“ཏང་གི་ཚོགས་ཆེན་ཉི་ཤུ་པའི་འཐུས་མིར་བདམས་ཐོན་བྱུང་བས་གཟི་བརྗིད་དང་སྤོབས་པ་ཆེན་པོ་སྐྱེ་གི་འདུག དེ་ནི་ངས་སློབ་གསོའི་ལས་ཀ་ལོ་28བྱས་པར་ཁས་ལེན་ཞིག་རེད་ལ་ལྕག་སྐུལ་ཞིག་ཀྱང་རེད། ངས་སྔར་བས་འབད་བརྩོན་བྱས་ཏེ་ནག་ཆུ་གྲོང་ཁྱེར་གྱི་དམིགས་བསལ་སློབ་གསོའི་བྱ་གཞག་ལ་འཕེལ་རྒྱས་གསར་པ་ཡོང་བར་རང་ནུས་ཡོད་རྒུ་འདོན་རྒྱུ་ཡིན”ཞེས་ཏང་གི་ཚོགས་ཆེན་ཉི་ཤུ་པའི་འཐུས་མི་དང་ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭའི་སློབ་སྤྱི་ཚེ་རིང་ལྷ་མོས་སེམས་འགུལ་ཆེན་པོ་ཐེབས་བཞིན་དུ་བཤད།

1994ལོར་བོད་ལྗོངས་མི་རིགས་སློབ་ཆེན(དེ་སྔའི་བོད་ལྗོངས་མི་རིགས་སློབ་གླིང)ནས་ཐོན་པ་དང་། དང་ཐོག་མའི་སློབ་འབྲིང་གི་དགེ་རྒན་དཀྱུས་མ་ཞིག་ནས་ནག་ཆུ་གྲོང་ཁྱེར་གྱི་བུ་བཅོལ་ཁང་དང་པོའི་ཧྲུའུ་ཅི་དང་། དེ་ནས་ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭའི་སློབ་སྤྱི་བཅས་ཀྱི་བར་ཚེ་རིང་ལྷ་མོས་སློབ་ཁྲིད་བྱས་ནས་བགྲང་བྱ་28སོང་ཡོད།

ཚེ་རིང་ལྷ་མོ་དང་དམིགས་བསལ་སློབ་གསོའི་དབར་2003ལོའི་སྒྲོག་འགྲེལ་སྙན་ཞུའི་ཚོགས་འདུ་ཞིག་ནས་ལས་འབྲེལ་བྱུང་ཞིང་། སྐབས་དེ་དུས་ཀྱི་ལྷ་ས་གྲོང་ཁྱེར་དམིགས་བསལ་སློབ་གསོའི་སློབ་གྲྭའི་སློབ་སྤྱིས་དམིགས་བསལ་སློབ་གསོའི་སློབ་ཁྲིད་ཀྱི་འདུ་ཤེས་མཉམ་སྤྱོད་བྱས་པ་ལས་ཁོང་ལ་སེམས་འགུལ་ཆེན་པོ་ཐེབས། དམིགས་བསལ་སློབ་གསོར་དགའ་ཞེན་ཆེ་བའི་དབང་གིས་2013ལོའི་དགུན་ཁའི་གུང་གསེང་ལ་ནག་ཆུ་དམིགས་བསལ་སློབ་གསོའི་སློབ་གྲྭའི་སློབ་སྤྱིར་བསྐོ་གཞག་བྱེད་སྐབས་ཁོང་གིས་ཐེ་ཚོམ་སྤུ་ཙམ་ཡང་མེད་པར་འགན་འཁྲི་དང་དུ་བླངས། འོན་ཀྱང་ལས་གནས་སུ་འཁོད་རྗེས། སློབ་མ་ཇི་ལྟར་བསྡུ་བ་ནི་ཁོང་གི་མདུན་དུ་འཕྲད་པའི་དཀའ་གནད་ཆེ་ཤོས་དེ་རེད།

