ཏོག་དབྱིབས་ནད་དུག་གསར་པའི་རིམས་འགོག་སྨན་ཁབ་རྒྱག་རྒྱུ་དེ་དགོས་གལ་ཧ་ཅང་ཆེན་པོ་ཞིག་རེད།
ཏོག་དབྱིབས་ནད་དུག་གསར་པའི་རྒྱུད་འགྱུར་སྲིན་ལ་མཚོན་ན། རྒྱལ་ཁབ་ཕྱི་ནང་གི་འབྲེལ་ཡོད་ཚན་རིག་ཞིབ་འཇུག་དང་རིམས་ནད་སྔོན་འགོག་དང་ཚོད་འཛིན་གྱི་ལག་ལེན་ལས་མངོན་པར། ད་ཡོད་ཀྱི་རིམས་འགོག་སྨན་ཁབ་ལ་སྔར་བཞིན་སྔོན་འགོག་དང་སྲུང་སྐྱོབ་ཀྱི་ནུས་པ་ཆེན་པོ་ལྡན་པ་སྟེ། ནད་དུག་མི་ཚོགས་ཁྲོད་དུ་ཁྱབ་པའི་ཉེན་ཁ་ཆུང་དུ་གཏོང་ཐུབ་པ་དང་། ནད་དུག་འགོས་པའི་མིའི་འགོས་ཁྱབ་ནུས་པ་ཆུང་དུ་གཏོང་ཐུབ་པ། ནད་དུག་འགོས་རྗེས་ནད་གཞི་ལྕི་པོ་ཐོན་ཚད་དང་ཤི་ཚད་དམའ་རུ་གཏོང་ཐུབ་པ་བཅས་རེད།
རིམས་འགོག་སྨན་ཁབ་བརྒྱབ་རྗེས་དུས་ཡུན་ཇི་ཙམ་ནང་འགོག་གཟུགས་ནུས་པ་ཐོན་གྱི་ཡོད་དམ།
དུས་འགོའི་ཏོག་དབྱིབས་ནད་དུག་གསར་པ་གསོད་པའི་སྨན་ཁབ་ཀྱི་ནད་ཐོག་ཚོད་ལྟའི་ཞིབ་འཇུག་ལས་མངོན་པར། ནད་དུག་གསོད་པའི་རིམས་འགོག་སྨན་ཁབ་ཐེངས་གཉིས་པ་བརྒྱབ་རྗེས་ཀྱི་གཟའ་འཁོར་གཉིས་ཀྱི་རྗེས་སུ་སྤྱིར་ན་སྨན་ཁབ་གཟེད་མཁན་མི་ཚོགས་ལ་ནད་འགོག་ཕན་འབྲས་ལེགས་ཙམ་ཐོན་གྱི་ཡོད།
ནད་འགོག་སྲུང་སྐྱོབ་ཀྱི་རྒྱུན་རིང་ཐུང་ཇི་ཙམ་ཡིན་ནམ།
ཏོག་དབྱིབས་ནད་དུག་གསར་པའི་རིམས་འགོག་སྨན་ཁབ་ལ་དམིགས་པའི་ནད་འགོག་སྲུང་སྐྱོབ་ཀྱི་རྒྱུན་རིང་ཐུང་ཇི་ཙམ་ཡིན་པ་སྔར་བཞིན་གྲངས་གཞི་བསྡུ་ལེན་བྱེད་བཞིན་ཡོད། ད་ཡོད་ཀྱི་གྲངས་གཞི་ལས་མངོན་གསལ། རྒྱུན་གཏན་གྱི་རིམས་འགོག་སྨན་ཁབ་དང་འདྲ་བར་ཏོག་དབྱིབས་ནད་དུག་གསར་པའི་སྨན་ཁབ་བརྒྱབ་རྗེས། དུས་ཚོད་རིང་པོ་སོང་བ་དང་བསྟུན་ནས་སྨན་ཁབ་བརྒྱབ་པའི་མིའི་གཟུགས་པོའི་ནང་གི་འགོག་གཟུགས་ཀྱི་ཆུ་ཚད་དེ་མཚུངས་ཀྱིས་དམའ་རུ་འགྲོ་ཡི་ཡོད།
འོན་ཀྱང་འགོག་གཟུགས་ཀྱི་ཆུ་ཚད་དམའ་རུ་སོང་བ་དེས་རིམས་འགོག་སྨན་ཁབ་ཀྱི་སྲུང་སྐྱོབ་ནུས་པ་མེད་པ་མཚོན་གྱི་མེད། དེ་ཆུ་ཚད་གང་འདྲ་ཞིག་ཏུ་སླེབས་ཚེ་སྲུང་སྐྱོབ་ཀྱི་ནུས་པ་མེད་པར་འགྱུར་གྱི་ཡོད་མིན་ཐད་མིག་སྔར་ད་དུང་གྲངས་གཞི་བསྡུ་རུབ་བྱས་ནས་ཞིབ་འཇུག་བྱེད་བཞིན་ཡོད།
རིམས་འགོག་སྨན་ཁབ་བརྒྱབ་རྗེས་སྔར་བཞིན་མི་སྒེར་གྱི་འགོག་སྲུང་ཡག་པོ་བྱེད་དགོས།
རིམས་འགོག་སྨན་ཁབ་རྒྱག་དགོས་ལ་ངེས་པར་དུ་གཟབ་ནན་གྱི་སྔོན་འགོག་དང་ཚོད་འཛིན་བྱ་ཐབས་ཀྱང་མཉམ་དུ་སྤྱོད་དགོས། ད་ལྟའི་དུས་སུ་ཚང་མའི་བདེ་འཇགས་ལ་འགན་སྲུང་བྱེད་ཆེད། ཏོག་དབྱིབས་ནད་དུག་གསར་པའི་རིམས་འགོག་སྨན་ཁབ་བརྒྱབ་རྗེས་ཚང་མས་མུ་མཐུད་མི་སྒེར་གྱི་འགོག་སྲུང་བྱེད་ཐབས་རྒྱུན་འཁྱོངས་བྱེད་དགོས་པ། དེའི་ནང་ཁ་རས་རྒྱག་པ་དང་། སྤྱི་ཚོགས་འབྲེལ་བའི་བར་ཐག་རྒྱུན་འཁྱོངས་བྱེད་པ། ལག་པ་ཡང་སེ་བཀྲུ་བ། རླུང་འགྲོ་ཡག་པོ་ཡོང་བ་སོགས་བྱེད་རྒྱུ་ཚུད་ཡོད།
མི་སྒེར་གྱི་ངོས་ནས་བཤད་ན། རིམས་འགོག་སྨན་ཁབ་བརྒྱབ་རྗེས་ཀྱི་སྲུང་སྐྱོབ་ཕན་འབྲས་ནི་100%མ་ཡིན་ལ་སྲུང་སྐྱོབ་རང་བཞིན་གྱི་འགོག་གཟུགས་ཐོན་པར་ཡང་དུས་ཚོད་ངེས་ཅན་ཞིག་དགོས། མི་ཚོགས་ཀྱི་ངོས་ནས་བརྗོད་ན་ནད་འགོག་གི་ནུས་པ་ཆགས་མེད་པའི་གནས་ཚུལ་འོག་ཏོག་དབྱིབས་ནད་དུག་གསར་པ་སྔར་བཞིན་འགོ་སླ་པོ་ཡོད།