོ་སོར་ཟིན་པ་དང་། མཐའ་མཚམས་རྫོང་21ཏུ་དམག་དཔུང་དང་ས་གནས་ཀྱི་གཞི་རིམ་ཏང་རྩ་འཛུགས་ཀྱི“མཉམ་སྤེལ་ལྔ་དང་སྲ་བརྟན་ལྔའི”ཆ་སྒྲིག་མཉམ་སྐྲུན་བྱས་ནས། མཐའ་མཚམས་སྟོབས་ཆེར་དང་སྲ་བརྟན་དུ་གཏོང་བའི་མཉམ་ཤུགས་ཆེན་པོ་ཞིག་གཅིག་ཏུ་སྒྲིལ་ཡོད་པ་རེད།

གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་ཆེད། ལྗོངས་ཡོངས་ཀྱིས་རིམ་རྩིས་བྱས་ན་ལས་བྱེད་པ་ཁྲི་23ལྷག་ཙམ་ཁག་11ལ་བགོས་ནས་གྲོང་སྡོད་ལས་དོན་རུ་ཁག་གི་རུ་མི་དང་། ཧྲུའུ་ཅི་དང་པོ། འདེམས་གཏོང་སློབ་མ་བཅས་ལ་མངགས་པ་དང་། མཐོ་སློབ་སློབ་ཐོན་སློབ་མའི་ཁྲོད་གྲོང་གསེབ་དར་རྒྱས་སོགས་རིགས་ཁག་གི་ཆེད་བསྒོས་ལས་བྱེད་པ་ཁྲི་1.2ལྷག་ཙམ་བསྡུས་ཏེ་གཞི་རིམ་གྱི་འཐབ་ས་དང་པོའི་མི་སྣ་མང་དུ་བཏང་བ། མ་དངུལ་སྒོར་དུང་ཕྱུར་86.67བཏང་ནས་གྲོང་ཚོ་རིམ་པའི་རྩ་འཛུགས་ཀྱི་བྱེད་སྒོ་སྤེལ་ཡུལ་ཚད་གཞི་ཅན་དུ་བསྐྲུན་རྒྱུ་ཕྱོགས་ཡོངས་ནས་ལེགས་སྒྲུབ་བྱས་པ། གྲོང་ཚོ་རིམ་པའི་མཉམ་སྡེབ་དཔལ་འབྱོར་འཕེལ་རྒྱས་ཤུགས་ཆེན་བཏང་བ། “ཁོག་སྟོང་གྲོང་ཚོ”མེད་པ་ཧུར་ཐག་བཟོས་ཡོད། མིག་སྔར་ལྗོངས་ཡོངས་ཀྱི་སྲིད་འཛིན་གྲོང་ཚོ་5535ལ་མཉམ་སྡེབ་དཔལ་འབྱོར་ཡོད་པ་དེས་99.89%བཟུང་ཡོད་པ་རེད།

2021ལོར་ཏང་དབུ་བརྙེས་ནས་ལོ་ངོ་100འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བའི་མཚམས་སུ། རིམ་པ་བཞིན་འདེམས་སྒྲུག་བྱས་པ་བརྒྱུད་རང་ལྗོངས་ཀྱི་ཏང་ཡོན་གཅིག་ལ“བདུན་གཅིག་བྱས་རྗེས་གཟེངས་རྟགས”ཐོབ་པ་དང་། ཏང་ཡོན་5དང་། ཏང་དོན་ལས་དོན་པ་2 གཞི་རིམ་ཏང་རྩ་འཛུགས་5བཅས་ལ་རྒྱལ་ཡོངས་ཀྱི“ཕུལ་བྱུང་གཉིས་དང་སྔོན་ཐོན་གཅིག”གི་གཟེངས་བསྟོད་ཐོབ་ཡོད། དུས་མཚུངས་རང་ལྗོངས་ཀྱིས་ད་དུང“ཕུལ་བྱུང་གསུམ་དང་སྔོན་ཐོན་གཅིག”གི་གཟེངས་བསྟོད་ལས་དོན་ཧུར་ཐག་སྤེལ་ནས། ཆ་རྐྱེན་འཛོམས་པའི་ཏང་ཡོན་རྒན་གྲས་ལ“ཏང་ནང་གི་གཟི་བརྗིད་ལྡན་པའི་ལོ་ངོ་50”ཡི་དྲན་རྟེན་རྟགས་མ་སྤྲད་ཡོད། 2021ལོར་ལྗོངས་ཡོངས་སུ་ཁྱོན་སྔོན་ཐོན་གཞི་རིམ་ཏང་རྩ་འཛུགས་3000དང་། ཕུལ་བྱུང་གུང་ཁྲན་ཏང་ཡོན་8000 ཕུལ་བྱུང་ཏང་དོན་ལས་དོན་པ་4000བཅས་ལ་གཟེངས་བསྟོད་ཐོབ་ཡོད་པ་རེད།