2021ལོའི་ཟླ་7ཚེས་21ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་བོད་ལྗོངས་ཉིང་ཁྲི་གྲོང་ཁྱེར་བྲག་ཡིབ་ཆུས་ཀ་ལ་གྲོང་ཚོར་གཟིགས་ཞིབ་གནང་བར་ཕེབས་པ་རེད། “གྲོང་ཚོའི་ཁམ་བུའི་མེ་ཏོག་ཧ་ཅང་མཛེས་པོ་འདུག འདི་ནི་མེས་པོས་ཁྱེད་ཚོར་བཞག་པའི་ཕན་བདེ་དང་། ཁྱེད་ཚོར་སྤྲད་པའི་ཁམ་བུའི་མེ་ཏོག་གི་ལྡུམ་ར་རེད”ཅེས་སྤྱི་ཁྱབ་ཧྲུའུ་ཅི་གྲོང་ཚོའི་ནང་ཕེབས་སྐབས་དེ་ལྟར་གསུངས།

སྤྱི་ཁྱབ་ཧྲུའུ་ཅི་ཞི་ཅིན་ཕིང་བོད་དུ་གཟིགས་ཞིབ་གནང་བར་ཕེབས་ནས་ལོ་གཅིག་འཁོར་བའི་མཚམས་སུ་། གསར་འགོད་པ་སླར་ཡང་ཀ་ལ་གྲོང་ཚོར་སྐྱོད་སྐབས་དེ་གར་ཐོན་ལས་དར་རྒྱས་ལ་དམངས་འཚོ་ཞི་མཐུན་ཡིན་པའི་རྣམ་པ་མཐོང་བྱུང་། དེ་སྔ་ཡུལ་དེའི་མང་ཚོགས་ཀྱིས་སེམས་ཁྲལ་ཆེ་ཤོས་བྱེད་པའི་གློག་མི་འདང་བའི་གནད་དོན་ཡང་ད་ལྟ་ལོ་རྒྱུས་སུ་གྱུར་ཟིན་འདུག།

“དེ་སྔ་ཁྱིམ་སྤྱོད་གློག་ཆས་གཤམ་སྐྱེལ་བྱེད་སྐབས་ང་ཚོའི་གྲོང་མི་མང་པོ་ཞིག་གིས་སྲིད་གཞུང་གི་ཁ་གསབ་ལ་བརྟེན་ནས་བརྙན་འཕྲིན་དང་འཁྱགས་སྒམ་ཉོས་ཡོད། འོན་ཀྱང་གློག་བརྟན་པོ་མེད་པས་བརྙན་འཕྲིན་བེད་མེད་དུ་གྱུར་ཏེ་ཁེབས་གཡོགས་ནས་འཇོག་པ་དང་འཁྱགས་སྒམ་དེའང་བཅའ་དངོས་ཙག་ཙིག་བླུགས་སའི་ཆ་སྒམ་ལྟ་བུར་གྱུར་ནས། རིན་གོང་ཆེན་པོ་སྤྲད་ཀྱང་ཕན་ཐོགས་གང་ཡང་མེད”ཅེས་གྲོང་མི་ཚེ་རིང་རྡོ་རྗེས་བཤད།

དུས་ཡུན་རིང་པོའི་ནང་གྲོང་མི་ཚོའི“གློག་སྤྱོད་ཐུབ་པ་དང་གློག་ཡག་པོ་སྤྱོད་ཐུབ་པའི”རེ་བ་དེ་སྔ་ཕྱི་བར་གསུམ་དུ་ཏང་དང་སྲིད་གཞུང་གི་ཐུགས་ལ་བཞག་པ་མ་ཟད། བོད་ཀྱི་གློག་ཤུགས་ལས་དོན་པའི་སེམས་ཁུར་བྱ་ཡུལ་ཞིག་ཏུའང་གྱུར་ཡོད། “ལོ་ལྔ་ཚན་བཅུ་གསུམ་པའི”རིང་། རྒྱལ་ཁབ་གློག་དྲ་བོད་ལྗོངས་གློག་ཤུགས་ཀྱིས་བོད་དབུས་དྲ་སྦྲེལ་ལས་གྲྭར་བརྟེན་ནས་གློག་དྲ་གཙོ་བོའི་ཁྱབ་རྒྱ་རྒྱུན་ཆད་མེད་པར་ཆེ་རུ་བཏང་སྟེ། ཀ་ལ་གྲོང་ཚོ་ཚུད་པའི་བྲག་ཡིབ་ཆུས་ཀྱི་གྲོང་རྡལ་4དང་ཤང་3དང་དབུལ་སྐྱོར་ས་ཚིགས་1གི་གྲོང་གསེབ་གློག་དྲ་སྒྱུར་བཀོད་ལས་གྲྭར་སྐུལ་འདེད་ཧུར་ཐག་བཏང་བ་རེད།

