ཚེས་24ཉིན་གྱི་ཕྱི་དྲོ། རང་སྐྱོང་ལྗོངས་སྲིད་གཞུང་གསར་འགྱུར་གཞུང་དོན་ཁང་གིས་ཏོག་གསར་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གསར་འགྱུར་ཡོངས་བསྒྲགས་ཚོགས་འདུ་ཐེངས་བཅུ་དྲུག་པ་འཚོགས་ནས། རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གནས་ཚུལ་གསར་ཤོས་བརྡ་ཁྱབ་བཏང་བ་དང་། རིམས་ནད་སྔོན་འགོག་དང་ཚོད་འཛིན་བྱེད་རིང་དཀའ་ངལ་ཡོད་པའི་མང་ཚོགས་ཀྱི་གཞི་རྩའི་འཚོ་བ་འགན་སྲུང་ལས་དོན་སྤེལ་ཚུལ་ངོ་སྤྲོད་བྱས་པ་རེད།

ངོ་སྤྲོད་བྱས་པར་གཞིགས་ན། ཟླ་8ཚེས་23ཉིན་གྱི་ཆུ་ཚོད་0ནས་24བར། ལྗོངས་ཡོངས་སུ་ཡུལ་དེ་གའི་ཏོག་གསར་གློ་ཚད་རིམས་ནད་གཏན་འཁེལ་ནད་དཔེ་23(ལྷ་ས་གྲོང་ཁྱེར་ལ་ནད་དཔེ་10དང་། གཞིས་རྩེ་གྲོང་ཁྱེར་ལ་ནད་དཔེ་1 ཉིང་ཁྲི་གྲོང་ཁྱེར་ལ་ནད་དཔེ་12)མང་དུ་ཕྱིན་པ་དང་། རྟགས་མེད་ནད་དུག་འགོས་པ་543(ལྷ་ས་གྲོང་ཁྱེར་ལ་194དང་། གཞིས་རྩེ་གྲོང་ཁྱེར་ལ་186 ལྷོ་ཁ་གྲོང་ཁྱེར་ལ་30 ཉིང་ཁྲི་གྲོང་ཁྱེར་ལ་27 ཆབ་མདོ་གྲོང་ཁྱེར་ལ་11 ནག་ཆུ་གྲོང་ཁྱེར་ལ་48 མངའ་རིས་ས་ཁུལ་ལ་47)མང་དུ་ཕྱིན་ཡོད་པ་རེད།

ཟླ་8ཚེས་24ཉིན་གྱི་ཆུ་ཚོད་0ནས་14བར། ལྗོངས་ཡོངས་སུ་ཡུལ་དེ་གའི་ཏོག་གསར་གློ་ཚད་རིམས་ནད་གཏན་འཁེལ་ནད་དཔེ་12(ཉིང་ཁྲི་གྲོང་ཁྱེར་ལ་ནད་དཔེ་8དང་། ནག་ཆུ་གྲོང་ཁྱེར་ལ་ནད་དཔེ་3 མངའ་རིས་ས་ཁུལ་ལ་ནད་དཔེ་1)མང་དུ་ཕྱིན་པ་དང་། རྟགས་མེད་ནད་དུག་འགོས་པ་158 (ལྷ་ས་གྲོང་ཁྱེར་ལ་35དང་། གཞིས་རྩེ་གྲོང་ཁྱེར་ལ་52 ལྷོ་ཁ་གྲོང་ཁྱེར་ལ་22 ཉིང་ཁྲི་གྲོང་ཁྱེར་ལ་4 ཆབ་མདོ་གྲོང་ཁྱེར་ལ་5 ནག་ཆུ་གྲོང་ཁྱེར་ལ་22 མངའ་རིས་ས་ཁུལ་ལ་18)མང་དུ་ཕྱིན་ཡོད་པ་རེད།

ཟླ་8ཚེས་23ཉིན་གྱི་ཆུ་ཚོད་24བར། ལྗོངས་ཡོངས་སུ་ཁྱོན་ཉེན་ཁ་ཆེ་བའི་ཁུལ་543དང་ཉེན་ཁ་འབྲིང་བའི་ཁུལ་280ཡོད་པ་རེད།

