ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཅང་ཤིས་སུ་རྟོག་ཞིབ་ཐེངས་གཉིས་གནང་ནས་ཁ་ཕྱོགས་སྟངས་འཛིན་གནང་བ་མ་ཟད། ཅང་ཤིས་ཀྱིས་གསར་བརྗེའི་རྟེན་གཞི་ཁུལ་རྙིང་པའི་སྤུས་ཚད་མཐོ་བའི་འཕེལ་རྒྱས་མགྱོགས་སུ་གཏོང་བའི་ཐད་དཔེ་སྟོན་གྱི་ནུས་པ་འདོན་པ་དང་དབུས་རྒྱུད་ས་ཁུལ་དར་རྒྱས་ལ་སྐུལ་འདེད་གཏོང་བའི་ཐད་དཔའ་ངར་ཆེན་པོས་སྔོན་གཏོད་ལེགས་བརྩོན་བྱེད་པར་ཁྲིད་སྟོན་གནང་བ་རེད།

“གསར་བརྗེའི་རྟེན་གཞི་ཁུལ་རྙིང་པའི་མི་དམངས་བདེ་སྐྱིད་འཚོ་བ་སྐྱེལ་རྒྱུ་ཡོང་བ་བྱེད་དགོས”

2016ལོའི་དཔྱིད་གསར་དུས་ཆེན་གྱི་སྔ་ནུབ་ཏུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཧྲེན་ཧྲན་གྲོང་ཚོར་ཕེབས་ནས་གནད་སྨིན་དབུལ་སྐྱོར་གྱི་གནས་ཚུལ་མཁྱེན་རྟོགས་གནང་ཞིང་། ཕེང་ཞ་དབྱིང་གི་ཁྱིམ་དུ་སྤྱི་ཁྱབ་ཧྲུའུ་ཅིས་ཁང་པ་རེ་རེར་གཟིགས་གནང་བ་དང་ཆབས་ཅིག་བཟའ་ཚང་གཉིས་དང་མཉམ་བཞུགས་གནང་ནས་ཡོང་འབབ་སྐོར་གླེང་གནང་བ་མ་ཟད། ཟས་གོས་སྡོད་སྐྱོད་ལ་ད་དུང་དཀའ་ངལ་དང་དགོས་མཁོ་གང་ཡོད་མེད་བཀའ་འདྲི་ཡང་གནང་བ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དབུལ་སྐྱོར་ལམ་བུའི་ཐོག་དཀའ་ངལ་ཡོད་པའི་ཁྱིམ་ཚང་དང་མང་ཚོགས་དབུལ་པོ་གཅིག་ཀྱང་མི་ལུས་པ་བྱེད་དགོས་ཞེས་གསུངས་པ་རེད།

ལོ་གསུམ་སོང་རྗེས། སྤྱི་ཁྱབ་ཧྲུའུ་ཅི་ཞི་ཅིན་ཕིང་སླར་ཡང་ཅང་ཤིས་སུ་ཕེབས་ཏེ། ཀན་ཀྲོའུ་གྲོང་ཁྱེར་ཡུས་ཏུའུ་རྫོང་ཙི་ཧྲན་གྲོང་རྡལ་ཐན་ཐོའུ་གྲོང་ཚོའི་དམར་དམག་གི་མི་རབས་རྗེས་མ་དང་གྲོང་ཚོའི་རྣམ་པར་གཟིགས་གནང་བ་དང་འབྲེལ། ཙེ་ཧྲན་ཕུའུ་ཤིས་སྔོ་ཚལ་ཐོན་ལས་གླིང་དུ་ཕེབས་ཏེ་སྔོ་ཚལ་ཐོན་ལས་འཕེལ་རྒྱས་ཀྱི་གནས་ཚུལ་མཁྱེན་རྟོགས་གནང་ཞིང་། ཁོང་གིས་ད་ཐེངས་ང་ཅང་ཤིས་སུ་ཡོང་དོན་ནི་གསར་བརྗེའི་རྟེན་གཞི་ཁུལ་རྙིང་པའི་ཡུལ་མི་ཚོར་ལྟ་བར་ཡོང་བ་ཡིན་ལ། ཡུལ་མི་ཚོའི་འཚོ་བ་ལེགས་སུ་ཕྱིན་ཡོད་མེད་དང་གསར་བརྗེའི་རྟེན་གཞི་ཁུལ་རྙིང་པ་དུས་བཀག་ལྟར་དབུལ་སྒྲོལ་དང་དབུལ་ཞྭ་ཕུད་ཡོད་མེད་ལ་ལྟ་བར་ཡོང་བ་ཡིན་ཞེས་ནན་བཤད་གནང་བ་རེད།

