འདི་ནི་ཉིང་ཞ་ཝུའུ་ཀྲུང་གྲོང་ཁྱེར་ཧུང་སི་པའོ་ཆུས་ཀྱི་ཧུང་ཏེ་གྲོང་ཚོ་ཡིན་པ།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཞ་རུ་རྟོག་ཞིབ་ཐེངས་གཉིས་གནང་བ་དང་འབྲེལ་གསུང་བཤད་གལ་ཆེན་ཡང་གནང་བ་མ་ཟད། ཉིང་ཞ་ཡི་ལས་དོན་ལ་མཛུབ་སྟོན་གལ་ཆེན་ཐེངས་མང་གནང་སྟེ་མཛེས་སྡུག་ལྡན་པའི་ཉིང་ཞ་གསར་པ་སྐྲུན་ཆེད་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་བཅངས་ནས། ཉིང་ཞའི་རྒྱ་ཆེའི་ལས་བྱེད་པ་དང་མང་ཚོགས་ཚོས་རྨ་ཆུ་རྒྱུག་ཁུལ་གྱི་སྐྱེ་ཁམས་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་ཀྱི་སྔོན་སྤེལ་ཁུལ་སྐྲུན་པའི་ལས་འགན་ཕྲག་ཐོག་ཏུ་ཁུར་ཏེ་མཐུན་སྒྲིལ་འབད་འཐབ་དང་དངོས་འཛིན་དངོས་སྒྲུབ་ཀྱིས་དཔལ་འབྱོར་དར་རྒྱས་དང་། མི་རིགས་མཐུན་སྒྲིལ། ཁོར་ཡུག་མཛེས་པ། མི་དམངས་འབྱོར་ཕྱུག་བཅས་ཀྱི་མཛེས་སྡུག་ལྡན་པའི་ཉིང་ཞ་གསར་པ་མུ་མཐུད་སྐྲུན་པའི་ཕྱོགས་སུ་མདུན་སྐྱོད་ཧུར་ཐག་བྱས་ཡོད།

སྐྱེ་ཁམས་སྲུང་སྐྱོང་སླར་གསོ་དང་ཁོར་ཡུག་བཅོས་སྐྱོང་ལ་སྤྱི་འདོམས་སྐུལ་འདེད་གཏོང་དགོས།

རྨ་ཆུའི་ངོགས་སུ་གནས་པའི་ཝུའུ་ཀྲུང་གྲོང་ཁྱེར་ནི་ཉིང་ཞའི་རྨ་ཆུ་འདྲེན་ཁུལ་གྱི་ས་ཁོངས་གལ་ཆེན་ཞིག་ཡིན་པ་དང་། ཝུའུ་ཀྲུང་དུ་རྒྱུག་པའི་རྨ་ཆུའི་རིང་ཚད་སྤྱི་ལེ་69ཟིན་གྱི་ཡོད།

2020ལོའི་ཟླ་6པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཞ་རུ་རྟོག་ཞིབ་གནང་སྐབས། རྨ་ཆུའི་རྒྱུད་ཡུན་རིང་བདེ་འཁོད་ཡོང་བའི་འགན་ལེན་བྱ་རྒྱུ་དེ་གལ་ཆེའི་ནང་གི་འགངས་ཆེར་བརྩིས་ནས་ཆུ་ལམ་དང་གྲམ་ཐང་ཁུལ་གྱི་ཕྱོགས་བསྡུས་བཅོས་སྐྱོང་ལས་གྲྭ་ལག་བསྟར་དང་། ངོགས་གཉིས་ཀྱི་ཆུ་རགས་དང་། ཆུ་ལམ་ཚོད་འཛིན་ཁྲིད་སྟོན། གྲམ་ཐང་ཁུལ་བཅོས་སྐྱོང་བཅས་ལ་སྤྱི་འདོམས་སྐུལ་འདེད་གཏོང་བ། ཆུའི་ཐོན་ཁུངས་གྲོན་ཆུང་དང་ལེགས་བསྡུས་བེད་སྤྱོད་ལ་སྐུལ་འདེད་གཏོང་བ། སྐྱེ་ཁམས་སྲུང་སྐྱོང་སླར་གསོ་དང་ཁོར་ཡུག་བཅོས་སྐྱོང་ལ་སྤྱི་འདོམས་སྐུལ་འདེད་གཏོང་བ་བཅས་བྱས་ཏེ་རྨ་ཆུ་རྒྱུག་ཁུལ་གྱི་སྐྱེ་ཁམས་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་ཀྱི་སྔོན་སྤེལ་ཁུལ་ཧུར་ཐག་བསྐྲུན་དགོས་ཞེས་གསུངས་པ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་བློ་ལ་བརྟན་པོར་བཅངས་ནས་ཝུའུ་ཀྲུང་གྲོང་ཁྱེར་གྱིས་རྨ་ཆུར་དེ་བས་གཅེས་སྤྲས་དང་རྨ་ཆུ་སྲུང་སྐྱོང་ཞིབ་ཚགས་བྱས་ནས་ཕྱོགས་བསྡུས་བཅོས་སྐྱོང་དང་། བརྒྱུད་རིམ་ལྡན་པའི་བཅོས་སྐྱོང་། ཆུ་འགོ་བཅོས་སྐྱོང་བཅས་མཐའ་འཁྱོངས་བྱས་ཡོད། “ལོ་ཤས་གོང་ཆུ་རགས་འཛུགས་སྐྲུན་དང་། ཆུ་ལམ་བཅོས་སྒྲིག གྲམ་ཐང་བཅོས་སྐྱོང་། སྐྱེ་ཁམས་སླར་གསོ་སོགས་ཀྱི་ལས་གྲྭ་ལག་ལེན་བསྟར་བའི་རྨང་གཞིའི་ཐོག་ང་ཚོས་ཆུ་དཔོན་དང་མཚོ་དཔོན་ལམ་ལུགས་ལག་ལེན་བསྟར་རྒྱུར་སྐུལ་འདེད་གཏིང་ཟབ་བཏང་བས། གྲོང་ཁྱེར་ཡོངས་ཀྱི་ཆུ་བོ་དང་ཆུ་ལམ་753དང་མཚོ་84བཅས་སུ་གྲོང་ཁྱེར་དང་། རྫོང་། ཤང་། གྲོང་ཚོ་བཅས་ཀྱི་རིམ་བཞིའི་ཆུ་དཔོན་དང་མཚོ་དཔོན་ཚང་མར་ཁྱབ་པ་དང་འབྲེལ་ཆུ་དོན་དང་། སྤྱི་བདེ། ཞིབ་དཔྱོད་སོགས་སྡེ་ཚན་ཞུགས་པའི་རྨ་ཆུ་སྲུང་སྐྱོང་གི་མཉམ་འབྲེལ་ཁྲིམས་འཛིན་ལམ་སྲོལ་བཙུགས་ཡོད”ཅེས་ཝུའུ་ཀྲུང་གྲོང་ཁྱེར་ཆུ་དོན་ཅུས་ཀྱི་ཅུས་ཀྲང་སུའུ་ཞའོ་ལིས་བརྗོད།

