ཚེས་23ཉིན་གྱི་སྔ་དྲོར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་བཀོད་གཏོང་གནང་ནས། ནུས་ཤུགས་ཡོད་རྒུས་མིག་སྔའི་རིམས་ནད་སྔོན་འགོག་དང་ཚོད་འཛིན་དང་འཕྲལ་སྡོམ་ཐག་གཅོད་ཡག་པོ་བྱེད་པའི་ཐད་སླར་ཡང་སྐུལ་སློང་དང་བཀོད་སྒྲིག་གནང་བ་རེད།

ཚོགས་ར། 

ཝང་ཅུན་ཀྲེང་གིས་གསུངས་དོན། རྒྱ་ཆེའི་ཏང་ཡོན་ལས་བྱེད་པས་ནད་དུག་དང་འཐབ་རྩོད་བྱེད་རིང་ཡིད་ཆེས་དང་ཆོད་སེམས་བརྟན་དུ་བཏང་ནས། རིག་པ་དྭངས་གསལ་མཐའ་འཁྱོངས་དང་། ཐོག་མཐའ་བར་གསུམ་དུ་གདེང་ཚོད་ཡོད་པ། ཞུམ་མེད་ཀྱི་འཐབ་སེམས་འཕེལ་བར་བྱེད་པ། ལས་དོན་ལག་བསྟར་བྱེད་ཤུགས་སྔར་བས་ཆེ་རུ་གཏོང་བ། སྔོན་འགོག་དང་ཚོད་འཛིན་གྱི་བྱ་ཐབས་ཆད་ལུས་མེད་པར་དོན་འཁྱོལ། ཉེན་ཁ་དང་མངོན་མེད་རྐྱེན་ངན་སྣ་ཚོགས་ཐོན་བཟོ་ཡོད་དུས་ནས་མེད་པར་བཟོ་བ། འབད་འཐབ་ལ་བརྟེན་ནས་བཅོས་སྐྱོང་ལ་སྐུལ་འདེད་གཏོང་བ་དང་ནུས་པ་དང་ཆུ་ཚད་མཐོ་རུ་ནུས་ལྡན་གཏོང་བ་བཅས་བྱས་ཏེ་རིམས་ནད་མ་མཆེད་སྔོན་འགོག་མཐའ་གཅིག་ཏུ་བྱེད་དགོས། 

ཝང་ཅུན་ཀྲེང་གིས་ནན་བཤད་གནང་དོན། མིག་སྔར་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་ཐད་ད་དུང་གནད་དོན་འགའ་ཡོད་པ་དེ་དག་མདོར་བསྡུས་ནས་བཤད་ན་ལག་བསྟར་བྱེད་ནུས་མི་འདང་བས་རེད། རིམ་ཁག་འགོ་ཁྲིད་ལས་བྱེད་པས་ངེས་པར་དུ་ཚད་མཐོའི་མཐོང་ཆེན་བྱེད་དགོས་ཤིང་། “ལས་བྱེད་པས་ལས་དོན་སྒྲུབ་པ་དང་ལས་དོན་སྒྲུབ་ཐུབ་པའི”འདུ་ཤེས་བློ་ལ་བརྟན་པོར་བཅངས་ཏེ་འགྲན་སློང་དྲག་པོའི་མདུན་དུ་ངེས་པར་དུ་ནན་པོ་དང་བྱ་སྤྱོད་མགྱོགས་མྱུར་སྤེལ་བ་དང་། ཏན་ཏིག་ཨང་དང་པོར་འཇོག་པ་དང་དངོས་སྒྲུབ་གཙིགས་ཆེར་འཛིན་པ། རང་འགན་ནན་སྒྲུབ་དང་རང་འགན་གཙང་སྒྲུབ་བྱེད་པ། ཉེན་ཁ་ཆེ་བའི་ལས་འགན་ལྕི་པོ་རང་འགུལ་ངང་འཁུར་བ། མངོན་གསལ་དོད་པའི་གནད་དོན་ཐག་གཅོད་ཧུར་ཐག་བྱེད་པ། རིམས་ནད་སྔོན་འགོག་དང་ཚོད་འཛིན་གྱི་འཐབ་རྩོད