ཟླ་9ཚེས་25ཉིན། བོད་རང་སྐྱོང་ལྗོངས་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གསར་འགྱུར་ཡོངས་བསྒྲགས་ཚོགས་འདུ་ཐེངས་ཞེ་བརྒྱད་པར། བོད་རང་སྐྱོང་ལྗོངས་རིམས་ནད་སྔོན་འགོག་དང་ཚོད་འཛིན་གྱི་རིགས་གཅིག་མཁས་ཅན་ཚོགས་ཆུང་གི་ཁོངས་མི་དང་། རང་སྐྱོང་ལྗོངས་ནད་ཡམས་སྔོན་འགོག་དང་ཚོད་འཛིན་ལྟེ་གནས་ཀྱི་ཀྲུའུ་རེན་གཞོན་པ་ཀྲུའུ་རེན་སྨན་པ་དཀའ་བཅུ་པ་ཧོའུ་ཕེ་པིན་གྱིས། འགོག་རྫས་བརྟག་དཔྱད་ཚད་ལྡན་ཇི་ལྟར་བྱེད་པ་དང་། བརྟག་དཔྱད་བྱས་རྗེས་ཀྱི་སྙིགས་རོ་གཙང་མ་ཇི་ལྟར་བཟོ་དགོས་པ་སོགས་ཀྱི་གནད་དོན་ལ་དམིགས་ནས་འགྲེལ་བཤད་ཞིབ་ཕྲ་བརྒྱབ་པ་རེད།
འགོག་རྫས་བརྟག་དཔྱད་ནི་མིག་སྔའི་ཉིང་སྐྱུར་བརྟག་དཔྱད་ཀྱི་རམ་འདེགས་ཤིག་ཡིན་པའི་ཆ་ནས། བཀོལ་སྤྱོད་བྱ་ཡུལ་དང་ཁྱབ་ཁོངས་ཇེ་ཆེར་འགྲོ་བཞིན་ཡོད། འོན་ཀྱང་འགོག་རྫས་བརྟག་དཔྱད་ནི་སྤྱིར་ན་མང་ཚོགས་སོ་སོས་རང་ལ་བརྟག་དཔྱད་བྱེད་པ་ཞིག་ཡིན་པ་དང་། བརྟག་དཔྱད་བྱེད་སྟངས་ཚད་དང་ལྡན་མིན་དེས་ཐད་ཀར་འགོག་རྫས་བརྟག་དཔྱད་བྱས་འབྲས་ཡང་དག་མིན་ལ་ཤུགས་རྐྱེན་ཐེབས་ཀྱི་ཡོད།
ཧོའུ་ཕེ་པིན་གྱིས་རྒྱ་ཆེའི་གྲོང་མིར་འགོག་རྫས་བརྟག་དཔྱད་བྱེད་སྐབས་གཤམ་གསལ་གྱི་བཀོལ་སྤྱོད་དོན་ཚན་ཁག་ལ་དོ་སྣང་བྱེད་དགོས་པའི་དྲན་སྐུལ་བྱས་པ་སྟེ།
གཅིག་ནས་བརྟག་དཔྱད་མ་བྱས་གོང་། ངེས་པར་དུ་བེད་སྤྱོད་གཏོང་སྟངས་ཀྱི་གསལ་བཤད་ཡི་གེ་ནན་ཏན་ཀློག་པ་དང་། དེ་རྗེས་གསལ་བཤད་ཡི་གེའི་ནང་དོན་ལ་ནན་པོར་གཞིགས་ཏེ། བེད་སྤྱོད་བྱེད་པ་དང་ཆབས་ཅིག བརྟག་དཔྱད་ཚོད་ལྟའི་སྨན་རྫས་ཀྱི་གོ་སྤྱོད་དུས་ཡུན་ཡོལ་མིན་ལ་ཡག་པོ་ལྟ་དགོས།
གཉིས་ནས་བརྟག་དཔྱད་མ་བྱས་གོང་། ཆུ་ཀ་ལའི་འོག་ཏུ་ལག་པ་འཁྲུད་པའམ་ཡང་ན་དུག་སེལ་གཤེར་ཁུས་ལག་པར་དུག་སེལ་བྱེད་དགོས།
གསུམ་ནས་སྣ་ཁུང་ནས་མ་དཔེ་ལེན་སྐབས། སྣ་ཁུང་གི་ཨི་ཁུང་གཉིས་ཀ་ནས་ལེན་དགོས་ཤིང་། དེའང་སྔོན་ལ་གཙང་ཤོག་གིས་སྣ་ལུད་ཡག་པོ་འཕྱིས་དགོས། བཤེར་རྒྱུག་གི་མགོ་ལ་ལག་པ་རེག་མི་ཆོག་པ་དང་གཤེར་རྒྱུག་སྣ་ཁུང་གི་ནང་དུ་གཏིང་རིང་ཐུང་ག་ཚོད་རྒྱུ་བ་དང་། དཀྲུག་དཀྲུག་ག་ཚོད་གཏོང་བ། དེ་བཞིན་སྣ་ཁུང་གི་ནང་དུ་དུས་ཡུན་ག་ཚོད་འཇོག་དགོས་པ་བཅས་གསལ་བཤད་ཡི་གེར་འཁོད་པ་ལྟར་བྱེད་དགོས།
