ཟླ་8ཚེས་14ཉིན་གྱི་ཆུ་ཚོད་15དང་སྐར་མ་30ཙམ་ལ་རྒྱལ་རྩེ་རྫོང་གཙང་ཁ་ཤང་འཕྲོད་བསྟེན་ཁང་གི་སྨན་པ་བསོད་ནམས་ཕུན་ཚོགས་དང་ཁོང་གི་ལས་རོགས་ཚོ་སྔར་རྒྱུན་བཞིན་རྫོང་འཕྲོད་བསྟེན་བདེ་ཐང་ཨུ་ལྷན་དུ་རེས་སྐོར་གསུམ་པའི་ཉིང་སྐྱུར་དངོས་ཟོག་ལེན་པར་སླེབས་ཡོད། སྟབས་མ་ལེགས་པ་ཞིག་ལ་ཁོང་ཚོ་ཕྱིར་ལོག་པའི་སྐབས་འགྲིམ་འགྲུལ་ལས་འཛོལ་ཐོན་ནས་བསོད་ནམས་ཕུན་ཚོགས་དང་མཉམ་དུ་ཡོད་པའི་སྨན་དོན་མི་སྣ་གཉིས་ལ་ཚད་གཞི་མི་འདྲ་བའི་རྨས་སྐྱོན་ཕོག་པའི་ནང་བསོད་ནམས་ཕུན་ཚོགས་མཚེར་པ་ཐོར་ནས་རྨས་སྐྱོན་ཚབས་ཆེན་ཕོག་སྟེ་ཉེན་ཁ་ཆེ་བའི་གནས་སུ་ལྷུངས།

འགྲིམ་འགྲུལ་ལས་འཛོལ་ཐོན་རྗེས་བསོད་ནམས་ཕུན་ཚོགས་ཀྱིས་རང་ཉིད་ཀྱི་ཉེན་ཁར་མ་བལྟོས་པར་འཕྲལ་མར་ལས་རོགས་གཉིས་པོར་རྨ་རས་དཀྲིས་པ་དང་རང་ཉིད་ཀྱིས་སྡུག་རུས་བྱས་ཏེ་ཉིང་སྐྱུར་དངོས་རྫས་བསྲུངས་ནས་བསྡད། ཤང་གི་སྨན་དོན་མི་སྣ་སླེབས་རྗེས་ཁོང་གིས་རེས་སྐོར་གསུམ་པའི་ཉིང་སྐྱུར་མ་དཔེ་བསྡུ་ལེན་གྱི་ཚོད་ལྟའི་ཤེལ་སྦུག་དང་ཨང་རྟགས་རྩིས་སྤྲད་རྗེས་གང་མགྱོགས་སྐྱེལ་དགོས་ཞེས་ཡང་ཡང་བཤད།

གཤགས་བཅོས་བྱས་རྗེས་ཀྱི་ཉིན་གཉིས་པར་དྲན་པ་གསོས་མ་ཐག་པའི་བསོད་ནམས་ཕུན་ཚོགས་ཀྱིས་ནད་ཁྲིའི་འགྲམ་གྱི་ལས་རོགས་མཐོང་འཕྲལ་བཤད་པའི་སྐད་ཆ་དང་པོ་ཤང་ནང་གི་རིམས་ནད་སྔོན་འགོག་དང་ཚོད་འཛིན་གྱི་གནས་ཚུལ་དྲིས་པ་མ་ཟད། ལས་རོགས་ལ“ད་ལྟ་ནི་དམིགས་བསལ་གྱི་དུས་ཚོད་ཡིན་པས་འདི་གར་ཁྱེད་ཚོས་ང་ལ་རོགས་པ་བྱས་ནས་སྡོད་མི་དགོས། ང་སྐྱོན་མི་འདུག ཁྱེད་ཚོ་གང་མགྱོགས་ཤང་ལ་ལས་ཀ་བྱེད་པར་ཕེབས”ཞེས་བཤད།

མིག་སྔར། བསོད་ནམས་ཕུན་ཚོགས་དྲག་སྐྱེད་ཡག་པོ་བྱུང་བ་དང་། ཁོང་གིས“ང་གང་དུ་ཡོད་པ་དང་ལས་ཀ་གང་ཞིག་བྱས་རུང་ང་ནམ་ཡང་ཏང་ཡོན་ཞིག་ཡིན་པས་མི་དམངས་ལ་ཞབས་འདེགས་ཞུ་རྒྱུ་ནི་ངས་སྒྲུབ་འོས་པའི་འགན་འཁྲི་ཞིག་ཡིན། རིམས་ནད་འགོག་རྒོལ་ལ་ཞུགས་ནས་རང་ཉིད་ཀྱིས་སེམས་ནུས་པ་ཕྲན་བུ་འདོན་རྒྱུ་བྱུང་བ་ནི་ངའི་གཟི་བརྗིད་ཡིན”ཞེས་བློ་རྩ་བརྟན་པོའི་ངང་བཤད།