ཚེས་20ཉིན་གྱི་ཕྱི་དྲོ། རང་སྐྱོང་ལྗོངས་སྲིད་གཞུང་གསར་འགྱུར་གཞུང་དོན་ཁང་གིས་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གསར་འགྱུར་ཡོངས་བསྒྲགས་ཚོགས་འདུ་ཐེངས་ཞེ་གསུམ་པ་འཚོགས་ནས་རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གནས་ཚུལ་གསར་ཤོས་བརྡ་ཁྱབ་བཏང་བ་དང་གཞུང་རྒྱུ་ཨུ་ལྷན་ཁོངས་གཏོགས་ཀྱིས་རིམས་ནད་སྔོན་འགོག་དང་ཚོད་འཛིན་དང་ཐོན་སྐྱེད་གཉེར་སྐྱོང་ལས་དོན་ལ་སྤྱི་འདོམས་ངང་དམ་འཛིན་ཡག་པོ་བྱས་པའི་འབྲེལ་ཡོད་གནས་ཚུལ་ངོ་སྤྲོད་བྱས་པ་རེད།

ངོ་སྤྲོད་བྱས་པར་གཞིགས་ན། ཟླ་9ཚེས་19ཉིན་གྱི་ཆུ་ཚོད་0ནས་24བར་ལྗོངས་ཡོངས་སུ་ཏོག་གསར་གློ་ཚད་ཕོག་པའི་ཡུལ་དེ་རང་གི་གཏན་འཁེལ་ནད་པ་16(ལྷ་ས་གྲོང་ཁྱེར་ནས་སྙན་སེང་ཞུས་པ)མང་དུ་ཕྱིན་པ་དང་། རྟགས་མེད་ནད་དུག་འགོས་པ་160(ལྷ་ས་གྲོང་ཁྱེར་ལ་149དང་། གཞིས་རྩེ་གྲོང་ཁྱེར་ལ་5 ཆབ་མདོ་གྲོང་ཁྱེར་ལ་3 ནག་ཆུ་གྲོང་ཁྱེར་ལ་3)མང་དུ་ཕྱིན་ཡོད་པ་རེད།

ཟླ་9ཚེས་20ཉིན་གྱི་ཆུ་ཚོད་0ནས་14བར། ལྗོངས་ཡོངས་སུ་ཏོག་གསར་གློ་ཚད་ཕོག་པའི་ཡུལ་དེ་རང་གི་གཏན་འཁེལ་ནད་པ་མང་དུ་ཕྱིན་མེད་པ་དང་། རྟགས་མེད་ནད་དུག་འགོས་པ་51(ལྷ་ས་གྲོང་ཁྱེར་ནས་སྙན་སེང་ཞུས་པ)མང་དུ་ཕྱིན་ཡོད་པ་རེད།

ཟླ་9ཚེས་19ཉིན་གྱི་ཆུ་ཚོད་24བར། ལྗོངས་ཡོངས་སུ་ཁྱོན་ཉེན་ཁ་ཆེ་བའི་ཁུལ་18དང་ཉེན་ཁ་འབྲིང་བའི་ཁུལ་116ཡོད་པ་རེད།

ཟླ་9ཚེས་19ཉིན་ཏོག་གསར་ནད་དུག་འགོས་པ་176མང་དུ་ཕྱིན་པ་དེ་དག་ཚང་མ་ལོགས་བཀར་དོ་དམ་ཚོད་འཛིན་ཁུལ་ནས་ཤེས་རྟོགས་བྱུང་བ་ཤ་སྟག་ཡིན་པ་རེད།

ཟླ་9ཚེས་19ཉིན་གྱི་ཆུ་ཚོད་24བར། ལྗོངས་ཡོངས་སུ་ནད་པ་2607དྲག་སྐྱེད་བྱུང་སྟེ་སྨན་ཁང་ནས་དོན་པ་དང་། ཐད་འབྲེལ་པ་58863ལ་གཅིག་སྡུད་ལོགས་བཀར་གྱི་ལྟ་ཞིབ་བྱེད་མཚམས་བཞག་པ་རེད། མིག་སྔར། མི་གྲངས་66675ལ་གཅིག་སྡུད་ལོགས་བཀར་གྱི་ལྟ་ཞིབ་བྱེད་བཞིན་ཡོད་པ་རེད།