རྨ་ཆུའི་འདམ་རའི་སྐྱེ་ཁམས་མ་ལག་ནུས་པ་ཆེ་རུ་གཏོང་བ་དང་འབབ་རྒྱུད་ཀྱི་སྐྱེ་ཁམས་ཁོར་ཡུག་ལེགས་སུ་གཏོང་ཆེད། ཉེ་བའི་ལོ་ཤས་རིང་ཝུའུ་ཀྲུང་གྲོང་ཁྱེར་གྱིས་འདམ་ར་སྲུང་སྐྱོང་དང་སླར་གསོ་བཅོས་སྐྱོང་སོགས་གཙོ་གནད་སྐྱེ་ཁམས་བཅོས་སྐྱོང་ལས་གྲྭ་ཁག་30ལྷག་ཙམ་ལག་ལེན་བསྟར་ནས་སྔ་རྗེས་སུ་ཆུ་བོ་རྒྱུག་ཁུལ་གྱི་འདམ་ར་སྤྱི་ལེ་32དང་མཚེའུ་ཡི་འདམ་ར་17སླར་གསོ་བྱས་པ་མ་ཟད། ད་དུང་ཞན་འགྱུར་གྱི་འདམ་ར་མུའུ་ཁྲི་4ཙམ་སླར་གསོ་བྱས་ཡོད།

2020ལོར་ཉིང་ཞ་ཡིས་རྨ་ཆུའི་ཉིང་ཞ་དུམ་བུའི་དུས་ཐེངས་གཉིས་པའི་འབྲུབ་འགོག་ལས་གྲྭ་ལེགས་སྒྲུབ་བྱས་ནས་ཁ་ཐོར་འཕྲལ་སྡོམ་འགོག་བཅོས་བྱེད་པ་ནས་ཕྱོགས་བསྡུས་བཅོས་སྐྱོང་བྱེད་པའི་བར་སྒྱུར་ཡོད། ཆུའི་སྦགས་བཙོག་བཅོས་སྐྱོང་ལ་ཕན་འབྲས་མངོན་གསལ་དོད་པོ་ཐོབ་ནས། འདས་ཟིན་པའི་ལོ་5ཡི་ནང་རྨ་ཆུའི་ཆུ་གཞུང་ཨ་མའི་ཉིང་ཞ་དུམ་བུའི་ཆུའི་སྤུས་ཚད་རིགས་IIཔར་རྒྱུན་འཁྱོངས་ཐུབ་ཡོད།

