ཟླ་9ཚེས་30ཉིན་གྱི་ཕྱི་དྲོ། རང་སྐྱོང་ལྗོངས་སྲིད་གཞུང་གསར་འགྱུར་གཞུང་དོན་ཁང་གིས་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གསར་འགྱུར་ཡོངས་བསྒྲགས་ཚོགས་འདུ་ཐེངས་ང་གསུམ་པ་འཚོགས་ནས་རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གནས་ཚུལ་གསར་ཤོས་བརྡ་ཁྱབ་བཏང་བ་དང་། ཚོང་དོན་ཁོངས་གཏོགས་ཀྱིས་འཚོ་བའི་མཁོ་ཟོག་མཁོ་སྤྲོད་འགན་ལེན་དང་། ཁྲོམ་རའི་ཟོག་གོང་བརྟན་པོ་ཡོང་བ། ལས་ཐོན་བསྐྱར་ཚུགས་ལ་སྐུལ་འདེད་བཅས་བྱས་པའི་གནས་ཚུལ་ངོ་སྤྲོད་བྱས་པ་རེད།

བོད་རང་སྐྱོང་ལྗོངས་སྲིད་གཞུང་གི་གསར་འགྱུར་མགྲིན་ཚབ་པ་སྲིད་གཞུང་གི་དྲུང་ཆེ་གཞོན་པ་བསྟན་འཛིན་ལྷུན་གྲུབ་ཀྱིས་ངོ་སྤྲོད་བྱས་པར་གཞིགས་ན། ཟླ་9ཚེས་29ཉིན་གྱི་ཆུ་ཚོད་0ནས་24བར་ལྗོངས་ཡོངས་སུ་ཏོག་གསར་གློ་ཚད་ཕོག་པའི་ཡུལ་དེ་རང་གི་གཏན་འཁེལ་ནད་པ་6(ལྷ་ས་གྲོང་ཁྱེར་ནས་སྙན་སེང་ཞུས་པ)མང་དུ་ཕྱིན་པ་དང་། རྟགས་མེད་ནད་དུག་འགོས་པ་66(ལྷ་ས་གྲོང་ཁྱེར་ལ་60དང་། གཞིས་རྩེ་གྲོང་ཁྱེར་ལ་2 ནག་ཆུ་གྲོང་ཁྱེར་ལ་4)མང་དུ་ཕྱིན་ཡོད་པ་རེད།

ཟླ་9ཚེས་30ཉིན་གྱི་ཆུ་ཚོད་0ནས་14བར། ལྗོངས་ཡོངས་སུ་ཏོག་གསར་གློ་ཚད་ཕོག་པའི་ཡུལ་དེ་རང་གི་གཏན་འཁེལ་ནད་པ་ཐོན་མེད་པ་དང་། རྟགས་མེད་ནད་དུག་འགོས་པ་19(ལྷ་ས་གྲོང་ཁྱེར་ལ་18དང་། གཞིས་རྩེ་གྲོང་ཁྱེར་ལ་1)མང་དུ་ཕྱིན་ཡོད་པ་རེད།

ཟླ་9ཚེས་29ཉིན་གྱི་ཆུ་ཚོད་24བར། ལྗོངས་ཡོངས་སུ་ཁྱོན་ཉེན་ཁ་ཆེ་བའི་ཁུལ་2དང་ཉེན་ཁ་འབྲིང་བའི་ཁུལ་47ཡོད་པ་རེད།

ཟླ་9ཚེས་29ཉིན་ཏོག་གསར་ནད་དུག་འགོས་པ་72མང་དུ་ཕྱིན་པ་དེ་དག་ཚང་མ་ལོགས་བཀར་དོ་དམ་ཚོད་འཛིན་ཁུལ་ནས་ཤེས་རྟོགས་བྱུང་བ་ཤ་སྟག་ཡིན་པ་རེད།