“གསར་བརྗེའི་དམག་འཁྲུག་གི་ལོ་རབས་སུ་ཅང་ཤིས་མི་དམངས་ཀྱིས་གསར་བརྗེར་རྒྱལ་ཁ་ལེན་ཆེད་བློས་གཏོང་ཆེན་པོ་བྱས་ཡོད་ལ། ལེགས་སྐྱེས་ཀྱང་ཆེན་པོ་ཕུལ་ཡོད། ད་ཆ་རྒྱལ་ཁབ་འཕེལ་རྒྱས་ཕྱིན་པ་དང་མི་དམངས་ཀྱི་འཚོ་བ་ལེགས་སུ་ཕྱིན་ཡོད། ང་ཚོས་ཆུ་འཐུང་དུས་ཆུ་འགོ་དྲན་པ་བྱས་ནས་གསར་བརྗེའི་སྔོན་བྱོན་པ་དང་གསར་བརྗེའི་སྔོན་གཤེགས་དཔའ་བོ་བརྗེད་མི་རུང་ལ། གསར་བརྗེའི་རྟེན་གཞི་ཁུལ་རྙིང་པའི་ཡུལ་མི་དེ་བས་བརྗེད་མི་རུང” སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“གསར་བརྗེའི་རྟེན་གཞི་ཁུལ་རྙིང་པའི་མི་དམངས་བདེ་སྐྱིད་འཚོ་བ་སྐྱེལ་རྒྱུ་ཡོང་བ་བྱེད་དགོས”ཞེས་གསུངས་པ་རེད།

མཛུབ་སྟོན་བློ་ལ་བརྟན་པོར་བཅངས་ནས་དམངས་ལ་བདེ་སྐྱིད་སྐྲུན། ཅང་ཤིས་ཀྱིས་དབུལ་སྒྲོལ་འགག་སྒྲོལ་དམག་འཐབ་ལ་རྒྱལ་ཁ་ལེན་རྒྱུ་དེ་དམངས་འཚོའི་འདུ་འགོད་ཨང་དང་པོར་བརྩིས་ནས་གནད་སྨིན་ངང་དབུལ་པོ་དབྱེ་འབྱེད་དང་། གནད་སྨིན་ཇུས་བསྟར། གནད་སྨིན་ཕྱིར་འཐེན་བཅས་བྱས་པར་བརྟེན་རྫོང་དབུལ་པོ་25ཡི་དབུལ་ཞྭ་བདེ་བླག་ངང་ཕུད་ནས་གྲོང་གསེབ་དར་རྒྱས་ལ་མུ་མཐུད་སྐུལ་འདེད་བཏང་ཡོད། 2021ལོར་ཞིང་ཆེན་དེ་ཡོངས་ཀྱི་མི་འབོར་དབུལ་པོའི་མི་རེའི་ཆ་སྙོམས་ཡོང་འབབ་ཁེ་གཙང་སྒོར་14391ཟིན་པ་དང་གསར་བརྗེའི་རྟེན་གཞི་ཁུལ་རྙིང་པའི་མང་ཚོགས་རྣམས་ཁོད་སྙོམས་པའི་ལམ་བུའི་ཐོག་བསྐྱོད་པ་དང་། བདེ་འཇཌ་ལྡན་པའི་སྡོད་ཁང་དུ་སྡོད་པ། གཙང་སྦྲ་ལྡན་པའི་གསང་སྤྱོད་སྤྱོད་པ། ཆུ་གཙང་མ་འཐུང་རྒྱུ་ཡོད་པ་བཅས་ཀྱི་རྣམ་པ་བཟང་པོ་མངོན་ཡོད།

