ཚེས་13ཉིན་གྱི་སྔ་དྲོར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་ས་གྲོང་ཁྱེར་གྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་བཀོད་གཏོང་ཚོགས་འདུ་གཙོ་སྐྱོང་གནང་ཞིང་། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་དང་རྒྱལ་ཁབ་རིམས་ནད་སྔོན་འགོག་དང་ཚོད་འཛིན་ཅུས་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་བོད་ལྗོངས་ལས་དོན་ཚོགས་ཆུང་གི་ཙུའུ་ཀྲང་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་གཞོན་པ་ཡུས་ཞུའེ་ཅུན་སོགས་ཚོགས་འདུར་ཞུགས་ཡོད་པ་རེད། 

ལྷ་ས་གྲོང་ཁྱེར་རིམས་ནད་སྔོན་འགོག་དང་ཚོད་འཛིན་གྱི་ལས་དོན་བཀོད་གཏོང་ཚོགས་འདུ་འཚོག་ཡུལ།

ཝང་ཅུན་ཀྲེང་གིས་ནན་བཤད་གནང་དོན། རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་ཐོབ་པའི་གྲུབ་འབྲས་ལ་ངོས་འཛིན་གང་ལེགས་གནང་སྟེ། ཕྱོགས་ཡོངས་ནས་རིམས་ནད་སྔོན་འགོག་དང་ཚོད་འཛིན་གྱི་འགག་སྒྲོལ་དམག་འཐབ་ལ་རྒྱལ་ཁ་ལེན་པའི་ཡིད་ཆེས་དང་ཆོད་སེམས་སྔར་བས་ཆེ་རུ་གཏོང་དགོས།  ཏོག་གསར་གློ་ཚད་ནི་སྔོན་འགོག་དང་། ཚོད་འཛིན། སྨན་བཅོས་བཅས་ཐུབ་པ་ཞིག་དང་། སྔོན་འགོག་དང་ཚོད་འཛིན་གྱི་བྱེད་ཐབས་ནི་དངོས་སྒྲུབ་གོ་ཆོད་པ་ཅིག ལྗོངས་ཡོངས་ཀྱི་མི་རིགས་ཁག་གི་མི་དམངས་ནི་སྤྱི་ཡོངས་ལ་ལྟ་རྟོག་ཐུབ་པ་ཞིག་བཅས་ཡིན་པས། ང་ཚོས་རིམས་ནད་སྔོན་འགོག་དང་ཚོད་འཛིན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་མུ་མཐུད་ལག་ལེན་གཏིང་ཟབ་བསྟར་བ་དང་པར་གཞི་དགུ་པའི་སྔོན་འགོག་དང་ཚོད་འཛིན་གྱི་ཇུས་གཞི་ལག་ལེན་ནན་པོ་བསྟར་ཚེ། སྔ་ཙམ་རིམས་ནད་སྔོན་འགོག་དང་ཚོད་འཛིན་ལ་ཕྱོགས་ཡོངས་ནས་རྒྱལ་ཁ་འཐོབ་ངེས་ཡིན་པ་ལག་ལེན་ལས་ར་འཕྲོད་བྱུང་ཡོད། 

