ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧོ་ནན་དུ་རྟོག་ཞིབ་གནང་བར་ཐེངས་མང་ཕེབས་ཏེ་འབྲུ་རིགས་ཐོན་སྐྱེད་དང་། རྨ་ཆུ་བཅོས་སྐྱོང་། དབུས་རྒྱུད་དར་རྒྱས། ལས་བྱེད་པའི་སྤྱོད་ཚུལ་སོགས་ཐད་ལ་བླང་བྱ་བཏོན་ཏེ་ཧོ་ནན་འཕེལ་རྒྱས་ལ་ཁ་ཕྱོགས་གསལ་སྟོན་གནང་ཡོད། སྤྱི་ཁྱབ་ཧྲུའུ་ཅིའི་བཀའ་མངགས་བློ་ལ་བརྟན་པོར་བཅངས་ཏེ་ཧོ་ནན་གྱིས་དཀའ་སྤྱད་འབད་འཐབ་དང་འགག་སྒྲོལ་ལམ་འཚོལ་བྱས་ནས་དབུས་རྒྱུད་ས་ཁུལ་གང་མགྱོགས་དར་རྒྱས་དང་སྔོན་ཐོན་བརྩོན་ལེན་ཧུར་ཐག་བྱས་ཏེ་དུས་རབས་གསར་པའི་ཀྲུང་ཡོན་ས་གཞི་ཆེ་མོར་དེ་བས་མཛེས་སྡུག་ལྡན་པའི་ལེའུ་བརྩམས་ཡོད།

“ལེགས་ཆ་དང་ཕུགས་ནོར་ཡིན་པའི་འབྲུ་རིགས་ཐོན་སྐྱེད་དེ་ག་དུས་ཡིན་རུང་དོར་མི་རུང”

2021ལོའི་ཟླ་5པར། ཧོ་ནན་ནན་དབྱང་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྟོག་ཞིབ་གནང་རིང་རླངས་འཁོར་ནས་བབས་གནང་སྟེ་གྲོ་ཞིང་ནང་ཕེབས་ནས་གྲོའི་སྐྱེ་འཚར་ལ་གཟིགས་ཞིབ་གནང་ཞིང་། ལོ་ལེགས་ཡོང་ཉེར་ཡོད་པ་གཟིགས་རྗེས་སྤྱི་ཁྱབ་ཧྲུའུ་ཅིས་དབྱར་འབྲུའི་ཐོན་འབབ་ཡག་པོ་བྱུང་ན་ལོ་འཁོར་མོའི་དཔལ་འབྱོར་ལ་འདེགས་སྐྱོར་ཐུབ་ཀྱི་རེད། འབྲུ་རིགས་ཀྱི་བདེ་འཇགས་འགན་ལེན་བྱེད་པར་ངེས་པར་དུ་ས་བོན་རང་ཉིད་ཀྱི་ལག་ཏུ་དམ་པོར་བཟུང་དགོས་ཞེས་གསུངས་པ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཞིང་ལས་ཀྱི་ཞིང་ཆེན་ཆེན་པོ་ཞིག་ཡིན་པའི་ཧོ་ནན་གྱི་ཞིང་ལས་དང་། ལྷག་པར་དུ་འབྲུ་རིགས་ཐོན་སྐྱེད་ཀྱིས་རྒྱལ་ནང་ལ་ཤུགས་རྐྱེན་ཧ་ཅང་ཆེན་པོ་ལྡན་ཡོད” “ལེགས་ཆ་དང་ཕུགས་ནོར་ཡིན་པའི་འབྲུ་རིགས་ཐོན་སྐྱེད་དེ་ག་དུས་ཡིན་རུང་དོར་མི་རུང”ཞེས་བཀའ་མངགས་ཟབ་མོ་གནང་ཡོད།