“སྤྱི་ཁྱབ་ཧྲུའུ་ཅི་འཚམས་འདྲིར་མ་ཕེབས་གོང་། གྲོང་ཚོའི་མི་རེའི་ཆ་སྙོམས་ལོའི་ཡོང་འབབ་སྒོར་3000ཡང་མི་ཟིན་པ་དང་ཡོང་འབབ་གསོག་ཆེད་གཞོན་ནུ་ཚང་མ་གྲོང་ཚོ་ནས་ཁ་བྲལ་ཡོད། ད་ཆ་མི་རེའི་ཆ་སྙོམས་ལོའི་ཡོང་འབབ་སྒོར་ཁྲི་2.6ཟིན་པ་དང་དུད་ཚང་དབུལ་པོ་21ཚང་མ་དབུལ་སྒྲོལ་ཐུབ་ཡོད་ལ། གཞོན་ནུ་ཚོ་ཡང་ཕ་ཡུལ་དུ་ལོག་ནས་རྒྱུན་སྡོད་མི་འབོར་མི་40ལྷག་ཙམ་ནས་མི་170ལྷག་ཙམ་བར་འཕར་ཡོད” ཅེས་ཧྲེན་ཧྲན་གྲོང་ཚོའི་ཀྲི་པུའུ་ཧྲུའུ་ཅི་ཕེང་ཀྲེང་དབྱང་གིས་བརྗོད།

ཙེ་ཧྲན་ཕུའུ་ཤིས་སྔོ་ཚལ་ཐོན་ལས་གླིང་དང་བར་ཐག་ཉེ་བའི་སར་བསྐྲུན་པའི་ཡུས་ཏུའུ་ཤིས་བཤམས་མཛོད་ཁང་དུ་ཕུའུ་ཤིས་ཀྱི་སྔོ་ཚལ་དང་། འབྲས། ཚ་ལུ་མ་སོགས་ཐོན་རྫས་གང་དགོས་སྒྲིག་བཤོམས་བྱས་ནས་འདུག “ཕུའུ་ཤིས་ཀྱི་ཐོན་ལས་རེ་བའི་ཐོན་ལས་ཤིག་ཏུ་འགྱུར་བཞིན་ཡོད” ཡུས་ཏུའུ་རྫོང་ཕུའུ་ཤིས་ཐོན་ལས་འཕེལ་རྒྱས་ལྟེ་གནས་ཀྱི་ཀྲུའུ་རེན་ལིའུ་ལུའུ་ཧྲེང་གིས་མིག་སྔར་རྫོང་ཡོངས་ཀྱི་མི་ཁྲི་བཞི་ལྔ་ཙམ་གྱིས་ཕུའུ་ཤིས་ཐོན་ལས་གཉེར་གྱི་ཡོད་པ་དང་འདེབས་གསོའི་རྒྱ་ཁྱོན་མུའུ་ཁྲི་15ཟིན་པ་མ་ཟད། ཐོན་རྫས་རིན་ཐང་སྒོར་དུང་ཕྱུར་6ལས་བརྒལ་ཡོད་ཅེས་བརྗོད།

“དཔེ་སྟོན་གྱི་ནུས་པ་འདོན་པ”དང“སྔོན་གཏོད་ལེགས་བརྩོན་བྱེད་དགོས”

གསར་བརྗེའི་རྟེན་གཞི་ཁུལ་རྙིང་པའི་སྤུས་ཚད་མཐོ་བའི་འཕེལ་རྒྱས་ལ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐུགས་ཁུར་ཟབ་མོ་གནང་གི་ཡོད། 2019ལོའི་ཟླ་5ཚེས་22ཉིན་ཅང་ཤིས་ཞིང་ཨུད་དང་ཞིང་ཆེན་སྲིད་གཞུང་གི་ལས་དོན་སྙན་སེང་གསན་སྐབས་སྤྱི་ཁྱབ་ཧྲུའུ་ཅིས་ཅང་ཤིས་ལ“གསར་བརྗེའི་རྟེན་གཞི་ཁུལ་རྙིང་པའི་སྤུས་ཚད་མཐོ་བའི་འཕེལ་རྒྱས་མགྱོགས་སུ་གཏོང་བའི་ཐད་དཔེ་སྟོན་གྱི་ནུས་པ་འདོན་པ་དང་དབུས་རྒྱུད་ས་ཁུལ་དར་རྒྱས་ལ་སྐུལ་འདེད་གཏོང་བའི་ཐད་སྔོན་གཏོད་ལེགས་བརྩོན་བྱེད་དགོས་པའི”བླང་བྱ་བཏོན་གནང་བ་རེད།