་བྱེད་རིང་རང་འགུལ་ངང་སྦྱོང་བརྡར་དང་ཉམས་སད་ཐེག་ཐུབ་པ་བཅས་བྱས་ནས་གོ་གནས་གང་ཞིག་བཟུང་ན་དེ་ཡི་སྲིད་དོན་སྒྲུབ་ཐུབ་པར་བྱེད་དགོས། སྤྱི་ཡོངས་ལ་སྣང་ཆེན་དང་དོན་ཆེན་ལ་དམིགས་ཏེ་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོ་ནས་ཕུལ་བྱུང་ལས་བྱེད་པ་དང་ཤེས་ལྡན་མི་སྣ་འཚོལ་ཞིབ་བྱེད་པར་སྣང་ཆེན་དང་། རིམས་ནད་སྔོན་འགོག་དང་ཚོད་འཛིན་གྱི་ལས་དོན་སྤེལ་རིང་སྤྱོད་ཚུལ་བརྟན་པོ་མེད་པ་དང་། སྣང་མེད་དུ་གཏོང་བ། གཡོལ་ཐབས་བྱེད་པ། ཁག་འགན་དཀྲི་རེས་བྱེད་པ་སོགས་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་བཀག་འགོག་མཐའ་གཅིག་ཏུ་བྱེད་པ། “བཤད་པ་བསྒྲུབས་པར་བརྩི་བ་དང་བསྒྲུབས་པ་ཡག་པོ་བསྒྲུབས་པར་བརྩི་བའི”སྣང་ཚུལ་བཀག་འགོག་མཐའ་གཅིག་ཏུ་བྱེད་པ། ལས་བྱེད་པ་འགའ་ཞིག་གིས་རིམས་འགོག་གི་ལས་དོན་སྤེལ་རིང་རྣམ་པ་དང་ཕྱི་ཚུལ་ཙམ་སྟོན་པར་ངོ་རྒོལ་མཐའ་གཅིག་ཏུ་བྱེད་པ། རིམས་ནད་སྔོན་འགོག་དང་ཚོད་འཛིན་བྱེད་སྐབས་དོན་འཁྱོལ་ལ་དམ་འཛིན་ནན་པོ་དང་ལྷོད་གཡེང་གཏོང་མི་རུང་བའི་བརྡ་རྟགས་དྲག་པོ་རྒྱུན་མཐུད་བཏང་ནས། རྒྱ་ཆེའི་ཏང་ཡོན་ལས་བྱེད་པ་ཚོར་དཀའ་ཚེགས་ཆེན་པོའི་ཁྲོད་དུ་ཉམས་སད་ཐེག་ཐུབ་པ་དང་དམག་འཐབ་ཆེན་པོའི་ནང་དུ་འགན་འཁྲི་མངོན་ཐུབ་པར་བྱེད་དགོས་པའི་ལྕག་སྐུལ་གནང་བ་རེད། 

ཝང་ཅུན་ཀྲེང་གིས་ནན་བཤད་གནང་དོན། གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་ཀྱིས་ལས་ཀའི་གཙོ་གནད་མངོན་པར་བྱས་ཏེ་རིགས་དབྱེ་མཛུབ་ཁྲིད་དང་ཚན་རིག་དང་མཐུན་པའི་ངང་ཇུས་བསྟར་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་བྱ་ཐབས་ཞིབ་ཅིང་ཕྲ་བའི་ངང་དོན་འཁྱོལ་ཡག་པོ་བྱེད་དགོས། གནད་དོན་ཤེས་རྟོགས་དང་གནད་དོན་ཐག་གཅོད་བྱེད་པའི་ཐད་ཤུགས་བརྒྱབ་སྟེ་ཐོན་མ་ཐག་དང་། གཞི་རིམ། ཞིབ་ཕྲ་བཅས་ནས་དམ་འཛིན་བྱེད་པ་དང་། རིགས་དབྱེ་རིམ་དབྱེའི