《རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་རྒྱུའི་བོད་རང་སྐྱོང་ལྗོངས་ཀྱི་སྲོལ་ཡིག》ལག་ལེན་བསྟར་ནས་ལོ་གཅིག་འཁོར་བའི་བཞུགས་མོལ་ཚོགས་འདུའི་ཐོག་གི་སྤེལ་རེས་གཏམ་བཤད། (གནད་བསྡུས)

                                                སྐྱེ་ཁམས་ཤེས་དཔལ་འཛུགས་སྐྱོང་གི་གཙོ་ཤུགས་དམག་གི་ནུས་པ་འདོན་སྤེལ་བྱེད་དགོས།

                                                        རང་སྐྱོང་ལྗོངས་སྐྱེ་ཁམས་ཁོར་ཡུག་ཐིང་། ཧུའུ་ཝུའེ་མིན།

ཚོགས་འདུའི་བཀོད་སྒྲིག་གཞིར་བཟུང་། ད་ལྟ་རང་རེའི་ཐིང་གིས《རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་རྒྱུའི་བོད་རང་སྐྱོང་ལྗོངས་ཀྱི་སྲོལ་ཡིག》སློབ་སྦྱོང་དང་ལག་བསྟར་བྱས་ཚུལ་སྙན་སེང་བྱེད་རྒྱུ་གཤམ་གསལ།

ལོ་གཅིག་ལྷག་ཙམ་རིང་། རང་སྐྱོང་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་དང་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཐུགས་ཁུར་དང་མཛུབ་ཁྲིད་འོག ལྗོངས་ཡོངས་ཀྱི་སྐྱེ་ཁམས་ཁོར་ཡུག་ཁོངས་གཏོགས་ཀྱིས་ཐོག་མཐའ་བར་གསུམ་དུ“གཏན་འཁེལ་གཉིས”ལ་ལྷག་བསམ་རྣམ་དག་གིས་བརྩི་བཀུར་ཞུ་བ་དང་། “སྲུང་སྐྱོང་གཉིས”ལག་ལེན་རྣམ་དག་བྱེད་པའི་མཐོ་ཚད་ཐོག་ནས་ཆབ་སྲིད་ཀྱི་ཚུགས་གནས་ཟམ་མི་ཆད་པར་མཐོ་རུ་གཏོང་བ་དང་། སྐྱེ་ཁམས་ཤེས་དཔལ་འཛུགས་སྐྱོང་གི་གཙོ་ཤུགས་དམག་གི་ནུས་པ་འདོན་སྤེལ་གང་ལེགས་བྱས་ནས་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་བྱ་རྒྱུར་གཅིག་འདོམས་དང་། 《སྲོལ་ཡིག》ལག་བསྟར་དོན་འཁྱོལ་བྱ་རྒྱུ་རྩ་བར་བཟུང་ནས་གཙོ་གནད་མངོན་གསལ་དོད་པོ་ཡོང་བ་དང་། བྱེད་ཐབས་ལ་ཤུགས་སྣོན་རྒྱག་པ། དོན་འཁྱོལ་ལ་དམ་འཛིན་བཅས་བྱས་ནས་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་རྒྱུའི་འགོ་ཡག་པོ་བཙུགས་ཡོད།