“ལག་རྩལ་གསར་གཏོད་ནི་ཁེ་ལས་ཀྱི་སྲོག་རྩ་ལྟ་བུ་ཡིན”ཅང་ཤིས་ཅིན་ལི་ཡུང་ཙེ་ཚན་རྩལ་མ་རྐང་ཚད་ཡོད་ཀུང་སིར་སྐྱོད་སྐབས་ཐོན་སྐྱེད་འཁོར་ཁང་གྲལ་སྟར་སྒྲིག་ལ། ལོ་གསུམ་གོང་གི་དྲོ་སྐྱིད་ལྡན་པའི་རྣམ་པ་དེས་ལས་བཟོ་ཚོས་རྒྱུན་ཆད་མེད་པར་གསར་གཏོད་བྱ་རྒྱུར་སྐུལ་ལྕག་གཏོང་བཞིན་འདུག

2019ལོའི་ཟླ་5ཚེས་20ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀུང་སི་དེར་རྟོག་ཞིབ་གནང་ནས་འཐབ་ཇུས་ཀྱི་གཞི་གནས་ཡིན་པའི་ལག་རྩལ་གསར་གཏོད་ལ་དམ་འཛིན་ནན་པོ་བྱེད་པ་དང་འགག་རྩའི་ལྟེ་བའི་ལག་རྩལ་དེ་བས་མང་བ་ཁོང་དུ་ཆུད་པ་བྱས་ནས་ལས་རིགས་འཕེལ་རྒྱས་ཀྱི་མཐོ་ས་བཟུང་དགོས་ཞེས་ནན་བཤད་གནང་བ་རེད།

“གསར་གཏོད་ཀྱི་རྩ་བ་དམ་པོར་བཟུང་ཐུབ་ན། ཁེ་ལས་ལ་དབྱར་མཚོ་རྒྱས་པ་ལྟར་གྱི་གསོན་ཤུགས་ལྡན་ཐུབ” ཀུང་སིའི་ཏུང་ཧྲི་ཀྲང་གཞོན་པ་ལུའེ་ཧྥུང་གིས། ང་ཚོས་སྤྱི་ཁྱབ་ཧྲུའུ་ཅིའི་མངགས་བཅོལ་བློ་ལ་བརྟན་པོར་བཅངས་ནས། ཀུང་སིས་ནུས་རྒྱུ་གྲོན་ཆུང་དང་ཁོར་ཡུག་སྲུང་སྐྱོང་ཁྱབ་ཁོངས་སུ་ཞིབ་འཇུག་གསར་སྤེལ་བྱེད་ཤུགས་མུ་མཐུད་ཆེ་རུ་བཏང་བ་དང་། ཉེ་བའི་ལོ་གསུམ་ནང་སྔ་རྗེས་སུ་ཞིབ་སྤེལ་མ་དངུལ་སྒོར་དུང་ཕྱུར་3.28བཏང་ནས་སྔོན་ཐོན་ལག་རྩལ་ཁོང་དུ་ཆུད་ཡོད་ལ། ཐོན་སྐྱེད་བྱས་པའི་རླུང་ཤུགས་གློག་གཏོང་དང་། ནུས་གསར་རླངས་འཁོར། ནུས་རྒྱུ་བསྲི་ཚགས་ཀྱི་དྲོད་སྙོམས་འཕྲུལ་ཆས་བཅས་ཁྱབ་ཁོངས་གསུམ་གྱིས་ཁྲོམ་ར་བཟུང་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད་ཅེས་བརྗོད།

