ཟླ་8ཚེས་31ཉིན་དང་ཟླ་9ཚེས་1ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་ནག་ཆུ་གྲོང་ཁྱེར་གྱི་སྦྲ་ཆེན་རྫོང་དང་། སོག་རྫོང་།  འབྲི་རུ་རྫོང་། གསེར་རྙེད་ཆུས་བཅས་སུ་ཕེབས་ཏེ། གཞི་རིམ་གྱི་ལས་བྱེད་མང་ཚོགས་ལ་གཟིགས་པ་དང་འཚམས་འདྲི་གནང་བ་མ་ཟད། རིམས་ནད་སྔོན་འགོག་དང་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལས་དོན་ལ་སྤྱི་འདོམས་སྐུལ་འདེད་གཏོང་བར་བརྟག་ཞིབ་དང་ལྟ་སྐུལ་མཛུབ་ཁྲིད་གནང་བ་རེད། 

ནག་ཆུའི་མྱུར་བགྲོད་གཞུང་ལམ་ཞིབ་བཤེར་ས་ཚིགས་སུ་ཝང་ཅུན་ཀྲེང་གིས་ལས་རེས་ལས་སྒྲུབ་དང་། ཟོག་འགྲེམས་ཤར་གཏོང་འགན་ལེན། ཞབས་འདེགས་དོ་དམ། རིམས་ནད་མ་མཆེད་སྔོན་འགོག་སོགས་ཀྱི་ལས་དོན་ལ་མཁྱེན་རྟོགས་ནན་ཏན་གནང་བཞིན་པ། 

གསེར་རྙེད་ཆུས་ནག་ཆུ་གྲོང་རྡལ་གླིང་སྐོར་སྡེ་ཁུལ་དང་། འབྲི་རུ་རྫོང་ཤག་ཆུ་གྲོང་རྡལ། སོག་རྫོང་ཙན་དན་དགོན། ནག་ཆུ་གྲོང་ཁྱེར་ཕྱོགས་བསྡུས་བཅོས་སྐྱོང་ལྟེ་བའི་ཐོག་ཁང་བཅས་སུ་ཝང་ཅུན་ཀྲེང་གིས་དྲ་མིག་ཅན་འཛུགས་སྐྲུན་དང་། རིམས་ནད་སྔོན་འགོག་དང་ཚོད་འཛིན་ལས་དོན། རིམས་འགོག་དངོས་ཟོག་འགན་ལེན་སོགས་ཀྱི་གནས་ཚུལ་ལ་མཁྱེན་རྟོགས་གནང་བ་རེད། ཁོང་གིས་ནན་བཤད་གནང་དོན། མི་སྣ་འདུ་འཛོམས་ཆེ་ས་དང་སྔོན་འགོག་དང་ཚོད་འཛིན་དཀའ་བའི་གཙོ་གནད་ཁུལ་ལ་དམ་པོར་དམིགས་ཏེ། དྲ་མིག་ཅན་དོ་དམ་གྱི་ཉམས་མྱོང་ཡག་པོ་དང་བྱ་ཐབས་ཡག་པོ་ཏན་ཏིག་སྤྱད་ནས་སྔོན་འགོག་དང་ཚོད་འཛིན་གྱི་བྱེད་ཐབས་ཁག་གཞི་རིམ་དུ་དོན་འཁྱོལ་བྱས་ཏེ། རིམས་ནད་སྔོན་འགོག་དང་ཚོད་འཛིན་གྱི་འགོག་སྲུང་འཛིང་རགས་བརྟན་པོ་ཞིག་མཐའ་གཅིག་ཏུ་སྐྲུན་དགོས། སྦྲ་ཆེན་རྫོང་ཁྱད་ལྡན་ཐོན་རྫས་འགྲེམས་ཚོང་ཆོམས་ཆེན་དང་། སློབ་ཆེན་སློབ་མའི་ལས་གཏོད་གསོ་སྦྱོང་རྟེན་གཞི། སོག་རྫོང་རྒྱལ་གཅེས་རིང་ལུགས་ཀྱི་ལོ་རྒྱུས་དྲན་གསོ་ཁང་བཅས་སུ་ཝང་ཅུན་ཀྲེང་གིས་ཁྱད་ལྡན་འབྲོག་ལས་ཐོན་རྫས་གསར་སྤེལ་དང་། སློབ་ཆེན་སློབ་མའི་ལས་གཏོད་གསར་གཏོད། གྲོང་གསེབ་དར་རྒྱས་གཏོང་། ནག་ཆུས་འབད་འབུངས་བྱེད་ཅེས་པའི་བྱེད་སྒོ་སྤེལ་ཚུལ་བཅས་ལ་མཁྱེན་རྟོགས་ཞིབ་ཕྲ་གནང་བ་རེད། ཁོང་གིས་ནན་བཤད་གནང་དོན། རིམས་ནད་སྔོན་འགོག་དང་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤྱི་འདོམས་བྱས་ཏེ། ཟོག་འགྲེམས་ཤར་གཏོང་འགན་ལེན་དང་། ཞིང་འབྲོག་ལས་ཐོན་སྐྱེད། གཞི་རྩའི་དམངས་འཚོ། ལས་ཞུགས་ལས་གཏོད། དཀའ་ངལ་སེལ་བ་སོགས་ཀྱི་བྱེད་ཐབས་དོན་འཁྱོལ་ཡག་པོ་བྱས་ནས། རིམས་ནད་ཀྱི་ཤུགས་རྐྱེན་ཚད་གཞི་མཐོ་ཤོས་ཀྱི་སྒོ་ནས་ཆུང་དུ་གཏོང་དགོས། ཁྱད་ལྡན་ཐོན་ཁུངས་ཀྱི་ལེགས་ཆར་གཞི་ཚུགས་ཏེ། ལས་སྣོན་ཞིབ་ཚགས་ཀྱི་ལམ་བུར་སྐྱོད་པ་དང་། ལྗོངས་ཕྱི་ནང་གི་ཁྲོམ་ར་རྒྱ་ཆེར་ཧུར་ཐག་གཏོང་བ། ཁྱད་ལྡན་ཞིང་ཕྱུགས་ཐོན་ལས་རྒྱ་སྟོབས་ཆེ་རུ་གཏོང་བ་བཅས་བྱས་ནས་མང་ཚོགས་ཀྱི་ཕྱུག་འགྱུར་ལ་སྐུལ་ཁྲིད་བྱེད་དགོས། 

