《རིན་གོང་སྐོར་གྱི་བཅའ་ཁྲིམས》ཀྱི་དོན་ཚན་བཅུ་བཞི་པར། “ཚོང་གཉེར་བྱེད་མཁན་གྱིས་གཤམ་གསལ་ཚུལ་མིན་བྱེད་སྤྱོད་སྤེལ་མི་ཆོག་པ་སྟེ།

(གཅིག) ཕན་ཚུན་ལྐོག་འབྲེལ་བྱས་ནས་ཁྲོམ་རའི་རིན་གོང་གི་ཁ་ལོ་བསྒྱུར་ཏེ། གཉེར་སྐྱོང་བྱེད་མཁན་གཞན་དག་དང་འཛད་སྤྱོད་པའི་ཁྲིམས་མཐུན་ཁེ་དབང་ལ་གནོད་འཚེ་གཏོང་བ་དང་།

(གཉིས།) ཚོང་ཟོག་སོས་པ་དང་། དུས་ཚིགས་རང་བཞིན་གྱི་ཚོང་ཟོག ཕུང་གསོག་ཐེབས་པའི་ཚོང་ཟོག་སོགས་བཅའ་ཁྲིམས་ལྟར་གོང་བཅག་ནས་བཙོང་ཆོག་པ་ཕུད། འགྲན་ཡ་ཟུར་འབུད་བྱེད་པའམ་ཡང་ན་ཁྲོམ་ར་སྒེར་བཟུང་བྱ་ཆེད། མ་གནས་ལས་དམའ་བའི་རིན་གོང་གིས་ཕམ་འཚོང་བརྒྱབ་སྟེ། རྒྱུན་གཏན་གྱི་ཐོན་སྐྱེད་དང་ཚོང་གཉེར་གྱི་སྒྲིག་ལམ་དཀྲུགས་པ་དང་། རྒྱལ་ཁབ་ཀྱི་ཁེ་ཕན་དང་གཉེར་སྐྱོང་བྱེད་མཁན་གཞན་དག་གི་ཁྲིམས་མཐུན་ཁེ་དབང་ལ་གནོད་སྐྱོན་གཏོང་བ།

(གསུམ།) རིན་གོང་སྤོར་བའི་ཆ་འཕྲིན་རྫུན་མ་བཟོ་བ་དང་ཁྱབ་བསྒྲགས་བྱས་ནས། རིན་གོང་ཧམ་ཤེད་ཀྱིས་སྤར་ཏེ་ཚོང་ཟོག་གི་རིན་གོང་འཕར་བར་སྐུལ་འདེད་གཏོང་བ།

(བཞི།) རྫུན་མ་བཟོ་བའམ་ཡང་ན་གོ་ནོར་ཐེབས་སྲིད་པའི་རིན་གོང་ལ་བརྟེན་ནས། འཛད་སྤྱོད་པའམ་གཉེར་སྐྱོང་བྱེད་མཁན་གཞན་དག་ལ་མགོ་སྐོར་བཏང་ནས་རང་ཉིད་དང་ཉོ་ཚོང་བྱེད་དུ་འཇུག་པ།

(ལྔ།) ཚོང་ཟོག་གམ་ཞབས་འདེགས་འདྲ་མཚུངས་མཁོ་འདོན་བྱེད་སྐབས། ཉོ་ཚོང་གི་ཆ་རྐྱེན་འདྲ་མཚུངས་ལྡན་པའི་གཉེར་སྐྱོང་བྱེད་མཁན་གཞན་དག་ལ་རིན་གོང་ནས་མཐོང་ཆུང་བྱེད་པ།

(དྲུག) རིམ་པ་སྤོར་བའམ་ཡང་ན་རིམ་པ་གཅོག་པ་སོགས་ཀྱི་བྱ་ཐབས་སྤྱད་ནས། ཚོང་ཟོག་ཉོ་སྒྲུབ་དང་ཕྱིར་ཚོང་བྱེད་པའམ་ཡང་ན་ཞབས་འདེགས་ཞུས་ཏེ། ངོ་བོ་བསྒྱུར་ནས་རིན་གོང་སྤོར་བའམ་ཡང་ན་གཅོག་པ།

(བདུན།) བཅའ་ཁྲིམས་དང་ཁྲིམས་སྲོལ་གྱི་གཏན་འབེབས་ལས་འགལ་ཏེ་ཚུལ་མིན་ཁེ་ཆེན་ཧམ་ཤེས་ཀྱིས་ལེན་པ།

(བརྒྱད།) བཅའ་ཁྲིམས་དང་སྲིད་འཛིན་ཁྲིམས་སྲོལ་དུ་བཀག་སྡོམ་བྱས་པའི་རིན་གོང་གི་ཚུལ་མིན་བྱེད་སྤྱོད་གཞན་དག”ཅེས་གཏན་འབེབས་བྱས་ཡོད།

   གཞན་ཡང《རིན་གོང་སྐོར་གྱི་བཅའ་ཁྲིམས》དང《རིན་གོང་གི་ཁྲིམས་འགལ་བྱེད་སྤྱོད་ཀྱི་སྲིད་འཛིན་ཆད་གཅོད་སྐོར་གྱི་གཏན་འབེབས》ཀྱི་གཏན་འབེབས་ལ་གཞིགས་ན། གཉེར་སྐྱོང་བྱེད་མཁན་གྱི་རིན་གོང་གི་ཁྲིམས་འགལ་བྱེད་སྤྱོད་ལ་ད་དུང་གཉེར་སྐྱོང་བྱེད་མཁན་གྱིས་སྲིད་གཞུང་གི་མཛུབ་ཁྲིད་རིན་གོང་དང་། སྲིད་གཞུང་གི་གཏན་འབེབས་རིན་གོང་། ཁྲིམས་གཏན་འཁེལ་བའི་རིན་གོང་། རིན་གོང་ལ་ཐེ་ཇུས་བྱ་ཐབས། འཕྲལ་སྡོམ་བྱ་ཐབས་བཅས་ལག་བསྟར་མི་བྱེད་པའི་བྱེད་སྤྱོད་དང་། དེ་བཞིན་རིན་གོང་གསལ་འགོད་ཀྱི་གཏན་འབེབས་ལས་འགལ་བ་སོགས་ཀྱི་བྱེད་སྤྱོད་ཚུད་ཡོད།