“གཙོ་ཁྲིད་ཐོན་ལས་ལ་དམིགས་ནས་གསར་དར་ཐོན་ལས་མགྱོགས་མྱུར་སྐྱེད་སྲིང་དང་སྲོལ་རྒྱུན་ཐོན་ལས་སྒྱུར་བཀོད་རིམ་སྤོར་བྱེད་དགོས” “གྲངས་འཛིན་དཔལ་འབྱོར་འཕེལ་རྒྱས་ཀྱི་གོ་སྐབས་དམ་འཛིན་བྱེད་དགོས” “འབྲི་ཆུའི་དཔལ་འབྱོར་ཁུལ་འཕེལ་རྒྱས་ལ་ཧུར་ཐག་ཞུགས་ནས་འབྲི་ཆུའི་ཟུར་གསུམ་གླིང་དང་གཡོད་ཀང་ཨའོ་བཅས་ཀྱི་ཁུག་ཆེན་ཁུལ་དང་སྦྲེལ་མཐུད་བྱས་ཏེ་སྒོ་དབྱེར་བརྟེན་ནས་འཕེལ་རྒྱས་ཆེན་པོར་སྐུལ་འདེད་གཏོང་དགོས” ཅང་ཤིས་སུ་རྟོག་ཞིབ་ཐེངས་གཉིས་གནང་རིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གྲོང་གསེབ་དང་། ཁེ་ལས། མཐོ་སློབ་བཅས་སུ་ཕེབས་ནས་ཅང་ཤིས་ཀྱི་སྤུས་ཚད་མཐོ་བའི་འཕེལ་རྒྱས་ལ་ཁ་ཕྱོགས་གཏན་འཁེལ་གནང་བ་རེད།

2016ལོའི་ཟླ་2པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་ནན་ཁྲང་སློབ་ཆེན་རྒྱལ་ཁབ་སྭེལ་གཞི་LEDལས་གྲྭའི་ལག་རྩལ་ཞིབ་འཇུག་ལྟེ་གནས་ཚོད་ལྟ་ཁང་དུ་ཕེབས་ནས། ཚོད་ལྟ་ཁང་གི་ཚན་རྩལ་གསར་གཏོད་དང་། ཤེས་ལྡན་པ་གསོ་སྐྱོང་། ཐོན་སློབ་ཞིབ་གསུམ་ཟུང་འབྲེལ་སོགས་ཀྱི་གནས་ཚུལ་མཁྱེན་རྟོགས་གནང་བ་རེད།

ཀྲུང་གོ་ཚན་རིག་ཁང་གི་ཡོན་ཧྲི་ནན་ཁྲང་སློབ་ཆེན་གྱི་སློབ་སྤྱི་གཞོན་པ་ཅང་ཧྥུང་དབྱི་ཡིས། “སྤྱི་ཁྱབ་ཧྲུའུ་ཅི་ཕེབས་པས་ང་ཚོར་སྐུལ་ལྕག་ཆེན་པོ་ཐེབས་བྱུང”ཞེས་དང་། “ང་ཚོས་སྤྱི་ཁྱབ་ཧྲུའུ་ཅིའི་བླང་བྱ་ལྟར་འགག་སྒྲོལ་བྱེད་ཤུགས་མུ་མཐུད་ཆེ་རུ་བཏང་བ་ཡིན། སྤྱི་ཁྱབ་ཧྲུའུ་ཅིས་རྟོག་ཞིབ་གནང་ནས་ཉིན་100ཡང་མ་འགོར་བར་ཚོགས་པས་ཧོང་ཀོང་ལག་རྩལ་ཐད་གྲུབ་འབྲས་གསར་པ་བླངས་ནས་རང་རྒྱལ་གྱི་LEDལག་རྩལ་རྒྱལ་སྤྱི་དང་མཉམ་པ་ནས་རྒྱལ་སྤྱིའི་སྔོན་ཐོན་དུ་སླེབས་པར་སྐུལ་འདེད་བཏང་ཡོད”ཅེས་བརྗོད།

