རིམས་ནད་ཐོན་ཚུན། ཆབ་མདོ་གྲོང་ཁྱེར་མི་སྤྱི་ཅུས་ཀྱིས“ཁུར་པོ་ཡང་གཏོང་དང་། ལས་གནས་བརྟན་གཏོང་། ལས་ཞུགས་རྒྱ་ཆེར་གཏོང་བ”བཅས་ལ་མུ་མཐུད་ནུས་ཤུགས་བཏོན་ནས་ཁེ་ལས་ལ་རིམས་ནད་སྔོན་འགོག་དང་ཚོད་འཛིན་ལས་དོན་ཡག་པོ་སྒྲུབ་རོགས་བྱེད་པ་དང་ཆབས་ཅིག་གང་མགྱོགས་ལས་འགོ་བསྐྱར་ཚུགས་དང་ཐོན་སྐྱེད་སླར་གསོ་ཐུབ་པར་བྱས་ནས་གྲོང་ཁྱེར་ཡོངས་ཀྱི་ལས་ཞུགས་དུས་བབ་སྤྱི་ཡོངས་བརྟན་པོ་ཡོང་བའི་འགན་ལེན་བྱས་ཡོད།

ཤེས་རྟོགས་བྱུང་བར་གཞིགས་ན། ཁེ་ལས་ཀྱི་ཁུར་པོ་སྔར་བས་ཡང་དུ་བཏང་ནས་ཚོང་གཉེར་གྱི་ཁོར་ཡུག་ལེགས་སུ་གཏོང་ཆེད། ཆབ་མདོ་གྲོང་ཁྱེར་མི་སྤྱི་ཅུས་ཀྱིས《བོད་རང་སྐྱོང་ལྗོངས་ཀྱིས་དུས་མཚམས་རང་བཞིན་གྱི་སྒོ་ནས་སྤྱི་ཚོགས་འགན་བཅོལ་གྱི་འགྲོ་གྲོན་ཆག་ཡང་དང་རྩ་ཆག་གཏོང་བའི་ལག་བསྟར་བྱ་ཐབས》དང《དུས་མཚམས་རང་བཞིན་གྱི་སྒོ་ནས་སྤྱི་ཚོགས་འགན་བཅོལ་གྱི་གྲོན་དངུལ་འཇལ་ཚད་མུ་མཐུད་ཉུང་དུ་གཏོང་རྒྱུའི་སྐོར་གྱི་བརྡ་ཐོ》སོགས་སྲིད་ཇུས་རབ་དང་རིམ་པ་དོན་འཁྱོལ་ཧུར་ཐག་བྱས་ཤིང་། མིག་སྔའི་བར། ཁེ་ལས་1226ལ་ལས་ཤོར་འགན་བཅོལ་གྱི་གྲོན་དངུལ་སྒོར་ཁྲི་1432.91དམའ་རུ་བཏང་བར་མི་43011ལ་ཕན་པ་ཐོབ་པ་དང་། ཁེ་ལས་1382ལ་ལས་རྨས་འགན་བཅོལ་གྱི་གྲོན་དངུལ་སྒོར་ཁྲི་652.87དམའ་རུ་བཏང་བར་མི་58939ཙམ་ལ་ཕན་པ་ཐོབ་ཡོད་པ་རེད།

ལས་གནས་བརྟན་གཏོང་གི་སྲིད་ཇུས་ཐད། ཅུས་དེས་སྤྱི་ཚོགས་འགན་བཅོལ་ལ་བརྟེན་ནས་ཁེ་ལས་ཀྱི་དཀའ་ངལ་སེལ་རོགས་བྱེད་པའི་སྲིད་ཇུས་དོན་འཁྱོལ་ནན་པོ་བྱས་ཏེ་ལས་མི་ཉུང་འཕྲི་དང་ཆ་རྐྱེན་དང་འཚམ་པའི་ཁེ་ལས་ལ་གཏན་འབེབས་ལྟར་ལས་གནས་བརྟན་གཏོང་གི་མ་དངུལ་ཕྱིར་སློག་བྱས་པ་དང་ཁེ་ལས་ལ་རོགས་སྐྱོར་དང་ལས་གནས་བརྟན་གཏོང་གི་སྲིད་ཇུས་ཀྱི་ཁྱབ་རྒྱ་ཆེ་རུ་བཏང་ཡོད། མིག་སྔའི་བར་ཁེ་ལས་2ལ་སྤྱི་ཚོགས་འགན་བཅོལ་གྱི་གྲོན་དངུལ་འཇལ་རྒྱུ་ནར་འགྱངས་ཀྱི་འགྲོ་ལུགས་གཉེར་བ་དང་མི་206ལ་གྲོན་དངུལ་འཇལ་རྒྱུ་ནར་འགྱངས་བྱས་པ་དེ་མ་དངུལ་སྒོར་ཁྲི་68.13དང་འབྲེལ་བ་ཡོད་པ་དང་། ཆ་རྐྱེན་དང་འཚམ་པའི་ཁེ་ལས་39ལ་ལས་གནས་བརྟན་གཏོང་གི་མ་དངུལ་སྒོར་ཁྲི་175.51སློག་ཡོད་པ་རེད།

དེ་དང་ཆབས་ཅིག་ཆབ་མདོ་གྲོང་ཁྱེར་མི་སྤྱི་ཅུས་ཀྱིས་ལས་ཞུགས་ཞབས་ཞུ་ཧུར་ཐག་བསྒྲུབས་ཏེ་དྲ་ཐོག་གདན་ཞུའི་ལས་དོན་སྤེལ་ནས་ལས་ཞུགས་བརྟན་པོ་ཡོང་བར་བྱེད་པའི་སྲིད་ཇུས་ཁ་གསབ་སྣ་ཚོགས་ཕྱོགས་ཡོངས་ནས་དོན་འཁྱོལ་བྱས་པར་མིག་སྔར་རིམ་རྩིས་བྱས་ན་རིགས་ཁག་གི་ལས་ཞུགས་ལས་གཏོད་ཀྱི་ཁ་གསབ་མ་དངུལ་སྒོར་ཁྲི་1111.56སློག་པར་མི་330ལ་ཕན་པ་ཐོབ་ཡོད་པ་རེད།