2016ལོའི་ཟླ་7པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཞ་རུ་རྟོག་ཞིབ་གནང་སྐབས། ཉིང་ཞ་ནི་ནུབ་བྱང་ས་ཁུལ་གྱི་སྐྱེ་ཁམས་བདེ་འཇགས་སྲུང་བཅད་གལ་ཆེན་ཞིག་ཡིན་པས། ལྗང་མདོག་སྲུང་བཅད་སྐྲུན་པར་ཤུགས་སྣོན་རྒྱག་དགོས་ཞེས་གསུངས་པ་རེད། 2020ལོའི་ཟླ་6པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཞ་རུ་རྟོག་ཞིབ་གནང་སྐབས། རྩེ་རིམ་ཇུས་འགོད་ལ་ཤུགས་སྣོན་རྒྱག་པ་དང་། འགན་འཁྲི་དོན་འཁྱོལ་ལ་དམ་འཛིན་ནན་པོ། ལྟ་སྐུལ་ཞིབ་བཤེར་ལ་ཤུགས་སྣོན་རྒྱག་པ་བཅས་བྱས་ནས་ཧོ་ལན་རི་བོའི་སྐྱེ་ཁམས་སྲུང་སྐྱོང་མཐའ་གཅིག་ཏུ་བྱེད་དགོས་ཞེས་གསུངས་པ་རེད།

2016ལོ་ནས་བཟུང་། ཉིང་ཞ་ཡིས་ཧོ་ལན་རི་བོའི་སྐྱེ་ཁམས་ཁོར་ཡུག་ཕྱོགས་ཡོངས་ནས་བཅོས་སྒྲིག་དང་སླར་གསོ་བྱས་ཏེ་ཧོ་ལན་རི་བོའི་རང་བྱུང་སྲུང་སྐྱོང་ཁུལ་གྱི་གནས་40བཅོས་སྒྲིག་དང་སླར་གསོ་བྱས་ནས་སྲུང་སྐྱོང་ཁུལ་མཐའ་སྐོར་གྱི་གཏེར་ཁུལ་11གི་ཁོར་ཡུག་བཅོས་སྐྱོང་ལ་སྐུལ་འདེད་བཏང་ཡོད།

འདས་ཟིན་པའི་ལོ་5ཡི་ནང་། ཉིང་ཞ་ཡིས་སྔ་རྗེས་སུ་ཧོ་ལན་རི་བོའི་སྐྱེ་ཁམས་སྲུང་སྐྱོང་དང་སླར་གསོ་སོགས་ལ་མ་དངུལ་སྒོར་དུང་ཕྱུར་150ཙམ་བཏང་ནས་བཅོས་སྐྱོང་སླར་གསོའི་རྒྱ་ཁྱོན་མུའུ་ཁྲི་40.5ཟིན་པ་དང་རྡོ་སོལ་ཐོན་ནུས་ཏུན་ཁྲི་1600ཐོན་སྐྱེད་བྱེད་མཚམས་བཞག་ཡོད།

2021ལོ་ནས་བཟུང་། ཉིང་ཞ་ཡིས་གཏེར་རིའི་ས་གཤིས་ཁོར་ཡུག་ཕྱོགས་བསྡུས་བཅོས་སྐྱོང་སོགས་བྱེད་ཐབས་སྤྱད་དེ། ཧོ་ལན་རི་བོའི་རང་བྱུང་སྐྱེ་ཁམས་ནུས་པ་རིམ་བཞིན་སླར་གསོ་བྱས་ཡོད། ཧོ་ལན་རི་བོའི་སྐྱེ་ཁམས་སྲུང་སྐྱོང་སླར་གསོ་ལྗོངས་ཡོངས་ཀྱི“ལོ་ལྔ་ཚན་བཅུ་བཞི་པའི”རིང་གི་གཙོ་གནད་ལས་གྲྭར་བཅུག་ཅིང་། མིག་སྔར་སྐྱེ་ཁམས་བཅོས་སྐྱོང་སླར་གསོའི་རྣམ་གྲངས་16དང་ཞོར་གཏོགས་རྣམ་གྲངས་50ལག་བསྟར་བྱས་པས། བཅོས་སྒྲིག་སླར་གསོའི་རྒྱ་ཁྱོན་མུའུ་ཁྲི་34ཟིན་པ་མ་ཟད། རི་རྒྱུད་དུ་ནགས་ཚལ་བར་ཁྱམས་དང་། ཞིང་ཁ་དང་ནགས་ཚལ་དྲ་བ། དཔལ་འབྱོར་ནགས་རྒྱུད་བཅས་མུའུ་ཁྲི་45བསྐྲུན་ཡོད།

རྒྱུན་སྲིང་ལྷོད་མེད་ངང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།

དབྱིན་ཁྲོན་གྲོང་ཁྱེར་ཞི་ཞ་ཁུལ་གྱི་རྒུན་འབྲུམ་འདེབས་འཛུགས་ལྡུམ་ར་རུ་ཡུལ་སྐོར་བས་ཁེངས་ནས་ཡོད། ལོ་བཅུའི་གོང་ས་ཆ་དེ་ནི་བེད་མེད་དུ་བཞག་པའི་གཏེར་ཁ་སྔོག་འདོན་ཁུལ་ཞིག་ཡིན་པ་སུ་ཞིག་གི་བློ་ལ་ཡང་འཁོར་མི་སྲིད།