ཀྲུང་གོ་ཤིས་ཐུའུ་ཚོགས་པ་དང་། ཉིང་ཏེ་དུས་རབས། ཀེ་ལི་གློག་ཆས། ཅི་ལི་རླངས་འཁོར་སོགས་ལས་རིགས་མང་པོ་ཅང་ཤིས་སུ་གཞིས་ཆགས་པ་དང་། ཟོག་འབྲེལ་དྲ་བ་དང་། རྟོག་བཟོའི་དོན་དངོས། གྲངས་གཞི་ཆེན་པོ་སོགས་དཔལ་འབྱོར་གསར་པ་མགྱོགས་མྱུར་འཕེལ་རྒྱས་ཕྱིན་ནས་ཞིང་ཆེན་ཡོངས་ཀྱི་གྲངས་འཛིན་དཔལ་འབྱོར་གྱི་གཞི་ཁྱོན་སྒོར་དུང་ཕྱུར་8000ལས་བརྒལ་ཡོད། རྒྱལ་ཁབ་ཀྱི་སྐྱེ་ཁམས་ཤེས་དཔལ་ཚོད་ལྟའི་ཁུལ་སྐྲུན་པར་གྲུབ་འབྲས་མངོན་གསལ་དོད་པོ་ཐོབ་པ་དང་སྒྱུར་བཅོས་ཀྱི་གྲུབ་འབྲས་35རྒྱལ་ཁབ་ཀྱི་ཁྱབ་གདལ་གསལ་ཐོར་བཅུག་ཡོད།

“ལོ་ལྔ་ཚན་བཅུ་གསུམ་པའི”རིང་། རྙོག་འཛིང་དང་ཛ་དྲག་ཆེ་བའི་རྒྱལ་ཁབ་ཕྱི་ནང་གི་ཁོར་ཡུག་ཏུ་ཅང་ཤིས་ཀྱི་དཔལ་འབྱོར་དམིགས་ཚད་གཙོ་བོ་ཐོག་མཐའ་བར་གསུམ་དུ་བརྟན་པོའི་ངང་འཕར་བའི་རྣམ་པ་རྒྱུན་འཁྱོངས་ཐུབ་ཡོད། འདི་ལོའི་དུས་ཚིགས་དང་པོར་ཅང་ཤིས་ཀྱིས་6.9%ཡི་GDPའཕར་ཚད་རྒྱལ་ཡོངས་ཀྱི་ཨང་གཉིས་པར་སླེབས་ཡོད་པ་རེད།

“གསར་བརྗེའི་སྙིང་སྟོབས་རླབས་པོ་ཆེ་མི་ཉམས་པར་བྱེད་དགོས”

ཅང་ཤིས་ནི་གསར་བརྗེའི་རྣམ་པས་ཕྱུག་པའི་ས་ཆ་ཞིག་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་ཅང་ཤིས་སུ་རྟོག་ཞིབ་གནང་རིམ་བཞིན་ཅིང་ཀང་ཧྲན་གསར་བརྗེའི་སྔོན་གཤེགས་དཔའ་བོའི་བང་སོ་དང་། ཟུར་བརྒྱད་ཐོག་ཁང་གི་གསར་བརྗེའི་གནས་རྙིང་། ཀྲུང་དབྱང་དམར་དམག་རྒྱང་སྐྱོད་རྡོག་ཐོན་དྲན་གསོ་ཁང་སོགས་སུ་ཕེབས་ནས་གསར་བརྗེའི་ལོ་རྒྱུས་དང་གསར་བརྗེའི་སྔོན་བྱོན་པར་དྲན་གསོ་ཞུ་ཡི་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བརྩེ་སེམས་ཟབ་མོས“ཅིང་ཀང་ཧྲན་གྱི་སྙིང་སྟོབས་དང་སུའུ་ཝེ་ཨེད་ས་ཁུལ་གྱི་སྙིང་སྟོབས་ལས་ཀྲུང་གོ་གུང་ཁྲན་ཏང་མིའི་ཐོག་མའི་བསམ་འདུན་དང་འགན་འཁྲི་མངོན་པ་མ་ཟད། ཀྲུང་གོ་གུང་ཁྲན་ཏང་གི་གསར་བརྗེའི་སྙིང་སྟོབས་རླབས་ཆེན་བཏོད་ཡོད། གསར་བརྗེའི་སྙིང་སྟོབས་རླབས་ཆེན་དེ་དག་ནི་ཡུལ་དུས་ལས་བརྒལ་ཞིང་ནམ་ཡང་ཉམས་པ་མེད་པས། ང་ཚོས་ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་འཆང་བའི་འཛད་མཐའ་མེད་པའི་བསམ་པའི་སྟོབས་ཤུགས་ཤིག་རེད”ཅེས་གསུངས་པ་རེད།