ཟླ་8ཚེས་23ཉིན་གྱི་ཆུ་ཚོད་24བར། ལྗོངས་ཡོངས་སུ་ནད་པ་83དྲག་སྐྱེད་བྱུང་སྟེ་སྨན་ཁང་ནས་དོན་པ་དང་། རྟགས་མེད་ནད་དུག་འགོས་པ་1718(སྒྲོམ་ཚང་སྨན་ཁང་ནས་དོན་པ)ལོགས་བཀར་གསོ་རིག་བརྟག་དཔྱད་བྱེད་མཚམས་བཞག་པ། ཐད་འབྲེལ་པ་3878གཅིག་སྡུད་ལོགས་བཀར་གསོ་རིག་བརྟག་དཔྱད་བྱེད་མཚམས་བཞག་པ། མིག་སྔར། ནད་པ་47622ལོགས་བཀར་བརྟག་དཔྱད་བྱེད་བཞིན་ཡོད་པ་རེད།

རང་སྐྱོང་ལྗོངས་སྲིད་གཞུང་གི་དྲུང་ཆེ་གཞོན་པ་ཆོས་དར་གྱིས་གསུངས་དོན། རིམས་ནད་ལ་སྙིང་རྗེ་མེད་ཀྱང་མི་ཡུལ་དུ་བརྩེ་སེམས་ཀྱིས་ཁེངས་ཡོད། དཀའ་ངལ་ཇི་ཙམ་ཆེ་བའི་དུས་སུ་དཀའ་ངལ་ཡོད་པའི་མང་ཚོགས་ལ་དེ་ཙམ་ལྟ་སྐྱོང་ཡག་པོ་བྱེད་དགོས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་བློ་ལ་བརྟན་པོར་བཅངས་ནས་མི་དམངས་ལྟེ་བར་འཛིན་རྒྱུ་མཐའ་འཁྱོངས་ཀྱིས་དཀའ་ངལ་ཡོད་པའི་མང་ཚོགས་ཀྱི་འགན་ལེན་ལས་དོན་སེམས་ལ་འཇོག་པ་དང་གཙོ་ཆེ་ཤོས་སུ་བརྩིས་ཡོད། ཟླ་8ཚེས་10ཉིན《རིམས་ནད་སྔོན་འགོག་ཚོད་འཛིན་བྱེད་རིང་དཀའ་ངལ་ཡོད་པའི་མང་ཚོགས་ཀྱི་གཞི་རྩའི་འཚོ་བ་འགན་ལེན་གྱི་ལས་དོན་ཡག་པོ་བསྒྲུབ་རྒྱུའི་སྐོར་གྱི་ཛ་དྲག་བརྡ་ཐོ》བཀྲམ་ནས་བྱེད་ཐབས་བརྒྱད་བཏོན་ཏེ་རིམས་ནད་རིང་དཀའ་ངལ་ཡོད་པའི་མང་ཚོགས་ཀྱི་གཞི་རྩའི་འཚོ་བ་འགན་ལེན་བྱེད་པ་དང་། དཀའ་ངལ་ཡོད་པའི་མང་ཚོགས་དང་གནད་སྨིན་འབྲེལ་མཐུད་བྱས་ཏེ་དཀའ་ངལ་གྱི་རིགས་དང་དཀའ་ཚད་གཞིར་བཟུང་རིགས་དབྱེ་ཅན་དང་ཧེ་བག་ཅན་གྱི་རོགས་སྐྱོབ་བྱེད་པ། མ་མཐའི་འཚོ་བ་འགན་ལེན་བྱ་ཡུལ་དང་དམིགས་བསལ་དཀའ་ངལ་ཡོད་པའི་མི་སྣ་རེར་སྤྲོད་ཐེངས་གཅིག་ལ་འཚོ་བའི་ཁ་གསབ་སྒོར་600དུས་ཐོག་ཏུ་གྲངས་ཚང་ངང་སྤྲོད་པ། ཏོག་གསར་རིམས་ནད་རྐྱེན་གྱིས་གཞི་རྩའི་འཚོ་བར་དཀའ་ངལ་ཆེན་པོ་འཕྲད་པའི་ཁྱིམ་ཚང་དང་མི་སྒེར་གནས་སྐབས་རོགས་སྐྱོབ་བྱེད་ཁོངས་སུ་འཇུག་རྒྱུ་ཕྱི་ཕྱོགས་ནས་ཡོང་བའི་མི་སྣར་རོགས་སྐྱོབ་བྱ་རྒྱུར་ཤུགས་སྣོན་རྒྱག་པ། རིམས་ནད་སྔོན་འགོག་ཚོད་འཛིན་བྱེད་རིང་གི་རོགས་སྐྱོབ་སྔོན་ཇུས་འཐུས་ཚང་དུ་བཏང་ནས་ཆེད་མིས་ཆུ་ཚོད་24རིང“12349”ཡི་སྤྱི་ཚོགས་རོགས་སྐྱོབ་ཞབས་ཞུའི་ཐད་སྦྲེལ་ཁ་པར་བསྲུངས་ནས་རིམས་ནད་སྔོན་འགོག་ཚོད་འཛིན་དང་སྤྱི་ཚོགས་རོགས་སྐྱོབ་གཉིས་ཀར་འཐུས་ཤོར་མི་ཡོང་བའི་འགན་ལེན་བྱེད་དགོས་པ་བཅས་རེད།

