ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཧྥུའུ་ཅན་དུ་རྟོག་ཞིབ་གནང་བར་ཐེངས་གཉིས་ཕེབས་པ་དང་འབྲེལ་མཛུབ་སྟོན་གལ་ཆེན་ཡང་གནང་ཡོད། སྤྱི་ཁྱབ་ཧྲུའུ་ཅིས་བཀོད་གནང་བའི་འཕེལ་རྒྱས་ཀྱི་འཆར་གཞི་དོན་འཁྱོལ་བྱས་ཏེ་ཧྥུའུ་ཅན་མི་དམངས་ཀྱིས་མུ་མཐུད་འབད་འཐབ་ཀྱིས་རྒྱང་་ལམ་གསར་པར་བསྐྱོད་ནས་བརྗིད་ཆེའི་ལེའུ་གསར་པ་བརྩམས་ཡོད།

“གྲོང་གསེབ་དར་རྒྱས་གཏོང་དགོས། ཡུལ་བབ་དང་བསྟུན་ནས་དམངས་ཕྱུག་ཐོན་ལས་གདམ་རྒྱུ་ནི་འགག་རྩ་ཡིན”

2021ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྲ་རྫོང་དུ་རྟོག་ཞིབ་གནང་སྐབས། ཧྲ་རྫོང་གི་མི་རྣམས་ས་ཕྱོགས་གང་སར་བསྐྱོད་པས། ཧྲ་རྫོང་གི་སིལ་ཟས་དམངས་ཕྱུག་ཁྱད་ལྡན་ཐོན་ལས་སུ་གྱུར་ཡོད། “གྲོང་གསེབ་དར་རྒྱས་གཏོང་དགོས། ཡུལ་བབ་དང་བསྟུན་ནས་དམངས་ཕྱུག་ཐོན་ལས་གདམ་རྒྱུ་ནི་འགག་རྩ་ཡིན”ཞེས་གསུངས་པ་རེད།

ད་ཆ་ཧྥུའུ་ཅན་གྱི་ཞིམ་ཟས་དབུས་རྒྱུད་རི་ཁུལ་ནས་ཐོན་ཏེ། འཁོར་ཁང་ཆུང་ཆུང་ནས་བཟོ་གྲྭ་ཆེན་པོའི་བར་དང་། མུ་འབྲེལ་གཉེར་སྐྱོང་ནས་ཕྱི་རྒྱལ་དུ་ཕྱིར་གཏོང་བྱས་ཏེ་ཞིང་ཕྱུག་ཐོན་ལས་ཆེན་པོ་ཞིག་ཏུ་འཕེལ་རྒྱས་ཕྱིན་ཡོད། 2021ལོར་ཧྲ་རྫོང་གི་སིལ་ཟས་ཀྱི་ལོའི་ཡོང་འབབ་སྒོར་དུང་ཕྱུར་500ལྷག་ཙམ་ཟིན་པ་དང་མི་ཁྲི་30ལྷག་ཙམ་ལས་ཞུགས་ཐུབ་པར་སྐུལ་ཁྲིད་བྱས་ཡོད།

ཇ་ལོ་ནི་ཧྥུའུ་ཅན་བྱང་རྒྱུད་ཀྱི་ཝུའུ་དབྱི་ཧྲན་པས་མི་རབས་ནས་མི་རབས་བར་རྒྱུན་འཛིན་བྱེད་པའི་ཐོན་ལས་ཤིག་ཡིན་ལ། ས་གནས་དེ་གའི་གྲོང་གསེབ་དར་རྒྱས་གཏོང་བའི་ཀ་རྟེན་ལྟ་བུའི་ཐོན་ལས་ཤིག་ཀྱང་རེད། 2021ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྥུའུ་ཅན་དུ་རྟོག་ཞིབ་གནང་སྐབས། ཡུལ་མི་ཚོར“ཇའི་རིག་གནས་དང་། ཇའི་ཐོན་ལས། ཇའི་ཚན་རྩལ་བཅས་ཀྱི་ལས་དོན་ཡག་པོ་སྒྲུབ་པར་སྤྱི་འདོམས་བྱེད་དགོས”ཞེས་མངགས་བཅོལ་གནང་བ་རེད།

ཧྥུའུ་ཅན་ཞིང་ནགས་སློབ་ཆེན་གྱི་དགེ་རྒན་ཆེ་མོ་བ་ལེའོ་ཧུང་གིས་ཇའི་ཐོན་ལས་ལ་མདུན་ལམ་ཆེན་པོ་ཡོད་ཅེས་བརྗོད། 2021ལོའི་ཟླ་8པར་ཝུའུ་དབྱི་ཧྲན་དུ་ས་ཁོངས་ཧྲིལ་པོའི་སྐྱེ་ཁམས་ཇ་ཤིང་ར་བ་བསྐྲུན་པ་དང་ལོ་མཇུག་ཏུ་གཞི་ཁྱོན་མུའུ་ཁྲི་4.5ཟིན་ཡོད། ཇའི་ཐོན་ལས་ཀྱི་ཐོན་རྫས་རིན་ཐང་སྒོར་དུང་ཕྱུར་120ཟིན་པ་དེ་དུས་མཚུངས་ལས་9.3%འཕར་ཡོད་པ་རེད།

མིག་སྔར་ཧྥུའུ་ཅན་གྱིས་ཁྱད་ལྡན་ལེགས་ཆའི་ཐོན་ལས་སྐྱེད་སྲིང་བྱེད་མགྱོགས་སུ་བཏང་ཞིང་། “ལོ་ལྔ་ཚན་བཅུ་བཞི་པའི”རིང་། ཧྥུའུ་ཅན་གྱིས་གཙོ་གནད་ལེགས་ཆའི་ཁྱད་ལྡན་ཐོན་ལས་ཚོགས་པ་20འཛུགས་རྒྱུ་མ་ཟད། ཞིང་ལས་ཐོན་ལས་ཀྱི་སྟོབས་ཆེའི་གྲོང་རྡལ་100དང“གྲོང་ཚོ་རེར་སྤུས་རྟགས་རེའི”ཆེད་ལས་གྲོང་ཚོ་2000བསྐྲུན་ནས་ཁྱད་ལྡན་དེང་རབས་ཞིང་ལས་འཕེལ་རྒྱས་ཀྱི་རྣམ་པ་གཏོད་རྒྱུ་རེད། གསར་བརྗེའི་རྟེན་གཞི་ཁུལ་རྙིང་པ་མང་བའི་གནས་ཚུལ་ལ་དམིགས་ཏེ། ཧྥུའུ་ཅན་གྱིས་ཁྲང་ཏིང་གཙང་པོའི་སྦལ་པ་དང་ཅན་ཉིང་གི་པད་འབྲུ་སོགས་ཧྥུའུ་ཅན་ནུབ་རྒྱུད་ཀྱི་ཁྱད་ལྡན་ཞིང་ལས་སྤུས་རྟགས་རྒྱ་སྟོབས་ཆེ་རུ་བཏང་བ་རེད།

“སྤུས་ཚད་མཐོ་བའི་འཕེལ་རྒྱས་ལ་ཕྱོཌ་ཡོངས་ནས་སྐུལ་འདེད་གཏོང་བའི་ཐད་གྲུབ་འབྲས་གསར་པ་ཐོབ་པ་བྱེད་དགོས”

