མིག་སྔར། རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་བྱེད་པ་དེ“གཙང་བཟོ་གཉིས”ཀྱི་དམིགས་ཚད་གང་མགྱོགས་མངོན་འགྱུར་བྱེད་པའི་ཆེས་འགག་རྩ་དང་ཆེས་དཀའ་ངལ་ཆེ་བའི་དུས་མཚམས་སུ་གནས་ཡོད། གནད་འགག་ཇི་ཙམ་ཆེ་ན་དེ་ཙམ་གྱིས་ངེས་ཤུགས་རྒྱུན་འཁྱོངས་དང་།“སྐབས་བསྟུན་གཙང་བཟོའི”སྤྱིའི་བྱེད་ཕྱོགས་མཐའ་འཁྱོངས་བྱས་ནས་ལས་ཀའི་གཙོ་གནད་མངོན་གསལ་དོད་པོ་ཡོང་བར་བྱེད་པ་དང་། དམ་པ་དོན་གཉེར་གྱི་སྙིང་སྟོབས་ལ་བརྟེན་ནས་སྔོན་འགོག་དང་ཚོད་འཛིན་གྱི་བྱེད་ཐབས་དོན་འཁྱོལ་ནན་པོ་དང་ཞིབ་ཚགས་བྱེད་པ། ད་ཡོད་ཀྱི་གྲུབ་འབྲས་མུ་མཐུད་སྲ་བརྟན་དུ་གཏོང་བ། གཙོ་གནད་ཁུལ་འགག་སྒྲོལ་ཡོང་བར་གཅིག་སྡུད་ཐོག་སྐུལ་འདེད་གཏོང་བ་བཅས་བྱས་ཏེ། ཕྱོགས་ཡོངས་ནས་རྒྱལ་ཁ་ཐོབ་ཆེད་འབད་བརྩོན་བྱེད་དགོས།
རིམས་ནད་ཐོན་པ་ནས་བཟུང་། ལྗོངས་ཡོངས་ཀྱི་ས་གནས་ཁག་གིས་ཉེན་ཁ་ཆེ་འབྲིང་ཆུང་གསུམ་གྱི་ཁུལ་ཚན་རིག་དང་མཐུན་པའི་སྒོ་ནས་དབྱེ་འབྱེད་གནད་སྨིན་བྱས་ཏེ། ལུགས་མཐུན་ངང་བཀག་སྡོམ་ཚོད་འཛིན་དང་དོ་དམ་ཚོད་འཛིན་བྱས་ཡོད། སླད་ཕྱིན་མུ་མཐུད་རིམས་ནད་སྔོན་འགོག་དང་ཚོད་འཛིན་གྱི་དུས་བབ་ལ་གཞིགས་ནས་ཉེན་ཁའི་རིམ་པ་དང་དོ་དམ་ཚོད་འཛིན་བྱེད་ཐབས་དུས་ཐོག་ཏུ་ལེགས་སྒྲིག་བྱ་རྒྱུ་དང་། “ཡུལ་བབ་དང་བསྟུན་པ་དང་། གནད་དོན་ཕྱོགས་སྟོན་དུ་འཛིན་པ། གཙོ་གནད་མངོན་གསལ་དོད་པོ་ཡོང་བར་བྱེད་པ། ཡུག་དབྱེ་གཙང་བཟོ”བཅས་ཀྱི་ཐབས་ཇུས་གཞིར་བཟུང་། བཀོད་འདོམས་མ་ལག་ནུས་ཆེའི་ངང་འཁོར་རྒྱུག་ཐུབ་པར་བྱས་ནས་སྟོབས་ཤུགས་གཅིག་སྒྲིལ་གྱིས་གཙོ་གནད་ས་ཁོངས་འགག་སྒྲོལ་ཐུབ་པར་བྱེད་དགོས།
འགལ་བ་གཙོ་བོར་དམ་འཛིན་བྱས་ནས་འགག་རྩའི་གནད་དོན་ཐག་གཅོད་བྱེད་དགོས། ལྗོངས་ཡོངས་ཀྱི་ས་ཁུལ་དང་གྲོང་ཁྱེར་མང་ཆེ་བར་སྤྱི་ཚོགས་ཐོག་ལ་གཙང་བཟོ་ཐུབ་ཡོད། ས་གནས་ཁག་དང་གྲོང་ཁྱེར་ཁག་གིས་གཙང་བཟོ་ཐུབ་མེད་པའི་ས་ཆ་གལ་ཆེའི་ནང་གི་འགངས་ཆེར་བརྩིས་ཏེ། གཙོ་གནད་གནས་ཡུལ་ལ་དོ་དམ་ཚོད་འཛིན་བྱ་རྒྱུར་ཤུགས་སྣོན་རྒྱག་པ་དང་། རིམས་ནད་ཐོན་པའི་གཙོ་གནད་ཁྲོམ་གཞུང་དང་སྡེ་ཁུལ་དང་གཙོ་གནད་གནས་ཡུལ་ལ་འཇགས་རྣམ་དོ་དམ་བྱེད་ཐབས་དོན་འཁྱོལ་ཡག་པོ་བྱེད་པ། མཉམ་འགོག་མཉམ་སྡོམ་གྱི་ནུས་པ་འདོན་སྤེལ་བྱེད་པ། “ཏང་འཛུགས་སྐྱོང་+དྲ་མིག་ཅན”གྱི་དོ་དམ་བྱེད་སྟངས་ལ་སྐུལ་འདེད་གཏོང་བ། ཚན་པ་དང་བར་ཁྱམས་སུ་དྲ་མིག་ཅན་གྱི་དོ་དམ་བྱེད་པ། དྲ་མིག་ཅན་གྱི་དོ་དམ་ལས་དོན་ཏན་ཏིག་ཞིབ་ཚགས་དང་གནད་འཁེལ་ངང་སྒྲུབ་པ།“ཧ་རེ་ཧུ་རེའི”སྣང་ཚུལ་མི་ཐོན་པ་བཅས་བྱས་ནས་ཁུག་ཆ་གཅིག་ཀྱང་མི་ལུས་པའི་འགན་ལེན་བྱེད་དགོས།
ནད་པ་འཕར་ཚད་ཚོད་འཛིན་མཐའ་གཅིག་ཏུ་བྱས་ནས་གསོག་ཚད་ནུས་ཤུགས་ཡོད་རྒུས་སེལ་དགོས། སྟོབས་ཤུགས་གཅིག་སྒྲིལ་གྱིས་གཙོ་གནད་ས་ཁོངས་འགག་སྒྲོལ་བྱས་ཏེ་སྐྱོབ་བཅོས་དང་སྔོན་འགོག་དང་ཚོད་འཛིན་གྱི“ཐབས་མང་མཉམ་སྤྱོད”ཡག་པོ་བྱས་ནས་ཕུང་གསོག་ཐེབས་པའི་ནད་པ་ནུས་ཤུགས་ཡོད་རྒུས་སྐྱོབ་བཅོས་བྱེད་པ་དང་རིམས་ནད་མཆེད་ལམ་བཀག་ནས་འཕར་ཚད་ཚོད་འཛིན་ནན་པོ་བྱེད་དགོས། སྨན་བཅོས་སྲོག་སྐྱོབ་བྱ་རྒྱུ་དེ་ཐོག་མཐའ་བར་གསུམ་དུ་རིམས་ནད་སྔོན་འགོག་དང་ཚོད་འཛིན་གྱི་ལས་འགན་གལ་ཆེན་ཞིག་ཏུ་བརྩིས་ཏེ་སྨན་དོན་སྟོབས་ཤུགས་ཀྱི་ས་ཁོངས་སྤྱི་འདོམས་ལ་མུ་མཐུད་དམ་འཛིན་ཡག་པོ་བྱས་ནས། ཐོན་ཁུངས་དང་མི་ཤུགས་དགོས་མཁོ་ཆེ་ཤོས་ཀྱི་ས་གནས་དང་དགོས་གཏུགས་ཆེ་ཤོས་ཀྱི་ལས་དོན་ལ་གཏོང་དགོས། ཤེས་རྟོགས་དང་། བརྒྱུད་འདྲེན། ལོགས་བཀར། སྐྱོབ་བཅོས་བཅས་ཆད་ལུས་མེད་པར་སྦྲེལ་མཐུད་བྱེད་པའི་ལམ་སྲོལ་འཐུས་སྒོ་ཚང་དུ་བཏང་སྟེ། ཤེས་རྟོགས་བྱུང་བའི་ནད་དཔེར་དུས་ཐོག་ཏུ་བཀག་སྡོམ་བརྒྱུད་འདྲེན་དང་གཅིག་སྡུད་ལོགས་བཀར་གྱི་གསོ་རིག་ལྟ་ཞིབ་བྱ་ཐབས་དོན་འཁྱོལ་དང་། ནད་དཔེ་གནས་སའི་ཁུལ་ཆུང་དང་ཐོག་ཁང་སོགས་ལ་བཀག་སྡོམ་ཚོད་འཛིན་དོ་དམ་ནན་པོ་བྱས་ཏེ་ནད་དུག་མཆེད་ལམ་གང་མགྱོགས་མེད་པར་བཟོ་དགོས།