2014ལོའི་ཟླ་5པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁའེ་ཧྥུང་གྲོང་ཁྱེར་ཝུའེ་ཧྲི་རྫོང་ཀྲང་ཧྲི་གྲོང་རྡལ་གྱི་ཚད་གཞི་མཐོ་བའི་ཞིང་ཁའི་ཕྱོགས་བསྡུས་གསར་སྤེལ་དཔེ་སྟོན་ཁུལ་དུ་རྟོག་ཞིབ་གནང་སྐབས། རྒྱལ་ཡོངས་ཀྱི་འབྲུ་རིགས་ཐོན་སྐྱེད་ཀྱི་ལྟེ་བའི་ཁུལ་གཏོད་པའི་དམིགས་ཡུལ་དང་ལས་འགན་ལ་གཞི་ཚུགས་ཏེ་འབྲུ་རིགས་ཐོན་སྐྱེད་བྱེད་ནུས་ཆེ་རུ་གཏོང་བའི་ཐད་ཐབས་ལམ་གསར་པ་གཏོད་པ་དང་། བར་མཐོངས་གསར་པ་འཚོལ་བ། ལེགས་ཆ་གསར་པ་སྐྱེད་སྲིང་བཅས་བྱེད་དགོས་ཞེས་གསུངས་ཡོད།

སྤྱི་ཁྱབ་ཧྲུའུ་ཅིའི་བླང་བྱ་གལ་ཆེན་དོན་འཁྱོལ་བྱས་ཏེ་ཧོ་ནན་གྱིས་འབྲུ་རིགས་ཐོན་སྐྱེད་ལས་དོན་ལ་དམ་འཛིན་ཏན་ཏིག་བྱས་ཤིང་། རྨོ་ཞིང་སྲུང་སྐྱོང་གི་ལམ་ལུགས་ནན་ཤོས་དོན་འཁྱོལ་བྱས་ཏེ་འབྲུ་རིགས་ཐོན་སྐྱེད་ཀྱི་ནུས་པའི་ཁུལ་མུའུ་ཁྲི་7844.52དང་ཞིང་ལས་ཐོན་རྫས་གལ་ཆེན་སྲུང་སྐྱོང་ཁུལ་མུའུ་ཁྲི་1034དབྱེ་འབྱེད་གཏན་འབེབས་བྱས་ཡོད། ཞིང་ཆེན་ཡོངས་སུ་རེས་སྐོར་གསར་པའི་ཚད་གཞི་མཐོ་བའི་ཞིང་ཁ་འཛུགས་སྐྲུན་བྱས་པར་རིམ་རྩིས་བྱས་ན་མུའུ་ཁྲི་7580ཟིན་ཡོད། སོན་ལས་ཚན་རྩལ་རང་སྟོབས་རང་སྤེལ་ཡོང་བར་དམིགས་ཏེ་ཞིང་ལས་ལོ་ཏོག་གཙོ་བོའི་སོན་བཟང་ཁྱབ་ཚད་97%ཡན་ཟིན་པར་བྱས་ཡོད། རྒྱལ་ཁབ་ཞིང་འཕྲུལ་སྒྲིག་ཆས་གསར་གཏོད་ལྟེ་གནས་ཆུ་ཚད་མཐོ་པོས་བསྐྲུན་ཏེ་ཞིང་ལས་ལོ་ཏོག་གཙོ་བོའི་རྨོ་འདེབས་བསྡུ་གསུམ་ཕྱོགས་བསྡུས་འཕྲུལ་ཆས་ཅན་ལ་འགྱུར་ཚད་86.3%ཟིན་པ་བྱས་ཡོད། དེང་རབས་ཞིང་ལས་ཐོན་ལས་ཀྱི་ལག་རྩལ་མ་ལག་དང་ཞིང་ལས་ལག་རྩལ་ཁྱབ་གདལ་གྱི་མ་ལག་འཐུས་སྒོ་ཚང་དུ་བཏང་སྟེ་ཞིང་ལས་ཚན་རྩལ་ཡར་ཐོན་གྱི་ལེགས་སྐྱེས་འབུལ་ཚད་64.1%ཟིན་པ་བྱས་ཡོད།

“དབུས་རྒྱུད་ས་ཁུལ་དར་རྒྱས་གཏོང་རིང་འབད་བརྩོན་ཆེན་པོས་སྔོན་ཐོན་བརྩོན་ལེན་བྱས་པ”