རང་སྐྱོང་ལྗོངས་དམངས་སྲིད་ཐིང་གི་ཐིང་ཀྲང་གཞོན་པ་ཉིའུ་ཡུས་ཀྲི་ཡིས། རང་སྐྱོང་ལྗོངས་ཏང་ཨུད་དང་སྲིད་གཞུང་གི་གཅིག་གྱུར་བཀོད་སྒྲིག་གཞིར་བཟུང་། ལྗོངས་ཡོངས་ཀྱི་རིམ་ཁག་དམངས་སྲིད་སྡེ་ཚན་གྱིས་མཐའ་ཚད་ཀྱི་བསམ་བློ་བརྟན་པོ་འཛུགས་པ་དང་སྤྱི་ཚོགས་རོགས་སྐྱོབ་ཀྱི་འགན་འཁྲི་ཁྱོན་ཡོངས་ནས་དོན་འཁྱོལ་བྱས་ཏེ། དཀའ་ངལ་ཆེ་ཤོས་ཡོད་པའི་ཚོགས་སྤྱིར་དམིགས་ནས་ཆེས་གཞི་རྩའི་འཚོ་བ་འགན་ལེན་བྱས་ཡོད། ཟླ་8ཚེས་23ཉིན་གྱི་ཆུ་ཚོད་18བར་ལྗོངས་ཡོངས་ཀྱི་རིམ་ཁག་དམངས་སྲིད་སྡེ་ཚན་གྱིས་གྲོང་ཁྱེར་དང་གྲོང་གསེབ་ཀྱི་མ་མཐའི་འཚོ་བ་འགན་ལེན་དང་དམིགས་བསལ་དཀའ་ངལ་ཡོད་པའི་མི་སྣ་162899ལ་སྤྲོད་ཐེངས་གཅིག་ལ་ཁ་གསབ་སྒོར་ཁྲི་5034.22སྤྲད་པ་རེད། རོགས་སྐྱོབ་ཀྱི་ཆ་རྐྱེན་འཛོམས་པའི་དཀའ་ངལ་ཡོད་པའི་མང་ཚོགས་7270ཡི་གཞི་རྩའི་འཚོ་བའི་དངོས་ཟོག་ཐག་གཅོད་བྱས་ཤིང་། དེ་མི་དམངས་ཤོག་སྒོར་ལ་ཕབ་ན་ཁྱོན་སྒོར་ཁྲི་181.8ཟིན་པའི་ནང་དཀའ་ངལ་ཡོད་པའི་མང་ཚོགས་2452ནི་བོད་དུ་ལུས་པའི་མི་སྣ་དང་ཕྱི་ནས་གླ་པར་ཡོང་མཁན་ཡིན་པ་རེད།