ལྟ་སྐུལ་མཛུབ་ཁྲིད་གནང་རིང་། ཝང་ཅུན་ཀྲེང་གིས་རིམས་ནད་སྔོན་འགོག་དང་ཚོད་འཛིན་བྱེད་རིང་། གཞི་རིམ་ཏང་རྩ་འཛུགས་ཀྱི་ནུས་པ་འདོན་པའི་གནས་ཚུལ་ལ་གཙོ་གནད་མཁྱེན་རྟོགས་གནང་བ་དང་། གཞི་རིམ་གྱི་བཅོས་སྐྱོང་མ་ལག་དང་བཅོས་སྐྱོང་ནུས་པ་འཛུགས་སྐྱོང་ལ་ཤུགས་སྣོན་རྒྱག་པའི་ཐད་ལས་ཀའི་བླང་བྱ་བཏོན་གནང་བ་རེད། ཁོང་གིས་ནན་བཤད་གནང་དོན། འགག་རྩའི་དུས་སུ་ཏང་རྩ་འཛུགས་ནི་སྲོག་ཤིང་རེད། ཏོག་གསར་གློ་ཚད་རིམས་ནད་ལ་འགོག་རྒོལ་བྱེད་པ་ནི་གཞི་རིམ་ཏང་རྩ་འཛུགས་ཀྱིས་སྤྱི་ཚོགས་བཅོས་སྐྱོང་མ་ལག་དང་བཅོས་སྐྱོང་ནུས་པ་ཆེ་རུ་གཏོང་བའི་རྒྱུགས་ཆེན་པོ་ཞིག་དང་ཚོད་བགམ་ཞིག་རེད། གནད་དོན་གྱི་སྟོན་ཕྱོགས་དང་། དམིགས་ཚད་ཀྱི་སྟོན་ཕྱོགས། གྲུབ་འབྲས་ཀྱི་སྟོན་ཕྱོགས་བཅས་མཐའ་འཁྱོངས་ཀྱིས་ཉམས་མྱོང་ཕྱོགས་སྡོམ་དང་མི་འདང་ས་འཚོལ་བ་དང་། ཞན་ཆ་གསབ་པ་དང་ལས་དོན་ལ་སྐུལ་འདེད་གཏོང་བ། བཅོས་སྐྱོང་མ་ལག་འཛུགས་སྐྱོང་ལ་ཁྱོན་ཡོངས་ནས་སྐུལ་འདེད་གཏོང་བ། བཅོས་སྐྱོང་ནུས་པ་དང་ཆུ་ཚད་ཕྱོགས་ཡོངས་ནས་མཐོ་རུ་གཏོང་བ། གཞི་རིམ་ཏང་རྩ་འཛུགས་ཀྱི་སྒྲིག་འཛུགས་བྱེད་ནུས་དང་། གོང་བུ་སྒྲིལ་ནུས། འཐབ་འཛིང་བྱེད་ནུས་བཅས་ཆེ་རུ་ཏན་ཏིག་བཏང་སྟེ། གཞི་རིམ་ཏང་རྩ་འཛུགས་རིམས་ནད་སྔོན་འགོག་དང་ཚོད་འཛིན་གྱི་འགག་སྒྲོལ་དམག་འཐབ་ལ་རྒྱལ་ཁ་ལེན་པ་དང་། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་དུ་གཏོང་བ། མང་ཚོགས་ཀྱི་སྣེ་ཁྲིད་དེ་ཕྱུག་འགྱུར་ཡོང་བ། སྤྱི་ཚོགས་བརྟན་ལྷིང་སྲུང་སྐྱོང་། མཐའ་མཚམས་མངའ་ཁོངས་སྲུང་སྐྱོང་བཅས་ཀྱི་སྲ་ཞིང་བརྟན་པའི་དམག་འཐབ་མཁར་རྫོང་ཞིག་ཏུ་འཛུགས་སྐྲུན་བྱེད་དགོས།