“2014ལོའི་ཟླ་11པར་སྤྱི་ཁྱབ་ཧྲུའུ་ཅིས་རྟོག་ཞིབ་གནང་སྐབས་ང་ཚོར་ཚན་རྩལ་གསར་གཏོད་དང་གྲུབ་འབྲས་མགྱོགས་མྱུར་ཐོན་ལས་ཅན་དུ་འགྱུར་བར་དམ་འཛིན་ནན་པོ་བྱས་ནས་ཐོན་ལས་འཕེལ་རྒྱས་ཀྱི་ལག་རྩལ་གསར་པ་དང་རྒྱལ་སྤྱིའི་ཁྲོམ་ར་བཟུང་བར་དམ་འཛིན་ནན་པོ་བྱེད་དགོས་པའི་ལྕག་སྐུལ་གནང་བྱུང”ཧྥུའུ་ཅན་ཤིན་ཏ་ལུའུ་ཚན་རྩལ་ཚོགས་པ་ཚད་ཡོད་ཀུང་སིའི་དབུ་བཞུགས་ལག་བསྟར་དཔོན་ཝང་ཅིང་གིས། ཉེ་བའི་ལོ་བརྒྱད་རིང་ཀུང་སིས་གྲངས་འཛིན་ཅན་གསར་གཏོད་ཀྱི་གོམ་སྟབས་མགྱོགས་སུ་བཏང་བར་བརྟེན། ད་ཆ་རྒྱལ་ཁབ་དང་ས་ཁུལ་100ལྷག་ཙམ་ལ་ལས་སྒོ་ཁྱབ་ཡོད་ཅེས་བརྗོད།

མིག་སྔར། གྲངས་འཛིན་ཧྥུའུ་ཅན་བསྐྲུན་རྒྱུ་དེ་དཔལ་འབྱོར་དང་། ཆབ་སྲིད། རིག་གནས། སྤྱི་ཚོགས། སྐྱེ་ཁམས་སོགས་ཕྱོགས་ཁག་ཏུ་ཁྱབ་ཅིང་། 2021ལོར་ཞིང་ཆེན་ཡོངས་ཀྱི་གྲངས་འཛིན་དཔལ་འབྱོར་གྱི་འཕར་ཐང་སྒོར་དུང་ཕྱུར་ཁྲི་2.3ཟིན་པ་དེས་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་བསྡུར་ཚད་ཀྱི་47%ཙམ་བཟུང་བ་དང་། སྲིད་དོན་ཞབས་ཞུའི་ལས་དོན་དྲ་ཐོག་ནས་གཉེར་བའི་བསྡུར་ཚད་80%ལས་བརྒལ་བ་དང་ཕྱིར་སྐྱོད་མི་དགོས་པར་གཉེར་བའི་བསྡུར་གྲངས་90%ལས་བརྒལ་ཡོད། 5Gསྦྲེལ་ཚུགས་ཀྱང་རྫོང་ཁོངས་ས་ཁུལ་དང་། ཤང་དང་གྲོང་རྡལ། ས་ཁུལ་བཅས་95%ཡན་ལ་ཁྱབ་ཡོད་པ་རེད།

2021ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྥུའུ་ཅན་དུ་རྟོག་ཞིབ་གནང་སྐབས། “སྤུས་ཚད་མཐོ་བའི་འཕེལ་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བའི་ཐད་ཧྥུའུ་ཅན་ལ་གྲུབ་འབྲས་གསར་པ་ཐོབ་པའི་རེ་བ་ཡོད”ཅེས་གསུངས་པ་རེད། དབྱར་མཚོ་རྒྱས་པ་ལྟར་འཕེལ་རྒྱས་འགྲོ་བའི་གྲངས་འཛིན་དཔལ་འབྱོར་ནི་ཧྥུའུ་ཅན་གྱིས་སྤྱི་ཁྱབ་ཧྲུའུ་ཅིའི་མཛུབ་སྟོན་གལ་ཆེན་གྱི་དགོངས་དོན་དོན་འཁྱོལ་བྱས་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བའི་བསྡུས་རིས་ཤིག་རེད།

“སྤུས་ཚད་མཐོ་བའི་འཚོ་བ་གཏོད་པར་ཚད་བརྒལ་དེ་བས་ཆེ་བ་ཡོང་བ་བྱེད་དགོས”