ཟླ་9ཚེས་29ཉིན་གྱི་ཆུ་ཚོད་24བར། ལྗོངས་ཡོངས་སུ་ནད་པ་3974དྲག་སྐྱེད་བྱུང་སྟེ་སྨན་ཁང་ནས་དོན་པ་དང་། ཐད་འབྲེལ་པ་105505ལ་གཅིག་སྡུད་ལོགས་བཀར་གྱི་ལྟ་ཞིབ་བྱེད་མཚམས་བཞག་པ་རེད། མིག་སྔར། མི་གྲངས་34006ལ་གཅིག་སྡུད་ལོགས་བཀར་གྱི་ལྟ་ཞིབ་བྱེད་བཞིན་ཡོད་པ་རེད།

རང་སྐྱོང་ལྗོངས་ཚོང་དོན་ཐིང་ཏང་ཙུའུ་ཡི་ཁོངས་མ་ཐིང་ཀྲང་གཞོན་པ་ཀུའོ་ཁའེ་ཡིས་ངོ་སྤྲོད་བྱས་དོན། རིམས་ནད་ཐོན་རྗེས། ལྗོངས་ཡོངས་ཀྱི་རིམ་ཁག་ཚོང་དོན་སྡེ་ཚན་གྱིས་བློ་གཅིག་སེམས་གཅིག་ངང་མང་ཚོགས་ལ་ཞབས་འདེགས་ཞུ་རྒྱུ་དེ་འགོ་འཛུགས་ས་དང་དོན་ལ་བབས་སར་བརྩིས་ནས་དུས་ཐོག་ཏུ་འགོ་ཁྲིད་ཚོགས་ཆུང་ལེགས་སྒྲིག་དང་འཐུས་ཚང་དུ་གཏོང་བ་དང་། ལས་ཀའི་ཆེད་དམིགས་ཚོགས་ཆུང་འཛུགས་པ། ལས་ཀའི་འགན་འཁྲི་ནན་དུ་གཏོང་བ། ཞིང་ཆེན་དང་རང་སྐྱོང་ལྗོངས་བརྒྱད་ཀྱི་མཉམ་འབྲེལ་འགན་ལེན་དང་མཁོ་སྤྲོད་ཀྱི་ལམ་སྲོལ་ལག་ལེན་བསྟར་བ་བཅས་ལྗོངས་ཡོངས་ཀྱི་ཚོང་དོན་ཁོངས་གཏོགས་ཀྱིས་ཐུན་མོང་ཐོག་འབད་བརྩོན་བྱས་པ་བརྒྱུད། བཙོང་རྒྱུ་མི་ཆད་པ་དང་། ཁྲོམ་ར་བརྟན་པོའི་ངང་འཁོར་སྐྱོད། ཟོག་གོང་སྙོམས་པོ་བཅས་ཀྱི་དམིགས་ཚད་ལས་འགན་ཁྱོན་ཡོངས་ནས་མངོན་འགྱུར་བྱུང་ཡོད།

ཀུའོ་ཁའེ་ཡིས་བརྗོད་དོན། རྒྱལ་སྟོན་གྱི་གུང་གསེང་འཆར་ཉེའི་མཚམས་སུ། དུས་ཆེན་རིང་གི་ཁྲོམ་ར་བརྟན་པོ་ཡོང་བའི་འགན་ལེན་བྱས་ཏེ་འཆམ་མཐུན་གྱི་སྤྱི་ཚོགས་ཁོར་ཡུག་ཅིག་སྐྲུན་ཆེད། ལྗོངས་ཡོངས་ཀྱི་ཚོང་དོན་ཁོངས་གཏོགས་ཀྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་གཅིག་གྱུར་བཀོད་སྒྲིག་གཞིར་བཟུང་། “ཕྱོགས་བཞིའི་འགན་འཁྲི”དོན་འཁྱོལ་ཏན་ཏིག་བྱས་ནས་འཚོ་བའི་མཁོ་ཟོག་མཁོ་སྤྲོད་འགན་ལེན་ཡག་པོ་བྱེད་པ་དང་། ཁེ་ལས་ལ་རོགས་སྐྱོར་དང་དཀའ་ངལ་སེལ་རོགས་བྱེད་པའི་སྲིད་ཇུས་ཀྱི་བྱ་ཐབས་དོན་འཁྱོལ་བྱེད་པ། ལྗོངས་ཡོངས་སུ་གོ་རིམ་ལྡན་པའི་ངང་ཚོང་ཁྲོམ་བསྐྱར་ཚུགས་ཡོང་བར་རོགས་རམ་བྱེད་པ། ཀྲུང་དབྱང་གི་གྲབས་གསོག་ཤ་དམངས་ཕན་མཁོ་སྤྲོད་བྱེད་སྒོ་སྒྲིག་འཛུགས་བྱེད་པ། འཛད་སྤྱོད་ལ་སྐུལ་འདེད་གཏོང་བའི་བྱེད་སྒོ་དུས་ཐོག་ཏུ་སྤེལ་བ་བཅས་བྱས་ནས་མང་ཚོགས་ཀྱི་དགོས་མཁོ་ཏན་ཏིག་བསྐངས་ཏེ་ཚང་མར་ཕན་པ་དངོས་ཐོབ་པ་བྱ་རྒྱུ་ཡིན།

