ཟླ་8ཚེས་22ཉིན་གྱི་ཕྱི་དྲོ། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་སའི་སྡེ་ཁུལ་དུ་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་བཀོད་འདོམས་དང་། ལྟ་སྐུལ་མཛུབ་ཁྲིད། ཞིབ་བཤེར་བཅས་གནང་བར་ཕེབས་ཤིང་། འདི་ནི་ཝང་ཅུན་ཀྲེང་གིས་ལི་ཧྥེང་གསོལ་མགྲོན་ཁང་གི་ལོགས་བཀར་ས་ཚིགས་སུ་བསྒྱུར་སྐྱེལ་མི་སྣ་དང་སྨན་བཅོས་སྐྱོབ་བཅོས་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བཞིན་པ།

ཚེས་22ཉིན་གྱི་ཕྱི་དྲོ། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་སའི་སྡེ་ཁུལ་དུ་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་བཀོད་འདོམས་དང་། ལྟ་སྐུལ་མཛུབ་ཁྲིད། ཞིབ་བཤེར་བཅས་གནང་བར་ཕེབས་ཤིང་། ཁོང་གིས། སྡེ་ཁུལ་ནི་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་མདུན་མ་ཡིན་པས་ཡིད་ཆེས་དང་ཆོད་སེམས་སྔར་བས་བརྟན་དུ་གཏོང་བ་དང་། དཀའ་ངལ་དུ་མ་ཁྱད་བསད། གདོང་མཆོང་འགག་སྒྲོལ་བཅས་བྱས་ཏེ། སྡེ་ཁུལ་གྱི་སྔོན་འགོག་དང་ཚོད་འཛིན་ནུས་པ་ཆེ་རུ་གཏོང་བ་དང་། ཞབས་ཞུ་འགན་ལེན་གྱི་ཆུ་ཚད་མཐོ་རུ་གཏོང་བ། སྔོན་འགོག་ཚོད་འཛིན་གྱི་བྱ་ཐབས་ཁག་སྡེ་ཁུལ་དང་གཞི་རིམ་དུ་དོན་འཁྱོལ་ཡོང་བ་བཅས་བྱས་ཏེ་སྤྱི་ཚོགས་ཐོག་སྐབས་བསྟུན་གཙང་བཟོའི་དམིགས་ཚད་གང་མགྱོགས་མངོན་འགྱུར་ཡོང་བ་བྱེད་དགོས་པའི་ནན་བཤད་གནང་བ་རེད།

ཝང་ཅུན་ཀྲེང་གིས་སྐབས་བསྟུན་ངང་ཉེན་ཁ་ཆེ་བའི་ཁུལ་གྱི་གྲས་ཤིག་ཡིན་པའི་རྔ་ཆེན་ལམ་བྱང་སྡེ་ཁུལ་དུ་ཕེབས་ནས་སྡེ་ཁུལ་གྱི་སྔོན་འགོག་དང་ཚོད་འཛིན་གྱི་བླང་བྱ་དོན་འཁྱོལ་བྱས་ཚུལ་ལ་ས་གནས་ས་ཐོག་ཏུ་ཞིབ་བཤེར་གནང་བ་རེད། “ཉེ་དུས་དབྱེ་བཤེར་ཐུབ་པའི་ནད་དཔེ་ག་ཚོད་འདུག་གམ” “བསྒྱུར་སྐྱེལ་མི་སྣ་འདང་གི་འདུག་གམ” “མང་ཚོགས་ཀྱི་འཚོ་བའི་དངོས་རྫས་འགན་ལེན་གང་འདྲ་བྱུང་ཡོད་དམ”ཞེས་པ་སོགས་ཝང་ཅུན་ཀྲེང་གིས་བཀའ་འདྲི་ཞིབ་ཕྲ་གནང་ཞིང་། ཁོང་གིས། རིམས་ནད་ཐོན་ཚུན་རྒྱ་ཆེའི་གཞི་རིམ་ལས་བྱེད་པ་དང་། སྡེ་ཁུལ་གྱི་ལས་དོན་པ། དང་བླངས་པ་བཅས་ཀྱིས་འཐབ་ས་དང་པོ་བརྟན་སྲུང་དང་། ཉིན་མཚན་བསྟུད་མར་འབད་འཐབ། དཀའ་ལས་བརྒྱབ་ནས་མང་ཚོགས་ཀྱི་བསམ་ཤེས་དང་རྒྱབ་སྐྱོར་ཐོབ་པར་བྱས་ཡོད། གཞི་རིམ་སྡེ་ཁུལ་གྱིས་མི་སྣ་སྤྱི་འདོམས་ཡག་པོ་བྱས་ནས། སྡེ་ཁུལ་གྱི་དོ་དམ་ཚོད་འཛིན་ལས་དོན་ལྷུ་ཚིགས་ཁྲོད་ཀྱི་ཞན་ཆ་གྲལ་བཤེར་ནན་པོ་བྱེད་པ་དང་། རིམས་ནད་སྔོན་འགོག་དང་ཚོད་འཛིན་ལས་དོན་གྱི་གཙོ་གནད་མངོན་གསལ་དོད་པ་དང་། རིགས་དབྱེ་ཇུས་བསྟར། གནད་སྨིན་ངང་སྔོན་འགོག་དང་ཚོད་འཛིན། ཕན་འབྲས་ཆེན་པོས་སྐུལ་འདེད་བཅས་བཏང་ནས་སྡེ་ཁུལ་གྱི་འགོག་སྲུང་འཛིང་རགས་བརྟན་པོ་མཐའ་གཅིག་ཏུ་བསྐྲུན་དགོས་ཞེས་གསུངས་པ་རེད།

ལྕགས་རོང་བདེ་སྐྱིད་ཁང་བཟང་གླིང་དང་བརྒྱད་གཅིག་ཁུལ་ཆུང་གི་ལས་དོན་མི་སྣས་འཚོ་བའི་དངོས་རྫས་གོ་རིམ་ལྡན་པའི་ངང་དབོར་བཞིན་ཡོད་ལ་དུག་སེལ་ལས་དོན་ཡང་ནན་ཏན་ངང་སྤེལ་བཞིན་ཡོད། ཝང་ཅུན་ཀྲེང་གིས་འགན་གཙང་འགན་ལེན་ལས་བྱེད་པ་དང་སྡེ་ཁུལ་གྱི་འགན་འཁུར་བར་ཞིབ་ཕྲའི་སྔོན་འགོག་དང་ཚོད་འཛིན་བྱ་ཐབས་དང་སྡེ་ཁུལ་མང་ཚོགས་ལ་འཕྲད་པའི་དཀའ་ངལ་དང་གནད་དོན་བཀའ་འདྲི་ཞིབ་ཕྲ་གནང་ཞིང་། ཁོང་གིས་ཚང་མར་མཐའ་འཁྱོངས་ནི་རྒྱལ་ཁ་ཡིན་པ་དང་། མཐའ་འཁྱོངས་བྱས་ཚེ་རྒྱལ་ཁ་ཐོབ་ངེས་ཡིན་པས། ཡང་འབད་བསྐྱར་འབད་དང་སེམས་ཤུགས་གཅིག་སྒྲིལ་གྱིས་རྒྱལ་ཁའི་ཕྱོགས་སུ་གདོང་མཆོང་བྱེད་དགོས། དྲིལ་བསྒྲགས་དང་ཁྲིད་སྟོན་གྱི་ལས་དོན་ལ་ཤུགས་སྣོན་བརྒྱབ་ནས་མང་ཚོགས་ཀྱི་རིམས་འགོག་འདུ་ཤེས་ཟབ་ཏུ་གཏོང་བ་དང་། རིམས་འགོག་ཤེས་བྱ་ཁོང་དུ་ཆུད་པར་བྱེད་པ། རང་རྟོགས་ངང་རིམས་འགོག་བླང་བྱར་བརྩི་སྲུང་ཞུ་བ་བཅས་བྱས་ཏེ་སྔོན་འགོག་དང་ཚོད་འཛིན་གྱི་བྱ་ཐབས་ཁྱིམ་ཚང་ཀུན་གྱིས་རྟོགས་པ་དང་མི་ཚང་མས་ཤེས་པར་བྱེད་དགོས་པའི་ལྕག་སྐུལ་གནང་བ་རེད། ལི་ཧྥེང་གསོལ་མགྲོན་ཁང་གི་ལོགས་བཀར་ས་ཚིགས་སུ་ཝང་ཅུན་ཀྲེང་གིས་ལས་དོན་མི་སྣའི་ས་ནས་བསྒྱུར་སྐྱེལ་གྱི་མི་སྣ་དང་སྨན་བཅོས་སྐྱོབ་བཅོས་སོགས་ཀྱི་གནས་ཚུལ་མཁྱེན་རྟོགས་ནན་ཏན་གནང་ཞིང་། ཁོང་གིས་བསྒྱུར་སྐྱེལ་ལས་དོན་དེ་རིམས་ནད་སྔོན་འགོག་དང་ཚོད་འཛིན་གྱི་ལྷུ་ཚིགས་གལ་ཆེན་ཞིག་ཏུ་བརྩིས་ནས་དམ་འཛིན་བྱས་ཏེ། བསྒྱུར་སྐྱེལ་བརྒྱུད་རིམ་ལེགས་སུ་གཏོང་བ་དང་། མྱུར་ཚད་མགྱོགས་སུ་གཏོང་བ། ལས་ཕྱོད་ཆེ་རུ་གཏོང་བ་བཅས་བྱེད་དགོས་པའི་ནན་བཤད་གནང་བ་རེད། ད་དུང་ཁོང་གིས་མིག་སྔར་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཁག་ལ་གོ་རིམ་ལྡན་པའི་ངང་སྐུལ་འདེད་གཏོང་བཞིན་ཡོད་པས་སྤྱིའི་ཆར་གོ་རིམ་ལྡན་པའི་ངང་ལེགས་སུ་འགྲོ་བཞིན་ཡོད། སྤྱོད་གོ་ཆོད་པའི་བྱ་ཐབས་མཐའ་འཁྱོངས་ཀྱིས་སྔོན་འགོག་དང་ཚོད་འཛིན་གྱི་བྱ་ཐབས་ཁག་དོན་འཁྱོལ་ནན་པོ་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་དྲ་བ་བརྟན་པོ་བཙུགས་ནས་རྒྱལ་ཁ་ཐོབ་ངེས་ཀྱི་ཡིད་ཆེས་དང་ཆོད་སེམས་ལ་བརྟེན་ནས་རིམས་ནད་སྔོན་འགོག་དང་ཚོད་འཛིན་གྱི་འགག་སྒྲོལ་དམག་འཐབ་ལ་ནུས་ཤུགས་ཡོད་རྒུས་རྒྱལ་ཁ་ལེན་དགོས་པའི་ནན་བཤད་གནང་བ་རེད།

ཝང་ཅུན་ཀྲེང་གིས་གཞི་རིམ་ཏང་རྩ་འཛུགས་ཀྱི་དམག་འཐབ་མཁར་རྫོང་གི་ནུས་པ་དང་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱས་ནས་སྟོབས་ཤུགས་གཞི་རིམ་དུ་གཏོང་རྒྱུ་མཐའ་འཁྱོངས་ཀྱིས་སྡེ་ཁུལ་ཉིད་རིམས་ནད་སྔོན་འགོག་དང་ཚོད་འཛིན་གྱི་མཁར་རྫོང་བརྟན་པོ་ཞིག་ཏུ་འགྱུར་བ་བྱེད་དགོས། འགོ་ཁྲིད་ལས་བྱེད་པས་འགན་གཙང་ལེན་པའི་འགན་འཁྲི་སྔར་བས་ནན་དུ་བཏང་སྟེ་མི་ཚོགས་སྟུག་པ་དང་སྔོན་འགོག་དང་ཚོད་འཛིན་གྱི་དཀའ་གནད་ཆེ་བའི་གཙོ་གནད་སྡེ་ཁུལ་ལ་དམ་པོར་དམིགས་ཏེ་ནུས་ཤུགས་ཡོད་རྒུས་སྔོན་ཚུད་ནས་བཀོད་འདོམས་བྱས་ཏེ་གང་མགྱོགས་འཇུར་མིག་སེལ་བ་དང་། སྐྱོན་ཆ་སེལ་བ། ཞན་ཆ་སེལ་བ་བཅས་བྱེད་དགོས། རིམ་པ་ཁག་གི་རིམས་ནད་སྔོན་འགོག་དང་ཚོད་འཛིན་གྱི་བཀོད་འདོམས་ལམ་སྲོལ་ཟམ་མི་ཆད་པར་འཐུས་སྒོ་ཚང་དུ་གཏོང་བ་དང་། མི་རྒྱུ་གནས་གསུམ་མཉམ་འགོག་དང་གནས་རྒྱུད་ཁྱོན་གསུམ་ཟུང་འབྲེལ་མཐའ་འཁྱོངས་བྱས་ཏེ་རང་འགུལ་ངང་སྔོན་འགོག་དང་། སྔ་ཙམ་ཤེས་རྟོགས། མགྱོགས་མྱུར་ཐག་གཅོད་བཅས་ཐུབ་པར་བྱེད་དགོས་པའི་ནན་བཤད་གནང་བ་རེད།

ཝང་ཅུན་ཀྲེང་གིས། མང་ཚོགས་ཀྱི་ལས་དོན་གཏིང་ཟབ་དང་ཞིབ་ཚགས་ངང་བསྒྲུབས་ནས་རྒྱ་ཆེའི་མང་ཚོགས་སྒྲིག་འཛུགས་དང་སྐུལ་སློང་གཏིང་ཟབ་བྱེད་པ་དང་། མི་གཤིས་ཅན་གྱི་དོ་དམ་བྱ་ཐབས་སྤྱོད་པ། མཉམ་འགོག་མཉམ་སྡོམ་དང་དམངས་འགོག་དམངས་སྡོམ་གྱི་མཉམ་ཤུགས་ཆེན་པོ་གཅིག་ཏུ་བསྒྲིལ་བ་བཅས་བྱས་ནས་སྔོན་འགོག་དང་ཚོད་འཛིན་གྱི་བྱ་ཐབས་ཁག་དོན་འཁྱོལ་གནད་སྨིན་ཡོང་བར་སྐུལ་འདེད་ཤུགས་ཆེན་གཏོང་དགོས། རྒྱ་ཆེའི་ཏང་ཡོན་ལས་བྱེད་པས་བོད་སྐྱོད་པ་རྒན་གྲས་ཀྱི་སྙིང་སྟོབས་དར་སྤེལ་བཏང་སྟེ་སྣེ་ཁྲིད་ཀྱི་ནུས་པ་མུ་མཐུད་འདོན་སྤེལ་དང་། སྙིང་སྟོབས་ཆེར་སྐྱེད་དང་རྒྱུན་མཐུད་འབད་འཐབ་བྱེད་པ། མང་ཚོགས་ཀྱིས་བསམ་བློ་གཏོང་སར་བསམ་བློ་གཏོང་བ་དང་ལས་དོན་མཉམ་དུ་སྒྲུབ་པ། སེམས་ནུས་ཡོད་རྒུ་བཏོན་ནས་ཞབས་ཞུ་འགན་ལེན་གྱི་ལས་དོན་ཡག་པོ་སྒྲུབ་པ། འཚོ་བའི་མཁོ་ཆས་མཁོ་སྤྲོད་ནུས་ལྡན་དང་གོ་རིམ་ལྡན་པའི་ངང་ཡག་པོ་སྒྲུབ་པ། མང་ཚོགས་ཀྱི་དཀའ་ངལ་དུས་ཐོག་ཏུ་སེལ་བ་བཅས་བྱས་ནས་མང་ཚོགས་ལ་ཏང་དང་སྲིད་གཞུང་གི་ཐུགས་ཁུར་དང་དྲོ་སྐྱིད་ཚོར་བར་བྱེད་དགོས་པའི་ནན་བཤད་གནང་བ་རེད།