2021ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྥུའུ་ཅན་སན་མིང་གྲོང་ཁྱེར་དུ་རྟོག་ཞིབ་གནང་སྐབས“དེང་རབས་ཅན་གྱི་དམིགས་ཚད་གལ་ཆེ་ཤོས་ནི་མི་དམངས་བདེ་ཐང་ཡོང་བ་བྱེད་རྒྱུ་དེ་ཡིན། དེ་ནི་མི་དམངས་ཀྱི་བདེ་སྐྱིད་ལྡན་པའི་འཚོ་བའི་རྨང་གཞི་རེད”ཅེས་ནན་བཤད་གནང་བ་རེད།

2021ལོའི་ཟླ་10པར་སན་མིང་གྲོང་ཁྱེར་གྱིས་དམངས་ཡོངས་ཀྱི་བདེ་ཐང་དོ་དམ་སྲུང་སྐྱོང་མ་ལག་འཐུས་སྒོ་ཚང་དུ་གཏོང་བའི་འདུ་འགོད་དང་གཞུང་བཙུགས་སྨན་བཅོས་ཀྱི་སྒྲིག་གཞིའི་གླ་ཕོགས་ལམ་ལུགས་འཐུས་སྒོ་ཚང་དུ་གཏོང་བའི་འདུ་འགོད་སོགས“འདུ་འགོད་ཆེན་པོ་དྲུག”ལག་བསྟར་བྱས་པ་སྟེ། གྲོང་ཁྱེར་ཡོངས་ཀྱི་གཞུང་བཙུགས་སྨན་ཁང་གི་སྨན་བཅོས་ཀྱི་སྤྱིའི་ཡོང་འབབ་འཕར་ཚད་9%ནང་ཚུན་དུ་ཚོད་འཛིན་བྱས་པ་དང་། གཞི་རིམ་གྱི་སྨན་བཅོས་འཕྲོད་བསྟེན་སྒྲིག་གཞིས་སྨན་བཅོས་བྱས་པའི་བསྡུར་གྲངས་65%ཡན་ཟིན་པ། མང་ཚོགས་མི་སྒེར་གྱི་འཕྲོད་བསྟེན་གཏོང་སྒོའི་བསྡུར་གྲངས་དང་རང་བརྟེན་གཏོང་སྤྲོད་བསྡུར་གྲངས་སྔར་བས་ཆག་པ་སོགས་འདི་ལོའི་ཟླ་2པར་སན་མིང་གྲོང་ཁྱེར་རྒྱལ་ཡོངས་ཀྱི་སྨན་བཅོས་སྒྱུར་བཅོས་ཟབ་གཏོང་གི་ཉམས་མྱོང་ཁྱབ་གདལ་གཏོང་བའི་རྟེན་གཞི་ཐོག་མར་གྱུར་ཡོད་པ་རེད།

“ན་ནིང་ཟླ་གསུམ་པར་སྤྱི་ཁྱབ་ཧྲུའུ་ཅིས་རྟོག་ཞིབ་གནང་སྐབས‘ཝུའུ་དབྱི་ཧྲན་དུ་འགྲན་ཟླ་བྲལ་བའི་སྐྱེ་ཁམས་ཀྱི་མི་ཆོས་རིག་གནས་ཐོན་ཁུངས་ཡོད། དེ་ནི་ཀྲུང་ཧྭ་མི་རིགས་ཀྱི་སྤོབས་པ་ཡིན། གལ་ཆེ་ཤོས་ནི་སྲུང་སྐྱོང་ཡག་པོ་བྱེད་དགོས’ཞེས་ང་ཚོར་མངགས་བཅོལ་ཟབ་མོ་གནང་བྱུང་། ན་ནིང་ང་ཚོས་རིག་ལྡན་དོ་དམ་ལས་སྟེགས་རིམ་སྤོར་དང་འཐུས་སྒོ་ཚང་དུ་གཏོང་བ་དང་སྐྱེ་དངོས་ཐོན་ཁུངས་ཀྱི་རྨང་གཞིར་བརྟག་དཔྱད་བྱེད་པ་སོགས་རྣམ་གྲངས་མང་པོ་ལག་བསྟར་བྱས་ཡོད”ཅེས་ཝུའུ་དབྱི་ཧྲན་རྒྱལ་ཁབ་སྤྱི་གླིང་དོ་དམ་ཅུས་ཀྱི་ལས་དོན་མི་སྣ་ཧྥན་ཀྲི་ཝུའེ་ཡིས་བརྗོད།