ཧོ་ནན་ནི་ཀྲུང་ཡོན་དུ་གནས་པས། འབྲུ་རིགས་ཐོན་འབབ་མང་བ་མ་ཟད། བཟོ་ལས་ཀྱི་རྨང་གཞི་བཟང་བ་དང་། ས་བབ་ཀྱི་ཆ་རྐྱེན་ལེགས་པ། འགྲིམ་འགྲུལ་གྱི་ལེགས་ཆ་མངོན་གསལ་དོད་པ་བཅས་ཡོད། 2019ལོའི་ཟླ་9པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཤིན་དབྱང་དང་ཀྲེང་ཀྲོའུ་སོགས་ཀྱི་གསར་བརྗེའི་ཁུལ་རྙིང་དང་། གྲོང་གསེབ། ཁེ་ལས་སོགས་སུ་ཕེབས་ནས་དཔལ་འབྱོར་དང་སྤྱི་ཚོགས་འཕེལ་རྒྱས་སོགས་ལ་རྟོག་ཞིབ་གནང་བ་དང་འབྲེལ་ཧོ་ནན་ལ“དབུས་རྒྱུད་ས་ཁུལ་དར་རྒྱས་ཡོང་བར་སྐུལ་འདེད་གཏོང་བའི་འཐབ་ཇུས་ཀྱི་གོ་སྐབས་དམ་འཛིན་བྱེད་དགོས”དང“དབུས་རྒྱུད་ས་ཁུལ་དར་རྒྱས་གཏོང་རིང་འབད་བརྩོན་ཆེན་པོས་སྔོན་ཐོན་བརྩོན་ལེན་བྱེད་དགོས”ཞེས་བཀའ་མངགས་གནང་ཡོད།

སྤྱི་ཁྱབ་ཧྲུའུ་ཅིའི་བཀའ་མངགས་བློ་ལ་བརྟན་པོར་ངེས་ཏེ་ཧོ་ནན་གྱིས་དོན་དངོས་ལ་གཞི་ཚུགས་ནས་བྱས་རྗེས་ཧུར་ཐག་བཞག་པ་སྟེ།