རང་སྐྱོང་ལྗོངས་སྲིད་གཞུང་གི་གསར་འགྱུར་མགྲིན་ཚབ་པ་སྲིད་གཞུང་གི་དྲུང་ཆེ་གཞོན་པ་བསྟན་འཛིན་ལྷུན་གྲུབ་ཀྱིས། རིམས་ནད་ཐོན་ཚུན། ལྗོངས་ཏང་ཨུད་དང་སྲིད་གཞུང་གིས་རིམས་ནད་སྔོན་འགོག་དང་ཚོད་འཛིན་དང་གཞུང་རྒྱུ་དང་གཞུང་ཁོངས་ཁེ་ལས་ཀྱི་ལས་དོན་ལ་ཁྱོན་ཡོངས་ནས་སྤྱི་འདོམས་བྱས་ཡོད། ལྗོངས་ཡོངས་ཀྱི་གཞུང་རྒྱུ་ཁོངས་གཏོགས་ཀྱིས་འབོད་སྐུལ་དང་ལེན་ཧུར་ཐག་དང་། བཀོད་སྒྲིག་གནད་འཁེལ་ཞིབ་ཚགས། བྱ་སྤྱོད་མྱུར་པོ་དང་ཁྱོན་ཡོངས་ནས་སྤེལ་བ། རིམ་པ་བཞིན་འགན་འཁྲི་ནན་དུ་གཏོང་བ་བཅས་བྱས་ཏེ་རིམས་ནད་ལ་འགོག་རྒོལ་བྱེད་པའི་འཐབ་ས་དང་པོར་རང་འགུལ་ངང་ཞུགས་པ་དང་། “རིམས་ནད”ཀྱི་མཁོ་སྤྲོད་འགན་ལེན་ནང་ཞུགས་པ། སྨན་བཅོས་སྨན་རྫས་དང་། གསོལ་མགྲོན་ཁང་དང་མགྲོན་ཁང་། ཞིང་ཞོར་ཐོན་རྫས་ཁྲོམ་ར། གྲང་ཕྲེང་ཟོག་འགྲེམས་སོགས་དམངས་འཚོའི་ཞབས་ཞུའི་གཙོ་གནད་ལས་རིགས་ཁྱབ་ཁོངས་དང་འབྲེལ་བའི་ལྟ་འདོམས་ཁེ་ལས་ཀྱིས་སྔོན་འགོག་དང་ཚོད་འཛིན་གྱི་བྱ་ཐབས་ཞིབ་ཕྲ་བཟོ་བ་དང་བདེ་འཇགས་དང་གོ་རིམ་ལྡན་པའི་ངང་གཉེར་སྐྱོང་བྱ་རྒྱུར་མཐུན་སྦྱོར་མཛུབ་ཁྲིད་བྱས་ནས་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་བདེ་འཇགས་དང་། བརྟན་པོ། འཁོར་སྐྱོད་ནུས་ཆེ་བཅས་ཀྱི་འགན་ལེན་བྱས་ཏེ་སྤྱི་ཚོགས་ཀྱི་འགན་འཁྲི་ཏན་ཏིག་འཁུར་ཡོད། གོམ་སྟབས་རྗེས་མར། ལྗོངས་ཡོངས་ཀྱིས“རིམས་ནད་སྔོན་འགོག་དང་། དཔལ་འབྱོར་བརྟན་པོ། འཕེལ་རྒྱས་བདེ་འཇགས་ལྡན་པ”བཅས་ཀྱི་བླང་བྱ་གཞིར་བཟུང་། “བཀག་རྒྱ་གློད་ཀྱང་ཉེན་ཟོན་ལྷོད་མི་རུང་བའི”རྩ་དོན་མཐའ་འཁྱོངས་བྱས་ཏེ“ཕྱོགས་བཞིའི་འགན་འཁྲི”ནན་དུ་བཏང་ནས་སྔོན་འགོག་དང་ཚོད་འཛིན་གྱི་ལམ་སྲོལ་དོན་ཐོག་ཏུ་འཁྱོལ་བ་དང་། ནང་ངོས་ཀྱི་དོ་དམ་གནས་ལ་འཁྱོལ་བ། སྒྲིག་བཀོད་དང་དངོས་ཟོག་གནས་ལ་འཁྱོལ་བ། དྲིལ་བསྒྲགས་སློབ་གསོ་གནས་ལ་འཁྱོལ་བ་བཅས་ཀྱི་སྔོན་འགྲོའི་ཆ་རྐྱེན་འོག་རྒྱུན་གཏན་གྱི་ཐོན་སྐྱེད་དང་འཚོ་བའི་ཞབས་ཞུ་འགན་ལེན་མཐའ་གཅིག་ཏུ་ཡག་པོ་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་གྲུབ་འབྲས་རྒྱུན་མཐུད་བརྟན་དུ་གཏོང་གི་ཡིན་ཞེས་གསུངས་པ་རེད།