རྒྱལ་ཁབ་ཀྱི་སྐྱེ་ཁམས་ཤེས་དཔལ་ཚོད་ལྟའི་ཁུལ་ཐོག་མ་ཡིན་པའི་ཧྥུའུ་ཅན་དུ་ནགས་ཚལ་ཁྱབ་ཚད་ལོ་43བསྟུད་མར་རྒྱལ་ཡོངས་ཀྱི་ཨང་དང་པོར་སླེབས་པ་དང་། ས་ཆུ་ཤོར་ཚད་7.5%བར་ཆག་པ་དང་ནན་ཕིང་སོགས་ས་ཆ་5ཡི་ས་ཁུལ་གྱི་ཐོན་སྐྱེད་བསྡོམས་འབོར་གྱི་དཔྱད་ཞིབ་མེད་པ་བཟོས་ཡོད། 2021ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྥུའུ་ཅན་དུ་རྟོག་ཞིབ་གནང་སྐབས། ཚང་མར“མུ་མཐུད་འབད་བརྩོན་བྱས་ཏེ་རི་སྔོ་ཆུ་དྭངས་ནམ་ཡང་ཧྥུའུ་ཅན་གྱི་སྤོབས་པར་འགྱུར་བ་བྱེད་དགོས”ཞེས་ལྕག་སྐུལ་གནང་བ་རེད།

སྐྱེ་ཁམས་ཀྱི་མཛེས་སྡུག་ལོངས་སུ་སྤྱོད། རིག་གནས་ཀྱི་ངོ་མཚར་ཉམས་ལེན་བྱེད། 2021ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྥུའུ་ཅན་དུ་རྟོག་ཞིབ་གནང་སྐབས“སྤུས་ཚད་མཐོ་བའི་འཚོ་བ་གཏོད་པའི་ཐད་ཚད་བརྒལ་དེ་བས་ཆེ་བ་ཡོང་བ་བྱེད་དགོས”ཞེས་ནན་བཤད་གནང་བ་རེད།

“ལི་ཧྥང་ལུགས་ཀྱི་འགྱུར་རྡོ་གསོན་པོ”ཞེས་གྲགས་པའི་ཧྥུའུ་ཀྲོའུ་སན་ཧྥང་སྲང་ལམ་བདུན་ནི་བློ་མཐུན་ཞི་ཅིན་ཕིང་གི་སྲུང་སྐྱོང་འོག་བཤིག་སྤོ་བྱེད་དགོས་བྱུང་མེད། 2021ལོའི་ཟླ་3པར་སྤྱི་ཁྱབ་ཧྲུའུ་ཅི་སྲང་ལམ་འདིར་ཕེབས་ནས“སྲོལ་རྒྱུན་གྱི་ཁྲོམ་གཞུང་སྲུང་སྐྱོང་ཡག་པོ་དང་། གནའ་བོའི་སྐྲུན་དངོས་སྲུང་སྐྱོང་ཡག་པོ། རིག་དངོས་སྲུང་སྐྱོང་ཡག་པོ་བཅས་བྱེད་པ་ནི་གྲོང་ཁྱེར་གྱི་ལོ་རྒྱུས་དང་རིག་གནས་ཀྱི་འབྱུང་རྩ་ཉར་ཚགས་བྱས་པ་ཞིག་རེད”ཅེས་སླར་ཡང་མངགས་བཅོལ་གནང་བ་རེད།