བཟོ་སྐྲུན་ལས་རིགས་སྤུས་ཚད་མཐོ་བའི་འཕེལ་རྒྱས་ཡོང་བ་བྱ་རྒྱུ་དེ་འབད་འཐབ་ཀྱི་ཁ་ཕྱོགས་གཙོ་བོར་བརྩིས་ནས་སྲོལ་རྒྱུན་ཐོན་ལས་སྤུས་སྤར་འཕེལ་རྒྱས་ཡོང་བ་དང་། གསར་དར་ཐོན་ལས་གཙོ་གནད་དུ་སྐྱེད་སྲིང་བྱེད་པ། འབྱུང་འགྱུར་ཐོན་ལས་ཀྱི་ཇུས་འགོད་བཀོད་སྒྲིག་བཅས་ལ་སྤྱི་འདོམས་དམ་འཛིན་ཡག་པོ་བྱས་པས། གཞི་ཁྱོན་ཡན་གྱི་བཟོ་སྐྲུན་ལས་རིགས་ཀྱི་འཕར་ཐང་སྒོར་དུང་ཕྱུར་ཁྲི་1.65ཟིན་ཏེ་རྒྱལ་ཡོངས་ཀྱི་ཨང་ལྔ་པ་དང་དབུས་ནུབ་ས་ཁུལ་གྱི་ཨང་དང་པོར་བརྟན་པོར་གནས་ཡོད། གསར་གཏོད་དེ་སྤྱི་ཡོངས་འཕེལ་རྒྱས་ཀྱི་མངོན་གསལ་དོད་པོའི་གནས་བབ་ཐོག་བཞག་སྟེ། 2021ལོར་མཐོ་གསར་ལག་རྩལ་གྱི་ཁེ་ལས་དང་ཚན་རྩལ་རྣམ་པའི་ཁེ་ལས་འབྲིང་ཆུང་གི་གྲངས་འབོར་ཆ་སྙོམས་30%ཡན་འཕར་བ་དང་སྤྱི་ཚོགས་ཡོངས་ཀྱིས་ཞིབ་འཇུག་གསར་སྤེལ་ཐད་མ་འཇོག་བྱེད་ཚད་སྒོར་དུང་ཕྱུར་ཆིག་སྟོང་ལྷག་ཙམ་ཟིན་ཡོད། རྨང་གཞིའི་སྒྲིག་བཀོད་གལ་ཆེན་འཛུགས་སྐྲུན་ལ་ཤུགས་སྣོན་བརྒྱབ་ནས་སྲིད་འཛིན་གྲོང་ཚོ་ཚང་མར་ཨར་འདམ་ལམ་དང་འགྲུལ་སྐྱེལ་རླངས་འཁོར་ཤར་གཏོང་ཐུབ་པ་བྱས་པ་དང་། 5Gདྲ་རྒྱ་ཤང་དང་གྲོང་རྡལ་དང་གྲོང་གསེབ་ཀྱི་མི་ཚོགས་སྟུག་སར་ཁྱོན་ཡོངས་ནས་ཁྱབ་པར་བྱས་པ། ཕྱོགས་བཞི་ཀུན་ཁྱབ་ཀྱི་མྱུར་བགྲོད་ལྕགས་ལམ་གྱི་དྲ་བ་གཞི་རྩའི་ཆ་ནས་བསྐྲུན་ཟིན་པ། སྐམ་སའི་དབུས་ཁུལ་གྱི་སྒོ་དབྱེའི་མཐོ་ས་གང་མགྱོགས་བསྐྲུན་པས། 2021ལོར་ཞིང་ཆེན་ཡོངས་ཀྱི་ཕྱི་ཕྱོགས་ཚོང་དོན་གྱི་ཕྱིར་གཏོང་ནང་འདྲེན་དངུལ་འབོར་སྒོར་དུང་ཕྱུར་8000ལྷག་ཙམ་ཟིན་ནས་དབུས་རྒྱུད་ཀྱི་ཨང་དང་པོར་སླེབས་ཡོད།

“ལོ་8རིང་། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་བློ་ལ་བརྟན་པོར་བཅངས་ནས་འགག་རྩའི་ལག་རྩལ་འགག་སྒྲོལ་བྱེད་པར་མུ་མཐུད་ཤུགས་སྣོན་བརྒྱབ་སྟེ། འཛམ་གླིང་ཐོག་གི་བཅད་ཁ་ཧ་ཅང་ཆེ་བའི་གྲུ་བཞི་ནར་མོའི་འབིགས་འཕྲུལ་བཟོས་པ་ནས་འཛམ་གླིང་ཐོག་གི་རྟ་རྨིག་དབྱིབས་ཀྱི་འབིགས་འཕྲུལ་དང་པོའི་བར་འཛམ་གླིང་ཐོག་འབིགས་འཕྲུལ་ཁྱབ་ཁོངས་ཀྱི་ཟིན་ཐོ་རྒྱུན་ཆད་མེད་པར་གསར་གཏོད་བྱས་ཡོད”ཅེས་ཀྲུང་གོ་ལྕགས་ལམ་བཟོ་སྐྲུན་སྒྲིག་ཆས་ཚོགས་པ་ཚད་ཡོད་ཀུང་སིའི་སྤྱི་ཁྱབ་ཅིང་ལི་གཞོན་པ་ཝང་ཏུའུ་ཅོན་གྱིས་བཤད།

“རྨ་ཆུ་འདི་ཉིད་མི་དམངས་ལ་བདེ་སྐྱིད་བསྐྲུན་པའི་ཆུ་མོར་འགྱུར་བ་བྱེད་དགོས”

རྨ་ཆུ་ནི་ཀྲུང་ཧྭ་མི་རིགས་ཀྱི་མ་ཡུམ་ཆུ་བོ་ཡིན་ཞིང་། རྨ་ཆུའི་རྒྱུག་ཁུལ་གྱི་སྐྱེ་ཁམས་ཁོར་ཡུག་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་ཀྱི་གནད་དོན་དེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐོག་མཐའ་བར་གསུམ་དུ་ཐུགས་ལ་བཅངས་བཞིན་ཡོད།