ཝང་ཅུན་ཀྲེང་གིས། “སྐབས་བསྟུན་གཙང་བཟོའི”སྤྱིའི་བྱེད་ཕྱོགས་ལ་གཡོ་འགུལ་མི་གཏོང་རྒྱུ་མཐའ་འཁྱོངས་ཀྱིས་རིགས་དབྱེ་མཛུབ་ཁྲིད་དང་། ཁུལ་དབྱེ་དོ་དམ། ས་ཁུལ་རེ་ལ་ཐབས་ཇུས་རེ། བབ་བསྟུན་ལེགས་སྒྲིག་བཅས་མཐའ་འཁྱོངས་བྱས་ཏེ་སྤྱི་ཚོགས་ཐོག་དབྱེ་བཤེར་གཙང་སེལ་གང་མགྱོགས་ཐུབ་རྒྱུར་ནུས་ཤུགས་ཡོད་རྒུ་བཏོན་ནས་འགག་སྒྲོལ་བྱེད་མགྱོགས་སུ་གཏོང་དགོས། རིམས་ནད་ཐོན་པའི་གཙོ་གནད་ཁྲོམ་གཞུང་དང་སྡེ་ཁུལ་དང་གཙོ་གནད་གནས་ཡུལ་དུ་ཁྱིམ་སྡོད་དོ་དམ་སྲིད་ཇུས་དོན་འཁྱོལ་ཡག་པོ་དང་། སྡེ་ཁུལ་ལ་དོ་དམ་དང་ཚོད་འཛིན་ནན་པོ། བཀག་སྡོམ་དོ་དམ་བྱེད་ཤུགས་ཆེར་གཏོང་བཅས་བྱས་ནས་ཁུག་གསང་སྟོང་གསུམ་མི་ལུས་པའི་འགན་ལེན་ཏན་ཏིག་བྱས་ཏེ་བཀག་སྡོམ་བྱས་ཀྱང་ཚོད་འཛིན་ཡག་པོ་མི་ཐུབ་པ་དང་དོ་དམ་བྱས་ཀྱང་དམ་ནན་མི་བྱུང་བའི་སྣང་ཚུལ་གཏན་འགོག་བྱེད་དགོས། གྲལ་བཤེར་ཐེངས་མང་བྱས་ཀྱང་ནད་དཔེ་མེད་པའི་ཁུལ་ཆུང་ལ་ཁུལ་ཁོངས་ཀྱི་མཉམ་འགོག་ཞིབ་བཤེར་ལ་ཤུགས་སྣོན་བརྒྱབ་ནས། ད་ཡོད་ཀྱི་གྲུབ་འབྲས་སྲ་བརྟན་དུ་གཏོང་བ་དང་། བབ་བསྟུན་དོ་དམ་བྱེད་པ། རིམས་ནད་མེད་པའི་ཁུལ་ཆུང་དང་རིམས་ནད་མེད་པའི་གྲོང་ཚོ་དང་གྲོང་རྡལ་ཧུར་ཐག་གཏོད་པ་བཅས་བྱེད་དགོས། རིམ་ཁག་འགོ་ཁྲིད་དང་ལྷག་པར་དུ་ཏང་སྲིད་འགོ་ཁྲིད་གཙོ་བོས་འགན་འཁྲི་ཁུར་སེམས་དང་ལས་འགན་སྒྲུབ་སེམས་ཆེ་རུ་གཏོང་བ་དང་། གནད་དོན་ཐག་གཅོད་བྱེད་ནུས་ཆེ་རུ་གཏོང་བ། ཉིན་རེའི་རིམས་ནད་གནས་ཚུལ་ལ་དབྱེ་ཞིབ་དང་ཞིབ་འཇུག་བརྡར་གཅོད་བྱེད་ཤུགས་ཆེ་རུ་གཏོང་བ་བཅས་བྱས་ཏེ། གནས་ཚུལ་གསལ་པོ་དང་། གཞི་གྲངས་མཐིལ་རྟོགས། བྱེད་ཐབས་ཏན་ཏིག ཕན་འབྲས་ཐོན་པ་བཅས་ཐུབ་པར་བྱས་ནས་ཆོད་སེམས་སྔར་ལས་བརྟན་པོ་དང་། བྱེད་ཐབས་སྔར་ལས་གནད་འཁེལ། སྤྱོད་ཚུལ་སྔར་ལས་དངོས་སྒྲུབ་བཅས་ཀྱི་སྒོ་ནས་རིམས་ནད་སྔོན་འགོག་དང་ཚོད་འཛིན་གྱི་འགག་སྒྲོལ་དམག་འཐབ་མཐའ་གཅིག་ཏུ་ཡག་པོ་བརྒྱབ་སྟེ་རྒྱལ་ཁ་ལེན་དགོས་པའི་ནན་བཤད་གནང་བ་རེད།

ལིའུ་ཅང་དང་། ཝང་ཝུའེ་ཏུང་། ཕུར་བུ་དོན་གྲུབ། ཟླ་བ་ཚེ་རིང་བཅས་ཞུགས་ཡོད་པ་རེད།