2020ལོའི་ཟླ་6ཚེས་9ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཞ་རུ་རྟོག་ཞིབ་གནང་སྐབས། རྒུན་འབྲུམ་འདེབས་འཛུགས་ལྡུམ་རར་ཕེབས་ནས་ལས་ཀ་བྱེད་བཞིན་པའི་བཟོ་པ་དང་ལག་རྩལ་མི་སྣ་དང་སྤེལ་རེས་གནང་བ་དང་འབྲེལ་རྒུན་འབྲུམ་འདེབས་འཛུགས་ལག་རྩལ་དང་། ཐོན་རྫས་ཀྱི་ཚོང་ལམ་དང་ཡོང་འབབ་ཀྱི་གནས་ཚུལ་མཁྱེན་རྟོགས་ཀྱང་གནང་ཞིང་། སྤྱི་ཁྱབ་ཧྲུའུ་ཅིས་མི་དམངས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་འགྲོ་བས་རྒུན་ཆང་ཐོན་ལས་ལ་མདུན་ལམ་ཆེན་པོ་ཡོད་ཅེས་ནན་བཤད་གནང་བ་རེད།

2021ལོའི་ཟླ་7པར། ཉིང་ཞ་རྒྱལ་ཁབ་རྒུན་འབྲུམ་དང་རྒུན་ཆང་ཐོན་ལས་སྒོ་དབྱེ་འཕེལ་རྒྱས་ཀྱི་ཕྱོགས་བསྡུས་ཚོད་ལྟ་ཁུལ་སྒོ་བྱང་བཀལ་ནས་བཙུགས་ཤིང་། ཕྱོགས་བསྡུས་ཚོད་ལྟ་ཁུལ་བསྐྲུན་པ་གོ་སྐབས་སུ་བྱས་ནས་ཉིང་ཞ་ཡིས་རྒུན་ཆང་ཐོན་ལས་དེ་སྤུས་ཚད་མཐོ་བའི་འཕེལ་རྒྱས་ཀྱི་ཀ་རྟེན་ཐོན་ལས་སུ་གཏོད་པར་ཤུགས་སྣོན་བརྒྱབ་ཡོད། ན་ནིང་ཉིང་ཞའི་རྒུན་ཆང་ཐོན་ལས་ཀྱི་ཕྱོགས་བསྡུས་ཐོན་རྫས་རིན་ཐང་སྒོར་དུང་ཕྱུར་300ཟིན་ཡོད།

2020ལོའི་ཟླ་6ཚེས་9ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་དེ་གར་ཕེབས་ནས་ཉིང་ཞའི་དེང་རབས་ཞིང་ལས་འཕེལ་རྒྱས་དང་ཞིང་ལས་མཉམ་ལས་ཁང་གིས་ཞིང་པ་སྣེ་ཁྲིད་དེ་འབབ་འཕར་ཕྱུག་འགྱུར་གྱི་གཉེར་སྐྱོང་བྱེད་ཐབས་སོགས་ཀྱི་གནས་ཚུལ་སྙན་སེང་གསན་པ་དང་། ཉིང་ཞའི་ཁྱད་ལྡན་ཞིང་ལས་ཐོན་རྫས་འགྲེམས་སྟོན་ལ་གཟིགས་པ། འབྲས་འདེབས་པ་དང་ཉ་གསོའི་ལས་རིགས་མཉམ་འདྲེས་འཕེལ་རྒྱས་ཀྱི་གསར་གཏོད་བྱེད་ཐབས་མཁྱེན་རྟོགས་བཅས་གནང་བ་རེད། སྤྱི་ཁྱབ་ཧྲུའུ་ཅིས་ཞིང་ལས་ཀྱི་ཕྱོགས་སྒྱུར་འཕེལ་རྒྱས་ལ་སྐུལ་འདེད་གཏོང་བ་ནི་ཉིང་ཞ་ཡིས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རིང་གི་ལས་དོན་གལ་ཆེན་ཞིག་རེད། ཉིང་ཞ་ཡིས་རྨ་ཆུའི་ཐོན་ཁུངས་ལ་གཅེས་སྤྲས་དང་། འབྲས་དང་ཆུའི་དབར་གྱི་འགལ་ཟླ་ཐག་གཅོད་ལ་སྣང་ཆེན། ཞིང་ལས་ཐོན་ལས་ཀྱི་གྲུབ་ཆ་ལེགས་སྒྲིག ཆུ་གྲོན་ཆུང་ཅན་དང་ཟུར་སྣོན་རིན་ཐང་མཐོ་བའི་འདེབས་གསོའི་ལས་རིགས་འཕེལ་རྒྱས་ཧུར་ཐག་གཏོང་བ་བཅས་བྱེད་དགོས་ཞེས་ནན་བཤད་གནང་བ་རེད།