བོད་ཀྱི་ཞིང་འབྲོག་ནགས་གསུམ་གྱི་ཐོན་རྫས་བྲིན་ཚོང་གི་འབྲེལ་ཡོད་གནད་དོན་ཐད། ཀུའོ་ཁའེ་ཡིས་རིམས་ནད་ཀྱི་ཤུགས་རྐྱེན་ཕོག་པར་བརྟེན་ལྗོངས་ཡོངས་ཀྱི་ཞིང་འབྲོག་ཐོན་རྫས་ཁག་གཅིག་ལ་ཐོན་སྐྱེད་དང་བྲིན་ཚོང་འབྲེལ་མཐུད་ཡག་པོ་མ་བྱུང་བ་དང་བྲིན་ཁ་མི་རྒྱུག་པའི་གནས་ཚུལ་ཐོན་ཡོད། དེར་བརྟེན་རང་སྐྱོང་ལྗོངས་མཁོ་འཚོང་མཉམ་ལས་ཁང་གིས་བཀོད་སྒྲིག་ཧུར་ཐག་དང་རིམ་ཁག་མཁོ་འཚོང་མཉམ་ལས་ཁང་གིས་བྲིན་ཚོང་ཐབས་ལམ་གྱི་ལེགས་ཆ་འདོན་སྤེལ་གང་ལེགས་བྱས་ཏེ་འབྲེལ་ལམ་ཧུར་ཐག་བཙུགས་ནས་ཞིང་འབྲོག་ཐོན་རྫས་ལ་ཚོང་ལམ་ཡོད་པ་དང་ཞིང་འབྲོག་མང་ཚོགས་ཀྱི་བདེ་རྩར་ཐུག་པའི་ཁེ་ཕན་འགན་སྲུང་བྱས་ཡོད། “དབུལ་སྒྲོལ་ས་ཁུལ་གྱི་ཞིང་ཞོར་ཐོན་རྫས་དྲ་རྒྱའི་བྲིན་ཚོང་ལས་སྟེགས”(“832ལས་སྟེགས”)ལ་བརྟེན་ནས་དབུལ་སྒྲོལ་ས་ཁུལ་ལ་ཞིང་ཞོར་ཐོན་རྫས་འཚོང་རོགས་བྱས་ཏེ་ཞིང་འབྲོག་པའི་གྱོང་གུན་ཆུང་དུ་བཏང་ཞིང་། ཟླ་8པ་ནས་9པའི་བར་ཁྱོན་ཚོང་འགྲིག་ཚད་སྒོར་ཁྲི་339.97ཟིན་ཡོད་པ་རེད། དེས་མ་ཚད་ལྗོངས་ཡོངས་ཀྱི་མཁོ་འཚོང་མཉམ་ལས་ཁང་ཁོངས་གཏོགས་ཀྱི་ལས་བྱེད་ལས་བཟོ་ཚོས་ཀྱང་རིམས་འགོག་གི་མཁོ་སྤྲོད་འགན་ལེན་དང་སྡེབ་སྐྱེལ་གྱི་འཐབ་ས་དང་པོར་ཧུར་ཐག་ཞུགས་ཏེ་ལྗོངས་ཡོངས་ཀྱི་རིམས་འགོག་སྤྱི་ཡོངས་ལ་ཞབས་འདེགས་ཞུས་ཡོད་ཅེས་བརྗོད་པ་རེད།