རང་སྐྱོང་ལྗོངས་སྡོད་ཁང་འཛུཌ་སྐྲུན་ཐིང་ཏང་ཙུའུ་ཡི་ཁོངས་མི་ཐིང་ཀྲང་གཞོན་པ་ཡུས་དབྱང་གིས་ངོ་སྤྲོད་གནང་དོན། འདི་ལོ་ལྗོངས་ཡོངས་སུ་ཁང་གླ་སྒོར་དུང་ཕྱུར་4.7ཆག་ཡང་བཏང་བ་དེས་ཚོང་དུད་8574(དེའི་ནང་ས་ཁང་ཐོན་ལས་གསར་སྤེལ་ཁེ་ལས་ཁོངས་གཏོགས་ཀྱི་ཚོང་སྒྱུར་སྡོད་ཁང་ལ་ཟླ་བ་6རིང་གི་ཁང་གླ་ཆག་ཡང་དང་རྩ་ཆག་སྒོར་དུང་ཕྱུར་3.44བཏང་བས་ཚོང་དུད་4827ལ་ཕན་པ་ཐོབ་པ)ལ་ཕན་པ་ཐོབ་པ་རེད། ཟླ་གསུམ་རིང་ཞབས་ཞུའི་ལས་རིགས་ཀྱི་ཕྲན་ཚེགས་ཁེ་ལས་དང་སྒེར་གཉེར་ཚོང་དུད་ཀྱིས་བོགས་མར་བླངས་པའི་གཞུང་ཁོངས་སྡོད་ཁང་གི་ཁང་གླ་སྒོར་དུང་ཕྱུར་1.26ཆག་ཡང་དང་རྩ་ཆག་བཏང་བས་ཚོང་དུད་3747ལ་ཕན་པ་ཐོབ་ཡོད་པ་རེད། གོམ་སྟབས་རྗེས་མར་རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གིས་གཤམ་གསལ་ཕྱོགས་གསུམ་ཐད་ནས་ལས་དོན་ཡག་པོ་བསྒྲུབ་རྒྱུ་སྟེ། གཅིག་ནས་2022ལོའི་གཞུང་ཁོངས་སྡོད་ཁང་གི་ཟླ་བ་དྲུག་རིང་གི་ཁང་གླ་ཆག་ཡང་དང་རྩ་ཆག་གཏོང་བའི་ལས་དོན་སྔ་ཙམ་ཡག་པོ་བསྒྲུབས་ནས་མུ་མཐུད་ཡིད་རྟོན་སྐར་གྲངས་དང་། ཁྲལ་བསྡུ་ཆག་ཡང་དང་རྩ་ཆག གཟིགས་སྐྱོང་དངུལ་གཡར་སོགས་ཀྱི་ལྕག་སྐུལ་བྱེད་ཐབས་ལ་བརྟེན་ཏེ། ཁེ་ལས་དང་དེ་བཞིན་ཁང་པ་གཡར་མཁན་གཞན་གྱིས་རང་འགུལ་ངང་ཁང་པ་གཡར་སའི་ཚོང་དུད་ཀྱི་ཁང་གླ་ཆག་ཡང་དང་རྩ་ཆག་བཏང་ནས་རིམས་ནད་ཀྱི་ཤུགས་རྐྱེན་ངན་པར་མཉམ་དུ་ཁ་གཏད་གཅོག་དགོས་པའི་ཁྲིད་སྟོན་བྱེད་དགོས་པ་དང་། གཉིས་ནས་རྒན་གསོ་བཅོལ་ཉར་གྱི་ཁེ་ལས་འབྲིང་ཆུང་ཕྲན་གསུམ་དང་ཁེར་རྐྱང་ཚོང་དུད་ཀྱིས་གཞུང་ཁོངས་ཁང་པ་གཡར་རིགས་ལ་ཁང་གླ་ལོ་མཇུག་བར་རྦད་དེ་རྩ་ཆག་གཏོང་དགོས་པ། གསུམ་ནས་ཁང་གླ་རྩ་ཆག་དང་ཆག་ཡང་གཏོང་བའི་སྲིད་ཇུས་དང་བྱེད་ཐབས་དྲིལ་བསྒྲགས་རྒྱ་ཁྱབ་བྱས་ནས་ཁྱབ་ཁྱོན་སྔར་བས་ཆེ་རུ་དང་ཀུན་གྱིས་ཤེས་ཚད་མཐོ་རུ་བཏང་སྟེ། ཁང་གླ་ཆག་ཡང་དང་རྩ་ཆག་གཏོང་བའི་སྲིད་ཇུས་དོན་འཁྱོལ་ཞིབ་ཕྲ་བྱེད་དགོས་པའི་འགན་ལེན་བྱེད་དགོས་པ་བཅས་རེད།