2017ལོའི་ཟླ་7པར་ཞ་མོན་གྱི་ཀུའུ་ལང་ཡུས《འཛམ་གླིང་ཤུལ་བཞག་གི་མིང་གཞུང》ནང་བཅུག་ནས་ཡུན་རིང་མ་སོང་བར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཛུབ་སྟོན་གལ་ཆེན་གནང་ཞིང་། ཁོང་གིས“འཛམ་གླིང་ཤུལ་བཞག་ལ་རེ་ཞུ་བྱེད་པ་ནི་སྲུང་སྐྱོང་དང་བེད་སྤྱོད་དེ་བས་ལེགས་པ་བྱེད་ཆེད་རེད”ཅེས་གསུངས་པ་རེད། 2021ལོའི་ཟླ་7པར་སྤྱི་ཁྱབ་ཧྲུའུ་ཅིས་འཛམ་གླིང་ཤུལ་བཞག་ཚོགས་ཆེན་སྐབས་44པར་རྟེན་འབྲེལ་འཕྲིན་ཡིག་སྤྲིངས་ནས“རྩ་ཆེའི་རྒྱུ་ནོར་དེ་དག་སྲུང་སྐྱོང་ཡག་པོ་དང་། རྒྱུན་འཛིན་ཡག་པོ། བེད་སྤྱོད་ཡག་པོ་བཅས་བྱེད་རྒྱུ་ནི་ང་ཚོའི་ཐུན་མོང་གི་འགན་འཁྲི་རེད”ཅེས་གསུངས་པ་རེད། སྐབས་འདིའི་ཚོགས་ཆེན་ཐོག“སུང་རྒྱལ་རབས་དང་ཡོན་རྒྱལ་རབས་ཀྱི་ཀྲུང་གོའི་འཛམ་གླིང་རྒྱ་མཚོའི་ཚོང་དོན་ལྟེ་གནས་ཡིན་པའི་ཆོན་ཀྲོའུ”ཀྲུང་གོའི་འཛམ་གླིང་ཤུལ་བཞག་ཨང་56པར་དངོས་སུ་གྱུར་པ་རེད།

མིག་སྔར་གྲོང་ཁྱེར་གཉིས་སྲུང་སྐྱོང་ཁྲོད་སྔར་བཞིན་སྐྱེ་སྟོབས་ཀྱི་དཔལ་འབར་བཞིན་ཡོད། ཞ་མོན་གྱིས་གྲོང་ཁྱེར་གྱི་བཀོད་པ་དང་། ལོ་རྒྱུས་ཀྱི་སྐྲུན་དངོས་དང་སྡོད་ཁང་། མཛེས་ལྗོངས་ཁོར་ཡུག སྡེ་ཁུལ་གྱི་རིག་གནས་སྲོལ་རྒྱུན་སོགས་ནུས་ཤུགས་ཡོད་རྒུས་སྲུང་སྐྱོང་བྱས་ཡོད། ཆོན་ཀྲོའུ་རུ“ཆོན་ཀྲོའུ་ཡི་འཛམ་གླིང་ཤུལ་བཞག་ཉིན་མོ”གཏན་འཁེལ་བྱས་ནས། ཀྲུང་ཧྭའི་རྒྱ་མཚོའི་ཤེས་དཔལ་རྒྱུན་འཛིན་བྱས་ཏེ་འཛམ་གླིང་ཤུལ་བཞག་སྲུང་སྐྱོང་གི་དཔེ་མཚོན་གྲོང་ཁྱེར་དུ་གྱུར་ཡོད།

(ཤིན་ཧྭ་གསར་འགྱུར་ཁང་ཧྥུའུ་ཀྲོའུ་ནས་ཟླ་6ཚེས་6ཉིན་འབྱོར་བའི་གློག་འཕྲིན)