ལྗོངས་ཏང་ཨུད་ཀྱི་གཅིག་གྱུར་བཀོད་སྒྲིག་དང་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་གྱི་བོད་ཀྱི་ལས་དོན་ཚོགས་ཆུང་གི་ཞིབ་ཕྲའི་མཛུབ་ཁྲིད་འོག་ཚེས་27ཉིན་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་གཏིང་སྐྱེས་རྫོང་དུ་ཞིབ་བཤེར་མཛུབ་ཁྲིད་གནང་བ་རེད།
མིག་སྔར། གཞིས་རྩེའི་རྫོང་9རུ་སྤྱི་ཚོགས་ཐོག་གི་རིམས་ནད་གཙང་སེལ་ཐུབ་ཡོད་པས་ཡན་ཅིན་ཧའེ་ཡིས་རྗེས་མཐུད་ཀྱི་སྔོན་འགོག་དང་ཚོད་འཛིན་ལས་དོན་སྤེལ་ཚུལ་ལ་དོ་ཁུར་ཆེན་པོ་གནང་གི་ཡོད། གཏིང་སྐྱེས་རྫོང་གི་ཕ་ཡུལ་དུ་ལོག་པའི་མང་ཚོགས་ཀྱི་བཀོད་སྒྲིག་ས་ཚིགས་དང་རྫོང་རིམས་ནད་སྔོན་འགོག་དང་ཚོད་འཛིན་བཀོད་འདོམས་པུའུ་རུ་ཁོང་གིས་ཕ་ཡུལ་དུ་ལོག་པའི་མང་ཚོགས་ལ་ཞབས་ཞུ་དོ་དམ་དང་། ཡུལ་སྐོར་བ་ཕྱིར་ལོག་ཞབས་ཞུ། གཙོ་གནད་ཁུལ་གྱི་དུག་སེལ་བཅས་དང་། དེ་བཞིན“སྟོན་གསུམ”གྱི་ལས་དོན་སྤེལ་ཚུལ་བཀའ་འདྲི་དང་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་འགོ་ཁྲིད་ལས་བྱེད་པས་འགན་འཁྲི་འཁུར་ཕོད་པ་དང་བྱ་སྤྱོད་མགྱོགས་པོ་སྤེལ་བ་དང་འབྲེལ། དོན་འཁྱོལ་ལ་དམ་འཛིན་ནན་པོ་བྱས་ཚེ་ལས་ཀའི་ཕན་འབྲས་ཡག་པོ་ཐོན་ངེས་རེད།
མ་གཞི་འདི་གར་སྤྱི་ཚོགས་ཐོག་གཙང་བཟོ་ཐུབ་ཡོད་མོད། འོན་ཀྱང་དེར་བློ་ཡིད་ཚིམ་པ་དང་སྤོབས་སེམས་གཏན་ནས་བྱེད་མི་རུང་བར། ངེས་པར་དུ་རིག་པ་དྭངས་གསལ་གྱི་སྒོ་ནས་སྤྱི་ཚོགས་ཐོག་གཙང་བཟོ་བྱུང་བ་ནི་ནད་དཔེ་གསར་པ་གཅིག་ཀྱང་ཐོན་མེད་པ་མ་ཡིན་ལ་ཉེན་ཁ་ཆུང་བ་དེ་ཉེན་ཁ་མེད་པ་མིན་པ་གསལ་པོར་ཤེས་དགོས། རིམས་ནད་སྔོན་འགོག་དང་ཚོད་འཛིན་གྱི་རྩ་བ་དེ་མུ་མཐུད་དམ་པོར་འཛིན་ནས་རིམས་ནད་སྔོན་འགོག་དང་ཚོད་འཛིན་གྱི་པར་མ་དགུ་པའི་བླང་བྱ་གཞིར་བཟུང་སྐབས་བསྟུན་དང་། གནད་སྨིན། ཚན་རིག་དང་མཐུན་པ་བཅས་ཀྱི་སྒོ་ནས་ཉེན་ཁའི་ཁུལ་དབྱེ་མཚམས་འབྱེད་པ་དང་། གཙོ་གནད་ཁུལ་གྱི་ཞབས་ཞུ་དོ་དམ་ལ་ཤུགས་སྣོན་རྒྱག་པ། ལྟ་ཞིབ་ཚད་ལེན་དང་ཉེན་བརྡ་གཏོང་ཤུགས་ཆེ་རུ་གཏོང་བ། སྤྱི་ཚོགས་ཐོག་གི་བྱེད་སྒོ་གོ་རིམ་ལྡན་པའི་ངང་སླར་གསོ་བྱེད་པ། རིམས་ནད་སྔོན་འགོག་དང་ཚོད་འཛིན་དང“སྟོན་གསུམ”གྱི་ལས་དོན་སྤྱི་འདོམས་ཀྱིས་ཡག་པོ་སྒྲུབ་པ་བཅས་བྱས་ནས་ལས་སླ་པོར་ཐོབ་པ་ཞིག་མིན་པའི་རིམས་འགོག་གྲུབ་འབྲས་དག་རྐང་རྗེས་ལག་སུབ་གཏན་ནས་གཏོང་མི་རུང་ཞེས་གསུངས་པ་རེད།
ཡན་ཅིན་ཧའེ་ཡིས་གཞིས་རྩེའི་གོང་འོག་ཚང་མས“སྐབས་བསྟུན་གཙང་བཟོའི”སྤྱིའི་མཛད་ཕྱོགས་ལ་གཡོ་འགུལ་མི་གཏོང་རྒྱུ་མཐའ་འཁྱོངས་ཀྱིས་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ལ་ངོ་རྒོལ་མཐའ་གཅིག་ཏུ་བྱས་ནས། དཀའ་སྤྱད་དངོས་སྒྲུབ་དང་བྱ་བ་ཧུར་ཐག་སྒྲུབ་པ་དང་། སྟོབས་ཤུགས་གཅིག་སྒྲིལ་གྱིས་སྔོན་འགོག་དང་ཚོད་འཛིན་བྱེད་ཤུགས་ཆེ་རུ་གཏོང་རྒྱུར་དམིགས་ནས་སྤྱི་ཚོགས་ཐོག་གཙང་བཟོ་སྔ་ཙམ་ཡོང་བ་བྱེད་དགོས། ལྷོད་གཡེང་སྤུ་ཙམ་ཡང་མི་གཏོང་བར་གནད་དོན་ཕྱོགས་སྟོན་དང་མཇུག་འབྲས་ཕྱོགས་སྟོན་དུ་འཛིན་རྒྱུ་མཐའ་འཁྱོངས་ཀྱིས་མང་ཚོགས་ཀྱི་འཚོ་བའི་དངོས་ཟོག་དང་སྨན་རྫས་སོགས་གཞི་རྩའི་འགན་ལེན་ལ་དམིགས་ཏེ་ཐབས་བརྒྱ་ཇུས་སྟོང་གིས་ཐག་གཅོད་མགྱོགས་པོ་དང་ཐག་གཅོད་ཡག་པོ་བྱེད་དགོས། ཐོག་མཐའ་བར་གསུམ་དུ་བཀག་སྡོམ་ལ་དམ་འཛིན་ནན་པོ་བྱས་ནས། ལས་དོན་སྡེ་ཁུལ་ལ་དམིགས་པ་དང་། གཙོ་གནད་སྡེ་ཁུལ་ལ་ཕྱོགས་པ། སྟོབས་ཤུགས་སྡེ་ཁུལ་ལ་ཕྱོགས་པ་བཅས་བྱ་རྒྱུ་མཐའ་འཁྱོངས་དང་། ཡུག་བགོས་ས་ཚིགས་འགན་ལེན་དང་འགན་འཁྲི་ནན་དུ་གཏོང་བ། སྡེ་ཁུལ་གྱི་སྐོར་སྐྱོད་ཞིབ་བཤེར་ལ་ཤུགས་སྣོན་རྒྱག་པ། རྒྱལ་སྒོ་དང་སྒོ་ཆུང་གཉིས་ཀར་དམ་འཛིན་བྱེད་པ། ཁྲིམས་འགལ་སྒྲིག་འགལ་ངང་ཕྱིར་འདུ་འཛོམས་བྱེད་པར་བསྐྱོད་པའི་བྱེད་སྤྱོད་ལ་ཞིབ་བཤེར་ཐག་གཅོད་ནན་པོ་བྱེད་པ་དང་འབྲེལ་དུས་ཐོག་དམར་རྗེན་དུ་འདོན་པ་བཅས་བྱས་ཏེ་ཟིལ་གནོན་གྱི་རྣམ་པ་ཞིག་ཆགས་པར་བྱེད་དགོས། ཐོག་མཐའ་བར་གསུམ་དུ་འགན་ལེན་ནུས་ལྡན་གྱིས་དངོས་ཟོག་གཏོང་འདྲེན་དང་། གསོག་འཇོག སྡེབ་སྐྱེལ་བཅས་ལ་ཤུགས་སྣོན་བརྒྱབ་ནས། མཁོ་སྤྲོད་འདང་ངེས་དང་འགན་ལེན་ནུས་ལྡན་ཐུབ་པར་བྱེད་པ་དང་། ལྷག་པར་དུ་སྐྱེལ་འདྲེན་གྱི་མཐའ་མའི་འགོག་རྐྱེན་སེལ་ཐུབ་པ་བྱས་ཏེ་དོན་འཁྱོལ་ཡག་པོ་མ་བྱུང་བའི་རིགས་ལ་སྔར་བཞིན་འགན་འཁྲི་བདའ་འདེད་ནན་པོ་གཏོང་དགོས། ཞབས་ཞུ་ལེགས་གཏོང་ཐད་ཐོག་མཐའ་བར་གསུམ་དུ་དམ་འཛིན་གྱིས་ཡུལ་སྐོར་བའི་བསམ་བློའི་ལས་དོན་དང་བདེ་འཇགས་སྒྱུར་སྐྱེལ་སོགས་ཀྱི་ལས་དོན་ཡག་པོ་བསྒྲུབས་ནས་བསམ་ཤེས་དང་རྒྱབ་སྐྱོར་ཐོབ་པར་བྱེད་པ་དང་། རང་སྐྱོང་ལྗོངས་ཀྱི་གཅིག་གྱུར་བཀོད་སྒྲིག་གཞིར་བཟུང་སློབ་འགོ་ཚུགས་པའི་སློབ་མའི་ཁྱིམ་བདག་གི་གནས་ཚུལ་དུད་ཚང་རེ་རེ་བཞིན་མཐིལ་རྟོགས་བྱས་ཏེ་སྲིད་ཇུས་དྲིལ་བསྒྲགས་དང་ཤེས་སུ་འཇུག་པ་དང་འབྲེལ་ཡོད་འབྲེལ་གཏུག་ཞབས་ཞུའི་ལས་དོན་ཡག་པོ་བསྒྲུབས་ནས་སློབ་མ་བདེ་འཇགས་དང་གོ་རིམ་ལྡན་པའི་ངང་བོད་ནས་ཐོན་པའི་བཀོད་སྒྲིག་བྱེད་པ། ལས་བྱེད་པ་དང་ལྷག་པར་དུ་བོད་སྐྱོར་སྨན་བཅོས་རུ་མི་དང་། འཐབ་ས་དང་པོའི་ལས་དོན་པ། དང་བླངས་པ་བཅས་ལ་སེམས་ཁུར་དང་གཅེས་སྐྱོང་བྱས་ཏེ་རེས་མོས་བྱས་ནས་ངལ་གསོ་གོ་རིམ་ལྡན་པའི་ངང་བཀོད་སྒྲིག་བྱེད་པ་དང་ཞབས་འདེགས་ཡག་པོ་ཞུ་བ་བཅས་བྱས་ནས་ཚང་མའི་དཀའ་སྤྱད་ལ་འབྲས་བུ་ཐོབ་པར་བྱེད་དགོས་པའི་ནན་བཤད་གནང་བ་རེད།