དེ་སྔ་གློག་སྤྱོད་དཀའ་བ་ལས་གྲོང་མིའི་ཐོན་སྐྱེད་དང་འཚོ་བར་དཀའ་ངལ་འཕྲད་ཀྱི་ཡོད་ལ། ཁམ་བུའི་མེ་ཏོག་གྲོང་ཚོའི་དཔལ་འབྱོར་འཕེལ་རྒྱས་ལའང་ཚོད་འཛིན་ཕོག་ཡོད། “ཁམ་བུའི་མེ་ཏོག་གྲོང་ཚོའི”གློག་སྤྱོད་དཀའ་བའི་གནད་དོན་ཐག་གཅོད་བྱས་རྗེས་ཀ་ལ་གྲོང་ཚོས་ཡུལ་བབ་དང་བསྟུན་ནས“ཁམ་བུའི་མེ་ཏོག་ལྡུམ་རའི”མཛེས་ལྗོངས་ཁུལ་གཞི་རྟེན་དུ་བྱས་ཏེ། “ཁམ་བུའི་མེ་ཏོག་གི་ཡུལ་སྐོར་རིག་གནས་དུས་ཆེན”བཏོད་ནས་ཁྱིམ་ཚང་མགྲོན་ཁང་གཉེར་བ་དང་། འདེབས་འཛུགས་དང་གསོ་ཚགས་བྱེད་པ། གྲོང་གསེབ་ཀྱི་ཡུལ་སྐོར་ལས་རིགས་འཕེལ་རྒྱས་གཏོང་བ་བཅས་བྱས་ནས“སྐྱེ་ཁམས་ལ་བརྟེན་ནས་ཕྱུག་འགྱུར་ལམ་བུར་སྐྱོད་པའི”གྲོང་གསེབ་དར་རྒྱས་གཏོང་བའི་དཔེ་སྟོན་གྲོང་ཚོ་ཞིག་ཏུ་གྱུར་ཡོད།

“ཁྱིམ་དུ་ཁྱིམ་ཚང་མགྲོན་ཁང་གཉེར་བས་ཁང་མིག་16ལ་ཆུ་བསྲོ་ཆས་དང་བརྙན་འཕྲིན་སོགས་གློག་ཆས་སྒྲིག་དགོས་ཀྱི་ཡོད་སྟབས། གློག་སྤྱོད་ཚད་ཆེས་ཆེར་མང་དུ་ཕྱིན་ཡོད། གློག་ཤུཌ་ཀུང་སིས་དུས་ཐོག་ཏུ་རོགས་རམ་བྱས་པས་གློག་གི་གནད་དོན་ཐག་གཅོད་ཐུབ་བྱུང”ཞེས་གྲོང་མི་ཚེ་གཡང་གིས་སེམས་འགུལ་ཐེབས་བཞིན་དུ་བཤད།

གྲོང་གསེབ་དར་རྒྱས་གཏོང་བའི་ཐད་གློག་ཤུགས་སྔོན་ལ་ལག་བསྟར་བྱས་ཤིང་། ཉིན་བཞིན་ཆེ་རུ་འགྲོ་བའི་མང་ཚོགས་ཀྱི་གློག་སྤྱོད་དགོས་མཁོ་སྐོང་བ་དང་ཁྱིམ་ཚང་མགྲོན་ཁང་གི་གློག་མཁོ་འདོན་གྱི་སྤུས་ཚད་དང་གློག་སྤྱོད་བདེ་འཇགས་འགན་ལེན་བྱ་ཆེད། རྒྱལ་ཁབ་གློག་དྲ་བྲག་ཡིབ་ཆུས་གློག་འདོན་ཀུང་སིས་མི་སྣ་སྒྲིག་འཛུགས་ཐེངས་མང་བྱས་ཏེ་དུད་ཚང་དུ་གློག་གི་དགོས་མཁོ་ཤེས་རྟོགས་དང་། ས་གནས་ས་ཐོག་ཏུ་ཞིབ་བཤེར། དུས་ཐོག་ཏུ་སྤུས་ཚད་མཐོར་གཏོང་དང་རྒྱ་སྐྱེད་བཅས་བྱས་ནས་ཁྱིམ་ཚང་མགྲོན་ཁང་གཉེར་སྐྱོང་གི་གདེང་ཚོད་ཆེ་རུ་བཏང་བ་རེད།