“ཞིང་ནང་དུ་ཆུ་འབྲས་འདེབས་པ་ཕུད། ད་དུང་ཉ་དང་། སྡིག་སྲིན། ཡ་ཙེ་བཅས་གསོས་ནས་ཆུ་གཅིག་མང་སྤྱོད་དང་ཞིང་གཅིག་ཐོན་མང་མངོན་འགྱུར་བྱུང་ཡོད”གླིང་ཁུལ་འདེབས་འཛུགས་ཀྱི་འགན་འཁུར་བ་ཀྲང་ཆིང་ཧྭ་ཡིས་ངོ་སྤྲོད་བྱས་པར་གཞིགས་ན། ཞིང་ལས་དང་ཡུལ་སྐོར་མཉམ་འདྲེས་བྱས་པས། ན་ནིང་གླིང་ཁུལ་གྱི་ཡོང་འབབ་སྒོར་ཁྲི་1880ཟིན་པ་དང་ཞིང་པ་100ལྷག་ཙམ་ལ་མི་རེར་ཆ་སྙོམས་འབབ་འཕར་སྒོར་ཁྲི་3ལྷག་ཙམ་ཟིན་ཡོད་ཅེས་བརྗོད།

2020ལོའི་ཟླ་6པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཞ་རུ་རྟོག་ཞིབ་གནང་སྐབས། སྤུས་ཚད་མཐོ་བའི་འཕེལ་རྒྱས་ལ་རྒྱུན་སྲིང་ལྷོད་མེད་ངང་སྐུལ་འདེད་གཏོང་བ་དང་། དཔལ་འབྱོར་འཕེལ་རྒྱས་གཏོང་སྟངས་ཕྱོགས་སྒྱུར་མགྱོགས་སུ་གཏོང་བ། ཐོན་ལས་ཕྱོགས་སྒྱུར་རིམ་སྤོར་མགྱོགས་སུ་གཏོང་བ། སྒུལ་ནུས་གསར་རྙིང་བརྗེ་ཚད་མགྱོགས་སུ་གཏོང་བ་བཅས་བྱས་ཏེ། དཔལ་འབྱོར་འཕེལ་རྒྱས་ཀྱི་གྲངས་འབོར་ལུགས་མཐུན་ངང་འཕར་བ་དང་སྤུས་ཚད་བརྟན་པོའི་ངང་འཕར་བ་སྐུལ་འདེད་གཏོང་དགོས་ཞེས་ནན་བཤད་གནང་བ་རེད།

ནག་ཐིང་ཐིང་གི་རྡོ་སོལ་ལ་རྡོ་སྣུམ་དང་རང་བྱུང་སོལ་རླངས་བཟོ་ཆོག་ལ་དཀར་གཙང་གི་ཧྥང་ལུན་རས་ཆ་ཡང་བཟོ་ཆོག དེང་སྐབས་ཀྱི་རྡོ་སོལ་རྫས་འགྱུར་བཟོ་ལས་ཀྱིས་རྡོ་སོལ་འབུད་རྫས་ནས་རྒྱུ་ཆར་གྱུར་པའི་གཏམ་རྒྱུད་དབྱིན་ཁྲོན་ཤར་རྒྱུད་ཧན་ཧའེ་ལི་ཡི་ཉིང་ཏུང་ནུས་རྒྱུའི་རྫས་འགྱུར་བཟོ་ལས་རྟེན་གཞིར་གྲགས་ནས་ཡོད།

2016ལོའི་ཟླ་7ཚེས་19ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཏུང་ནུས་རྒྱུའི་རྫས་འགྱུར་བཟོ་ལས་རྟེན་གཞིར་རྟོག་ཞིབ་གནང་སྐབས། རང་རྒྱལ་གྱི་ནུབ་རྒྱུད་དུ་ནུས་རྒྱུའི་རྫས་འགྱུར་བཟོ་ལས་རྟེན་གཞི་དེ་འདྲ་ཞིག་དང་ལྷག་པར་དུ་མིག་སྔར་འཛམ་གླིང་དུ་གཞི་ཁྱོན་ཆེ་ཤོས་ཀྱི་རྡོ་སོལ་སྣུམ་གྱི་རྣམ་གྲངས་བསྐྲུན་པར་འཐབ་ཇུས་ཀྱི་དོན་སྙིང་ལྡན་ཡོད། ཡང་འབད་བསྐྱར་འབད་དང་ཡག་ཐོག་ཡག་བརྩེགས་བྱས་ནས་ལག་རྩལ་གྱི་འགག་སྒོ་དང་། སྤུས་ཚད་ཀྱི་འགག་སྒོ བདེ་འཇགས་ཀྱི་འགག་སྒོ ཁོར་ཡུག་སྲུང་སྐྱོང་གི་འགག་སྒོ་བཅས་ནན་པོ་བསྲུང་ནས་སྤུས་འབོར་གཉིས་ལྡན་ངང་དུས་བཀག་ལྟར་འཛུགས་སྐྲུན་གྱི་ལས་འགན་ལེགས་གྲུབ་བྱེད་དགོས་ཞེས་གསུངས་པ་རེད།

2016ལོའི་ཟླ་12ཚེས་21ཉིན་ཉིང་ཏུང་རྟེན་གཞིའི་རྡོ་སོལ་སྣུམ་གྱི་རྣམ་གྲངས་ཚོད་ལྟའི་རླངས་འཁོར་ལེགས་གྲུབ་བྱུང་བ་དང་། ལོ་རེར་རྡོ་སོལ་ཏུན་ཁྲི་400ཡི་བར་བརྒྱུད་གཤེར་འགྱུར་རྣམ་གྲངས་ཀྱི་Aསྣུམ་ལམ་ཐིག་ཧྲིལ་པོ་ཤར་གཏོང་ཐུབ་ནས་སྣུམ་ཐོན་ཚད་ལྡན་སྐྱེད་ཐུབ་སྟེ། རྡོ་སོལ“ནག་པོ་ནས་དཀར་པོར་གྱུར་པ”དང་ཐོན་ཁུངས“ལྕི་བ་ནས་ཡང་བར་གྱུར་པའི”འགྱུར་ལྡོག་འགྲོ་རིང་ཐོན་ལས་ཕྱོགས་སྒྱུར་རིམ་སྤོར་བྱུང་ཡོད།

2021ལོར་ཉིང་ཞ་ཡིས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བར་ཕན་འབྲས་གསར་པ་ཐོབ་པ་དང་གསར་དར་འགུལ་ནུས་མགྱོགས་མྱུར་སྟོབས་ཆེར་ཕྱིན་ཞིང་། ལྗོངས་ཡོངས་ཀྱི་གཞི་ཁྱོན་ཡན་གྱི་བཟོ་ལས་ཀྱི་ལག་རྩལ་མཐོ་བའི་བཟོ་སྐྲུན་ལས་རིགས་ཀྱི་འཕར་ཐང་དུས་མཚུངས་ལས་22.5%འཕར་བ་དང་སྒྲིག་ཆས་བཟོ་སྐྲུན་ལས་རིགས་ཀྱི་འཕར་ཐང་དུས་མཚུངས་ལས་12.7%འཕར་ནས་གཞི་ཁྱོན་ཡན་གྱི་བཟོ་ལས་ཀྱི་འཕར་ཐང་བསྡོམས་འབོར་ལས་སོ་སོར་བརྒྱ་ཆའི་གྲངས་14.5དང་4.7འཕར་ཡོད། ཆུ་གློག་དང་། རླུང་གློག ཉི་འོད་ནུས་པ་སོགས་བསྐྱར་སྐྱེས་ནུས་རྒྱུས་གློག་གཏོང་ཚད་ཆུ་ཚོད་ཆན་ཝ་དུང་ཕྱུར་485.2ཟིན་ནས་དུས་མཚུངས་ལས་37.7%འཕར་ཡོད། དྲ་སྦྲེལ་དཔལ་འབྱོར་མགྱོགས་མྱུར་འཕེལ་རྒྱས་ཕྱིན་ཏེ་ལོ་ཧྲིལ་པོར་དྲ་ཐོག་སིལ་ཚོང་གྲངས་འབོར་སྒོར་དུང་ཕྱུར་302.8ཟིན་ནས་དུས་མཚུངས་ལས་46%འཕར་ཡོད།

ཕྱོགས་ཡོངས་ནས་དབུལ་སྒྲོལ་དང་གྲོང་གསེབ་དར་རྒྱས་གཏོང་བའི་འཐབ་ཇུས་འབྲེལ་མཐུད་ནུས་ལྡན་ལ་སྐུལ་འདེད་གཏོང་དགོས།

2016ལོའི་ཟླ་7ཚེས་18ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཆར་པར་མ་འཛེམས་པར་ཀུའུ་ཡོན་གྲོང་ཁྱེར་ཅིང་ཡོན་རྫོང་ཏ་དབན་ཤང་དབྱང་ལིང་གྲོང་ཚོར་ཕེབས་ནས་དབུལ་སྒྲོལ་འགག་སྒྲོལ་གྱི་ལས་དོན་ལ་རྟོག་ཞིབ་གནང་བ་རེད། དུད་ཚང་དབུལ་པོ་མ་ཁེ་ཅུན་གྱི་ཁྱིམ་དུ་སྤྱི་ཁྱབ་ཧྲུའུ་ཅིས་དབུལ་སྒྲོལ་གྱི་བྱེད་ཐབས་དོན་འཁྱོལ་ལ་མཁྱེན་རྟོགས་ཞིབ་ཕྲ་གནང་བ་རེད། ཡུལ་ཚོའི་འཐུས་མི་དང་གླེང་མོལ་གནང་སྐབས་གྲོང་ཚོའི་འཐུས་མིས་ལོ་འདི་དག་རིང་ཆུ་དང་། གློག ལམ། ཐོན་ལས་འཕེལ་རྒྱས་སོགས་ཀྱི་ཐད་ཐོན་པའི་མངོན་གསལ་དོད་པའི་འགྱུར་ལྡོག་སྐོར་གཅིག་རྗེས་གཉིས་མཐུད་ངང་ཞུས།

“སྡོད་ཁང་དང་། སྒྲིག་བཀོད། ཕྱུགས་ཚང་བཅས་ནས་ལས་ཞུགས་དང་། ཡོང་འབབ། སློབ་སྐྱོད། ནད་ལྟ། སྤྱི་པའི་ཞབས་འདེགས་བཅས་ཀྱི་སྐོར་སྤྱི་ཁྱབ་ཧྲུའུ་ཅིས་བཀའ་འདྲི་ཞིབ་ཚགས་གནང་བས་ཡུལ་མི་ཚོར་དྲོ་སྐྱིད་ཟབ་མོ་ཚོར་ཡོད”ཅེས་མ་ཁེ་ཅུན་གྱིས་དྲན་གསོ་དང་བཅས་བརྗོད།

