ཟླ་8ཚེས་7ཉིན་གྱི་དགོང་མོའི་ཆུ་ཚོད་8པར་སྣེའུ་སྒྲོམ་ཚང་སྨན་ཁང་དུ་དུས་ཁག་དང་པོའི་ནད་རྟགས་མེད་པའི་ནད་པ་གསུམ་འབྱོར་བ་ནས་བཟུང་། ད་བར་ལྷ་ས་གྲོང་ཁྱེར་མི་དམངས་སྨན་ཁང་གི་སྨན་དོན་པས་ཉིན་42འབད་འཐབ་བྱས་པ་རེད།

     དེ་དང་དུས་མཚུངས། སྣེའུ་སྒྲོམ་ཚང་སྨན་ཁང་གིས་ནད་རྟགས་མི་འདྲ་བར་གཞིགས་ནས།ནད་རྟགས་མེད་པའི་ནད་པའི་སྲོག་རྒྱུན་སྟོན་གྲངས་ལ་བརྟག་དཔྱད་ནན་པོ་བྱེད་པ་དང་། ནད་གཞི་ཡང་བའི་ནད་པ་ཚ་བ་རྒྱག་པ་དང་།གློ་གོག་པ། ལུད་པ་འབྱུང་བ་སོགས་ཀྱི་ནད་རྟགས་ལ་གཞིགས་ནས་སྨན་བཅོས་བྱེད་པ།སྤྱིར་བཏང་གི་ནད་པར་དམིགས་སའི་རང་བཞིན་དང་ཚད་ལྡན་གྱི་རང་བཞིན་ལྡན་པའི་ནད་འགོག་སྨན་བཅོས་བྱེད་ཀྱི་ཡོད། གལ་ཏེ་ནད་པའི་ནད་རྟགས་ལ་འགྱུར་ལྡོག་བྱུང་ཚེ། དུས་ཐོག་ཏུ་སྨན་ཁང་གཞན་ལ་སྨན་བཅོས་བྱེད་པར་གཏོང་གི་ཡོད།

    ད་ཆ་སྲིད་གཞུང་གིས་ནད་དུག་འགོག་པའི་སྨན་མང་པོ་སྤྲད་སོང་། ང་ཚོས་ནད་པའི་གནས་ཚུལ་ལ་གཞིགས་ནས་འདམ་ག་བྱེད་པ་དང་། ཚོད་སྐོར་ནན་པོ་བྱས་རྗེས། གཞི་ནས་སྨན་བཅོས་ལུགས་མཐུན་བྱེད་ཀྱི་ཡོད། ཅེས་སྣེའུ་སྒྲོམ་ཚང་སྨན་ཁང་སྐྱོབ་བཅོས་ཚོགས་ཆུང་གི་ཙུའུ་ཀྲང་གཞོན་པ་པ་སངས་ཀྱིས་བརྗོད།

     སྒྲོམ་ཚང་སྨན་ཁང་དུ་ནད་པ་མང་ལ་གཅིག་སྡུད་ཆེ་བས།སྣེའུ་སྒྲོམ་ཚང་སྨན་ཁང་གི་ཉེན་དོན་ཁང་དུ་བཅའ་སྡོད་སྣེའུ་སྤྱི་བདེ་ཡན་ལག་ཅུས་ཀྱི་མི་དམངས་ཉེན་རྟོག་པས་སྒྲིག་ལམ་བཟོ་བ་ཕུད། ད་དུང་ནད་པར་ལྟ་རྟོག་བྱེད་རོགས་བྱེད་ཀྱི་ཡོད།ཉིན་ལྟར་མི་དམངས་ཉེན་རྟོག་པ་དང་ལས་རོགས་ཉེན་རྟོག་པ་3ནས་5བར་ལས་གྲུབ་པའི་དང་བླངས་པའི་ཚོགས་པས། ཨང་གྲངས་ལེན་པ་དང་ལྟོ་སྣོད་རྩིས་བརྒྱབ་སྟེ། ལྟོ་ཆས་བླུགས་པའི་སྡེར་མ་ནད་པ་མི་རེ་ངོ་རེའི་ལག་ཏུ་སྐྱེལ་གྱི་ཡོད། ཅེས་སྒྲོམ་ཚང་སྨན་ཁང་དུ་བཅའ་སྡོད་སྣེའུ་སྤྱི་བདེ་ཡན་ལག་ཅུས་ཀྱི་མི་དམངས་ཉེན་རྟོག་པ་ཀྲང་ཁའེ་ཡིས་བརྗོད།

སྒྲོམ་ཚང་སྨན་ཁང་དུ་མང་ཆེ་བ་ནད་རྟགས་མེད་པའི་ནད་པའམ་ཡང་ན་ནད་གཞི་ཡང་བའི་ནད་པ་ཤ་སྟག་ཡིན་པ་ལས། རྒན་རྒོན་དང་བྱིས་པ་མང་པོ་ཡོད། མི་ཚང་མ་ནད་གཞི་མགྱོགས་པོ་དྲག་ཆེད། སྒྲོམ་ཚང་སྨན་ཁང་དུ་བཅའ་སྡོད་མི་དམངས་ཉེན་རྟོག་པས་རྒྱུན་དུ་རོལ་རྩེད་རང་བཞིན་གྱི་བྱེད་སྒོ་སྒྲིག་འཛུགས་བྱེད་ཀྱི་ཡོད།

སྒྲོམ་ཚང་སྨན་ཁང་ལ་མ་བསྡད་གོང་། ནད་པ་ཧོ་ཞའོ་ཡུས་ཀྱིས་སྨན་ཁང་གི་ཆ་རྐྱེན་ཡག་པོ་ཡོད་མེད་ལ་སེམས་ཁྲལ་ཆེན་པོ་བྱེད་ཀྱི་ཡོད། སྨན་ཁང་དུ་སྡོད་པའི་ཉིན་དེ་དག་རིང་སྨན་དོན་པ་དང་། དང་བླངས་པ། སྤྱི་བདེ་མི་དམངས་ཉེན་རྟོག་པ་བཅས་ཀྱིས་ཞབས་འདེགས་ཡག་པོ་ཞུས་པས། ཁོང་དང་འདྲ་བའི་ནད་པ་མང་པོས་བསྔགས་བརྗོད་བྱེད་ཀྱི་ཡོད་པ་རེད།