ཝང་ཅུན་ཀྲེང་གིས་ནན་བཤད་གནང་དོན། འགན་འཁྲི་ཏན་ཏིག་ཁུར་བ་དང་ནུས་ཤུགས་ཡོད་རྒུས་འགག་སྒྲོལ་བྱས་ཏེ། སྔོན་འགོག་དང་ཚོད་འཛིན་གྱི་བྱེད་ཐབས་ཁག་གི་དོན་འཁྱོལ་ལ་སྐུལ་འདེད་ནུས་ལྡན་གཏོང་དགོས། ཞིང་ཆེན་རིམ་པའི་འགོ་ཁྲིད་ལྷ་ས་གྲོང་ཁྱེར་གྱི་གཞི་རིམ་དུ་བསྐྱོད་དེ། ཐོན་ཁུངས་ལ་སྤྱི་འདོམས་དང་སྟོབས་ཤུགས་ཆེན་པོ་མཉམ་སྒྲིལ། ནུས་ཤུགས་ཡོད་རྒུས་གཞི་རིམ་གྱི་འཐབ་ས་དང་པོས་རིམས་ནད་ལ་ཕྱོགས་ཡོངས་ནས་འགོག་རྒོལ་བྱེད་པར་མཛུབ་ཁྲིད། མི་དམངས་མང་ཚོགས་ཀྱིས་བསམ་བློ་གཏོང་སར་བསམ་བློ་གཏོང་བ་དང་། གཞི་རིམ་གྱི་མི་དང་མཉམ་དུ་ལས་ཀ་བྱེད་པ། ཚན་རིག་དང་མཐུན་པའི་སྒོ་ནས་སྔོན་འགོག་དང་ཚོད་འཛིན་གྱི་སྟོབས་ཤུགས་ལ་སྤྱི་འདོམས། ཁག་ས་དང་། འགག་ས། གནད་ས་བཅས་སེལ་བར་ཤུགས་རྒྱག་པ། སྒྲིག་འཛུགས་བཀོད་འདོམས་དང་། ཉིང་སྐྱུར་བརྟག་དཔྱད། རིམས་དཔྱད་སྒྱུར་འདྲེན། ཉེན་ཁར་དོ་དམ་ཚོད་འཛིན། སྨན་བཅོས་འགན་ལེན། དངོས་ཟོག་མཁོ་སྤྲོད་འགན་ལེན། མང་ཚོགས་ཀྱི་འཚོ་བ་དང་སྤྱི་ཚོགས་བརྟན་ལྷིང་གི་ལས་དོན་བཅས་གོ་རིམ་ལྡན་པའི་ངང་ཡག་པོ་བསྒྲུབས་ནས། སྐབས་བསྟུན་གཙང་བཟོའི་དམིགས་ཚད་གང་མགྱོགས་མངོན་འགྱུར་ཐུབ་པར་བྱེད་དགོས། 

ཝང་ཅུན་ཀྲེང་གིས་ནན་བཤད་གནང་དོན། ང་མིན་ན་སུ་ཡིན་པའི་གསར་བརྗེའི་སྙིང་སྟོབས་དར་སྤེལ་བཏང་སྟེ། འགན་འཁྲི་འཁུར་སེམས་ཆེན་པོར་བརྟེན་ནས་རིམས་ནད་སྔོན་འགོག་དང་ཚོད་འཛིན་ལ་ཕྱོགས་ཡོངས་ནས་རྒྱལ་ཁ་འཐོབ་པའི་འགན་ལེན་བྱེད་དགོས། སྤྱི་ཡོངས་ཀྱི་འདུ་ཤེས་བརྟན་པོ་འཛུགས་པ་དང་། བཀོད་འདོམས་དང་བཀོད་གཏོང་ནུས་ལྡན་བྱེད་པ། ལས་ཀའི་ཕན་འབྲས་དངོས་ཐོན་པ་བཅས་བྱས་ཏེ། སྤྱོད་ཚུལ་ཡག་པོར་བརྟེན་ནས་དམག་འཐབ་དྲག་པོ་འདི་ལས་རྣམ་པར་རྒྱལ་བར་བྱེད་དགོས། མང་ཚོགས་ཀྱི་འཚོ་བར་སེམས་ཁུར་དང་། གཞི་རྩའི་འཚོ་བའི་འགན་ལེན་ལ་ཤུགས་རྒྱག་པ། མང་ཚོགས་ཀྱི་དོ་ཁུར་ལ་དུས་ཐོག་ཏུ་ལན་འདེབས་པ། བརྩེ་སེམས་ཟབ་མོས་མང་ཚོགས་ཀྱི་དཀའ་ངལ་གང་དྲག་ཅི་དྲག་གིས་ཐག་གཅོད་ཡག་པོ་བྱས་ནས། ཡིད་ཆེས་དང་དཔའ་སེམས་འཕེལ་བར་བྱེད་པ་དང་ཞུམ་མེད་ཀྱི་སྟོབས་ཤུགས་ཆེན་པོ་གཅིག་ཏུ་སྒྲིལ་དགོས། གྲོང་ཁྱེར་དང་ས་ཁུལ་ཁག་གིས“རིམས་ནད་འགོག་ཐུབ་པ་དང་། དཔལ་འབྱོར་བརྟན་པ། བདེ་འཇགས་འཕེལ་རྒྱས”བཅས་ཀྱི་བླང་བྱ་དོན་འཁྱོལ་ཡག་པོ་བྱས་ནས། རིམས་ནད་སྔོན་འགོག་དང་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤྱི་འདོམས་ནུས་ལྡན་བྱེད་པ་དང་། འགོ་སྔ་ཙམ་ཚུགས་པ་དང་སྔོན་འགོག་ལ་གཞི་ཚུགས་ཏེ། ཤེས་རྟོགས་སྔ་ཙམ་དང་། ཐག་གཅོད་མགྱོགས་མྱུར་། ཕྱི་ནས་མི་འགོ་བ་བཅས་བྱེད་པ་དང་། རིམས་ནད་ཡར་བསྐྱར་མ་ཐོན་མཐའ་གཅིག་ཏུ་སྔོན་འགོག གཞི་ཁྱོན་རང་བཞིན་གྱི་རིམས་ནད་མི་ཐོན་པའི་མཐའ་ཚད་བརྟན་པོར་བསྲུངས་ཏེ། བྱ་སྤྱོད་དངོས་ལ་བརྟེན་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས། 

ཡུས་ཞུའེ་ཅུན་གྱིས་ནན་བཤད་གནང་དོན། གནད་དོན་ལ་ཐད་ཀར་ཕྱོགས་པ་དང་འགག་སྒྲོལ་དཀའ་སེལ་གྱིས་རིམས་ནད་སྔོན་འགོག་དང་ཚོད་འཛིན་གྱི་བྱེད་ཐབས་དོན་འཁྱོལ་ཏན་ཏིག་དང་ཞིབ་ཚགས་བྱས་ཏེ། འགོ་ལམ་དང་འབྲེལ་ཐག་མགྱོགས་མྱུར་བཅད་ནས་ཕྱི་ནས་མི་འགོ་བ་དང་ནང་དུ་བསྐྱར་ལོག་སྔོན་འགོག་གི་འགོག་སྲུང་འཛིང་རགས་བརྟན་པོ་ཞིག་སྐྲུན་དགོས། ཡུལ་བབ་དང་བསྟུན་ནས་དམིགས་སའི་རང་བཞིན་གྱི་བྱེད་ཐབས་ཞིབ་འཇུག་བྱས་ནས་བཟོས་ཏེ། གྲོང་ཚོ་ཨུ་ལྷན་རེར་ཁ་གཏད་གཅོག་ཐབས་རེ་དང་སྡེ་ཁུལ་རེར་ཇུས་གཞི་རེ་ཡོད་པར་བྱས་ནས། ཚན་རིག་དང་མཐུན་པ་དང་གནད་སྨིན་གྱི་སྔོན་འགོག་དང་ཚོད་འཛིན་འགན་ལེན་བྱེད་དགོས། གླེང་ཕྱོགས་ཀྱི་དྲིལ་བསྒྲགས་ལ་ཤུགས་སྣོན་དང་། མང་ཚོགས་ཀྱིས་དོ་ཁུར་བྱེད་པའི་ཚ་གནད་ལ་དམིགས་པ། དུས་ཐོག་ཏུ་སྤྱི་ཚོགས་ལ་རིམས་ནད་སྔོན་འགོག་དང་ཚོད་འཛིན་གྱི་ཆ་འཕྲིན་ཡང་དག་ཡོངས་བསྒྲགས་བྱེད་པ། མང་ཚོགས་ལ་རྒྱལ་ཁ་འཐོབ་ངེས་ཀྱི་དད་སེམས་བརྟན་དུ་གཏོང་བ་དང་རིམས་འགོག་གི་འདུ་ཤེས་ཟབ་ཏུ་གཏོང་བར་ཁྲིད་སྟོན། མང་ཚོགས་ལ་དམ་པོར་བརྟེན་པ་བཅས་བྱས་ནས། སེམས་ནུས་གཅིག་སྒྲིལ་གྱིས་ཐུན་མོང་ཐོག་རིམས་ནད་སྔོན་འགོག་དང་ཚོད་འཛིན་གྱི་འགག་སྒྲོལ་དམག་འཐབ་ལ་རྒྱལ་ཁ་ལེན་དགོས།