“2016ལོར་ང་ཚོའི་ཡུལ་ཚོའི་མི་རེའི་ཆ་སྙོམས་ཡོང་འབབ་ཁེ་གཙང་སྒོར་6960ཟིན་པ་དང་ན་ནིང་ལོ་མཇུག་ཏུ་སྒོར་12652ཟིན་ནས་ལྡབ་གཅིག་ཙམ་འཕར་ཡོད” ཅེས་དབྱང་ལིང་གྲོང་ཚོའི་ཏང་ཀྲི་པུའི་ཧྲུའུ་ཅི་དབྱང་ཅེས་བརྗོད། ཁོང་གིས་མིག་སྔར་གྲོང་ཚོ་ཡོངས་ཀྱིས་བ་གླང་མགོ་གྲངས་1100དང་ལུག་1000ལྷག་ཙམ་གསོ་ཚགས་བྱས་པས་ལོའི་ཐོན་རྫས་རིན་ཐང་སྒོར་ཁྲི་3000ཟིན་ཡོད་ཅེས་བརྗོད།

2020ལོའི་ཟླ་6པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཞ་རུ་རྟོག་ཞིབ་གནང་སྐབས། དབུལ་སྒྲོལ་གྲུབ་འབྲས་སྲ་བརྟན་དང་རྒྱ་ཆེར་གཏོང་བར། ད་ཡོད་ཀྱི་སྲིད་ཇུས་སྤྱིའི་ཆ་ནས་བརྟན་པོ་རྒྱུན་འཁྱོངས་བྱས་ཏེ་ཕྱོགས་ཡོངས་ནས་དབུལ་སྒྲོལ་དང་གྲོང་གསེབ་དར་རྒྱས་འཐབ་ཇུས་ཀྱི་སྦྲེལ་མཐུད་ནུས་ལྡན་ལ་སྐུལ་འདེད་གཏོང་དགོས་ཞེས་ནན་བཤད་གནང་བ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱས་ནས། ཉིང་ཞ་ཡིས་འདི་ལོ་སྒོར་དུང་ཕྱུར་20བཏང་སྟེ་གྲོང་གསེབ་ཀྱི་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་ལ་རྒྱབ་སྐྱོར་དང་གྲོང་གསེབ་དར་རྒྱས་གཏོང་བའི་འབྲེལ་མཐུད་མ་དངུལ་ཐོན་ལས་འཕེལ་རྒྱས་ལ་སྤྱོད་པའི་བསྡུར་ཚད་55%ལས་མི་དམའ་བ་བྱས་ཡོད། གྲོང་གསེབ་དར་རྒྱས་གཏོང་བའི་གཙོ་གནད་རོགས་སྐྱོར་རྫོང་དང་གནས་སྤོས་ཡུལ་མི་གཅིག་སྡུད་བཀོད་སྒྲིག་ཁུལ་གྱིས་ཞིང་འབྲེལ་དང་ཞིང་པ་སྣེ་ཁྲིད་ཀྱིས་ཁྱད་ལྡན་ཐོན་ལས་འཕེལ་རྒྱས་གཏོང་བར་རྒྱབ་སྐྱོར་བྱས་ནས་ཡུལ་བབ་དང་བསྟུན་ཏེ“འདེབས་འཛུགས་ཆུང་གྲས་དང་། གསོ་ཚགས་ཆུང་གྲས། ས་ཞིང་ཆུང་གྲས། ལས་སྣོན་ཆུང་གྲས། ཚོང་དོན་ཆུང་གྲས། ཁྱིམ་ཚང་མགྲོན་ཁང་ཆུང་གྲས”སོགས་ཁྱད་ལྡན་ལྡུམ་རའི་དཔལ་འབྱོར་འཕེལ་རྒྱས་བཏང་ནས་དབུལ་སྒྲོལ་མང་ཚོགས་40%ཡན་གྱི་ཡོང་འབབ་ཐོན་ལས་ནས་བྱུང་བའི་འགན་ལེན་བྱས་ཡོད།