2014ལོའི་ཟླ་3པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཆེད་མངགས་རྨ་ཆུའི་ལན་ཁའོ་ཡི་ཆུ་རགས་ཤར་མར་རྟོག་ཞིབ་གནང་བར་ཕེབས་ནས། རྨ་ཆུའི་འབྲུབ་ཆུ་སྔོན་འགོག་དང་གྲམ་ཐང་ཁུལ་གྱི་མང་ཚོགས་ཀྱི་ཐོན་སྐྱེད་དང་འཚོ་བའི་གནས་ཚུལ་མཁྱེན་རྟོགས་གནང་བ་རེད།

2019ལོའི་ཟླ་9ཚེས་18ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧོ་ནན་ཀྲེང་ཀྲོའུ་རུ་རྨ་ཆུའི་རྒྱུག་ཁུལ་གྱི་སྐྱེ་ཁམས་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་སྐོར་གྱི་བཞུགས་མོལ་ཚོགས་འདུ་གཙོ་སྐྱོང་གནང་སྟེ། རྨ་ཆུ་རྒྱུག་ཁུལ་གྱི་སྐྱེ་ཁམས་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་གཏོང་བ་ནི་རྒྱལ་ཁབ་ཀྱི་འཐབ་ཇུས་གལ་ཆེན་ཞིག་རེད་ཅེས་གསུངས་པ་རེད། “ས་ཁོངས་ཀྱི་ཁྱད་ཆོས་ལྡན་པའི་སྤུས་ཚད་མཐོ་བའི་འཕེལ་རྒྱས་ཀྱི་ཐབས་ལམ་གསར་པ་འཚོལ་ཞིབ་ཧུར་ཐག་བྱེད་དགོས”དང“རྨ་ཆུ་འདི་ཉིད་མི་དམངས་ལ་བདེ་སྐྱིད་བསྐྲུན་པའི་ཆུ་མོར་འགྱུར་བ་བྱེད་དགོས”ཞེས་ནན་བཤད་གནང་བ་རེད།