ནག་ཆུ་གྲོང་ཁྱེར་ནི་ས་རྒྱ་ཆེ་ལ་མི་འབོར་ཉུང་བས་སློབ་མ་ཉུང་བའི་ཁར་ཁྱིམ་བདག་གིས་ཀྱང་དམིགས་བསལ་སློབ་གསོར་ལྟ་སྟངས་ཡག་པོ་མེད། དབང་པོ་སྐྱོན་ཅན་གྱི་བྱིས་པ་ཚང་མར་སློབ་གསོ་ཐོབ་པའི་གོ་སྐབས་མི་ཤོར་བ་བྱ་ཆེད། ཚེ་རིང་ལྷ་མོས་སློབ་གྲྭ་མ་འཚོག་གོང་གི་ཟླ་གཉིས་ཙམ་ནས་ནག་ཆུ་གྲོང་ཁྱེར་ཉེ་འཁོར་གྱི་རྫོང་དང་། ཤང་གྲོང་། གྲོང་ཚོ་བཅས་ཚང་མར་བསྐྱོད་ནས་དུད་ཚང་དུ་ཤ་ཚའི་ཁ་ཏ་བསླབ་བྱ་མང་པོ་བྱས་པ་བརྒྱུད་དབང་པོ་སྐྱོན་ཅན་གྱི་བྱིས་པ་60སློབ་གྲྭར་བསྡུ་ཐུབ་པ་རེད། བྱིས་པ་དེ་དག་བདེ་ཐང་ངང་འཚར་ལོངས་དང་སྦྱངས་པར་གྲུབ་འབྲས་ཐོབ་པའི་སླད་དུ། ཚེ་རིང་ལྷ་མོས་གསར་གཏོད་རང་བཞིན་གྱི་སྒོ་ནས་གཅིག་སྡུད་སློབ་ཁྲིད་དང་། བདེ་ཐང་དྲག་སྐྱེད་སྦྱོང་བརྡར། ལས་རིགས་སློབ་གསོ་བཅས“ཕྱོགས་གསུམ་གཞི་གཅིག”གི་སློབ་གཉེར་བྱེད་སྟངས་བཏོན་ཞིང་། སྔ་དྲོ་རྒྱལ་ཁབ་སློབ་ཚན་གྱི་ཚད་གཞི་ལྟར་རིག་གནས་སློབ་ཚན་བཀོད་སྒྲིག་བྱེད་པ་དང་། ཕྱི་དྲོ་བྱེ་བྲག་ཅན་གྱི་སློབ་ཁྲིད་འཆར་གཞི་དང་བདེ་ཐང་སླར་གསོའི་སྦྱོང་བརྡར་བྱེད་པ་མ་ཟད། ལོ་ན་ཆེ་བའི་ཕྲུ་གུར་འཁེལ་འཐག་འཛིན་གྲྭ་དང་། འཚེམ་བཟོའི་འཛིན་གྲྭ། ཁ་གདན་འཛིན་གྲྭ། སྲོ་སྐམ་འཛིན་གྲྭ། རྫ་བཟོའི་འཛིན་གྲྭ་སོགས་ལས་རིགས་སློབ་གསོའི་སློབ་ཚན་བཀོད་སྒྲིག་བྱེད་ཀྱི་ཡོད། ལོ་དེ་དག་གི་སློབ་གསོའི་ལག་ལེན་བརྒྱུད། སློབ་གྲྭའི་དབང་པོ་སྐྱོན་ཅན་སློབ་མ་ཚོས་ལག་རྩལ་སྣ་གཅིག་དང་འཚོ་བའི་འཇོན་ཐང་ཤེས་ནས་རང་བརྟེན་ལས་གཏོད་དང་ལས་ཞུགས་ལ་རྩལ་ནུས་ཀྱི་འདེགས་སྐྱོར་ཐུབ་པ་མ་ཟད། ད་དུང་རང་ཉིད་ཀྱི་གཟུགས་པོའི་ཞན་ཆར་ཡང་ལྟ་སྟངས་ཡང་དག་བཟུང་ནས་དཀའ་ངལ་སྣ་ཚོགས་ཁྱད་བསད་ཧུར་ཐག་བྱས་པས་འབྱུང་འགྱུར་གྱི་འཚོ་བར་གདེང་ཚོད་ཀྱིས་ཁེངས་ཡོད། མིག་སྔའི་བར་སློབ་གྲྭར་ལས་ཞུགས་ལས་གཏོད་དང་། གྲལ་སྡོད་མཉམ་སྦྱོང་། སློབ་རིམ་འཕར་བ་བཅས་ཀྱི་སློབ་མ་65ཡོད་པ་དང་སློབ་མ་17རྒྱལ་ཡོངས་ཀྱི་དམིགས་བསལ་ཨོ་རྩལ་འགྲན་ཚོགས་སྐབས་གཉིས་ལ་ཞུགས་མྱོང་ཡོད་པ་རེད།

ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭ་བཙུགས་ནས་ད་བར་ལོ་བཅུ་ཡང་ཟིན་གྱི་མེད་མོད། འོན་ཀྱང་སྲིད་ཇུས་ཀྱི་ཤར་རླུང་ལ་བརྟེན་ནས་ཚེ་རིང་ལྷ་མོས་དམིགས་བསལ་སློབ་གསོའི་བྱ་གཞག་ལ་འབད་འབུངས་བྱས་ཏེ་ས་གནས་ཀྱི་ཁྱད་ཆོས་ལྡན་པའི་སློབ་གསོར་བརྟེན་ནས་དབང་སྐྱོན་ལ་རོགས་རམ་དང་སློབ་གསོར་བརྟེན་ནས་དབུལ་སྐྱོར་བྱེད་པའི་ལམ་བུར་བསྐྱོད་དེ་གངས་ལྗོངས་ས་མཐོར་དམིགས་བསལ་སློབ་གསོའི་བྱ་གཞག་གི་ཕུགས་འདུན་དོན་གཉེར་བྱེད་པའི་གཟུགས་བརྙན་བཟང་པོ་ཞིག་བཏོད་ཡོད།