ང་ཚོས་གཤམ་གསལ་གྱི་གཙོ་གནད་ལས་དོན་ཁག་ལ་གཙོ་གནད་ཐོག་དམ་འཛིན་ཡག་པོ་བྱས་པ་སྟེ། གཅིག་ནི་བསམ་བློ་གཅིག་ཏུ་སྒྲིལ་ཞིང་། 《སྲོལ་ཡིག》སློབ་སྦྱོང་དང་ལག་བསྟར་མཐའ་འཁྱོངས་བྱ་རྒྱུ་དེ་ཆབ་སྲིད་ཀྱི་རྨང་གཞི་གལ་ཆེན་དང་། བསམ་བློའི་རྨང་གཞི། བྱ་སྤྱོད་ཀྱི་རྨང་གཞི་བཅས་སུ་བརྩིས་ནས་ལྗོངས་ཏང་ཨུད་དྲིལ་བསྒྲགས་པུའུ་དང་ལྷན་དུ་སྐྱེ་ཁམས་ཤེས་དཔལ་གྱི་མཐོ་སའི་དྲིལ་བསྒྲགས་སློབ་གསོའི་ཆེད་དོན་ཇུས་གཞི་བཟོས་པ་དང་། སྐྱེ་ཁམས་ཤེས་དཔལ་གྱི་དྲིལ་བསྒྲགས་ཟླ་བའི་བྱེད་སྒོ་རབ་དང་རིམ་པ་སྤེལ་བ། སྐྱེ་ཁམས་ཤེས་དཔལ་གྱི་མཐོ་སའི་ཆེད་དོན་བགྲོ་གླེང་འཛིན་གྲྭ་གཉེར་བ། དྲིལ་བསྒྲགས་སློབ་གསོ་ཟམ་མི་ཆད་པར་གཏིང་ཟབ་ཏུ་གཏོང་བ། དྲིལ་བསྒྲགས་སློབ་གསོའི་བྱེད་སྒོ་ཐེངས་1000ལྷག་ཙམ་སྤེལ་བ། མི་ཐེངས་ཁྲི་30ལྷག་ཙམ་ལ་ཕན་པ་ཐོབ་པ། ལྗོངས་ཏང་ཨུད་དང་སྲིད་གཞུང་གི་འགོ་ཁྲིད་བློ་མཐུན་གཙོ་བོའི་མཛུབ་སྟོན་ལྟར་སྐབས་དང་པོའི“སྐྱེ་ཁམས་ཤེས་དཔལ་གྱི་མཐོ་སའི་གླེང་སྟེགས”གྲ་སྒྲིག་ཞིབ་ཚགས་བྱས་པ། རིམ་པ་བཞིན་ལས་ཀའི་འགན་འཁྲི་ནན་དུ་བཏང་བས་སྤྱི་ཚོགས་ཡོངས་ཀྱིས་སྐྱེ་ཁམས་ཤེས་དཔལ་གྱི་མཐོ་ས་མཉམ་དུ་སྐྲུན་པའི་སྟོབས་ཤུགས་ཆེན་པོ་གཅིག་སྡུད་ནུས་ལྡན་བྱས་པ་དང་། གཉིས་ནི་འཆར་འགོད་ཐད“རྩིས་ཐོ་གཅིག”གསལ་པོ་བཟོས་ཤིང་། སྐྱེ་ཁམས་ཤེས་དཔལ་གྱི་མཐོ་སའི་ཆེད་དོན་ཚོགས་ཆུང་གཞུང་ལས་ཁང་གིས་སྣེ་ཁྲིད་དེ་སྤྱི་ཡོངས་དམ་འཛིན་བྱེད་པའི་ནུས་པ་འདོན་སྤེལ་བྱས་ནས། 《རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་རྒྱུའི་བོད་རང་སྐྱོང་ལྗོངས་ཀྱི་འཆར་འགོད》བཟོས་པ་དང་། “ས་ཁུལ་ལྔ་དང་མ་ལག་གཅིག”གི་འཛུགས་སྐྲུན་དམིགས་ཚད་དང“བྱ་སྤྱོད་ཆེན་པོ་བཅུའི”ལས་ཀའི་ཐབས་ལམ་ཁ་གསལ་བཟོས་ནས་ལག་བསྟར་བསམ་འཆར་བཏོན་པ་དང་ལོ་འཁོར་གྱི་ཇུས་གཞི་བཟོས་པ། རིགས་ཆེན་པོ་6དང་རྣམ་གྲངས་32ཀྱི་སྟོན་རྟགས་མ་ལག་བཏོད་པ། ལོ་འཁོར་གྱི་ལས་འགན་ཞིབ་ཕྲ་53དང་གཙོ་གནད་རྣམ་གྲངས་14ཡི་གསལ་ཐོ་བཟོས་པ། དུས་ཐོག་ཏུ་རྗེས་འདེད་ལྟ་སྐུལ་དང་། དུས་བཀག་ལྟར་འཕེལ་རིམ་བཀོད་གཏོང་བཅས་བྱས་ནས་དམིགས་ཚད་ཅན་དང་། ཞིབ་ཕྲ་ཅན། རྣམ་གྲངས་ཅན། སྟོན་རྟགས་ཅན་བཅས་ཀྱི་སྒོ་ནས་མཐོ་ས་འཛུགས་གཏོད་ཀྱི་ལས་འགན་ཁག་ནུས་ལྡན་ངང་དོན་འཁྱོལ་བྱས་པ། གསུམ་ནི་ལྟ་སྐུལ་གྱི“དྲ་བ་གཅིག”དམ་དུ་བཏང་ཞིང་། 《སྲོལ་ཡིག》ཚད་གཞིར་འཛིན་རྒྱུ་མཐའ་འཁྱོངས་ཀྱིས་རང་སྐྱོང་ལྗོངས་མི་དམངས་འཐུས་ཚོགས་དང་གཞོགས་འདེགས་བྱས་ཏེ་དུས་བཀག་ལྟར“ཀྲུང་ཧྭའི་ཁོར་ཡུག་སྲུང་སྐྱོང་གི་དུས་རབས་བྱ་སྤྱོད·བོད་ཀྱི་བྱ་སྤྱོད”ཀྱི་བྱེད་སྒོ་སྤེལ་བ་དང་། ཁྲིམས་བསྟར་ལྟ་སྐུལ་ལ་ཕྱོགས་ཡོངས་ནས་ཤུགས་སྣོན་རྒྱག་པ། སྐྱེ་ཁམས་ཁོར་ཡུག་སྲུང་སྐྱོང་གི་ཆེད་དོན་ཁྲིམས་བསྟར་བྱ་སྤྱོད་མུ་མཐུད་སྤེལ་བ་བཅས་བྱས་ནས་རིམ་རྩིས་བྱས་ན་ཁོར་ཡུག་གི་ཁྲིམས་འགལ་བྱེད་སྤྱོད་300ལྷག་ཙམ་ཞིབ་བཤེར་ཐག་གཅོད་བྱས་པ་དང་དངུལ་ཆད་སྒོར་ཁྲི་4000ཙམ་བཅད་པ་རེད། རེས་སྐོར་གཉིས་པའི་ཀྲུང་དབྱང་གི་སྐྱེ་ཁམས་ཁོར་ཡུག་སྲུང་སྐྱོང་གི་ལྟ་ཞིབ་གཞོགས་འདེགས་ལས་དོན་བདེ་བླག་ངང་ལེགས་སྒྲུབ་བྱས་ནས་ལྟ་ཞིབ་དང་ཡིག་འབུལ་ཞུ་བཅར་གྱོད་གཞི་1115བསྒྲུབས་པ་དང་། ལྟ་ཞིབ་དང་བརྡ་ཁྱབ་བཏང་བའི་དཔེ་མཚོན་གྱོད་གཞི3དང་ལྟ་ཞིབ་དང་ཚུར་ལན་གྱི་དག་ཐེར་ལས་འགན་43དོན་འཁྱོལ་བྱ་རྒྱུར་སྐུལ་འདེད་ཏན་ཏིག་བཏང་ཡོད། 2021ལོའི་སྐྱེ་ཁམས་ཁོར་ཡུག་སྲུང་སྐྱོང་གི་དཔྱད་ཞིབ་ལེགས་སྒྲུབ་བྱས་ནས་བྱ་དགའ་སྒོར་ཁྲི་9500སྤྲད་པ་དང་ཁོར་ཡུག་ལྟ་འདོམས་ཀྱི་དབང་གྲགས་ནུས་ལྡན་ངང་བཙུགས་པ་རེད། བཞི་ནི་མུ་མཐུད“དམག་འཐབ་གཅིག”ཡག་པོ་བརྒྱབ་ཅིང་། ཚན་རིག་དང་མཐུན་ལ་གནད་ལ་འཁེལ་བ་དང་ཁྲིམས་ལྟར་སྦགས་བཙོག་བཅོས་སྐྱོང་མཐའ་འཁྱོངས་ཀྱིས་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་བརྒྱབ་པ་དང་། བོད་ཀྱི་ཁྱད་ཆོས་ལྡན་པའི་མཚོན་རྟགས་རང་བཞིན་གྱི་གཡུལ་འགྱེད་7རྒྱུན་མཐུད་ལག་བསྟར་བྱས་པ། སྐྱེ་ཁམས་སྲུང་སྐྱོང་ཉམས་གསོ་དང་། ཁོར་ཡུག་ཕྱོགས་བསྡུས་བཅོས་སྐྱོང་། འཁྱགས་རོམ་ཐོན་ཁུངས་སྲུང་སྐྱོང་། རང་བྱུང་སྲུང་སྐྱོང་ཁུལ་ལྟ་སྐུལ་སོགས་གཙོ་གནད་ལས་འགན་དོན་འཁྱོལ་ལ་སྐུལ་འདེད་ཏན་ཏིག་བཏང་ཡོད། 