“རྒྱ་ཆེའི་ཏང་ཡོན་དང་ལས་བྱེད་པར་བསམ་བློའི་ཐད་གཞི་སྒྱུར་རྩ་སྒྱུར་དང་རྩ་བ་དང་བླ་སྲོག་བརྟན་པོ་སྲུང་བར་སློབ་གསོ་ཁྲིད་སྟོན་བྱེད་དགོས” “ལྷག་བསམ་རྣམ་དག་དང་། སྤྱོད་གཙང་། འགན་འཁུར་བཅས་ཀྱི་ཆབ་སྲིད་ཀྱི་གཤིས་རྒྱུད་ཞུན་བརྡར་བྱས་ནས་མི་དམངས་ཀྱི་ཞབས་ཞུ་བ་ཡག་པོ་ཞིག་བྱེད་དགོས” “ལས་དོན་སྒྲུབ་སྐབས་སྔོན་ལ་བསམ་བློ་གཏོང་བ་དང་ཏན་ཏིག་སྒྲུབ་དགོས”སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཅང་ཤིས་སུ་རྟོག་ཞིབ་གནང་སྐབས་དང་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པའི་ཅང་ཤིས་འཐུས་མི་ཚོགས་པའི་གྲོས་ཞིབ་ལ་ཞུགས་སྐབས་ལས་བྱེད་པའི་སྤྱོད་ཚུལ་འཛུགས་སྐྱོང་ལ་ཤུགས་སྣོན་རྒྱག་པར་བླང་བྱ་ཐེངས་མང་བཏོན་གནང་བ་རེད།

སྤྱི་ཁྱབ་ཧྲུའུ་ཅིའི་བླང་བྱ་བློ་ལ་བརྟན་པོར་བཅངས་ནས་ཅང་ཤིས་ཀྱིས་ལས་བྱེད་པའི་གསར་གཏོད་ལས་གཏོད་ལ་བརྟེན་ནས་སྤྱི་ཚོགས་ཡོངས་ཀྱི་གསར་གཏོད་ལས་གཏོད་ཀྱི་གསོན་ཤུགས་འཕེལ་བར་བྱས་ཤིང། “སྔོན་མ་སུའུ་ཝེ་ཨེད་ས་ཁུལ་གྱི་ལས་བྱེད་པས་མཚན་མོ་བཞུ་མར་ཁྱེར་ནས་ཞིང་པ་དབུལ་པོར་ལྟ་བར་འགྲོ་ཡི་ཡོད། ད་ཆ་ང་ཚོས་གསར་བརྗེའི་ས་བོན་རྒྱུན་འཛིན་བྱས་ནས་ན་གཞོན་ལས་བྱེད་པ་ཁེ་ལས་སུ་གནས་སྦྱར་ལ་བཏང་སྟེ། ཁོ་ཚོས་བཟོ་པ་ཚོ་དང་མཉམ་དུ་ལས་ཡུལ་དུ་ལས་ཀ་བྱེད་པ་དང་ཁེ་ལས་ལ་ཞབས་འདེགས་ཞུ་རིང་སྤྱོད་ཚུལ་ཞུན་བརྡར་ཐུབ་པ་དང་ལས་སྒོ་འཕེལ་ཐུབ་པར་བྱེད་ཀྱི་ཡོད”ཅེས་ཡུས་ཏུའུ་རྫོང་ཨུད་ཀྱི་ཧྲུའུ་ཅི་ཧོང་ཧྥ་ཡིས་བརྗོད།

འབྱུང་འགྱུར་ལ་ཕྱོགས་ནས་ཅང་ཤིས་ཀྱི་བུ་ཕྲུག་ཁྲི་4500ལྷག་ཙམ་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་བློ་ལ་བརྟན་པོར་བཅངས་ནས“དཔེ་སྟོན་གྱི་ནུས་པ་འདོན་པ”དང“སྔོན་གཏོད་ལེགས་བརྩོན་ཕོད་པ”བྱས་ཏེ་དངོས་འཛིན་དངོས་སྒྲུབ་ཀྱི་འབད་འཐབ་སྙིང་སྟོབས་ལ་བརྟེན་ནས་དུས་རབས་ཀྱི་གཟི་བརྗིད་གསར་པ་གཏོད་བཞིན་མཆིས།

(ཤིན་ཧྭ་གསར་འགྱུར་ཁང་ནན་ཁྲང་ནས་འབྱོར་བའི་གློག་འཕྲིན)