རིམས་ནད་མཆེད་རྒྱུ་སྔོན་འགོག་ཚོད་འཛིན་ནན་པོ་བྱེད་པའི་འགག་རྩ་ནི་གཞི་རིམ་དང་གཙོ་གནད་སྡེ་ཁུལ་ལ་ཐུག་ཡོད། ཟླ་8ཚེས་9ཉིན་ལྗོངས་སྡོད་ཁང་འཛུགས་སྐྲུན་ཐིང་གིས《ས་ཁང་བདག་ཁོངས་ཁྱབ་ཁོངས་ཀྱི་ཏོག་གསར་གློ་ཚད་རིམས་ནད་སྔོན་འགོག་ཚོད་འཛིན་ལས་དོན་ལ་ཕྱོགས་ཡོངས་ནས། ཤུགས་སྣོན་རྒྱག་རྒྱུའི་སྐོར་གྱི་ཛ་དྲག་བརྡ་ཐོ》བཏང་ནས་ས་ཁུལ་དང་གྲོང་ཁྱེར་ཁག་གི་སྡོད་ཁང་འཛུགས་སྐྲུན་སྡེ་ཚན་གྱིས་སྡེ་ལས་ཞབས་ཞུའི་ཁེ་ལས་ལ་རང་འཁྲིའི་ལས་གནས་ཐོག་གཞི་ཚུགས་པ་དང་འགན་འཁྲི་འཁུར་རྒྱུར་མཛུབ་ཁྲིད་བྱས་ཏེ་སྡེ་ཁུལ་གྱིས་ཁྱོན་ཡོངས་ནས་མཉམ་འགོག་མཉམ་སྡོམ་གྱི་བྱེད་ཐབས་དོན་འཁྱོལ་བྱ་རྒྱུར་གཞོགས་འདེགས་ཧུར་ཐག་བྱས་ནས། ཁུལ་ཆུང་གི“འགག་སྒོ་དང་པོ”མཐའ་གཅིག་ཏུ་སྲུང་དགོས་པའི་བླང་བྱ་བཏོན་པ་རེད། ལྗོངས་ཡོངས་ཀྱི་སྡེ་ལས་ཞབས་ཞུའི་ཁེ་ལས་220ལྷག་ཙམ་གྱིས་དང་ལེན་ཧུར་ཐག་ཞུས་པ་དང་སྡེ་ལས་མི་སྣ་ཁྲི་2ལྷག་ཙམ་གྱིས་བཀའ་འབྱོར་འཕྲལ་སྒྲུབ་དང་རང་འགུལ་ངང་ཁོངས་གཏོགས་ཁུལ་གྱི་ཁྲོམ་གཞུང(སྡེ་ཁུལ)ལ་གཞོགས་འདེཌ་བྱས་ཏེ་ཏན་ཏིག་དང་། ཞིབ་ཚགས། མྱུར་པོ་བཅས་ཀྱི་སྒོ་ནས་རིམས་ནད་སྔོན་འགོག་ཚོད་འཛིན་ལས་དོན་དོན་འཁྱོལ་བྱས་པ་རེད།

ཤེས་རྟོགས་བྱུང་བར་གཞིགས་ན། ལྗོངས་ཡོངས་ཀྱི་སྡེ་ལས་ཞབས་ཞུའི་ཁེ་ལས་ཀྱིས་ཕྱོགས་མི་ཏང་ཡོན་3000ཙམ་སྐུལ་སློང་བྱས་པ་དང་། སྡེ་ཁུལ་གྱི་གྲོང་ལྷན་དང་། སྡེ་ཁུལ་གྱི་དང་བླངས་པ། སྡེ་ཁུལ་གྱི་དོ་བདག་སོགས་ཀྱི་སྟོབས་ཤུགས་དང་མཉམ་འབྲེལ་བྱས་ནས་རྡོག་རྩ་གཅིག་སྒྲིལ་གྱིས་སྡེ་ཁུལ་གྱི་རིམས་ནད་སྔོན་འགོག་དང་ཚོད་འཛིན་ལས་དོན་གོ་རིམ་ལྡན་པའི་ངང་སྤེལ་ཐུབ་པའི་འགན་ལེན་ནུས་ལྡན་བྱས་པ་རེད། བོད་ལྗོངས་ཧུང་ཧྥ་སྡེ་ལས་ཀུང་སིས་འཕྲལ་དུ་ཏང་ཡོན་དང་བླངས་ཞབས་ཞུ་རུ་ཁག་འཛུགས་རྒྱུའི་འབོད་སྐུལ་བྱས་པ་དང་ཏང་ཡོན་ཡོངས་ཀྱིས་མིང་ཐོབ་གསལ་སྟོན་དང་འགན་འཁྲི་གསལ་སྟོན་བྱས་པ་མ་ཟད། ཏང་ནང་ཞུགས་མཁན་ཧུར་བརྩོན་ཅན་དང་། རྣམ་གྲངས་ཀྱི་རྐང་འཛིན་པ། སེམས་རྩ་འཁོལ་བའི་སྡེ་ཁུལ་གྱི་དོ་བདག་བཅས་བསྡུས་ནས་རིམས་ནད་སྔོན་འགོག་ཚོད་འཛིན་དང་བླངས་རུ་ཁག་བཙུགས་ཏེ་རིམས་ནད་སྔོན་འགོག་ཚོད་འཛིན་གྱི་འཐབ་ས་དང་པོར་ཧུར་ཐག་ཞུགས་ཡོད། གཞིས་རྩེ་གྲོང་ཁྱེར་ཇོ་མོ་གླང་མའི་ཚའེ་ཤིན་སྡེ་ལས་ཀུང་སིས་མི་སྣ་སྒྲིག་འཛུགས་བྱས་ཏེ“དང་བླངས་ཞབས་ཞུའི་དར་ཆ”འཁྱེར་བ་དང་“དཔུང་དར་དམར་པོ”བཏགས་ནས་ཁུལ་ཆུང་གི་རིམས་འགོག་དྲ་རྒྱ་བཙུགས་ཏེ་ཁྱོན་ཡོངས་ནས་ཕྱོགས་ཡོངས་ནས་སྔོན་འགོག་ཚོད་འཛིན་གྱི་ལས་དོན་ཧུར་ཐག་སྤེལ་ཡོད། ལྷོ་ཁ་གྲོང་ཁྱེར་ཧེ་ཤིང་སྡེ་ལས་ཀུང་སིའི་འགན་ནུས་སྡེ་ཚན་གྱི་ཏང་ཡོན་ཡོངས་ལས་གྲུབ་པའི“སྡེ་ལས་ཏང་ཡོན་འཕྲལ་རྒོལ་རུ་ཁག”གིས“ཏང་ཡོན་གྱི་གདོང་ལེན་ལས་གནས”བཀོད་སྒྲིག་བྱས་པ་དང་། “ཕུ་མེད་ལས་གོས་དམར་པོ”གྱོན་ནས་ལྷོ་ཁ་གྲོང་ཁྱེར་ཐད་གཏོགས་སྤྱི་པའི་བོགས་གཏོང་ཁང་དུ་བསྐྱོད་ནས་ཉིང་སྐྱུར་བརྟག་དཔྱད་སོགས་ཀྱི་ལས་དོན་སྒྲུབ་རོགས་བྱས་ཡོད།

དེ་དང་ཆབས་ཅིག་སྡེ་ལས་ཁེ་ལས་ཁག་གིས་ད་དུང་དོ་བདག་སྐད་འཕྲིན་ཚོགས་པར་བརྡ་ཐོ་གཏོང་བ་དང་། ཁ་པར་བརྒྱབ་ནས་བརྡ་ཐོ་གཏོང་བ། རྒྱང་སྒྲོག་ཆུང་ངུ་སྒྲོག་པ། རྩ་ཚིག་སྦྱར་བ་སོགས་ཀྱི་བྱེད་ཐབས་རྒྱ་ཁྱབ་ངང་སྤྱད་པ་དང་ཐབས་ལམ་མང་པོ་བརྒྱུད་དྲིལ་བསྒྲགས་བྱེད་ཤུགས་ཆེ་རུ་བཏང་ནས། གྲོང་མི་མི་རེ་ངོ་རེས་མིག་སྔའི་རིམས་ནད་གནས་ཚུལ་ཤེས་རྟོགས་ཐུབ་པའི་འགན་ལེན་བྱས་ཏེ་ཚང་མར་རང་ཉིད་ཀྱི་འགོག་སྲུང་ལ་ཤུགས་སྣོན་རྒྱག་པ་དང་རིམས་ནད་སྔོན་འགོག་ཚོད་འཛིན་ལ་གཞོགས་འདེགས་ཧུར་ཐག་བྱ་རྒྱུའི་དྲན་སྐུལ་བྱས་པ་རེད། མིག་སྔའི་བར་ལྗོངས་ཡོངས་ཀྱི་སྡེ་ལས་ཁེ་ལས་ཁག་གིས་རིམ་རྩིས་བྱས་ན་རིམས་ནད་སྔོན་འགོག་ཚོད་འཛིན་གྱི་ཆ་འཕྲིན་དང་འབྲེལ་ཡོད་དྲན་སྐུལ་8000ལྷག་ཙམ་བཏང་ནས་རིམས་ནད་འགོག་བཅོས་ཀྱི་རྣམ་པ་བཟང་པོ་ཞིག་ཧུར་ཐག་བཏོད་ཡོད་པ་རེད།