སྤྱི་ཁྱབ་ཧྲུའུ་ཅིའི་མཛུབ་སྟོན་གལ་ཆེན་ལ་བརྩི་སྲུང་ཞུས་ནས། ཧོ་ནན་གྱིས་དོན་འཁྱོལ་ཧུར་ཐག་དང་སྐུལ་འདེད་ཏན་ཏིག་བཏང་ཞིང་། ཁོར་ཡུག་སྦགས་བཙོག་ཕྱོགས་བསྡུས་བཅོས་སྐྱོང་བྱེད་པར་དམ་འཛིན་ཧུར་ཐག་བྱས་པས། རྨ་ཆུའི་ཆུ་གཞུང་ཨ་མའི་ཆུའི་སྤུས་ཚད་བརྟན་ལ་ཚད་གཞི་ལོན་པ་དང་རྒྱུན་མཐུད་ལེགས་སུ་ཕྱིན་ཞིང་། རྒྱལ་ཁབ་ཀྱི་ས་ངོས་ཆུའི་དཔྱད་ཞིབ་བཅད་ཁ་སོ་ལྔའི་ཁྲོད་ནས་ཉེར་ལྔ་Ⅲརིགས་ཡན་གྱི་ཆུའི་སྤུས་ཚད་ཀྱི་ཚད་གཞི་ལོན་ཡོད། ཕྱོགས་བསྡུས་རང་བཞིན་གྱི་ཆུ་ལོག་སྔོན་འགོག་དང་གནོད་འཚེ་ཉུང་གཏོང་གི་མ་ལག་འཐུས་སྒོ་ཚང་དུ་བཏང་བ་དང་། ཚད་ལྡན་གྱི་ཆུ་རགས་སྤྱི་ལེ་500བསྐྲུན་པ། རྨ་ཆུའི་གྲམ་ཐང་ཁུལ་གྱི་གྲོང་མི་གནས་སྤོས་ལས་གྲྭའི་བཀོད་སྒྲིག་ཁུལ་35ཚང་མ་བསྐྲུན་ཟིན་པ། མི་ཁྲི་30གནས་སྤོས་བྱེད་པའི་ལས་འགན་སྤྱིར་ན་ལེགས་གྲུབ་ཟིན་ཡོད་པ་རེད། རྨ་ཆུའི་རྒྱུད་ཀྱི་སྐྱེ་ཁམས་བར་ཁྱམས་འཛུགས་སྐྲུན་ལ་སྐུལ་འདེད་བཏང་ནས། སྐྱེ་ཁམས་བར་ཁྱམས་ཀྱི་གཡས་ངོགས་འགྲོ་ལམ་སྤྱིར་ན་ཤར་གཏོང་ཐུབ་པ་དང་གཡོན་ངོགས་འགྲོ་ལམ་སྤྱི་ལེ་489ཤར་གཏོང་ཐུབ་ནས་ངོགས་གཉིས་ཀྱི་བར་ཁྱམས་ལ་ཤིང་འཛུགས་མུའུ་ཁྲི་10.7བྱས་པ་ཡོད་པ་རེད། རྨ་ཆུའི་རིག་གནས་དུས་རབས་ཀྱི་རིན་ཐང་སྔོག་འདོན་བྱས་ནས་རིག་གནས་གནའ་རྫས་རྟོག་ཞིབ་དང་ཞིབ་འཇུག་ལས་དོན་ལ་སྐུལ་འདེད་བཏང་བར་ཚད་བརྒལ་གལ་ཆེན་བྱུང་བ་དང་། རྨ་ཆུའི་རྒྱལ་ཁབ་རིག་གནས་སྤྱི་གླིང་གི་གཙོ་གནད་རྣམ་གྲངས་21ལག་བསྟར་བྱས་པ་ལ་སོགས། ལང་ལོང་དུ་རྒྱུག་པའི་རྨ་ཆུས་སྐྱེ་འགྲོ་ཀུན་ལ་ཕན་བདེ་བསྐྲུན། མི་དམངས་ལ་བདེ་སྐྱིད་བསྐྲུན་པའི་ཆུ་མོ་ཞིག་ལང་ལོང་དུ་རྒྱུག་བཞིན་མཆིས།

ད་ཆ་ཧོ་ནན་དུ་དཔལ་འབྱོར་གྱི་སྤྱི་འབོར་སྒོར་དུང་ཕྱུར་ཁྲི་6ཙམ་ཟིན་ཞིང་། ལོ་བསྟུད་མར་ལོ་ལེགས་བྱུང་བ་དང་སྐྱེ་ཁམས་ཁོར་ཡུག་རྒྱུན་མཐུད་ལེགས་སུ་ཕྱིན་ནས། ཞིང་ཆེན་ཡོངས་ཀྱི་གོང་འོག་ཚང་མས་སེམས་ཤུགས་གཅིག་སྒྲིལ་གྱིས་ཏང་གི་གཟི་བརྗིད་སྲོལ་རྒྱུན་དང་སྤྱོད་ཚུལ་བཟང་པོར་བརྟེན་ནས་ཐོག་མའི་བསམ་འདུན་ལ་ཞུན་བརྡར་དང་། སྟོབས་ཤུགས་གཅིག་སྒྲིལ། འབད་འབུངས་ཡར་བརྩོན་བཅས་བྱས་པས། དུས་རབས་གསར་པའི་ཀྲུང་ཡོན་ས་ཁུལ་གྱིས་འབད་བརྩོན་ལྷོད་མེད་བྱེད་པའི་རྣམ་པ་ཞིག་རིམ་བཞིན་མངོན་བཞིན་ཡོད་པ་རེད།

(ཤིན་ཧྭ་གསར་འགྱུར་ཁང་ཀྲེང་ཀྲོའུ་ནས་འབྱོར་པའི་གློག་འཕྲིན)