ཝང་ཅུན་ཀྲེང་གིས་ནག་ཆུ་གྲོང་ཁྱེར་ཕྱོགས་བསྡུས་བཅོས་སྐྱོང་ལྟེ་གནས་སུ་དྲ་མིག་ཅན་གྱི་དོ་དམ་ལས་དོན་ལ་མཁྱེན་རྟོགས་ཞིབ་ཕྲ་གནང་བཞིན་པ། 

ཝང་ཅུན་ཀྲེང་གིས་འཐབ་ས་དང་པོར་འབད་འཐབ་བྱེད་མཁན་རིམས་ནད་སྔོན་འགོག་དང་ཚོད་འཛིན་གྱི་ལས་དོན་པར་སྙིང་དབུས་ནས་ཐུགས་རྗེ་ཆེ་དང་བླ་ན་མེད་པའི་གུས་འདུད་ཞུས་པ་རེད། ཁོང་གིས་ནན་བཤད་གནང་དོན། འཐབ་ས་དང་པོའི་ལས་དོན་མི་སྣར་སེམས་ཁུར་དང་གཅེས་སྐྱོང་བྱས་ནས་གནད་དོན་ཞིབ་ཕྲ་དུས་ཐོག་ཏུ་ཐག་གཅོད་བྱེད་རོགས་བྱས་ཏེ། རྒྱ་ཆེའི་ཏང་ཡོན་ལས་བྱེད་པས་འཐབ་ས་དང་པོར་ནུས་ཤུགས་ཡོད་རྒུ་འདོན་པ་དང་བློ་གཅིག་སེམས་གཅིག་གིས་དམག་འཐབ་ཐུབ་པར་བྱས་ནས། རིམས་ནད་སྔོན་འགོག་དང་ཚོད་འཛིན་གྱི་དམག་འཐབ་ཆེན་པོ་འདིར་རྒྱལ་ཁ་མཐའ་གཅིག་ཏུ་འཐོབ་པ་བྱེད་དགོས།