རང་སྐྱོང་ལྗོངས་སྲིད་གཞུང་གཞུང་རྒྱུ་ཨུ་ལྷན་ཏང་ཨུད་ཀྱི་ཨུ་ཡོན་ཀྲུའུ་རེན་གཞོན་པ་ཀེང་ཚུའེ་ཞ་ཡིས་ངོ་སྤྲོད་བྱས་དོན། གློ་བུར་དུ་ཐོན་པའི་རིམས་ནད་ཀྱི་མདུན་དུ། རང་ལྗོངས་ཀྱི་གཞུང་རྒྱུ་ཨུ་ལྷན་ཁོངས་གཏོགས་ཀྱིས་བྱ་ཐབས་ཁག་ཧུར་ཐག་སྤྱད་ནས་ལྟ་འདོམས་ཁེ་ལས་12ཀྱིས་རིམས་ནད་སྔོན་འགོག་དང་ཚོད་འཛིན་དང་བདེ་འཇགས་ཐོན་སྐྱེད་ཀྱི་ལས་དོན་སྤྱི་འདོམས་ངང་ཡག་པོ་བསྒྲུབ་རྒྱུར་མཛུབ་ཁྲིད་བྱས་ཡོད། དེ་དང་ཆབས་ཅིག ལྟ་འདོམས་ཁེ་ལས་ཁག་གིས་ཁང་གླ་ཆག་ཡང་དང་རྩ་ཆག་གཏོང་བའི་སྲིད་ཇུས་ལག་བསྟར་དོན་འཁྱོལ་མཐའ་གཅིག་ཏུ་བྱས་ཤིང་། མིག་སྔའི་བར་རིམ་རྩིས་བྱས་ན་ཁང་གླ་སྒོར་དུང་ཕྱུར་2.36ཆག་ཡང་དང་རྩ་ཆག་བཏང་བས་བོགས་ལེན་དུད་ཚང་3000ལྷག་ཙམ་ལ་ཕན་པ་ཐོབ་ཡོད།