གྲོང་གསེབ་ཏུ་གློག་མཁོ་འདོན་བྱེད་པའི་འགན་ལེན་ནུས་པ་ཕྱོགས་ཡོངས་ནས་ཆེ་རུ་བཏང་སྟེ་གྲོང་གསེབ་ཀྱི་གློག་དྲ་སྒྱུར་བཀོད་ལས་དོན་ཞིང་འབྲོག་མང་ཚོགས་ཀྱི་སེམས་ལ་བསམ་པ་བཞིན་སྒྲུབ་ཐུབ་ཆེད། 2022ལོར་རྒྱལ་ཁབ་གློག་དྲ་བོད་ལྗོངས་གློག་ཤུགས་ཀྱིས་གྲོང་གསེབ་ཀྱི་གློག་དྲ་སྲ་བརྟན་མཐོར་གཏོང་རྣམ་གྲངས་ཁག་74ལག་ལེན་བསྟར་རྩིས་ཡོད་པ་དང་། སྔོན་དཔག་བྱས་ན་འདི་ལོའི་ལོ་མཇུག་ཏུ་མི་ཁྲི་1.5ཙམ་ལ་ཕན་པ་ཐོབ་རྒྱུ་རེད།

བདེ་འཇགས་ངང་གློག་སྤྱོད་པའི་གྲོང་མིའི་འདུ་ཤེས་སྔར་བས་ཟབ་ཏུ་གཏོང་ཆེད། རྒྱལ་ཁབ་གློག་དྲ་བོད་ལྗོངས་གློག་ཤུགས་ཀུང་སིས་ཐོག་མཐའ་བར་གསུམ་དུ་འཛུགས་སྐྲུན་དང་དོ་དམ་གལ་ཆེ་མཉམ་འཛིན་མཐའ་འཁྱོངས་ཀྱིས་རྒྱུན་གཏན་གྱི་ཞབས་ཞུར་ཤུགས་སྣོན་བརྒྱབ་པ་མ་ཟད། དུས་བཀག་ལྟར་གུང་ཁྲན་ཏང་ཡོན་ཞབས་ཞུ་རུ་ཁག་ཁམ་བུའི་མེ་ཏོག་གྲོང་ཚོར་བསྐྱོད་རྒྱུ་སྒྲིག་འཛུགས་བྱས་ཏེ་གློག་སྐུད་དང་སྒྲིག་ཆས་ལ་ཕྱོགས་ཡོངས་ནས་གྲལ་བཤེར་བྱེད་པ་དང་། སྤྱོད་དུད་ཀྱིས་སྐད་ཆ་དྲིས་པའི་གློག་འདོན་ཇུས་གཞིའི་སྐོར་ལ་ལན་འདེབས་པ། གློག་སྤྱོད་དྲིལ་བསྒྲགས་ལག་དེབ་སྤྲོད་པ། “ངས་མང་ཚོགས་ལ་བྱ་བ་དངོས་སྒྲུབ་པའི”དང་བླངས་བྱེད་སྒོ་སྤེལ་བ་བཅས་བྱས་ནས་སྤྱོད་དུད་ལ་ཞབས་འདེཌ་ཞུ་ཚད་རྒྱུན་མཐུད་མཐོ་རུ་བཏང་བ་རེད།

2002ལོར“ཁམ་བུའི་མེ་ཏོག་ཡུལ་སྐོར་རིག་གནས་དུས་ཆེན”སྐབས་དང་པོ་གཉེར་ནས་ད་བར་ལོ་20སོང་རིང་། ལོ་ལྟར་ཁམ་བུའི་མེ་ཏོག་དུས་ཆེན་འཆར་རིམ་བཞིན་རྒྱལ་ཁབ་གློག་དྲ་བོད་ལྗོངས་གློག་ཤུགས་ཀྱིས་དུས་ཆེན་གལ་ཆེན་སྐབས་གློག་འགན་ལེན་གྱི་སྔོན་ཇུས་ལག་བསྟར་བྱས་ནས་ཁམ་བུའི་མེ་ཏོག་དུས་ཆེན་གྱི་གློག་འགན་ལེན་གྱི་བྱ་ཐབས་ཁག་དོན་འཁྱོལ་བྱས་པ་དང་། བྱེད་སྒོ་སྤེལ་ཡུལ་གྱི་གློག་སྐུད་དང་སྒྲིག་ཆས་ཀྱི་མངོན་མེད་རྐྱེན་ངན་ཕྱོགས་ཡོངས་ནས་གྲལ་བཤེར་དང་བཅོས་སྒྲིག་བྱས་ཏེ་སྐྱོན་ཆ་སྣ་ཚོགས་དུས་ཐོག་ཏུ་བསལ་ཡོད། 2021ལོའི་ཁམ་བུའི་མེ་ཏོག་དུས་ཆེན་རིང་ཀ་ལ་གྲོང་ཚོས་ཡུལ་སྐོར་བ་མི་ཐེངས་ཁྲི་14ལ་སྣེ་ལེན་ཞུས་ནས་གྲོང་ཚོ་ཡོངས་ལ་ཡུལ་སྐོར་ཡོང་འབབ་སྒོར་ཁྲི་460ལྷག་ཙམ་བྱུང་བ་དང་དུད་ཚང་རེར་ཆ་སྙོམས་ཁེ་སྤོགས་སྒོར་ཁྲི་10ཙམ་བྱུང་ཡོད་པ་རེད།