2022ལོའི་ལོ་སྟོད་དུ། ལྗོངས་ཡོངས་ཀྱི་མཁའ་རླུང་ཁོར་ཡུག་སྤུས་ཚད་ལེགས་པའི་ཉིན་གྲངས་ཀྱི་བསྡུར་ཚད་100%ཟིན་པ་དང་། གཙང་པོ་དང་མཚོ་མཚེའུ་གཙོ་བོའི་ཆུའི་སྤུས་ཚད་ལོན་པའམ་ཡང་ན་རིགས་IIIཚད་གཞིར་སླེབས་པ། གྲོང་ཁྱེར་དང་གྲོང་རྡལ་གྱི་གཅིག་སྡུད་རྣམ་པའི་འཐུང་ཆུའི་ཆུ་འགོའི་ཆུའི་སྤུས་ཚད་100%ཟིན་པ། ས་རྒྱུའི་ཁོར་ཡུག་བདེ་འཇགས་དང་བརྟན་པོ་བྱུང་བ། 2021ལོའི་སྦགས་བཙོག་འགོག་བཅོས་འགག་སྒྲོལ་དམག་འཐབ་ཀྱི་ཕན་འབྲས་ལ་ཕུལ་བྱུང་རིམ་པའི་དཔྱད་ཞིབ་ཐོབ་པ་རེད།

གྲུབ་འབྲས་ཐོབ་པ་དང་དུས་མཚུངས་སློབ་སྦྱོང་དང་དྲིལ་བསྒྲགས་གཏིང་ཟབ་དེ་ཙམ་མེད་པ་དང་། མཐོ་ས་བསྐྲུན་རྒྱུའི་ལས་དོན་ལ་སྐུལ་འདེད་གཏོང་ཤུགས་ཆེན་པོ་མེད་པ། ཁྲིམས་བསྟར་ལྟ་འདོམས་གནད་ལ་འཁེལ་པོ་དེ་ཙམ་མེད་པ་སོགས་ཀྱི་གནད་དོན་ཡང་ལྷག་ཡོད། གོམ་སྟབས་རྗེས་མར། ང་ཚོས་བློ་བརྟན་འགྱུར་མེད་ངང《རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་རྒྱུའི་བོད་རང་སྐྱོང་ལྗོངས་ཀྱི་སྲོལ་ཡིག》ལག་བསྟར་དོན་འཁྱོལ་བྱས་ནས། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ལྟ་སྐུལ་མཛུབ་ཁྲིད་བསམ་འཆར་དང་ལྷག་པར་དུ་བཞུགས་མོལ་ཚོགས་འདུའི་དགོངས་དོན་ལ་ནན་པོར་གཞིགས་ནས་འཐབ་ཇུས་ཀྱི་ངེས་ཤུགས་རྒྱུན་འཁྱོངས་དང་། རྒྱུན་མཐུད་ཤུགས་སྣོན། སྙིང་རུས་གཏན་འཁྱོངས་བཅས་བྱས་ཏེ་ནུས་ཤུགས་ཡོད་རྒུས་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་པའི་གོམ་སྟབས་གསར་པ་སྤོ་རྒྱུར་སྐུལ་འདེད་གཏོང་བ་དང་སྐྱེ་ཁམས་ཤེས་དཔལ་འཛུགས་སྐྱོང་དེ་རྒྱལ་ཡོངས་ཀྱི་མདུན་གྲལ་དུ་སླེབས་པར་བྱས་ཏེ་ཕུལ་བྱུང་གི་གྲུབ་འབྲས་ཐོག་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་རྒྱུ་ཡིན།