ཀེང་ཚུའེ་ཞ་ཡིསབརྗོད་དོན། རིམས་ནད་ཐོན་རིང་། ལྗོངས་གཞུང་རྒྱུ་ཨུ་ལྷན་ཁོངས་གཏོགས་ཀྱིས་ཚན་ཁག་གཉིས་བཙུགས་ནས་རིམས་ནད་སྔོན་འགོག་དང་ཚོད་འཛིན་དང་ཐོན་སྐྱེད་གཉེར་སྐྱོང་ལས་དོན་ལ་སྤྱི་འདོམས་ངང་དམ་འཛིན་ཡག་པོ་བྱས་ཡོད། ཁེ་ལས་7གྱིས་ལས་སྒོ་ཁག་གཅིག་རྒྱུན་མཐུད་ཐོན་སྐྱེད་དང་གཉེར་སྐྱོང་བྱེད་བཞིན་ཡོད་ཅིང་། དེའི་ནང་བོད་ཀྱི་མཁའ་འགྲུལ་འགྲུལ་སྐྱེལ་ཁུལ་ནས་འགྲུལ་པ་མི་ཐེངས་ཁྲི་14ལྷག་ཙམ་སྐྱེལ་འདྲེན་བྱས་པར་ལས་གཉེར་ཡོང་འབབ་སྒོར་དུང་ཕྱུར་1.59ཟིན་པ་དང་། གསར་སྤེལ་མ་འཇོག་ཚོགས་པའི་ནུས་རྒྱུ་གཙང་མའི་ཁུལ་ནས་རིམ་རྩིས་བྱས་ན་གློག་གཏོང་ཚད་ཆན་ཝ་དུང་ཕྱུར་2.77ཟིན་ནས་གཉེར་སྐྱོང་ཡོང་འབབ་སྒོར་ཁྲི་7000ལྷག་ཙམ་ཟིན་པ། བདུད་རྩི་ཚོགས་པའི་སྨན་དང་སྨན་བཅོས་ཡོ་བྱད་ཁུལ་ནས་ཁ་རས་ཁྲི་300ལྷག་ཙམ་དང་རིམས་འགོག་སྨན་རིལ་ཁྲི་360ལྷག་ཙམ་ཐོན་སྐྱེད་བྱས་ནས་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་དགོས་མཁོ་ནུས་ཤུགས་ཡོད་རྒུས་འགན་ལེན་བྱས་པ། བོད་སྐྲུན་ཚོགས་པས་ཨར་འདམ་ཏུན་ཁྲི་17.6ཐོན་སྐྱེད་དང་བྲིན་ཚོང་བྱས་པར་ལས་གཉེར་ཡོང་འབབ་སྒོར་ཁྲི་5000ལྷག་ཙམ་ཟིན་པ། མཐོ་བརྩོན་དམངས་སྤྱོད་མེ་རྫས་ཀུང་སིས་དམངས་སྤྱོད་འབར་རྫས་ཏུན་4000ལྷག་ཙམ་ཐོན་སྐྱེད་དང་བྲིན་ཚོང་བྱས་པར་ལས་གཉེར་ཡོང་འབབ་སྒོར་དུང་ཕྱུར་1.48ཟིན་ཡོད། མིག་སྔར། རིམས་ནད་ཀྱི་དུས་བབ་ཟམ་མི་ཆད་པར་བརྟན་དུ་འགྲོ་བ་དང་ཆབས་ཅིག ལྟ་འདོམས་ཁེ་ལས་ཁག་གིས་ལས་ཐོན་བསྐྱར་ཚུགས་ཀྱི་ཇུས་གཞི་བཟོས་ཏེ་གདུབ་ཟུམ་དོ་དམ་བྱས་པས་ལས་སྒོ་ཁག་སླར་གསོ་ཐུབ་རིགས་ཚང་མ་གཞི་རྩའི་ཆ་ནས་སླར་གསོ་ཐུབ་ཡོད། ཚོགས་པ་དང་ཀུང་སི་12ཀྱིས་གོ་རིམ་ལྡན་པའི་ངང་འཛུགས་སྐྲུན་རྣམ་གྲངས་73སྒྲིག་འཛུགས་བྱས་ནས་ལས་ཐོན་བསྐྱར་ཚུགས་བྱས་པ། ཞིང་ལས་མ་འཇོག་ཚོགས་པས་སྟོན་འདེབས་སྐྱེལ་འདྲེན་ལས་སྒོ་སླར་གསོ་བྱས་པ་དང་། ཀྲུང་ཤིང་ཚོང་དོན་ཀུང་སིས་ནང་ཁུལ་གྱི་ཉོ་ཚོང་ལས་སྒོ་སླར་གསོ་བྱས་པ། འགྲིམ་འགྲུལ་མ་འཇོག་ཚོགས་པས་ཕྱི་ཕྱོགས་ཀྱི་མ་རྩ་མཉམ་འཇོག་མཉམ་ལས་རྣམ་གྲངས་ཀྱི་ལས་སྒོ་སླར་གསོ་བྱས་པ་དང་། ཀྲུང་དབྱང་ཁེ་ལས་10ལྷག་ཙམ་ལ་འཚམས་འདྲི་བྱས་ཏེ་མཉམ་ལས་ཀྱི་འདོད་མཐུན་སྒོར་དུང་ཕྱུར་3ཙམ་བཞག་པ་རེད།

“གོམ་སྟབས་རྗེས་མར། གཞུང་རྒྱུ་ཨུ་ལྷན་གྱིས‘རིམས་ནད་སྔོན་འགོག་དང་། དཔལ་འབྱོར་བརྟན་པོ། འཕེལ་རྒྱས་བདེ་འཇགས་ལྡན་པ’བཅས་ཀྱི་བླང་བྱ་གཞིར་བཟུང་། ‘འཕར་སྣོན་བརྟན་པོ་དང་། ཉེན་ཁ་སྔོན་འགོག འཕེལ་རྒྱས་ལ་སྐུལ་འདེད’བཅས་ཀྱི་ལས་དོན་དེ་བས་མངོན་གསལ་དོད་པའི་གནས་བབ་ཐོག་བཞག་ནས་འགག་སྒྲོལ་དཀའ་སེལ་གྱིས་ཟླ་བཅུ་པའི་ཟླ་འགོར་ལྟ་འདོམས་ཁེ་ལས་ཁག་ཁྱོན་ཡོངས་ནས་ལས་ཐོན་བསྐྱར་ཚུགས་ཡོང་བའི་བརྩོན་ལེན་བྱེད་ཀྱི་ཡིན”ཞེས་ཀེང་ཚུའེ་ཞ་ཡིས་ངོ་སྤྲོད་བྱས་པ་རེད།