ད་ཐེངས་ཀྱི་རིམས་ནད་ཐོན་ཚུན། རྒྱ་ཆེའི་ལྷ་སའི་གྲོང་མི་དང་མང་ཚོགས་ཚོས་འབྲེལ་ཡོད་ཀྱི་བཅའ་ཁྲིམས་དང་ཁྲིམས་སྲོལ་དང་རིམས་འགོག་གི་བྱེད་ཐབས་ལ་རང་འགུལ་ངང་སྲུང་བརྩི་ཞུས་པ་དང་། རིམས་འགོག་མི་སྣའི་ལས་དོན་ལ་རང་འགུལ་ངང་གཞོགས་འདེགས་བྱས་ཏེ། ལྷ་ས་གྲོང་ཁྱེར་གྱི་སྤྱི་ཚོགས་ཀྱི་སྤྱི་པའི་སྒྲིག་ལམ་དང་རིམས་ནད་སྔོན་འགོག་དང་ཚོད་འཛིན་ལས་དོན་གྱི་སྒྲིག་ལམ་ལ་མཉམ་དུ་སྲུང་སྐྱོང་བྱེད་ཀྱི་ཡོད། འོན་ཀྱང་མི་འགའ་ཞིག་གིས་འབྲེལ་ཡོད་ཀྱི་བཅའ་ཁྲིམས་དང་ཁྲིམས་སྲོལ་ལ་སྣང་མེད་གཏོང་བ་དང་དེ་ལས་འགལ་ཏེ། དྲ་ཐོག་ཏུ་རིམས་ནད་དང་འབྲེལ་བའི་ཆ་འཕྲིན་རྫུས་མ་བཟོས་པ་དང་སྤེལ་བས། སྤྱི་ཚོགས་སུ་ཤུགས་རྐྱེན་ངན་པ་བཟོས་ཡོད། དཔེ་མཚོན་གྱི་གྱོད་དཔེ་བརྡ་ཁྱབ་གཏོང་རྒྱུ་གཤམ་གསལ།

 ཉེ་ཆར། གཞིས་རྩེ་གྲོང་ཁྱེར་བཞད་མཐོང་སྨོན་རྫོང་གི་དྲ་དམངས་ཚེ་ཆེ་གེ་མོ་དང་། ལྷ་ས་གྲོང་ཁྱེར་ཁྲེང་ཀོན་ཆུས་ཀྱི་དྲ་དམངས་ཚེ་ཆེ་གེ་མོ། ལྷ་ས་གྲོང་ཁྱེར་མལ་གྲོ་གུང་དཀར་རྫོང་གི་དྲ་དམངས་སྐལ་ཆེ་གེ་མོ་བཅས་ཀྱིས་དཔོད་ཆུང་དང་ཁྱུག་དབྱིངས་སུ་རིམས་ནད་དང་འབྲེལ་བའི་དཀྲོག་གཏམ་སྤེལ་བ་དང་། སྒྲ་བརྙན་རྫུན་མ་བཟོ་བ། འགལ་ཟླའི་བསམ་པ་བཟོ་ཐབས་བྱེད་པ། བསྡུ་རུབ་ཟིང་སློང་ལ་ངན་སྐུལ་བཅས་བྱས་ནས། སྤྱི་ཚོགས་ཀྱི་སྤྱི་པའི་བདེ་འཇགས་ལ་གནོད་འཚེ་བཟོས་པ་དང་རིམས་ནད་སྔོན་འགོག་དང་ཚོད་འཛིན་ལས་དོན་གྱི་སྒྲིག་ལམ་ལ་གཏོར་བཤིག་བཏང་སྟེ་སྤྱི་ཚོགས་སུ་ཤུགས་རྐྱེན་ངན་པ་བཟོས་ཡོད། དེར་བརྟེན། སྤྱི་བདེ་ལས་ཁུངས་ཀྱིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བདེ་འཇགས་དོ་དམ་ཆད་གཅོད་སྐོར་གྱི་བཅའ་ཁྲིམས》ཀྱི་འབྲེལ་ཡོད་གཏན་འབེབས་ལ་གཞིགས་ནས་གོང་གསལ་གྱི་མི་གསུམ་པོར་སྲིད་འཛིན་གྱི་ཆད་པ་བཅད་ཡོད།

    དྲ་རྒྱའི་བར་མཐོངས་ནི་ཁྲིམས་འོག་ཏུ་མི་ཚུད་པའི་ས་ཆ་མིན་པས། རྒྱ་ཆེའི་དྲ་དམངས་ཀྱིས་དྲ་རྒྱའི་བདེ་འཇགས་དོ་དམ་གྱི་བཅའ་ཁྲིམས་དང་ཁྲིམས་སྲོལ་ལ་སྲུང་བརྩི་ནན་པོ་ཞུ་བ་དང་། རིམས་ནད་དང་འབྲེལ་བའི་ཆ་འཕྲིན་ཐད་གཞུང་ཕྱོགས་ཀྱི་དབང་གྲགས་ལྡན་པའི་ཁྱབ་བསྒྲགས་ལ་གཞིར་བཟུང་སྟེ། དཀྲོག་གཏམ་མི་བཟོ་བ་དང་། དཀྲོག་གཏམ་ལ་ཡིད་ཆེས་མི་བྱེད་པ། དཀྲོག་གཏམ་མི་སྤེལ་བ་བཅས་བྱས་ནས། སྐྱོན་བྲལ་དང་གོ་རིམ་ལྡན་པའི་དྲ་རྒྱའི་ཁོར་ཡུག་དང་སྤྱི་ཚོགས་ཀྱི་སྒྲིག་ལམ་མཉམ་དུ་སྲུང་སྐྱོང་བྱས་ཏེ། བྱ་སྤྱོད་དངོས་ལ་བརྟེན་ནས་རིམས་ནད་འགོག་རྒོལ་ལ་སྟོབས་ཤུགས་ལེགས་སྐྱེས་འབུལ་དགོས། རྐང་བཙུགས་ནས་དཀྲོག་གཏམ་བཟོ་བ་དང་། སྤེལ་བ། དེ་བཞིན་ཁྲིམས་འགལ་ངང་མི་མང་པོ་བསྡུ་རུབ་བྱས་ནས་ཟིང་སློང་མཁན་ལ་སྤྱི་བདེ་ལས་ཁུངས་ཀྱིས་ཁྲིམས་ལྟར་ཞིབ་བཤེར་ཐག་གཅོད་ནན་པོ་དང་མྱུར་པོ་བྱེད་རྒྱུ་རེད།

    ཆེད་དུ་བརྡ་ཁྱབ་འདི་བཏང་བ་ཡིན།

ལྷ་ས་གྲོང་ཁྱེར་སྤྱི་བདེ་ཅུས་ཀྱིས།

                  2022ལོའི་ཟླ་9ཚེས་18ཉིན།