ཚེས་11ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་གཞིས་རྩེ་གྲོང་ཁྱེར་གྱི་རིམས་ནད་སྔོན་འགོག་དང་ཚོད་འཛིན་གྱི་བརྙན་འཕྲིན་ཁ་པར་ཚོགས་འདུ་གཙོ་སྐྱོང་གནང་བ་མ་ཟད། གོམ་སྟབས་རྗེས་མའི་ལས་དོན་ལ་ཞིབ་འཇུག་དང་བཀོད་སྒྲིག་ཀྱང་གནང་ཞིང་། ཁོང་གིས། བསམ་བློ་དང་བྱ་སྤྱོད་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག རྒྱལ་སྲིད་སྤྱི་ཁྱབ་ཁང་མཉམ་འགོག་མཉམ་སྡོམ་ལམ་སྲོལ་གྱི་སྤྱིའི་བླང་བྱ། ལྗོངས་ཏང་ཨུད་ཀྱི་ལས་དོན་བཀོད་སྒྲིག་བཅས་ཀྱི་ཐོག་གཅིག་གྱུར་ཏན་ཏིག་ཡོང་བར་བྱས་ཏེ་ཡིད་ཆེས་བརྟན་གཏོང་དང་ངར་ཤུགས་གཅིག་སྒྲིལ་གྱིས་རིམས་འགོག་ཐད་ཀྱི“གཞིས་རྩེའི་རྒྱུགས་ལན”ནུས་ཤུགས་ཡོད་རྒུས་ཡག་པོ་ཕུལ་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་ཁོར་ཡུག་བཟང་པོ་ཞིག་གཏོད་དགོས་ཞེས་ནན་བཤད་གནང་བ་རེད།
ཚོགས་འདུར་རྒྱལ་ཁབ་ནད་ཡམས་སྔོན་འགོག་དང་ཚོད་འཛིན་ཅུས་ཀྱི་ཅུས་ཀྲང་གཞོན་པ་སུན་དབྱང་གིས་གཞིས་རྩེའི་རིམས་ནད་སྔོན་འགོག་དང་ཚོད་འཛིན་ལས་དོན་ལ་མཛུབ་ཁྲིད་བསམ་འཆར་བཏོན་གནང་བ་དང་། ལའེ་ཅའོ་དང་། འོད་ཟེར། ཀྲང་ཡན་ཆིང་། ཅང་ཅེ་བཅས་ཚོགས་འདུར་ཞུགས་ཡོད་པ་རེད།
ཡན་ཅིན་ཧའེ་ཡིས། མིག་སྔར་གཞིས་རྩེ་གྲོང་ཁྱེར་གྱི་རིམས་ནད་སྔོན་འགོག་དང་ཚོད་འཛིན་ལས་དོན་དེ་འགག་རྩའི་དུས་སྐབས་དང་ཤུགས་རྒྱག་པའི་དུས་མཚམས་སུ་གནས་ཡོད་པ་དང་། དུས་སྐབས་དེ་ནི་ང་ཚོའི་བློ་སྟོབས་ཀྱི་ངར་ཤུགས་དང་འཐབ་ཇུས་ཀྱི་ངེས་ཤུགས་ལ་ཚོད་བགམ་སྤྲོད་ཤུགས་ཆེ་ཤོས་ཀྱི་དུས་སྐབས་ཤིག་རེད། གྲོང་ཁྱེར་ཡོངས་ཀྱི་གོང་འོག་ཚང་མས་སེམས་པ་གཅིག་མཐུན་དང་། ཀུན་སེམས་གཅིག་སྒྲིལ། ངར་ཤུགས་གཅིག་སྒྲིལ། བསམ་ཇུས་གཅིག་འགོད་བཅས་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་མི་དམངས་དམག་འཁྲུག་ལ་ཐུན་མོང་ཐོག་རྒྱལ་ཁ་ལེན་དགོས་ཞེས་ནན་བཤད་གནང་བ་རེད།