1992ལོ།

★ ཟླ་1ཚེས་14ཉིན། ཅང་ཙེ་མིན་གྱིས་ཀྲུང་དབྱང་གི་མི་རིགས་ལས་དོན་ཚོགས་འདུར་གསུང་བཤད་གནང་སྟེ། འདྲ་མཉམ་དང་། མཐུན་སྒྲིལ། རོགས་རེས་བཅས་ཀྱི་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྲ་བརྟན་དང་འཕེལ་རྒྱས་གཏོང་བ་དང་། མི་རིགས་ས་ཁོངས་རང་སྐྱོང་ལམ་ལུགས་མཐའ་འཁྱོངས་དང་འཐུས་སྒོ་ཚང་དུ་གཏོང་བ། མེས་རྒྱལ་གཅིག་གྱུར་མཐའ་གཅིག་ཏུ་སྲུང་སྐྱོང་བཅས་བྱེད་དགོས་ཞེས་གསུངས།

★ ཟླ་1ཚེས་18ཉིན་ནས་ཟླ་2ཚེས་21ཉིན་བར། ཏེང་ཞའོ་ཕིང་གིས་ཝུའུ་ཁྲང་དང་། ཧྲེན་ཀྲེན། ཀྲུའུ་ཧའེ། ཧྲང་ཧའེ་སོགས་སུ་གཟིགས་ཞིབ་གནང་བ་དང་འབྲེལ་གཏམ་བཤད་གནང་སྟེ། ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ཚུན་གྱི་ལམ་ཕྱོགས་དང་། མཛད་ཕྱོགས། སྲིད་ཇུས་བཅས་མཐའ་འཁྱོངས་བྱེད་པའི་འགག་རྩ་ནི“ལྟེ་བ་གཅིག་དང་གཞི་རྩའི་ཆ་གཉིས”མཐའ་འཁྱོངས་ལ་ཐུག་པ་དང་། གཞི་རྩའི་ལམ་ཕྱོགས་ལོ་བརྒྱ་རྒྱུན་འཁྱོངས་བྱེད་དགོས། “སྤྱི་ཚོགས་རིང་ལུགས”དང“མ་རྩ་རིང་ལུགས”གང་ཡིན་མིན་བརྡར་ཤ་གཅོད་པའི་ཚད་གཞི་གཙོ་བོ་སྤྱི་ཚོགས་རིང་ལུགས་སྤྱི་ཚོགས་ཀྱི་ཐོན་སྐྱེད་ནུས་ཤུགས་འཕེལ་རྒྱས་ལ་ཕན་ཐོགས་ཡོད་མེད་དང་། སྤྱི་ཚོགས་རིང་ལུགས་རྒྱལ་ཁབ་ཀྱི་ཕྱོགས་བསྡུས་རྒྱལ་སྟོབས་ཆེ་རུ་གཏོང་བར་ཕན་ཐོགས་ཡོད་མེད། མི་དམངས་ཀྱི་འཚོ་བའི་ཆུ་ཚད་མཐོ་རུ་གཏོང་བར་ཕན་ཐོགས་ཡོད་མེད་བཅས་ལ་ལྟ་དགོས། གོ་སྐབས་ལ་དམ་འཛིན་བྱས་ནས་རང་ངོས་འཕེལ་རྒྱས་གཏོང་དགོས་ན་འཕེལ་རྒྱས་ནི་ལྡོག་མེད་ཀྱི་གནས་ལུགས་རེད་ཅེས་གསུངས།

★ ཟླ་2ཚེས་25ཉིན། རྒྱལ་ཡོངས་མི་དམངས་འཐུས་ཚོགས་སྐབས་བདུན་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་ཉེར་བཞི་པར《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་རྒྱ་མཚོ་དང་མཐའ་འབྲེལ་ས་ཆའི་སྐོར་གྱི་བཅའ་ཁྲིམས》ལ་གྲོས་འཆམ་བྱུང་ཡོད།

★ ཟླ་3ཚེས་8ཉིན། རྒྱལ་སྲིད་སྤྱི་ཁྱབ་ཁང་གིས《རྒྱལ་ཁབ་ཀྱི་དུས་ཡུན་རིང་འབྲིང་གི་ཚན་རིག་ལག་རྩལ་འཕེལ་རྒྱས་ཀྱི་རྩ་གནད》བཀྲམ།