སྡེ་ཁུལ་གྱི་གྲོང་མིའི་རྒྱུན་གཏན་གྱི་འཚོ་བའི་དགོས་མཁོ་སྐོང་ཆེད། སྡེ་ལས་ཞབས་ཞུའི་ཁེ་ལས་ཀྱིས་རང་འགུལ་ངང་འགྲོ་གྲོན་ཚབ་སྤྲོད་དང་། དངོས་ཟོག་ཚབ་ཉོ། མྱུར་སྐྱེལ་ཚབ་འཇལ། སྒོ་རྩའི་འཚོ་བའི་གད་སྙིགས་དུས་ཐོག་ཏུ་དབྱུགས་པ་སོགས་བྱེད་ཀྱི་ཡོད། འགྲོ་ལམ་གྱི་མངོན་གསལ་དོད་སར“འབྲེལ་གཏུག་གཱ”སྦྱར་ཡོད་པས་གྲོང་མིར་དཀའ་ངལ་འཕྲད་སྐབས་འཕྲལ་མར་སྡེ་ལས་མི་སྣར་འབྲེལ་གཏུག་བྱས་ནས་ཐག་གཅོད་བྱེད་ཆོག་གི་ཡོད་པ་རེད།

གཞན་ཡང་རང་ལྗོངས་ཀྱི་སྡེ་ལས་ཁེ་ལས་ཀྱིས་སྤྱི་ཚོགས་ཀྱི་འགན་འཁྲི་ལག་ལེན་ཧུར་ཐག་བསྟར་ནས་རང་འགུལ་ངང་རིམས་འགོག་དངོས་ཟོག་དང་འཚོ་བའི་མཁོ་ཆས་ཞལ་འདེབས་བརྒྱབ་ཡོད། བསྡོམས་རྩིས་བྱས་པར་གཞིགས་ན། ཟླ་9ཚེས་5ཉིན་བར་ལྗོངས་ཡོངས་ཀྱི་སྡེ་ལས་ཁེ་ལས་ཀྱིས་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོར་འགོག་སྲུང་གྱོན་ཆས་དང་། འགོག་སྲུང་ལག་ཤུབས། ཁ་རས་N95 འགོག་སྲུང་ངོ་ཁེབས། བཟའ་བཅའ་དང་བཏུང་བྱ་སོགས་སྒོར་ཁྲི་300ལྷག་ཙམ་རི་བའི་རིམས་འགོག་དང་འཚོ་བའི་དངོས་ཟོག་ཞལ་འདེབས་བརྒྱབ་པ་རེད། ལྷ་ས་གྲོང་ཁྱེར་ཐེན་ཧུའུ་སྡེ་ལས་དང་ཅི་ཀྲི་ཏི་སྡེ་ལས་ཀྱིས་དོ་དམ་བྱེད་ཁོངས་ཁུལ་ཆུང་དུ་ཤིས་ཀྭ་དང་། གཏེར་ཆུ། དུག་སེལ་གཤེར་ཁུ། འགོག་སྲུང་གྱོན་ཆས་སོགས་འཚོ་བའི་དངོས་ཟོག་དང་རིམས་འགོག་དངོས་ཟོག་བསྐྱལ་བ་རེད། རྣམ་སྲས་ཚོགས་པས་སྡེ་ཁུལ་གྱི་དོ་བདག་ལ་རིན་མེད་ངང་རྩམ་པ་དང་། འབྲས། གྲོ་ཞིབ། རྒྱ་ཐུག ཕག་ཀྲིན་སོགས་སྤྲད་པ་དང་འཐབ་ས་དང་པོའི་རིམས་འགོག་མི་སྣར་གཏེར་ཆུ་དང་། བཏུང་བྱ། སྟབས་བདེའི་ཐུག་པ་སོགས་སྤྲད་པ་རེད། ལྷོ་ཁ་གྲོང་ཁྱེར་ཧའེ་ཤིང་སྡེ་ལས་ཀུང་སིས་སྡེ་ཁུལ་གྱི་འཐབ་ས་དང་པོའི་རིམས་འགོག་མི་སྣར་ཁ་རས་N95་ཁྲི་1ལྷག་ཙམ་དང་། སྨན་སྤྱོད་ཁ་རས་1000འགོག་སྲུང་གྱོན་ཆས་220སོགས་སྒོར་ཁྲི་15རི་བའི་རིམས་འགོག་དངོས་ཟོག་ཞལ་འདེབས་བརྒྱབ་པ་རེད།