ཟླ་6ཚེས་8ཉིན་ནི་ཝུའུ་ཀྲུང་གྲོང་ཁྱེར་ཧུང་སི་པའོ་ཆུས་ཧུང་ཏེ་གྲོང་ཚོའི་མང་ཚོགས་ཀྱི་ངོས་ནས་བརྗོད་ན། བརྗེད་པར་དཀའ་བའི་ཉིན་མོ་ཞིག་རེད། 2020ལོའི་ཟླ་6ཚེས་8ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཧུང་ཏེ་གྲོང་ཚོར་ཕེབས་ནས་གྲོང་ཚོའི་དབུལ་སྐྱོར་འཁོར་ཁང་གི་སྒོ་རའི་ནང་ཉིང་ཞ་དང་ཧུང་ཏེ་གྲོང་ཚོའི་དབུལ་སྒྲོལ་འགག་སྒྲོལ་གྱི་གནས་ཚུལ་ངོ་སྤྲོད་གསན་ཞིང་། སྤྱི་ཁྱབ་ཧྲུའུ་ཅིས་དབུལ་སྐྱོར་འཁོར་ཁང་གཉེར་བའི་དམིགས་ཡུལ་ནི་དབུལ་སྐྱོར་བྱེད་དགོས་པ་འདི་ཡིན་པས། དབུལ་སྐྱོར་གྱི་ངོ་བོ་མཐའ་འཁྱོངས་བྱས་ཏེ་དཀའ་ངལ་ཡོད་པའི་མང་ཚོགས་ལ་ཕྱོགས་པ་དང་དཀའ་ངལ་ཡོད་པའི་མང་ཚོགས་མང་ཙམ་ལས་ཞུགས་ཐུབ་པར་བྱེད་དགོས། རང་ཁྱིམ་དུ་ལས་ཞུགས་ཐུབ་པའི་ཡུལ་མི་ཚོའི་ཡོང་འབབ་གྲོང་ཁྱེར་ལས་དམའ་ཡང་། ཉལ་ཁང་དང་། བཟའ་བཅའ། འགྲིམ་འགྲུལ་སོགས་ཀྱི་འགྲོ་གྲོན་གྲོན་ཆུང་ཐུབ་པ་མ་ཟད། ད་དུང་ཁྱིམ་ཚང་ལ་ལྟ་རྟོག་ཐུབ་པས་གོ་ཉིས་ཆོད་ཐུབ་ཅེས་གསུངས་པ་རེད།

ཧྥུའུ་ཉིང་མཉམ་ལས། ཏེ་ཧྭ་རོགས་སྐྲུན་ཞེས་པའི་ཡིག་འབྲུ་ཆེན་པོ་ཧུང་ཏེ་གྲོང་ཚོའི་དབུལ་སྐྱོར་འཁོར་ཁང་གི་ཕྱིའི་གྱང་ལྡེབས་སུ་བཀལ་འདུག དབུལ་སྐྱོར་འཁོར་ཁང་དུ་གྲོང་མི་བཅུ་ཕྲག་ཁ་ཤས་ཀྱིས་ཤོག་སྒམ་ལ་འགྱིག་གི་ལག་འཇུ་སྒར་བཞིན་འདུག “ད་ཆ་འཁོར་ཁང་གི་ལག་རྩལ་བཟོ་པར་ཟླ་རེའི་གླ་ཆ་སྒོར་སུམ་སྟོང་བཞི་སྟོང་ཙམ་ཡོད་པ་དང་ཐོན་གྲངས་བརྩི་མཁན་ཡུལ་མིར་ཟླ་རེར་གླ་ཆ་སྒོར་1000ཙམ་ཡོད”ཅེས་འཁོར་ཁང་གི་འགན་འཁུར་བ་ཞུས་ལིན་གྱིས་བརྗོད།

ལོ་གཉིས་སོང་རྗེས་ཧུང་ཏེ་གྲོང་ཚོའི་རྨང་གཞིའི་སྒྲིག་བཀོད་རིམ་བཞིན་འཐུས་སྒོ་ཚང་དུ་ཕྱིན་པ་དང་ཐོན་ལས་ཀྱི་བཀོད་པ་རྒྱུན་ཆད་མེད་པར་ལེགས་སུ་ཕྱིན་ཞིང་། 2021ལོར་གྲོང་ཚོའི་མཉམ་སྡེབ་དཔལ་འབྱོར་ཡོང་འབབ་སྒོར་ཁྲི་140ལས་བརྒལ་བ་དང་ཡུལ་མི་མི་རེའི་ཆ་སྙོམས་ཡོང་འབབ་ཁེ་གཙང་སྒོར་ཁྲི་1.25ཟིན་ཡོད།

རྒྱང་ལམ་གསར་པར་འབད་བརྩོན་གྱིས། དུས་རབས་གསར་པར་བྱས་རྗེས་འཇོག

ཉིང་ཞ་ཧུད་རིགས་རང་སྐྱོང་ལྗོངས་ཏང་ཨུད་ཀྱི་འགན་འཁུར་བློ་མཐུན་གཙོ་བོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཉིང་ཞ་རུ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་དང་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ནས། འགན་འཁྲི་དང་ལས་འགན་ཕྲག་ཏུ་འཁུར་བ་དང་། འབད་འབུངས་ཡར་བརྩོན། རྒྱུན་འཁྱོངས་ལྷོད་མེད་བཅས་བྱས་ཏེ་སྤྱི་ཚོགས་རིང་ལུགས་དེང་རབས་ཅན་གྱི་མཛེས་སྡུག་ལྡན་པའི་ཉིང་ཞ་གསར་པ་ཕྱོགས་ཡོངས་ནས་སྐྲུན་པའི་བརྗིད་ཆེའི་ལེའུ་ཧུར་ཐག་རྩོམ་གྱི་ཡིན་ཞེས་བརྗོད།