★ ཟླ་10ཚེས་12ནས་18ཉིན་བར། ཀྲུང་གོ་གུང་ཁྲན་ཏང་རྒྱལ་ཡོངས་འཐུས་མི་ཚོགས་ཆེན་ཐེངས་བཅུ་བཞི་པ་འཚོགས་ཤིང་། ཚོགས་ཆེན་ལ་གྲོས་འཆམ་བྱུང་བའི་སྙན་སྒྲོན《སྒྱུར་བཅོས་སྒོ་དབྱེ་དང་དེང་རབས་ཅན་འཛུགས་སྐྲུན་གྱི་གོམ་སྟབས་མགྱོགས་སུ་བཏང་ནས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བྱ་གཞག་ལ་རྒྱལ་ཁ་སྔར་ལས་ཆེ་བ་འཐོབ་པར་བྱེད་དགོས》ཞེས་ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ཚུན་གྱི་ལོ་14རིང་གི་ལག་ལེན་དངོས་ཀྱི་ཉམས་མྱོང་ལ་ཕྱོགས་སྡོམ་བྱས་ཡོད། ཚོགས་ཆེན་ལ《ཀྲུང་གོ་གུང་ཁྲན་ཏང་གི་སྒྲིག་ཡིག(བཟོ་བཅོས་འཆར་ཟིན)》ལ་གྲོས་འཆམ་བྱུང་ཞིང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་འཛུགས་སྐྲུན་བྱེད་རྒྱུའི་སྐོར་གྱི་བློ་མཐུན་ཏེང་ཞའོ་ཕིང་གི་རིགས་པའི་གཞུང་ལུགས་དང་སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་གྱི་ཏང་གི་གཞི་རྩའི་ལམ་ཕྱོགས་ཏང་གི་སྒྲིག་ཡིག་ཏུ་བཀོད།

★ ཟླ་10ཚེས་19ཉིན། ཀྲུང་གུང་སྐབས་བཅུ་བཞི་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོར་ཅང་ཙེ་མིན་ཀྲུང་དབྱང་ཨུ་ཡོན་ལྷན་ཁང་གི་སྤྱི་ཁྱབ་ཧྲུའུ་ཅིར་བདམས་པ་དང་། ཅང་ཙེ་མིན་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞིར་གཏན་འཁེལ་བྱས་པ། ཝེ་ཅན་ཞིང་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཧྲུའུ་ཅིར་བསྐོས་པ་རེད།

★ ཟླ་11པར། མཚོ་འགག་ངོགས་གཉིས་ཀྱི་འབྲེལ་བའི་མཐུན་ཚོགས་དང་ཐའེ་དབན་མཚོ་འགག་སྤེལ་རེས་ཐེབས་རྩ་ཚོགས་པས་ངོགས་གཉིས་ཀྱི་ལས་དོན་རང་བཞིན་གྱི་གྲོས་མོལ་ལ་ཀྲུང་གོ་གཅིག་གི་རྩ་དོན་མཐའ་འཁྱོངས་བྱེད་པར་གསལ་འགྲེལ་ཇི་ལྟར་བྱེད་དགོས་པའི་གནད་དོན་ཐག་གཅོད་བྱེད་པར“མཚོ་འགག་ངོགས་གཉིས་ཀྲུང་གོ་གཅིག་གི་ཁོངས་སུ་གཏོགས་པ་དང་། ཐུན་མོང་ཐོག་འབད་བརྩོན་བྱས་ཏེ་རྒྱལ་ཁབ་གཅིག་གྱུར་ཡོང་བར་བྱེད་དགོས་པའི”གཅིག་མཐུན་ངོས་འཛིན་བྱུང་བར་ཕྱིས་སུ“གོ་གཉིས་གཅིག་མཐུན་ངོས་འཛིན”ཟེར།

(རྩོམ་གྱི་ཡོང་ཁུངས་ཤིན་ཧྭ་གསར་འགྱུར་ཁང)