བཞི་ནས་བཤེར་རྒྱུག་མ་དཔེ་བླུག་སའི་ནང་དུ་བླུགས་རྗེས། ཡག་པོ་བཙིར་ནས། དཀྲུག་དཀྲུག་ཐེངས་ཁ་ཤས་བཏང་སྟེ། མ་དཔེ་བླུག་སའི་ནང་གི་གཤེར་ཁུ་དང་མ་དཔེ་ཡག་པོ་བསྲེས་དགོས།
ལྔ་ནས་བརྟག་དཔྱད་བྱང་བུའི་མ་དཔེ་བླུག་སའི་ཁུང་བུར་མ་དཔེ་ཐིགས་པ་3ནས་4བར་རམ་ཡང་ན་གསལ་བཤད་ཡི་གེ་ལྟར་མ་དཔེ་འདང་ངེས་བླུག་དགོས། གལ་ཏེ་མ་དཔེ་ཐིགས་པ་ཉུང་དྲགས་ན་སྲིབ་གཤིས་རྫུན་མའམ་ཡང་ན་བརྟག་དཔྱད་བྱས་འབྲས་ཕན་མེད་ལ་འགྱུར་ཉེན་ཡོད།
དྲུག་ནས་བརྟག་དཔྱད་བྱས་འབྲས་ལ་ལྟ་སྐབས། གསལ་བཤད་ཡི་གེར་གསལ་པོར་འཁོད་པའི་གོ་ཆོད་དུས་ཡུན་ལ་ནན་པོར་གཞིགས་ནས་ལྟ་དགོས་པ་དང་། གོ་ཆོད་དུས་ཡུན་ལས་ཡོལ་ཚེ་བརྟག་དཔྱད་བྱས་འབྲས་ཕན་མེད་དུ་འགྱུར་གྱི་ཡོད།
ཧོའུ་ཕེ་པིན་གྱིས་ད་དུང་ངོ་སྤྲོད་བྱས་པར། བརྟག་དཔྱད་བྱས་རྗེས་ཀྱི་སྙིགས་རོ་དག་མི་ཚོགས་མི་འདྲ་བས་བྱེད་ཐབས་མི་འདྲ་བ་སྤྱད་དེ་གཙང་མ་བཟོ་དགོས་པ་སྟེ། ལོགས་དགར་ལྟ་ཞིབ་བྱེད་མཁན་ལ་མཚོན་ན་བརྟག་དཔྱད་བྱས་འབྲས་སྲིབ་གཤིས་སམ་ཡང་ན་གདགས་གཤིས་གང་ཞིག་ཡིན་རུང་བེད་སྤྱོད་བྱས་ཟིན་པའི་བཤེར་རྒྱུག་དང་། མ་དཔེ་བླུག་སྣོད། བརྟག་དཔྱད་བྱང་བུ་སོགས་འགྱིག་ཤོག་གི་ཁུག་མའི་ནང་དུ་བླུགས་ནས་ཁ་དམ་པོར་བསྡམས་རྗེས། དོ་དམ་པས་སྨན་བཅོས་ཀྱི་སྙིགས་རོའམ་ཡང་ན་གོ་རིམ་གཞིར་བཟུང་གཙང་མ་བཟོ་དགོས། སྡེ་ཁུལ་གྱི་གྲོང་མིར་མཚོན་ན་བརྟག་དཔྱད་བྱས་འབྲས་སྲིབ་གཤིས་ཡིན་ཚེ། བེད་སྤྱོད་བྱས་པའི་བཤེར་རྒྱུག་དང་། མ་དཔེ་བླུག་སྣོད། བརྟག་དཔྱད་བྱང་བུ་སོགས་འགྱིག་ཤོག་གི་ཁུག་མའི་ནང་དུ་བླུགས་ནས་ཁ་དམ་པོར་བསྡམས་རྗེས། སྤྱིར་བཏང་གི་གད་སྙིགས་ལ་བརྩིས་ནས་གཙང་མ་བཟོ་དགོས་པ་དང་། གལ་ཏེ་བརྟག་དཔྱད་བྱས་འབྲས་གདགས་གཤིས་ཡིན་ཚེ། བརྟག་དཔྱད་ཡོ་ཆས་ཚང་མ་འགྱིག་ཤོག་གི་ཁུག་མའི་ནང་དུ་བླུགས་ནས་ཁ་དམ་པོར་བསྡམས་རྗེས། མི་སྒྱུར་སྐྱེལ་བྱེད་སྐབས་སྨན་བཅོས་སྒྲིག་གཞིར་སྤྲད་ནས་སྨན་བཅོས་ཀྱི་སྙིགས་རོ་ལྟར་གཙང་མ་བཟོ་དགོས།