་ངང་དོ་དམ་བྱེད་པར་ཤུགས་སྣོན། ཁུལ་དབྱེ་ཡུག་དབྱེ་བྱས་ནས་འགན་འཁྲི་ནན་དུ་གཏོང་བ། རིམས་ནད་སྔོན་འགོག་དང་ཚོད་འཛིན་ལས་དོན་གྱི་ཞན་ཆའི་ལྷུ་ཚིགས་དང་འགག་གནད་གཙོ་གནད་དུ་འཚོལ་ཞིབ་དང་ཐག་གཅོད་བྱེད་པ། དུས་ཐོག་ཏུ“ཁབ་མིག་ཆེན་པོ”བཀག་པ་བཅས་བྱས་ནས་ཉེན་ཁ་ཆུང་གྲས་གནད་དོན་ཆེན་པོར་མ་གྱུར་སྔོན་འགོག་བྱེད་དགོས། དམིགས་ཚད་ཀྱི་སྟོན་ཕྱོགས་ལ་ཤུགས་སྣོན་བརྒྱབ་སྟེ་ས་གནས་ཁག་གི་དོན་དངོས་དང་ཟུང་འབྲེལ་གྱིས་དོན་ཐོག་ཏུ་འཁྱོལ་ཐུབ་ངེས་ཀྱི་བྱ་ཐབས་སྤྱད་དེ་ལེགས་ཆའི་སྟོབས་ཤུགས་གཅིག་སྡུད་དང་། ཡུག་དབྱེ་ཚར་གཅོད་དང་རེ་རེ་བཞིན་འགག་སྒྲོལ། འགག་སྒྲོལ་མགྱོགས་སུ་གཏོང་བ་བཅས་བྱས་ནས “གཙང་བཟོའི་དམིགས་ཚད”ཕྱོགས་སུ་གདོང་མཆོང་བྱེད་དགོས། ནུས་ཤུགས་ཡོད་རྒུས་ལས་ཕྱོད་ཆེ་རུ་བཏང་སྟེ་ལྷུ་ཚིགས་ཡོངས་ལ་རང་བཤེར་རང་བཅོས་བྱེད་པ་དང་། སྤྱི་ཚོགས་དོ་དམ་ཚོད་འཛིན་དང་བཀག་སྡོམ་ཚོད་འཛིན་དང་། རིམས་དཔྱད་ཁུངས་འདེད། ཉིང་སྐྱུར་བརྟག་དཔྱད། གདགས་གཤིས་འཚོལ་བཤེར་དང་ལོགས་བཀར་སོགས་སྔོན་འགོག་དང་ཚོད་འཛིན་བྱ་ཐབས་སྔར་བས་ལེགས་སུ་བཏང་ནས་རིམས་ནད་སྔོན་འགོག་དང་ཚོད་འཛིན་ཚན་རིག་ཅན་དང་ཞིབ་ཕྲ་ཅན་གྱི་ཆུ་ཚད་མཐོ་རུ་གཏོང་དགོས། རིམ་ཁག་སྡེ་ཚན་ཁག་དང་ལས་རིགས་ཁག་གི་འགན་འཁྲི་ནན་དུ་བཏང་ནས་རང་འགན་རང་འཁུར་དང་རང་འགན་གཙང་སྒྲུབ་ཀྱིས་ལས་ཀའི་གཙོ་གནད་མངོན་གསལ་དོད་པོ་ཡོང་བ་དང་། སྨན་ཁང་དང་། སློབ་གྲྭ དགོན་སྡེ། རྒན་གསོ་ཁང་། ཕན་བདེ་ཁང་། བཙོན་ཁང་སོགས་མི་ཚོགས་སྟུག་སར་དམ་པོར་དམིགས་པ་དང་། གཙོ་གནད་ས་ཁོངས་དང་། གཙོ་གནད་ཁྱབ་ཁོངས། གཙོ་གནད་ལས་རིགས་བཅས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཏན་ཏིག་སྒྲུབ་པ། སྟོབས་ཤུགས་གཅིག་སྒྲིལ་གྱིས་ཚར་གཅོད་དམག་འཐབ་རྒྱག་པ་བཅས་བྱས་ནས་མཐའ་གསལ་མཐིལ་རྟོགས་གང་མགྱོགས་ཐུབ་པར་བྱེད་དགོས། རིམས་ནད་སྔོན་འགོག་ཚོད་འཛིན་དང་སྤྱི་ཚོགས་བརྟན་ལྷིང་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤྱི་འདོམས་བྱས་ཏེ་མང་ཚོགས་ལ་སྟོན་ཁའི་རྨོ་འདེབས་བསྡུ་གསུམ་གྱི་ལས་དོན་སྒྲུབ་རོགས་ཧུར་ཐག་བྱེད་པ་དང་། རིམས་འགོག་གིས་སོ་ནམ་གྱི་དུས་ཚོད་ལ་ཤུགས་རྐྱེན་མི་ཐེབས་པར་བྱས་ནས་གཉིས་ཀར་འཐུས་ཤོར་མི་ཡོང་བ་དང་གཉིས་ཀར་སྐུལ་མ་ཐེབས་པའི་འགན་ལེན་ཏན་ཏིག་བྱེད་དགོས། དོ་དམ་ཚོད་འཛིན་བྱ་ཐབས་ནན་དུ་གཏོང་བ་དང་བཀག་སྡོམ་དོ་དམ་ལ་ཤུགས་སྣོན་བརྒྱབ་ནས། ཁུག་གསང་སྟོང་གསུམ་མི་ལུས་པ་དང་རིམས་ནད་མ་མཆེད་སྔོན་འགོག་མཐའ་གཅིག་ཏུ་བྱས་ཏེ། དོ་དམ་ཚོད་འཛིན་གྱི་བྱ་ཐབས་ནན་པོར་བརྟེན་ནས་དོ་དམ་ཚོད་འཛིན་མགྱོགས་མྱུར་བྱེད་མཚམས་འཇོག་དགོས། རིགས་དབྱེ་མཛུབ་ཁྲིད་དང་སྟབས་བསྟུན་ལེགས་སྒྲིག་མཐའ་འཁྱོངས་ཀྱིས་འགག་སྒྲོལ་མགྱོགས་མྱུར་ཐུབ་པར་བྱས་ནས་རིམས་ནད་མེད་པའི་ཁུལ་ཆུང་ཧུར་ཐག་བཏོད་དེ་ད་ཡོད་ཀྱི་གྲུབ་འབྲས་བརྟན་དུ་གཏོང་དགོས། ཐོག་མཐའ་བར་གསུམ་དུ་མི་དམངས་ཀྱི་ལངས་ཕྱོགས་ནས་གནད་དོན་ལ་བསམ་བློ་གཏོང་བ་དང་ལས་དོན་བསྒྲུབས་ཏེ་དུས་དང་རྣམ་པ་ཀུན་ཏུ་མང་ཚོགས་སེམས་ལ་འཇོག་པ་དང་མང་ཚོགས་དང་རྩ་བ་ནས་ཁ་འབྲལ་མི་རུང་། ཐོག་མཐའ་བར་གསུམ་དུ་མང་ཚོགས་ཀྱི་བདེ་སྡུག་སེམས་ལ་བཞག་སྟེ་སེམས་ནུས་ཡོད་རྒུས་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་གང་ལེགས་བྱེད་པ་དང་། མང་ཚོགས་ཀྱི་ཐོན་སྐྱེད་དང་འཚོ་བར་འགན་ལེན་ཡག་པོ་བྱས་ནས་བསམ་བློའི་སློབ་གསོ་གཏོང་བ་དང་ཁྲིད་སྟོན་བྱེད་པའི་ལས་དོན་གཏིང་ཟབ་དང་ཞིབ་ཚགས་སྒྲུབ་དགོས། རྒྱུན་གཏན་གྱི་སྨན་བཅོས་ཞབས་འདེགས་ཡག་པོ་ཞུ་བ་དང་། རྒྱུན་གཏན་གྱི་སྨན་བཅོས་སྒྲིག་ལམ་ཡག་པོ་སྲུང་བ། དོས་དྲག་དང་ཉེན་ཆེའི་ནད་པ་དང་དམིགས་བསལ་ཚོགས་སྤྱིའི་སྨན་བཅོས་དགོས་མཁོ་སྔོན་ལ་འགན་ལེན་བྱས་ནས། མང་ཚོགས་ཀྱི་རྒྱུན་གཏན་གྱི་སྨན་བཅོས་ཞབས་ཞུའི་དགོས་མཁོ་སྐོང་དགོས།